Lotu ʻa Kalaisí, tā ʻe Derek Hegsted

19–25 ʻOkatopa

3 Nīfai 27–4 Nīfai

“ʻOku ʻIkai Lava ke ʻI Ai ha Kakai ʻOku Lahi Hake ʻEnau Fiefiá”

ʻI hoʻo lau ʻa e 3 Nīfai 27–4 Nīfai, fakakaukau ki ha ngaahi aʻusia, fakakaukau, potufolofola, mo ha ngaahi talanoa ʻe tokoni ke mahino ki he fānaú ʻa e ngaahi fakakaukau ʻi he ngaahi vahe ko ʻení.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Tokoniʻi ʻa e fānaú ke nau manatuʻi ʻa e meʻa kuo nau ako ʻi he ngaahi uike kuo hilí fekauʻaki mo e meʻa naʻe akoʻi ʻe Sīsū ki he kakai ʻi he fonua ko Mahú. Fakamatalaʻi ange ʻoku talamai ʻe he Tohi ʻa Molomoná ʻa hono tāpuekina ʻo e kakaí ʻi he taimi naʻa nau talangofua ai ki he meʻa naʻe akoʻi ange ʻe Sīsuú.

Akoʻi e Tokāteliné: Fānau Iiki Angé

3 Nīfai 27:1–22

ʻOku ou kau ki he Siasi ʻo Sīsū Kalaisí.

ʻOku tokoni fēfē nai ʻa e ngaahi folofola ʻa e Fakamoʻuí ki Heʻene kau ākongá, ke mahino ki he fānaú ʻa e mahuʻinga ʻo e kau ki he Siasi ʻo Sīsū Kalaisí?

Ngaahi ʻEkitivitī ʻe Ala Fakahokó

• Kole ki he fānau takitaha ke nau talamai honau ngaahi hingoá. Ko e hā e ʻuhinga ʻoku mahuʻinga ai ʻa e ngaahi hingoá? Talaange kiate kinautolu naʻe loto ʻa e kau ākonga ʻo Sīsuú ke nau ʻiloʻi ʻa e meʻa ʻoku totonu ke nau fakahingoa ʻaki ʻa e Siasi ʻo Kalaisí. Lau kiate kinautolu ʻa e tali ʻo e Fakamoʻuí ʻi he 3 Nīfai 27:7. Ko hai naʻe folofola ʻe Sīsū ʻoku totonu ke fakahingoa ki ai ʻa Hono Siasí?

• Faʻu ha pine ʻoku ʻasi ai ʻa e “ʻOku ou kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní” ke tui ʻe he fānau takitaha ki ʻapi. Tuku ki he fānaú ke nau valivali ʻenau ngaahi piné. Hivaʻi mo e kalasí ʻa e “Ko e Siasi ʻo Sīsū Kalaisí” (Tohi Hiva ʻa e Fānaú, 48-49). Talaange ʻa e ʻuhinga ʻokú ke houngaʻia ai ʻi he kau ki he Siasí, pea fehuʻi ki he fānaú pe ko e hā ʻa e ʻuhinga ʻoku nau houngaʻia ai ʻi he Siasí.

• Tokoniʻi ʻa e fānaú ke nau fakatahatahaʻi ʻa e pāsolo ʻi he peesi ʻekitivitī ki he uike ní. Fakamatalaʻi ange ʻoku finangalo ʻa Sīsū ke langa ʻa Hono Siasí ʻi Heʻene ongoongoleleí, pea fakaʻaongaʻi ʻa e peesi ʻekitivitií ke talanoa ai ki he fānaú kau ki hono ʻuhingá.

4 Nīfai 1:2–3, 15–17

ʻOku ʻomi ʻe hono moʻui ʻaki ʻa e ongoongoleleí, ʻa e fiefia kiate au.

ʻE lava ke tokoni ʻa e fiefia ʻo e kakaí ʻoku fakamatalaʻi ʻi he 4 Nīfaí ke ako e fānaú kau ki he fiefia ʻoku maʻu mei hono moʻui ʻaki ʻo e ongoongoleleí.

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau talanoa ki he meʻa ʻokú ne ʻomi ai ʻa e fiefiá kiate kinautolú. Ke talanoa ki he fānaú kau ki he fiefia ʻo e kakai ʻi he 4 Nīfai, lau ʻa e ngaahi kupuʻi lea mahuʻinga mei he veesi 2–3 mo e 15–17. Te ke lava foki ʻo fakaʻaongaʻi ʻa e “Vahe 48: Ko e Melinó ʻi ʻAmelika” (Ngaahi Talanoa ʻo e Tohi ʻa Molomoná, 136–37, pe ko e vitiō kaunga ki ai ʻi he ChurchofJesusChrist.org). Fakamamafaʻi ange naʻe fiefia ʻa e kakaí koeʻuhí naʻa nau ului ki he ʻEikí, naʻa nau moʻui ʻaki ʻa e ngaahi fekaú, pea naʻa nau feʻofaʻaki.

• Fakaʻaliʻali ha fakatātā ʻo ha kakai fiefia. Fakamatalaʻi ange naʻe maʻu ʻe he kakai ʻi he 4 Nīfai ha fiefia ʻi ha meimei taʻu ʻe 200 koeʻuhí ne nau feinga kotoa ʻi honau lelei tahá ke nau moʻui ʻaki ʻa e ongoongoleleí. Tokoniʻi ʻa e fānaú ke nau fakakaukau ki ha ngaahi fekau ʻe niʻihi te nau lava ʻo talangofua ki ai. Hangē ko ʻení, te ke lava ʻo lau kiate kinautolu ʻa e 4 Nīfai 1:15 ke akoʻi naʻe ʻikai ke toe fetauʻaki ʻa e kakaí ʻiate kinautolu. Fakaafeʻi ʻa e fānaú ke nau fakatātaaʻi ʻa e talangofua ki he ngaahi fekau naʻa nau fakakaukau ki aí. Hivaʻi fakataha ha foʻi hiva fekauʻaki mo e fiefia ʻoku maʻu mei he moʻui ʻaki ʻa e ongoongoleleí, hangē ko e “ ʻI heʻetau Tokoní” (Tohi Hiva ʻa e Fānaú, 108B).

• Lau ha ngaahi kupuʻi lea mei he 4 Nīfai 1:24–29, 34–35, mo e 43 ʻokú ne fakamatalaʻi ʻa e meʻa naʻe hoko ʻi he taimi naʻe ʻikai ke toe tauhi ai ʻe ha niʻihi ʻo e kau Nīfaí ʻa e ngaahi fekaú. ʻI hoʻo fai iá, fakaafeʻi ʻa e fānaú ke nau mata mamahi ʻi he taimi ʻoku nau fanongo ai ki ha meʻa ʻoku ongo fakamamahi. Fakamoʻoniʻi ange, ʻoku fakatau ki he fiefiá ʻa hono tauhi ʻo e ngaahi fekaú.

Akoʻi e Tokāteliné: Fānau Lalahi Angé

3 Nīfai 27:3–8

ʻOku ou kau ki he Siasi ʻo Sīsū Kalaisí.

Fakakaukau ki he founga te ke lava ai ʻo tokoniʻi e fānau ʻokú ke akoʻí ke nau fakatokangaʻi ʻa e ngaahi tāpuaki lahi ʻoku maʻu ʻi he hoko ko ha mēmipa ʻo e Siasi ʻo Sīsū Kalaisí.

Ngaahi ʻEkitivitī ʻe Ala Fakahokó

• Tokoniʻi ʻa e fānaú ke nau lau ʻa e 3 Nīfai 27:3, ʻo kumi ʻa e fehuʻi naʻe fai ʻe he kau ākonga ʻo Sīsuú kiate Iá. Fakaafeʻi leva kinautolu ke nau kumi ʻi he 3 Nīfai 27:5–8 ki he talí. Fakatatau ki he ngaahi veesi ko ʻení, ko e hā e ʻuhinga ʻoku mahuʻinga ai ʻa e hingoa ʻo e Siasí?

• Tokoniʻi ʻa e fānaú ke nau fakakaukau ki ha ngaahi kulupu kehekehe ʻoku nau kau ki ai, hangē ko e fāmilí pe ko e kalasi Palaimelí. Kole ange ke nau tala atu ʻa e meʻa ʻoku nau saiʻia ai ʻi heʻenau kau ki he ngaahi kulupú takitaha. Kole ki he fānaú ke nau tokoni atu ʻi hono tohi ʻa e foʻi lea takitaha ʻo e hingoa ʻo e Siasí ʻi ha laʻipepa kehe. Tuifio leva ʻa e ngaahi laʻipepá, pea fakaafeʻi ʻa e fānaú ke nau fokotuʻutuʻu lelei ʻa e ngaahi foʻi leá ni ki hono fakahokohokó. Ko e hā ha ngaahi tāpuaki kuo tau maʻu ʻi heʻetau hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?

3 Nīfai 27:13–22

ʻOku langa ʻa e Siasi ʻo Sīsū Kalaisí ʻi Heʻene ongoongoleleí.

Naʻe fakamatala fakanounouʻi ʻe he Fakamoʻuí ʻa ʻEne ongoongoleleí ʻi he 3 Nīfai 27. ʻE tokoni fēfē nai ʻEne ngaahi folofolá ke mahino ki he fānaú ʻa e ʻuhinga ʻo e ongoongoleleí?

Ngaahi ʻEkitivitī ʻe Ala Fakahokó

• Fakamatalaʻi ange ki he fānaú ʻoku ʻuhinga ʻa e foʻi lea ongoongoleleí ki he “ngaahi ongoongo ʻoku lelei” (vakai ki he Fakahinohino ki he Ngaahi Folofolá, “Ongoongolelei”). Tokoniʻi e fānaú ke nau fekumi ʻi he 3 Nīfai 27:13–15 ki ha meʻa ʻoku ongoongo fakafiefia kiate kinautolu. Ko e hā e ʻuhinga ʻoku tau houngaʻia ai ʻi heʻetau ʻiloʻi e ongoongolelei ʻo Sīsū Kalaisí?

• Hiki ʻi he palakipoé ha ngaahi tefitoʻi moʻoni ʻo e ongoongoleleí hangē ko e tuí, fakatomalá, papitaisó, ko e Laumālie Māʻoniʻoní, mo e kātaki ki he ngataʻangá. Fakaafeʻi ʻa e fānaú ke nau fekumi ʻi he 3 Nīfai 27:19–21, ki he ngaahi lea ko ʻení pe ko ha ngaahi lea faitatau ʻi he folofola ʻa Sīsū kau ki Heʻene ongoongoleleí.

• Kole ki he fānaú ke nau fakakaukauloto ʻoku ʻi ai haʻanau kaungāmeʻa ʻokú ne fehuʻi ange ʻa e meʻa ʻoku nau tui ki ai ʻi heʻenau hoko ko ha mēmipa ʻo e Siasí. Tokoniʻi kinautolu ke nau maʻu ha ngaahi moʻoni ʻi he 3 Nīfai 27:13–21 te nau lava ʻo vahevahe ke fakamatala fakanounouʻi ʻaki ʻa e meʻa ʻoku tau tui ki aí.

• Fakaafeʻi ʻa e fānaú ke nau fili ha taha ʻo e ngaahi moʻoni ʻo e ongoongoleleí naʻe akoʻi ʻe he Fakamoʻuí ʻi he 3 Nīfai 27:13–21 ʻa ia ʻoku nau toe fie ako lahi ange ki aí. Tokoniʻi kinautolu ke nau fekumi ʻi he Fakahinohino ki he Ngaahi Folofolá ke maʻu ha potufolofola ʻe taha pe ua ʻoku kaunga ki he moʻoni ko iá. Fakaafeʻi kinautolu ke nau fevahevaheʻaki ʻa ʻenau ngaahi potufolofolá mo e meʻa naʻa nau akó. Ko e hā e ʻuhinga ʻoku tau houngaʻia ai ʻi heʻetau ʻiloʻi e ongoongolelei ʻo Sīsū Kalaisí?

4 Nīfai

ʻOku ʻomi ʻe hono moʻui ʻaki ʻa e ongoongoleleí, ʻa e fiefia kiate au.

Koeʻuhi naʻe ului kinautolu kia Sīsū Kalaisi mo ʻEne ongoongoleleí, naʻe lava ke fokotuʻu ʻe he kakai naʻe fakamatalaʻi ʻi he 4 Nīfai ha ʻātakai ʻo e melino mo e uouangataha. Ko e hā ʻe lava ke ako ʻe he fānaú mei aí?

Ngaahi ʻEkitivitī ʻe Ala Fakahokó

• Teuteuʻi ha ngaahi laʻipepa ʻoku ʻi ai ha ngaahi kupuʻi lea mei he 4 Nīfai 1:2–3, 5, mo e 15–17 ʻokú ne fakamatalaʻi ʻa e ngaahi tāpuaki naʻe maʻu ʻe he kakaí (hangē ko e “naʻe ʻikai ha fekeʻikeʻi ʻi he fonuá”). Tuku ʻa e ngaahi laʻipepá ʻi ha faʻoʻanga meʻa, pea tuku ke toʻo tahataha ʻe he fānau takitaha ʻo lau ia. Poupouʻi ʻa e fānaú ke nau kumi ʻenau ngaahi kupuʻi lea ʻi he ngaahi veesi mei he 4 Nīfai. Ko e hā ʻoku tau ako mei he ngaahi kupuʻi lea ko ʻení? Ko e hā ha ngaahi faitatau ʻoku tau mamata ki ai ʻi he vahaʻa ʻo e ngaahi veesi ko ʻení mo e ʻuhinga ʻo e Saioné ʻi he Mōsese 7:18?

• Ke tokoniʻi ʻa e fānaú ke nau akoako fakahoko ʻa e meʻa ʻoku akoʻi ʻi he 4 Nīfai 1:15–16, ʻoange kiate kinautolu ha ngaahi tūkunga ʻa ia ʻoku ʻi ai ha kakai ai ʻoku nau feʻitangaki. Fakaafeʻi kinautolu ke nau fakatātaaʻi ʻa e meʻa ne mei hoko ʻi he tūkungá kapau naʻa nau feinga ke nau moʻui taʻeʻiai ha “fekeʻikeʻi.” Ko e hā e ʻuhinga ʻoku faingofua ange ai ke tau fakaʻehiʻehi mei he fekeʻikeʻí ʻi he taimi ʻoku tau maʻu ai ʻa e “ʻofa ʻa e ʻOtuá” ʻi hotau lotó?

• Lau mo e fānaú ʻa e ngaahi veesi ko ʻení, pea kole ange ke nau kumi ʻa e ngaahi ʻuhinga naʻe ʻikai ke toe nofo melino mo fiefia ai ʻa e kau Nīfaí mo e kau Leimaná: 4 Nīfai 1:20, 24–29, 34–35, mo e 43. Te tau lava fēfē ʻo fakaʻehiʻehi mei he ngaahi fakatuʻutāmaki ko ʻení? Tokoniʻi ʻa e fānaú ke nau ʻiloʻi ha ngaahi founga te tau lava ai ʻo fakaʻehiʻehi mei he loto hīkisiá ʻaki hono toe vakaiʻi ʻa e Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni (2014), 238–39.

Poupouʻi e Ako ʻi ʻApí

Poupouʻi ʻa e fānaú ke nau fili ha meʻa ʻe taha te nau fai ke nau ʻomi ai ha melino mo ha fiefia lahi ange ki honau ʻapí mo vahevahe ia mo honau ngaahi fāmilí.

Fakatupulaki ʻEtau Akoʻí

Poupouʻi e ngaahi mātuʻa ʻa e fānaú. “Ko e ngaahi mātuʻá ko e kau faiako mahuʻinga taha kinautolu ʻo e ongoongoleleí ki heʻenau fānaú—ʻokú nau fakatou maʻu e tefitoʻi fatongia mo e mālohi lahi taha ke tākiekina ʻenau fānaú (vakai, Teutalōnome 6:6–7). ʻI hoʻo akoʻi e fānaú ʻi he lotú, fekumi ʻi he faʻa lotu ki he ngaahi founga ke poupou ai ki heʻenau mātuʻá ʻi honau fatongia mahuʻingá” (Ko e Faiako ʻi he Founga ʻa e Fakamoʻuí,25).