« ថ្ងៃទី ១៦–២២ ខែ មីនា ។ យ៉ាកុប ៥–៧ ៖ ‹ ព្រះអម្ចាស់ធ្វើកិច្ចការជាមួយនឹងពួកយើង › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១៦–២២ ខែ មីនា ។ យ៉ាកុប ៥–៧ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
ថ្ងៃទី ១៦–២២ ខែ មីនា
យ៉ាកុប ៥–៧
ព្រះអម្ចាស់ធ្វើការជាមួយនឹងយើង
ការអានព្រះគម្ពីរអញ្ជើញឲ្យមានវិវរណៈ ។ ដូច្នេះនៅពេលបងប្អូនអាន យ៉ាកុប ៥–៧ សូមស្វែងរកការណែនាំមកពីព្រះវិញ្ញាណដើម្បីជួយបងប្អូន និងគ្រួសារបងប្អូន ។ តើព្រះអម្ចាស់មានសារលិខិតអ្វីខ្លះសម្រាប់បងប្អូន ?
កត់ត្រាចំណាប់អារម្មណ៍របស់បងប្អូន
មានមនុស្សជាច្រើនសន្ធឹក ដែលពុំទាន់បានឮអំពីដំណឹងល្អនៃព្រះយេស៊ូវគ្រីស្ទ ។ បើសិនជាបងប្អូនមានអារម្មណ៍លើសលប់ដោយភាពធំសម្បើមនៃកិច្ចការនៃការប្រមូលផ្ដុំពួកគេមកក្នុងសាសនាចក្រនៃព្រះអម្ចាស់ នោះរឿងរូបាធិដ្ឋាននៃដើមអូលីវនៅក្នុង យ៉ាកុប ៥ មានការរំឭកអះអាងមួយថា ៖ ចម្ការទំពាំងបាយជូរជាកម្មសិទ្ធិរបស់ព្រះអម្ចាស់ ។ ទ្រង់បានប្រទានដល់ពួកយើងម្នាក់ៗនូវតំបន់តូចមួយដើម្បីជួយនៅក្នុងកិច្ចការរបស់ទ្រង់ —ជាគ្រួសារយើង រង្វង់មិត្តភក្ដិរបស់យើង ដែនឥទ្ធិពលរបស់យើង ។ ហើយពេលខ្លះមនុស្សដំបូងគេដែលយើងជួយប្រមូលផ្ដុំ គឺជាខ្លួនយើងផ្ទាល់ ។ ប៉ុន្តែយើងពុំធ្វើតែឯងនៅក្នុងកិច្ចការនេះទេ ដ្បិតព្រះអម្ចាស់នៃចម្ការទំពាំងបាយជូធ្វើការព្រមជាមួយនឹងពួកអ្នកបម្រើរបស់ទ្រង់ ( សូមមើល យ៉ាកុប ៥:៧២ ) ។ ព្រះស្គាល់ ហើយស្រឡាញ់បុត្រាបុត្រីរបស់ទ្រង់ ហើយទ្រង់នឹងរៀបចំផ្លូវមួយសម្រាប់ពួកគេម្នាក់ៗស្ដាប់ឮដំណឹងល្អរបស់ទ្រង់ ទោះជាមនុស្សដែលបដិសេធទ្រង់កាលពីអតីតកាលក្ដី ( សូមមើល យ៉ាកុប ៤:១៥–១៨ ) ។ បន្ទាប់មក នៅពេលកិច្ចការធ្វើបានចប់សព្វគ្រប់ហើយ នោះមនុស្សទាំងអស់ដែលបាន « ធ្វើការយ៉ាងព្យាយាមជាមួយនឹង [ ទ្រង់ ]…នឹងមានអំណរជាមួយនឹង [ ទ្រង់ ] ដោយសារតែផ្លែឈើនៃចម្ការរបស់ [ ទ្រង់ ] » ( យ៉ាកុប ៥:៧៥ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
តើរូបាធិដ្ឋានគឺជាអ្វី ?
រូបាធិដ្ឋានគឺជារឿងទាំងឡាយដែលបង្រៀនអំពីសេចក្ដីពិតខាងវិញ្ញាណតាមរយៈនិមិត្តរូប ។ នៅក្នុងរូបាធិដ្ឋាននៃដើមអូលីវ ជាឧទាហរណ៍ ចម្ការតំណាងឲ្យលោកិយ មែកនៃដើមអូលីវតំណាងឲ្យពួកសាសន៍អ៊ីស្រាអែល ( អ្នកដែលបានធ្វើសេចក្ដីសញ្ញាជាមួយនឹងព្រះ ) និងដើមអូលីវព្រៃ តំណាងឲ្យជាតិសាសន៍ដទៃ ( អ្នកដែលពុំបានធ្វើសេចក្ដីសញ្ញាជាមួយនឹងព្រះ ) ។
នៅពេលបងប្អូនសិក្សារូបាធិដ្ឋាននៅក្នុង យ៉ាកុប ៥ សូមរកមើលនិមិត្តរូបបន្ថែម ហើយពិចារណាអំពីអត្ថន័យរបស់វា ។ ឧទាហរណ៍ តើបងប្អូនគិតថាផ្លែល្អតំណាងឲ្យអ្វី ? តើផ្លែអាក្រក់តំណាងឲ្យអ្វី ?
ព្រះយេស៊ូវគ្រីស្ទគឺជាម្ចាស់ចម្ការ ។
ពីមុនបងប្អូនចាប់ផ្ដើមការសិក្សារបស់បងប្អូនអំពីរូបាធិដ្ឋាននៃដើមអូលីវនៅក្នុង យ៉ាកុប ៥ វាអាចនឹងជាជំនួយបើមើល យ៉ាកុប ៤:១០–១៨ ដើម្បីរៀនពីមូលហេតុដែលយ៉ាកុបមានអារម្មណ៍បំផុសគំនិតឲ្យចែកចាយរូបាធិដ្ឋាននេះជាមួយនឹងប្រជាជនគាត់ ។ នៅក្នុង យ៉ាកុប ៦:៣–៥ បងប្អូនអាចស្វែងរកសារលិខិតបន្ថែមមួយចំនួនដែលយ៉ាកុបចង់គូសបញ្ជាក់ សូមមើលសារលិខិតទាំងនេះនៅក្នុងរូបាធិដ្ឋាន ។ តើមានសារលិខិតអ្វីខ្លះដែលបងប្អូនរកឃើញសម្រាប់ខ្លួនឯងនៅក្នុង យ៉ាកុប ៥ ?
យ៉ាកុប ៥ គឺជាជំពូកមួយដ៏វែង—ជំពូកវែងជាងគេបំផុតក្នុងព្រះគម្ពីរមរមន ។ ប្រហែលវាអាចជាជំនួយ បើបំបែកវាទៅជាវគ្គៗដូចខាងក្រោម ដែលពិពណ៌នាអំពីគ្រាទាំងឡាយក្នុងប្រវត្តិសាស្ត្រនៃពិភពលោក ៖
-
ខ ៣–១៤ ៖ការខ្ចាត់ខ្ចាយនៃពួកអ៊ីស្រាអែល ពីមុនជំនាន់នៃព្រះគ្រីស្ទ
-
ខ ១៥–២៨ ៖ការងារបម្រើរបស់ព្រះគ្រីស្ទ និងពួកសាវក
-
ខ ២៩–៤៩ ៖ការក្បត់សាសនាដ៏ធំ
-
ខ ៥០–៧៦ ៖ការប្រមូលផ្ដុំនៃអ៊ីស្រាអែលនៅថ្ងៃចុងក្រោយ
-
ខ ៧៦–៧៧ ៖សហសវត្សរ៍ និងចុងបញ្ចប់នៃពិភពលោក
បន្ថែមពីលើគំនិតយោបល់អំពីរូបាធិដ្ឋាន សូមមើលឌីយ៉ាក្រាមដែលមានអមជាមួយនឹងគម្រោងនេះ ។
យើងទាំងអស់គ្នាអាចបម្រើព្រះដោយការជួយទ្រង់ប្រមូលផ្ដុំបុត្រាបុត្រីរបស់ទ្រង់ ។
ព្រះអញ្ជើញខ្ញុំជួយទ្រង់ប្រមូលផ្ដុំបុត្រាបុត្រីរបស់ទ្រង់ ។
« អ្នកបម្រើដទៃទៀត » ( យ៉ាកុប ៥:៧០ ) ដែលត្រូវបានហៅចូលទៅក្នុងចម្ការរបស់ព្រះអម្ចាស់ រួមទាំងប្រជាជនដូចជាបងប្អូន—ក្នុងនាមជាសមាជិកនៃសាសនាចក្រ យើងទាំងអស់គ្នាមានការទទួលខុសត្រូវដើម្បីជួយព្រះប្រមូលផ្ដុំបុត្រាបុត្រីរបស់ទ្រង់ ។ តើគោលការណ៍អ្វីខ្លះដែលបងប្អូនរកឃើញនៅក្នុង យ៉ាកុប ៥ ជាពិសេស ខ ៦១–៦២ និង ៧០–៧៥ អំពីការធ្វើការនៅក្នុងចម្ការរបស់ព្រះអម្ចាស់ ? តើបងប្អូនដឹងថាទ្រង់ហៅបងប្អូនឲ្យបម្រើនៅក្នុងចម្ការរបស់ទ្រង់យ៉ាងដូចម្ដេច ? តើបងប្អូនមានបទពិសោធន៍អ្វីខ្លះ ខណៈកំពុងចូលរួមនៅក្នុងកិច្ចការរបស់ទ្រង់ ?
សូមមើលផងដែរ « កិច្ចការផ្សព្វផ្សាយសាសនា » ប្រធានបទដំណឹងល្អ topics.ChurchofJesusChrist.org « ចម្ការនៃដើមអូលីវក្នុងគម្ពីរសញ្ញាចាស់ » « ជួយសាសនាចក្រឲ្យរីកចម្រើន » ( វីដេអូ ChurchofJesusChrist.org ) ។
ខ្ញុំអាចមានជំហររឹងមាំនៅពេលអ្នកដទៃជំទាស់នឹងសេចក្ដីជំនឿរបស់ខ្ញុំ ។
បទពិសោធន៍របស់ពួកសាសន៍នីហ្វៃជាមួយសេរេម គឺមានជាញឹកញាប់នៅសព្វថ្ងៃនេះ ៖ ប្រហែលជាមានមនុស្សដែលពូកែនិយាយ មានចំណេះដឹងខ្ពង់ខ្ពស់ ដែលព្យាយាមបំផ្លាញសេចក្ដីជំនឿរបស់បងប្អូន ។ ប៉ុន្តែយ៉ាកុប « មិនអាចបាត់បង់ » ( យ៉ាកុប ៧:៥ ) ។ តើយ៉ាកុបឆ្លើយតបយ៉ាងដូចម្ដេច នៅពេលសេចក្ដីជំនឿរបស់គាត់ត្រូវគេវាយប្រហារ ? តើបងប្អូនរៀនអ្វីខ្លះមកពីការឆ្លើយតបរបស់គាត់ ? តើបងប្អូនអាចធ្វើអ្វីខ្លះឥឡូវនេះ ដើម្បីរៀបចំខ្លួនសម្រាប់ពេលដែលសេចក្ដីជំនឿរបស់បងប្អូននឹងត្រូវគេជំទាស់ ?
សូមមើលផងដែរ « Answering Gospel Questions » ប្រធានបទដំណឹងល្អ topics.ChurchofJesusChrist.org; ជែហ្វ្រី អ័រ ហូឡិន « The Cost—and Blessings—of Discipleship » Ensign ឬ Liahona ខែ ឧសភា ឆ្នាំ ២០១៤ ទំព័រ ៦–៩ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
យ៉ាកុប ៥
មានក្រុមគ្រួសារមួយចំនួនបានរកឃើញថាវាជាជំនួយដើម្បីគូរូបនិមិត្តរូបមកពីរូបាធិដ្ឋាននៃដើមអូលីវ នៅពេលពួកគេអានវា ។ គ្រួសាររបស់បងប្អូនអាចនឹងរីករាយចំពោះរបៀបនោះ ឬក៏មានរបៀបផ្សេងទៀតដែលបងប្អូនអាចជួយសមាជិកគ្រួសារមើលឃើញពីនិមិត្តរូបនោះនៅក្នុងរូបាធិដ្ឋាន ។ ប្រហែលជាបងប្អូនអាចគូសចំណាំតំបន់មួយនៅលើតុ ឬលើឥដ្ឋដើម្បីតំណាងឲ្យចម្ការ ( ឬពិភពលោក ) ហើយគូរដើមនៃដើមអូលីវ ( ឬវង្សអ៊ីស្រាអែល ) ដោយកម្មវត្ថុមួយ ដូចជារូបផ្គុំ ដែលអាចត្រូវបានបំបែកជាបំណែកតូចៗ ( ដើម្បីតំណាងឲ្យការខ្ចាត់ខ្ចាយនៃវង្សអ៊ីស្រាអែល ) បន្ទាប់មកដាក់វាផ្គុំចូលគ្នាវិញ ( តំណាងឲ្យការប្រមូលផ្ដុំនៃវង្សអ៊ីស្រាអែល ) ។ តើរូបាធិដ្ឋាននេះបង្រៀនយើងអ្វីខ្លះអំពីព្រះអម្ចាស់ ? អំពីពួកអ្នកបម្រើរបស់ទ្រង់ ?
យ៉ាកុប ៥:៧០–៧៧
នៅពេលបងប្អូនអានអំពី « ថ្ងៃចុងក្រោយ » ដែលព្រះអម្ចាស់ធ្វើការនៅក្នុងចម្ការរបស់ទ្រង់ តើមានអ្វីខ្លះដែលបំផុសគំនិតបងប្អូន និងគ្រួសារបងប្អូនឲ្យបម្រើព្រះអម្ចាស់ « ដោយអស់ពីចិត្ត » ? ( យ៉ាកុប ៥:៧១ ) ។ បងប្អូនអាចអញ្ជើញសមាជិកគ្រួសារឲ្យប្រៀបនឹងខ្លួនពួកគេទៅហ្នឹង ខទី ៧៥ ដោយការបន្ថែមឈ្មោះរបស់ពួកគេនៅក្នុងខនេះ— ឧទាហរណ៍ « [ ឈ្មោះ ] មានពរហើយ » ។ ប្រហែលជាពួកគេអាចចែកចាយបទពិសោធន៍នានាដែលពួកគេមានអារម្មណ៍អំណរ ខណៈពេលបម្រើដល់ព្រះអម្ចាស់នៃចម្ការ ឧទាហរណ៍ តាមរយៈការចែកចាយដំណឹងល្អ ការបម្រើនៅក្នុងព្រះវិហារបរិសុទ្ធ ឬការពង្រឹងសមាជិកសាសនាចក្រ ។ ( សូមមើលផងដែរ អិម រ័សុល បាឡឺដ « Put Your Trust in the Lord » Ensign ឬ Liahona ខែ វិច្ឆិកា ឆ្នាំ ២០១៣ ទំព័រ ៤៣–៤៥ ) ។
យ៉ាកុប ៦:៤–៧
តើព្រះអម្ចាស់បានលាតព្រះហស្តនៃសេចក្ដីមេត្តាករុណារបស់ទ្រង់មកកាន់យើងតាមរបៀបណា ? តើពាក្យ « ចូលជាប់នឹង » នៅក្នុងខទាំងនេះមានន័យយ៉ាងណា ? តើព្រះអម្ចាស់ចូលជាប់នឹងយើងដោយរបៀបណា ? តើយើងអាចចូលជាប់នឹងទ្រង់តាមរបៀបណា ?
យ៉ាកុប ៧:១–១២
តើយើងអាចរៀនអ្វីខ្លះមកពីខគម្ពីរទាំងនេះ អំពីរបៀបដែលមនុស្សព្យាយាមដឹកនាំអ្នកដទៃឲ្យវង្វេង ? តើយើងអាចធ្វើតាមគំរូរបស់យ៉ាកុប និងឈរឲ្យខ្ជាប់ខ្ជួននៅក្នុងសេចក្ដីជំនឿទៅលើព្រះគ្រីស្ទរបស់យើងយ៉ាងដូចម្ដេច?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អការបង្រៀនរបស់យើង
ទន្ទេញបទគម្ពីរ សូមជ្រើសរើសវគ្គបទគម្ពីរមួយដែលមានអត្ថន័យជាពិសេសចំពោះ គ្រួសារបងប្អូន ហើយទន្ទេញវាឲ្យចាំជាមួយគ្នា ។ អែលឌើរ រីឆាដ ជី ស្កត បានបង្រៀនថា « បទគម្ពីរដែលបានទន្ទេញចាំ ក្លាយទៅជាមិត្តយូរអង្វែងមួយ ដែលពុំទន់ខ្សោយទៅតាមពេលវេលានោះទេ » ( « The Power of Scripture » Ensign ឬ Liahona ខែ វិច្ឆិកា ឆ្នាំ ២០១១ ទំព័រ ៦ ) ។