Ko hono Fakanounouʻi ʻe Molomona ʻa e ʻŪ Lauʻi Peletí, tā ʻe Tom Lovell

26 ʻOkatopa–1 Nōvema 

Molomona 1–6

“ʻOku Ou Fakaʻamu Ke U Lava ʻo Fakalotoʻi ʻA [e Kakai] Kotoa Pē … ke Fakatomala”

Mahalo ʻe faingataʻa ke mahino kakato ki he fānaú ʻa e ngaahi meʻa naʻe fakamatalaʻi ʻi he Molomona 1–6, ka ʻe kei lava pē ke nau ako ha ngaahi lēsoni mei he talanoa ʻo e moʻui angatonu ʻa Molomona ʻi ha māmani faiangahalá. Te ke lava fēfē ʻo fakaʻaongaʻi ʻene aʻusiá ke akoʻi ki he fānaú ʻa e founga ke tau tauhi totonu ai ki he ongoongoleleí?

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Ko e hā ʻoku ʻilo ʻe he fānaú kau kia Molomoná? Fakaafeʻi kinautolu ke nau vahevahe e meʻa ʻoku nau ʻilo pe ako mei honau ngaahi fāmilí. ʻE lava ke tokoni ʻa hono fakaʻaliʻali ha fakatātā ʻo Molomona hangē ko ia ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.

Akoʻi e Tokāteliné: Fānau Iiki Angé

Molomona 1:1–3

Te u lava ʻo moʻui angatonu hangē ko Molomoná.

Neongo ʻoku iiki ʻa e fānau ʻokú ke akoʻí, te nau lava ʻo fakatupulaki ha ngaahi tuʻunga ʻulungāanga fakalaumālie mo moʻui angatonu.

Ngaahi ʻEkitivitī ʻe Ala Fakahokó

• Lau ʻa e Molomona 1:1–3 ki he fānaú, pe fakaʻaongaʻi ʻa e “Vahe 49: Ko Molomona mo ʻEne Ngaahi Akonakí” (Ngaahi Talanoa ʻo e Tohi ʻa Molomoná, 138–42, pe ko e vitiō kaunga ki ai ʻi he ChurchofJesusChrist.org). Fakaafeʻi kinautolu ke nau fakafanongo pe ko e taʻu fiha ʻa Molomona ʻi he taimi naʻe ʻoange ai ʻe ʻEmaloni kiate ia ha ngāue makehé. Kole ange leva ke nau fakatātaaʻi ʻi honau louhiʻinimá ʻa e lahi ʻo hono taʻú. Fakaʻaliʻali ange kiate kinautolu ha fakatātā ʻo ha taha ʻoku taʻu 10 ke tokoni ki he fānaú ʻi heʻenau fakakaukauloto ki he taʻu motuʻa ʻo Molomoná. Tokoniʻi kinautolu ke mahino ʻa e ngaahi ʻulungāanga lelei naʻe mamata ki ai ʻa ʻEmaloni ʻia Molomona ʻi heʻene kei siʻí, pea fakamoʻoniʻi ange ʻe lava e fānaú ʻo hangē ko Molomoná ʻi he taimi te nau muimui ai kia Sīsū Kalaisí.

• Fai ha foʻi vaʻinga ʻa ia ʻe toutou faʻifaʻitakiʻi ai ʻe he fānaú ʻa e ngaahi tōʻonga ʻokú ke fakahokó. Fakaʻaliʻali leva ha ngaahi fakatātā ʻo e ngaahi meʻa naʻe fai ʻe Sīsuú, pea talanoa ki he founga te tau lava ai ʻo muimui kiate Iá (vakai ki he Tohi Fakatātā ʻo e Ongoongoleleí, fika 33–35, 41–42). Aleaʻi ʻa e ngaahi founga naʻe muimui ai ʻa Molomona kia Sīsū Kalaisí—hangē ko hono akoʻi ʻa e ongoongoleleí, poupouʻi ʻa e kakaí ke nau talangofua ki he ʻOtuá, mo ʻofa ki he niʻihi kehé.

Molomona 3:3, 9

ʻOku ʻomi ʻe he Tamai Hēvaní ha ngaahi tāpuaki lahi kiate au.

ʻE lava ke tokoni ʻa e ngaahi akonaki ʻa Molomoná ke fakatokangaʻi ʻe he fānaú ʻa e ngaahi tāpuaki kuo foaki ange ʻe he Tamai Hēvaní kiate kinautolú.

Ngaahi ʻEkitivitī ʻe Ala Fakahokó

• Lau ʻa e Molomona 3:3 mo e 9 ki he fānaú, pea fakamatalaʻi ange naʻe teʻeki ke fakatokangaʻi ʻe he kau Nīfaí kuo tāpuekina kinautolu ʻe he Tamai Hēvaní. Tokoniʻi ʻa e fānaú ke nau fakakaukau ki ha ngaahi tāpuaki kuo foaki ange ʻe he Tamai Hēvaní kiate kinautolu. Fakaʻaliʻali ha ngaahi fakatātā pe ngaahi meʻa te ne lava ʻoange ha ngaahi fakakaukau kiate kinautolu. Ko e hā te tau lava ʻo fai ke fakahaaʻi ai ʻoku tau houngaʻia ki he Tamai Hēvaní ʻi heʻetau ngaahi tāpuakí?

• Tokoniʻi ʻa e fānaú ke nau fakakaukau ki ha ngaahi tāpuaki kuo foaki ange ʻe he Tamai Hēvaní, pea kole ange ke nau tā ha ngaahi fakatātā ʻo ha niʻihi ʻo e ngaahi tāpuaki ko ʻení. Fakaafeʻi kinautolu ke nau tautau ʻenau ngaahi fakatātaá ʻi ha feituʻu ʻi ʻapi te nau lava ʻo sio ki ai mo manatuʻi ʻoku tāpuekina kinautolu ʻe he Tamai Hēvaní ʻi ha ngaahi founga lahi. Te ke lava foki ʻo fakaafeʻi kinautolu ke nau feinga ke ʻiloʻi ʻa e ngaahi tāpuaki ʻoku haʻu mei he Tamai Hēvaní, lolotonga ʻenau hivaʻi e veesi ʻuluaki ʻo e “ ʻOku ou Fakamālō Atu ʻe Tamai” (Tohi Hiva ʻa e Fānaú, 9).

Molomona 3:12

ʻOku finangalo ʻa e Tamai Hēvaní ke u ʻofa ki he tokotaha kotoa pē.

Te ke lava fēfē ʻo tokoniʻi ʻa e fānau ʻokú ke akoʻí ke nau maʻu ha holi ke ongoʻi ʻofa kiate kinautolu ʻoku nau feohí?

Ngaahi ʻEkitivitī ʻe Ala Fakahokó

• Kole ki he fānau takitaha ke nau tā ha tokotaha ʻi he palakipoé, pea fakamahino ange ʻa e hā kehekehe ʻa e tokotaha ne nau taá mei he niʻihi kehé. Tā takai ha foʻi haati fōlahi ʻi he kotoa ʻo e ngaahi fakatātaá. Tokoni ke mahino ki he fānaú ʻoku finangalo ʻa e Tamai Hēvaní ke tau ʻofa ki he kakai kotoa pē. Lau ʻa e Molomona 3:12, ʻo fakamamafaʻi ange ʻa e foʻi lea “ʻofa”. Ko e hā naʻe fai ʻe Molomona ke fakahaaʻi ʻaki ʻene ʻofa ki he niʻihi kehé?

• Hivaʻi fakataha ha foʻi hiva fekauʻaki mo e ʻofa ki he niʻihi kehé, hangē ko e “Folofola ʻa Sīsū ʻFeʻofaʻakiʼ” (Tohi Hiva ʻa e Fānaú, 39), lolotonga hono fakaʻaliʻali ha ngaahi fakatātā ʻo e fānau ʻi he funga ʻo e māmaní. Fakamoʻoniʻi ange ʻa e ʻofa ʻa e ʻOtuá ki he kotoa ʻo ʻEne fānaú. Fakakakato mo e fānaú e peesi ʻekitivitī ʻo e uike ní.

Akoʻi e Tokāteliné: Fānau Lalahi Angé

Molomona 1:1–3; 2:1, 23–24; 3:1–3, 12, 17–22

Te u lava ʻo moʻui angatonu hangē ko Molomoná.

Naʻe kei siʻi ʻaupito ʻa Molomona ʻi he taimi naʻe fakatokangaʻi ai ʻe ʻEmaloni ʻokú ne fakapotopoto feʻunga ke tokangaʻi ʻa e ngaahi lekooti toputapú. Ko e hā ha ngaahi ʻulungāanga māʻoniʻoni ʻokú ke mamata ki ai ʻi he fānau ʻokú ke akoʻí?

Ngaahi ʻEkitivitī ʻe Ala Fakahokó

• Fakaafeʻi ʻa e fānaú takitaha ke nau lau ha taha ʻo e ngaahi potufolofola ko ʻení, pea tokoniʻi kinautolu ke nau vahevahe ʻa e meʻa ʻoku nau ako ki ai fekauʻaki mo Molomoná: Molomona 1:1–3; 2:1, 23–24; mo e 3:1–3, 12, 20–22. Vahevahe leva ʻa e ngaahi ʻulungāanga māʻoniʻoni ʻokú ke mamata ki ai ʻi he fānaú takitaha.

• Fakaʻaliʻali ha fakatātā ʻo Molomona (vakai ki he fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Tokoniʻi e fānaú ke nau ʻiloʻi koeʻuhi ko e fakapotopoto mo e moʻui falalaʻanga feʻunga ʻa Molomona ke ne tauhi mo fakatolonga ʻa e ngaahi lekooti ʻo e kakai Nīfaí, ʻoku tau maʻu ai he kuongá ni ʻa e Tohi ʻa Molomoná. Talanoa mo e fānaú fekauʻaki mo hono ʻuhinga ʻo e fakapotopotó mo e falalaʻangá. Fakaafeʻi kinautolu ke nau fakalaulauloto ki he ngaahi founga te nau lava ai ʻo toe fakapotopoto angé.

  

  Molomona, Taʻu 10, tā ʻe Scott M. Snow

Molomona 2:8–15; 5:10–11

ʻOku iku ʻa e mamahi faka-ʻOtuá ki he liliu moʻoní.

Naʻe mamata ʻa Molomona naʻe mamahi ʻa e kau Nīfai faiangahalá, ka ʻoku ʻikai ko e faʻahinga mamahi ia te ne ueʻi kinautolu ke nau fakatomalá (vakai ki he Molomona 2:13). Te ke tokoniʻi fēfē ke mahino ki he fānaú ʻa e faikehekehe ʻi he vahaʻa ʻo e mamahi fakaemāmaní mo e mamahi fakaʻotua ʻoku iku ki he fakatomalá?

Ngaahi ʻEkitivitī ʻe Ala Fakahokó

• Hiki ʻa e ongo ʻuluʻi tohi ko ʻení he palakipoé: Mamahi ʻoku iku ai ki he fakatomalá mo e Mamahi ʻoku ʻikai iku ki he fakatomalá. Fakaafeʻi ʻa e fānaú ke nau taufetongi ʻi hono lau e ngaahi veesi mei he Molomona 2:8, 10–15. Tokoniʻi kinautolu ke nau hiki e ngaahi meʻa ʻoku nau ako fekauʻaki mo e mamahí ʻi lalo ʻi he ʻuluʻi tohi ʻoku totonu mo iá ʻi he palakipoé. Te tau lava fēfē ʻo fakapapau ʻoku iku ʻa e mamahi ʻoku tau ongoʻi ʻi he faiangahalá, ke tau liliu aí?

• Fakaafeʻi ha mēmipa ʻo e kau pīsopelikí pe ko ha mātuʻa ʻo e taha ʻo e fānaú ke ne vahevahe mo e kalasí ʻa e founga ʻe lava ke tokoni ai ʻa e mamahi fakaʻotuá ke tau liliu ʻo hoko ʻo hangē ko e Tamai Hēvaní mo Sīsū Kalaisí. Ko e hā ʻoku mahuʻinga ai ke tau fakatokangaʻi pe ʻoku tau ongoʻi mamahi fakaʻotua pe mamahi fakaemāmaní? Fakaafeʻi ʻa e fānaú ke nau fekumi ʻi he Molomona 2:12 ke nau ʻiloʻi e ʻuhinga ʻoku totonu ai ke “fiefia ʻa [hotau] … lotó” ʻi he fakatomalá (Molomona 2:12).

Molomona 3:12

ʻOku ou lava ʻo ongoʻi ʻa e ʻofa ʻa e Tamai Hēvaní maʻá e niʻihi kehé.

ʻOku faʻa faingofua ke ʻofa kiate kinautolu ʻoku nau ʻofa mo hangē ko kitautolú, ka naʻe fakahaaʻi mai ʻe Molomona te tau lava ʻo ʻofa ʻiate kinautolu ʻoku kehe ʻenau tuí mo ʻenau tōʻongá meiate kitautolu, ʻaki ʻa e tokoni ʻa e Tamai Hēvaní.

Ngaahi ʻEkitivitī ʻe Ala Fakahokó

• Tokoniʻi ha tokotaha ke ne lau ʻa e Molomona 3:12, pea fakaafeʻi ʻa e fānaú ke nau hiki ha sētesi ʻe taha ʻokú ne fakamatala fakanounouʻi ʻa e meʻa ʻoku nau ako meia Molomona fekauʻaki mo e ʻofa ki he niʻihi kehé. Fakaafeʻi ʻa e fānaú ke vahevahe ʻa e meʻa ne nau hikí. Te tau lava fēfē ʻo ongoʻi ʻa e ʻofa ʻoku maʻu ʻe he ʻOtuá ki he niʻihi kehé? (vakai ki he Molonai 7:48). Ko e hā te tau lava ʻo fai ke fakahaaʻi ʻaki ʻetau ʻofa ki he niʻihi ʻi heʻetau kalasí pe ʻi hotau ngaahi fāmilí?

• Tokoniʻi ʻa e fānaú ke nau fakakakato ʻa e peesi ʻekitivitī ki he uike ní. Tokoniʻi kinautolu ke nau fakakaukau ki ha ngaahi founga ʻuhingamālie ke nau ala atu ai ʻi he ʻofa kiate kinautolu ʻoku nau kehe meiate kitautolú.

Poupouʻi e Ako ʻi ʻApí

Poupouʻi ʻa e fānaú ke nau fakaʻaliʻali ʻa e peesi ʻekitivitī ki he uike ní ʻi ha feituʻu ʻi ʻapi koeʻuhi ke fakamanatu ange kiate kinautolu ke nau ʻofa ki he niʻihi kehé. ʻOange kiate kinautolu ha faingamālie ʻi ha kalasi ʻi he kahaʻú ke vahevahe ʻa e meʻa ne nau faí.

Fakatupulaki ʻo ʻEtau Founga Akoʻí

Fulihi ʻa e ngaahi ʻekitivitií ke feʻunga mo e taʻu motuʻa ʻo e fānau ʻokú ke akoʻí. ʻOku fie maʻu ʻe he fānau iiki angé ha fakamatala ʻoku fakaikiikí mo ako mei ha ngaahi founga fakafaiako ʻoku faingofua angé. ʻI heʻenau matuʻotuʻá, te nau lava ʻo kau lahi ange pea mahalo naʻa lelei ange hono vahevahe ʻenau ngaahi fakakaukaú. ʻOange ki he fānau kotoa ha ngaahi faingamālie ʻoku taau mo e taʻumotuʻá ke vahevahe, fakamoʻoni, mo kau, pea fakapapauʻi ke fai ha tokoni ʻo ka fie maʻu. (Vakai, Ko e Faiako ʻi he Founga ʻa e Fakamoʻuí, 25–26.)