« ថ្ងៃទី ៣–៩ ខែ កុម្ភៈ នីហ្វៃទី ២ ១–៥ ៖ ‹ ពួកយើងបានរស់នៅតាមរបៀបនៃសុភមង្គល › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ៣–៩ ខែ កុម្ភៈ នីហ្វៃទី ២ ១–៥ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
អ័ដាម និងអេវ៉ា ដោយ ដាកឡាស ហ្វ្រាយើរ
ថ្ងៃទី ៣–៩ ខែ កុម្ភៈ
នីហ្វៃទី ២ ១–៥
« ពួកយើងបានរស់នៅតាមរបៀបនៃសុភមង្គល »
លីហៃបានបង្រៀនកូនចៅគ្រប់រូបរបស់លោកទៅតាមតម្រូវការ និងកាលៈទេសៈរបស់ពួកគេម្នាក់ៗ ។ សូមធ្វើតាមគំរូរបស់លោក នៅពេលអ្នករៀបចំបង្រៀនដល់កុមារក្នុងថ្នាក់របស់អ្នក ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
បន្ទាប់ពីពន្យល់ថា លីហៃបានបង្រៀនគ្រួសាររបស់លោកអំពីសេរីភាព ដើម្បីធ្វើការជ្រើសរើសផ្ទាល់ខ្លួនហើយនោះ សូមអញ្ជើញកុមារឲ្យចែកចាយបទពិសោធន៍ ដែលពួកគេមានក្នុងការជ្រើសរើសត្រូវ ។ តើពួកគេមានអារម្មណ៍ដូចម្ដេច បន្ទាប់ពីពួកគេបានធ្វើការជ្រើសរើសបែបនោះ ? តើពួកគេអាចចងចាំដើម្បីជ្រើសរើសត្រូវនាពេលខាងមុខដោយរបៀបណា ?
បង្រៀនគោលលទ្ធិ ៖ កុមារតូចៗ
ខ្ញុំមានពរ ពេលខ្ញុំគោរពតាម ។
គោលការណ៍នេះបានបង្រៀននៅក្នុងខគម្ពីរនេះ—ការគោរពប្រតិបត្តិនាំមកនូវពរជ័យ—ត្រូវបានបង្ហាញជាញឹកញាប់ពេញព្រះគម្ពីរមរមនទាំងមូល ។ សូមពិចារណាអំពីរបៀបដែលអ្នកអាចជួយកុមារឲ្យរៀនស្គាល់វានៅក្នុងជីវិតផ្ទាល់របស់ពួកគេ ។
សកម្មភាពដែលអាចជ្រើសរើស
-
សូមឲ្យកុមារជួយអ្នកផ្តល់និយមន័យពាក្យ បទបញ្ញត្តិ ហើយធ្វើបញ្ជីមួយអំពីបទបញ្ញត្តិ ។ សូមអាន នីហ្វៃទី ២ ១:២០ ហើយគូសបញ្ជាក់ថា យើងនឹង « រីកចម្រើន » ឬបានពរ នៅពេលយើងគោរពបទបញ្ញត្តិ ។ តើយើងមានអារម្មណ៍យ៉ាងណា នៅពេលយើងគោរពតាមបទបញ្ញត្តិទាំងនេះ ?
-
សូមបង្ហាញកុមារនូវរបស់ដែលផ្តល់ការការពារ ដូចជាស្បែកជើង មួក និងស្រោមដៃ ។ សូមឲ្យពួកគេសាក-លវត្ថុទាំងនោះ ។ តើវត្ថុទាំងនេះការពារពួកគេយ៉ាងដូចម្តេច ? សូមប្រាប់ពួកគេថា បទបញ្ញត្តិរបស់ព្រះវរបិតាសួគ៌អាចការពារយើងពីគ្រោះថ្នាក់ខាងវិញ្ញាណ ។ សូមចែកចាយបទពិសោធន៍មួយ នៅពេលអ្នកត្រូវបានការពារ តាមរយៈការគោរពតាមបទបញ្ញត្តិ ។
ព្រះបានប្រទានសេរីភាពក្នុងការជ្រើសរើសដល់ខ្ញុំ ។
ដោយសារជម្រើសរបស់ពួកគេ នោះអ័ដាម និងអេវ៉ាត្រូវចាកចេញពីសួនច្បារអេដែន ។ តើអ្នកអាចបង្រៀនកុមារថា ជម្រើសរបស់អ័ដាម និងអេវ៉ា ធ្វើឲ្យយើងអាចប្រើប្រាស់សិទ្ធិរបស់យើង ដើម្បីជ្រើសរើសព្រះវរបិតាសួគ៌យើងដូចសព្វថ្ងៃនេះយ៉ាងដូចម្តេច ?
សកម្មភាពដែលអាចជ្រើសរើស
-
សូមគូររូបភាពនៃមនុស្សដែលមានសេរីភាពម្នាក់ និងរូបភាពនៃមនុស្សដែលជាប់ឃុំឃាំង ( ប្រហែលជាមនុស្សនៅក្នុងគុក ) ហើយអញ្ជើញកុមារឲ្យចង្អុលទៅរូបភាពត្រឹមត្រូវ នៅពេលអ្នកអានពាក្យ ឥស្សរភាព និងពាក្យ ការជាប់ឃុំឃាំង នៅក្នុង នីហ្វៃទី ២ ២:២៧ ។ សូមគូសបញ្ជាក់ឃ្លា « សិទ្ធិនឹងរើស » ហើយអញ្ជើញកុមារម្នាក់ៗឲ្យនិយាយវាម្តងទៀត ។
-
សូមរំឭកជាមួយកុមារនូវរឿងរបស់អ័ដាម និងអេវ៉ា ( សូមមើល នីហ្វៃទី ២ ២:១៧–១៩, សូមមើលផងដែរ « ជំពូកទី ៣ ៖ អ័ដាម និង នាងអេវ៉ា » ដំណើររឿងព្រះគម្ពីរសញ្ញាចាស់ ទំព័រ ១៥–១៨ ឬវីដេអូដែលដូចគ្នានេះនៅគេហទំព័រ ChurchofJesusChrist.org ) និងជម្រើសដែលពួកគេបានជ្រើសយកនៅក្នុងសួនច្បារអេដែន ។ សូមជួយកុមារឲ្យសរសេរជម្រើសមួយចំនួន ដែលពួកគេធ្វើរៀងរាល់ថ្ងៃ ។ សូមថ្លែងទីបន្ទាល់ថា ព្រះវរបិតាសួគ៌យើងបានប្រទានសេរីភាពក្នុងការជ្រើសរើសរវាងល្អ និងអាក្រក់ដល់យើង ហើយសូមអញ្ជើញកុមារឲ្យលោតឡើងលើ និងលោតចុះក្រោម ឬទះដៃរបស់ពួកគេ ដើម្បីសាទរដល់ការមានសិទ្ធិជ្រើសរើស ។
-
សូមលេងល្បែងកម្សាន្តមួយ គឺអ្នកនិយាយពាក្យមួយ ( ដូចជា ពាក្យ ពន្លឺ ) ហើយកុមារនិយាយពាក្យផ្ទុយនឹងពាក្យនោះ ( ងងឹត ) ។ សូមធ្វើសកម្មភាពនេះដដែលៗឲ្យបានបីបួនដង ។ ដើម្បីជួយកុមារឲ្យយល់អំពីរបៀបមានការផ្ទុយគ្នា ជួយយើងឲ្យធ្វើការជ្រើសរើស នោះសូមអានបទគម្ពីរពាក់កណ្តាលដំបូងនៃ នីហ្វៃទី ២ ២:១១ និង នីហ្វៃទី ២ ២:១៦ ។ សូមប្រាប់រឿងឲ្យកុមារស្ដាប់អំពីកុមារម្នាក់ដែលត្រូវបានល្បួងឲ្យធ្វើការជ្រើសរើសខុស ។ សូមជួយកុមារឲ្យគិតអំពីអ្វីដែលផ្ទុយពីជម្រើសនោះ ហើយអញ្ជើញពួកគេឲ្យសម្តែងវា ។ សូមថ្លែងទីបន្ទាល់ថា ព្រះវរបិតាសួគ៌ប្រទានពរដល់យើង នៅពេលយើងជ្រើសរើសផ្លូវត្រូវ ។
-
សូមច្រៀងចម្រៀងមួយបទជាមួយគ្នាអំពីការធ្វើការជ្រើសរើស ដូចជាបទ « ខ្ញុំព្យាយាមក្លាយដូចព្រះយេស៊ូវ » ឬ « ជ្រើសរើសផ្លូវត្រូវ » ( សៀវភៅចម្រៀងកុមារ ទំព័រ ៤០–៤១, ៨២–៨៣ ) ហើយសូមសួរកុមារនូវអ្វីដែលពួកគេរៀនពីចម្រៀងនេះអំពីការធ្វើការជ្រើសរើស ។
បង្រៀនគោលលទ្ធិ ៖ កុមារធំៗ
ខ្ញុំមានពរ ពេលខ្ញុំគោរពតាម ។
នៅពេលកុមារមានសេចក្តីជំនឿថា ព្រះនឹងប្រទានពរដល់ពួកគេដោយសារការគោរពបទបញ្ញត្តិ—ទោះបីពរជ័យទាំងនោះពុំកើតឡើងភ្លាមៗក្តី—វាមានភាពកាន់តែងាយស្រួលឲ្យពួកគេធ្វើការជ្រើសរើសត្រឹមត្រូវ ។
សកម្មភាពដែលអាចជ្រើសរើស
-
សូមជួយកុមារឲ្យរំឭកអំពីជម្រើសមួយចំនួនដែលនីហ្វៃ និងពួកបងប្រុសរបស់លោកបានជ្រើសរើស ។ ឧទាហរណ៍មួយចំនួន សូមមើល នីហ្វៃទី ១ ២:១១–១៦; ៣:៥–៧ និង ១៨:៩–១១ ។ សូមអញ្ជើញពួកគេឲ្យអាន នីហ្វៃទី ២ ១:២០ ជាមួយគ្នា ហើយចែកចាយពីមូលហេតុដែលពួកគេគិតថា ហេតុអ្វីលីហៃនឹងផ្តល់សារលិខិតនេះដល់កូនចៅរបស់លោក ។
-
សូមសរសេរឃ្លានានាមកពី នីហ្វៃទី ២ ១:២០ នៅលើចម្រៀកក្រដាស ហើយពិភាក្សាអំពីអត្ថន័យនៃឃ្លាទាំងនោះ ។ សូមអញ្ជើញកុមារឲ្យតម្រៀបចម្រៀកក្រដាសនោះតាមលំដាប់លំដោយត្រឹមត្រូវ ដោយប្រើខគម្ពីរនេះ ។ ដើម្បីបង្ហាញភាពខុសគ្នារវាងភាពចម្រើនឡើង និងការកាត់ចេញ សូមបង្ហាញកុមារនូវរុក្ខជាតិល្អមួយ និងស្លឹក ឬមែកមួយដែលត្រូវបានកាត់ចេញពីរុក្ខជាតិនោះ ។ តើស្លឹកដែលនៅជាប់នឹងរុក្ខជាតិ និងស្លឹកដែលត្រូវបានកាត់ចេញពីរុក្ខជាតិមានភាពខុសគ្នាដូចម្តេចខ្លះ ? តើយើងដូចជាស្លឹកដែលនៅជាប់នឹងរុក្ខជាតិ នៅពេលយើងគោរពតាមបទបញ្ញត្តិរបស់ព្រះយ៉ាងដូចម្តេច ? សូមអញ្ជើញកុមារឲ្យកត់ត្រានៅក្នុងសៀវភៅកំណត់ហេតុនូវរបៀបនានាដែលព្រះប្រទានពរដល់ពួកគេ នៅពេលពួកគេជ្រើសរើសត្រូវ ។
ព្រះបានប្រទានសិទ្ធិជ្រើសរើសដល់ខ្ញុំ ។
ព្រះយេស៊ូវគ្រីស្ទបានសង្គ្រោះយើងពីសេចក្តីស្លាប់ខាងរូបកាយ និងសេចក្តីស្លាប់ខាងវិញ្ញាណ ( ការបែកចេញពីព្រះ ដោយសារតែអំពើបាប ) តាមរយៈដង្វាយធួន និងការមានព្រះជន្មរស់ឡើងវិញរបស់ទ្រង់ ។ ដើម្បីទៅរស់នៅជាមួយព្រះវរបិតាសួគ៌វិញ នោះយើងត្រូវប្រើសិទ្ធិជ្រើសរើសរបស់យើង ដើម្បីបន្តប្រែចិត្ត និងព្យាយាមរស់នៅដោយសុចរិត ។
សកម្មភាពដែលអាចជ្រើសរើស
-
សូមលើករូបភាពរបស់អ័ដាម និងអេវ៉ា ( សូមមើល សៀវភៅរូបភាពដំណឹងល្អ លេខ ៤ ) ហើយសូមអញ្ជើញកុមារឲ្យចែកចាយអ្វីដែលពួកគេដឹងអំពីអ្វីដែលបានកើតឡើងចំពោះអ័ដាម និងអេវ៉ានៅក្នុងសួនច្បារអេដែន ។ សូមជួយកុមារឲ្យរកចម្លើយនៅក្នុង នីហ្វៃទី ២ ២:២២–២៧ ។ សូមពន្យល់ថា ដោយសារជម្រើសរបស់អ័ដាម និងអេវ៉ា នោះយើងមានពរដើម្បីកើតមកលើផែនដីនេះ ហើយប្រើសិទ្ធិជ្រើសរើសរបស់យើង ដើម្បីធ្វើការជ្រើសរើសល្អ ហើយប្រែចិត្តតាមរយៈដង្វាយធួនរបស់ព្រះគ្រីស្ទ នៅពេលយើងធ្វើការជ្រើសរើសខុស ។
-
សូមសរសេរពាក្យនានាក្នុង នីហ្វៃទី ២ ២:២៧ នៅលើក្ដារខៀន ។ សូមជួយកុមារឲ្យទន្ទេញខគម្ពីរនេះ ដោយនិយាយវាឡើងវិញ ហើយឆ្លាស់វេនគ្នាលុបពាក្យពីរបី គ្រប់ពេលដែលពួកគេនិយាយវាឡើងវិញ ។ សូមជួយកុមារឲ្យស្រមៃថា តើជីវិតដែលគ្មានជម្រើសមានសភាពដូចម្តេច ។ ហេតុអ្វីពួកគេមានអំណរគុណចំពោះសិទ្ធិជ្រើសរើស ?
-
សូមអញ្ជើញកុមារឲ្យចែកចាយបទពិសោធន៍ នៅពេលពួកគេបានធ្វើការជ្រើសរើសល្អ ។ តើពួកគេមានអារម្មណ៍ដូចម្ដេច បន្ទាប់ពីពួកគេបានធ្វើការជ្រើសរើសបែបនោះ ? តើយើងអាចធ្វើអ្វីខ្លះដើម្បីជួយខ្លួនយើងឲ្យជ្រើសរើសត្រូវ នៅពេលយើងត្រូវបានល្បួងឲ្យធ្វើអ្វីដែលខុសនោះ ? សូមគិតពីការច្រៀងចម្រៀងមួយបទអំពីការធ្វើការជ្រើសរើស ដូចជាបទ « ជ្រើសផ្លូវត្រូវ » ( ទំនុកតម្កើង លេខ ១៤៨ ) ហើយអញ្ជើញកុមារឲ្យចែកចាយអ្វីដែលពួកគេរៀនមកពីចម្រៀងនេះ ។
យ៉ូសែប ស៊្មីធ គឺជា « អ្នកមើលឆុតដ៏ជម្រើស » ម្នាក់ ។
នៅក្នុង នីហ្វៃទី ២ ៣ លីហៃថ្លែងពីការព្យាករមួយអំពីព្យាការី យ៉ូសែប ស្ម៊ីធ ។ អ្នកអាចប្រើវាជាឱកាសមួយបង្រៀនកុមារអំពីបេសកកម្មរបស់លោកនៅក្នុងថ្ងៃចុងក្រោយនេះ ។
សកម្មភាពដែលអាចជ្រើសរើស
-
សូមអញ្ជើញកុមារឲ្យស្រាវជ្រាវ នីហ្វៃទី ២ ៣:៦–២៤ រកតម្រុយអំពីព្យាការីណាមួយដែលខគម្ពីរនេះបានពិពណ៌នា ។ សូមសរសេរតម្រុយទាំងនេះនៅលើក្ដារខៀន ។ ហេតុអ្វីយ៉ូសែប ស៊្មីធ ត្រូវបានហៅថា « អ្នកមើលឆុតដ៏ជម្រើស » ម្នាក់ ? តើយ៉ូសែប ស្ម៊ីធ បានធ្វើអ្វីខ្លះដែល « ជាប្រយោជន៍ដ៏ធំដល់ [ បងប្អូនរបស់លោក ] ? » ( ខទី ៧ ) ។
-
សូមច្រៀងទំនុកតម្កើងអំពី យ៉ូសែប ស៊្មីធ ដូចជាបទ « សរសើរដល់លោក » ( ទំនុកតម្កើង លេខ ១៦ ) ឬមើលវីដេអូដែលបង្ហាញអំពីទិដ្ឋភាពខុសៗគ្នានៃបេសកកម្មរបស់លោក ដូចជាវីដេអូដែលមាននៅក្នុង history.ChurchofJesusChrist.org/article/joseph-smith-video-downloads ។ សូមសួរកុមារអំពីមូលហេតុដែលពួកគេមានអំណរគុណចំពោះព្យាការី យ៉ូសែប ស៊្មីធ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តកុមារឲ្យកត់ចំណាំពីឱកាសនានា ដែលពួកគេមានដើម្បីធ្វើការជ្រើសរើសនាសប្តាហ៍នេះ ។ សូមអញ្ជើញពួកគេឲ្យត្រៀមខ្លួនជាស្រេចដើម្បីចែកចាយនៅសប្តាហ៍ក្រោយ នូវជម្រើសអ្វីខ្លះដែលពួកគេបានជ្រើសរើស និងលទ្ធផលដែលកើតមកពីជម្រើសរបស់ពួកគេ ។
ការកែលម្អការបង្រៀនរបស់យើង
កុមារអាចស្គាល់ឥទ្ធិពលរបស់ព្រះវិញ្ញាណ ។ សូមបង្រៀនពួកគេថា អារម្មណ៍នៃសេចក្ដីសុខសាន្ត សេចក្ដីស្រឡាញ់ និងភាពកក់ក្ដៅ ដែលពួកគេមាននៅពេលដែលពួកគេនិយាយ ឬច្រៀងពីព្រះយេស៊ូវគ្រីស្ទ និង ដំណឹងល្អរបស់ទ្រង់ កើតមានមកពីព្រះវិញ្ញាណបរិសុទ្ធ ។ អារម្មណ៍ទាំងនេះអាចស្ថាបនាទីបន្ទាល់របស់ពួកគេ ។