Mavahe ʻa e Kakai Sēletí mei Pēpelí, tā ʻe Albin Veselka

9–15 Nōvema

ʻEta 1–5

“Tatala ʻa e Veili Ko Ia ʻo e Taʻetuí”

Lolotonga hoʻo toe vakaiʻi e meʻa naʻá ke ako ʻi hoʻo ako e ʻEta 1–5, ko e hā ha ngaahi moʻoni ʻokú ke ongoʻi mālieʻia ke tokoniʻi e fānaú ke nau ʻiloʻí? Mahalo ʻoku ʻi ai ha ngaahi fakakaukau ʻi he fokotuʻutuʻu ko ʻení ʻe lava ʻo tokoni.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali ha fakatātā ʻo e tokoua ʻo Sēletí (vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakaafeʻi ʻa e fānaú ke vahevahe e meʻa ʻoku nau ʻilo fekauʻaki mo iá.

Akoʻi e Tokāteliné: Fānau Iiki Angé

ʻEta 1:33–43; 2:16–25; 3:1–6

ʻOku fanongo mai ʻa e Tamai Hēvaní mo tali ʻeku ngaahi lotú.

ʻOku fakatātaaʻi ʻe he talanoa ʻo e tokoua ʻo Sēletí ha ngaahi founga ʻe niʻihi ʻe lava ke tokoniʻi ai kitautolu ʻe he ʻOtuá ʻi he taimi ʻoku tau lotu aí.

Ngaahi ʻEkitivitī ʻe Ala Fakahokó

• Fakaafeʻi ha niʻihi ʻo e kāingalotu ʻi he uōtí ʻoku nau ʻilo ha lea fakafonua kehe ke nau lea ʻaki ha ngaahi sētesi ʻi he lea fakfonua ko iá, ki hoʻo kalasí (pe fanongo ki ha hiki ʻo ha leʻo ʻo ha lea fakafonua kehe). Tuku ki he fānaú ke nau lea ʻaki ha lea fakafonua kehe, pea fakamahinoʻi ange ʻa hono faingataʻa ke nau femahinoʻaki ʻi he taimi ʻoku ʻikai ai ke nau lea ʻaki ʻa e lea fakafonua tatau. Fakaʻaongaʻi ʻeni ke fakafeʻiloaki ʻaki ʻa e talanoa ʻo e Taua ʻo Pēpelí ʻi he Sēnesi 11:1–9 mo e ʻEta 1:33. Lau ʻa e ʻEta 3:13 mo e 15, pea fakamatalaʻi ange ʻa e lotu ʻa e tokoua ʻo Sēletí ke malava ke nau femahinoʻaki mo hono fāmilí mo e hono ngaahi kaungāmeʻá (vakai ki he ʻEta 1:34–37). Lau pea tokoniʻi e fānaú ke mahino kiate kinautolu ʻa e tali ʻa e ʻEikí ki heʻene lotú ʻi he ʻEta 1:35. Te ke lava foki ʻo fakaʻaongaʻi ʻa e “Vahe 50: Ko e Mavahe ʻa e Kau Sēletí mei Pēpelí” (Ngaahi Talanoa ʻo e Tohi ʻa Molomoná, 143–44, pe ko e vitiō kaunga ki ai ʻi he ChurchofJesusChrist.org).

• Fakaafeʻi ʻa e fānaú ke nau pehē pē ʻoku nau langa ha vaka, ʻo hangē ko hono fakamatalaʻi ʻi he ʻEta 2:16–17. Fakamatalaʻi ʻa e ngaahi palopalema naʻe maʻu ʻe he kakai Sēletí ʻi honau ngaahi vaká (vakai ki he ʻEta 2:19), pea fehuʻi ki he fānaú pe ko e hā te nau fai ki he ngaahi palopalema ko ʻení. Lau ʻa e ʻEta 2:18–19 ke akoʻi ki he fānaú hono ʻave ʻe he tokoua ʻo Sēletí ʻene ngaahi palopalemá ki he ʻEikí, ʻi he lotu. Fakamoʻoniʻi ange, te tau lava ʻo lotu maʻu pē ʻi he taimi ʻoku ʻi ai ai haʻatau ngaahi fehuʻi pe ngaahi palopalema.

• Fakamatala fakanounouʻi ʻa e ʻEta 2:19–3:6 ke fakamatalaʻi e tali ʻa e ʻEikí ki he ngaahi fehuʻi ʻa e tokoua ʻo Sēletí fekauʻaki mo e ngaahi vaká. Tuku holo ha ngaahi foʻi maka ʻe 16 ʻi he loki akó, pea fakaafeʻi e fānaú ke nau lau e ngaahi foʻi maká ʻi heʻenau maʻu kinautolú. Fakaʻaliʻali e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea tuku ki he fānaú ke nau toe fai ʻa e talanoá (vakai foki ki he peesi ʻekitivitī ki he uike ní).

ʻEta 3:13, 15

Naʻe ngaohi au ʻi he ʻīmisi ʻo e ʻOtuá.

ʻI he mamata ʻa e tokoua ʻo Sēletí ki he ʻEikí, naʻá ne ʻilo ai ko e “tangata kotoa pē naʻe fakatupu ʻi he kamataʻangá ʻi [Hono] tatau [ʻOʻoná]” ( ʻEta 3:15).

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo e Fakamoʻuí, pea fakaafeʻi ʻa e fānaú ke nau tuhu ki ha ngaahi konga ʻo Hono sinó. Fakamatalaʻi ange, ʻi he taimi naʻe mamata ai e tokoua ʻo Sēletí kia Sīsū Kalaisí, naʻá ne ʻiloʻi ai ʻoku tau hangē kotoa pē ko Sīsuú. ʻI hoʻo tuhu ki ha konga ʻo e sino ʻi he fakatātaá, fakaafeʻi kinautolu ke nau tuhu ki he konga tatau ʻi honau ngaahi sinó. Fakamoʻoniʻi ange naʻe ngaohi kitautolu ke tau hangē ko ʻetau Tamai Hēvaní mo Sīsū Kalaisi.

• Hivaʻi fakataha ha foʻi hiva fekauʻaki mo hotau ngaahi sinó, hangē ko e “ ʻUlu, Uma, Tui, mo e Vaʻe” (Tohi Hiva ʻa e Fānaú, 129A). Tokoniʻi e fānaú ke nau talanoa fekauʻaki mo e ʻuhinga ʻoku nau houngaʻia ai ʻi he ngaahi konga kehekehe ʻo honau sinó.

ʻOku fakatupu kitautolu ʻi he īmisi ʻo e ʻOtuá.

Akoʻi e Tokāteliné: Fānau Lalahi Angé

ʻEta 1:33–43; 2; 3:1–17

Te u lava ʻo maʻu ha fakahā ke tokoniʻi au.

Te ke tokoniʻi fēfē ʻa e fānaú ke nau ako kau ki he fakahaá, mei he sīpinga ʻa e tokoua ʻo Sēletí? Ko e hā ha ngaahi aʻusia te ke lava ʻo vahevahe, ʻi he taimi ne tokoniʻi ai koe ʻe he ʻEikí ke ke maʻu ha ngaahi tali ke fakaleleiʻi hoʻo ngaahi palopalemá pe ngaahi fehuʻí?

Ngaahi ʻEkitivitī ʻe Ala Fakahokó

• Kimuʻa he kalasí, hikiʻi ʻa e kupuʻi lea “Tuʻu hake, tafoki, pea tangutu ki lalo” ʻi he ngaahi lea fakafonua kehekehe ʻi ha ngaahi laʻi pepa (te ke lava ʻo fakaʻaongaʻi ha liliu lea ʻi he ʻinitanetí pe ko ha tokoni ha taha ʻokú ne ʻilo ha lea fakafonua kehe). ʻOange ʻa e laʻi pepa ʻe taha ki he fānaú takitaha, pea fakaafeʻi kinautolu ke nau feinga ke muimui ki he ngaahi fakahinohinó. Fakaʻaongaʻi ʻeni ke tokoni ke fakamatalaʻi e meʻa naʻá ne fakaʻaiʻai e lotu ʻa e tokoua ʻo Sēletí ʻi he ʻEta 1:33–37. Lau fakataha ʻa e ngaahi veesi ko ʻení, pea kole ki he fānaú ke nau tokanga ki he ongo naʻe maʻu ʻe he ʻEikí kia Sēleti mo hono ngaahi kaungāmeʻá mo e fāmilí. Ko e hā ʻoku tau ako mei he talanoa ko ʻení fekauʻaki mo e lotú?

• Vahe ki he tamasiʻi takitaha ke ne lau ha taha ʻo e ngaahi potufolofola ko ʻení, pea tokoniʻi kinautolu ke nau kumi ki ha foʻi fehuʻi pe palopalema naʻe maʻu ʻe he tokoua ʻo Sēletí: ʻEta 1:33–35; ʻEta 1:36–37; mo e ʻEta 2:18–20. Ko e hā e meʻa naʻe fai ʻe he tokoua ʻo Sēletí ki he ngaahi palopalema mo e ngaahi fehuʻi ko ʻení? Naʻe tokoniʻi fēfē nai ia ʻe he ʻEikí ʻi he tūkunga takitaha? Fakaafeʻi ʻa e fānaú ke nau fakakaukau ki ha ngaahi palopalema ʻoku nau fie maʻu tokoni ai. Te nau lava fēfē ʻo muimui ki he sīpinga ʻo e tokoua ʻa Sēletí ke maʻu ha ngaahi solovaʻanga ki heʻenau ngaahi palopalemá? Vahevahe ha aʻusia ʻa ia naʻá ke lotua ai ha tokoni pea tokoniʻi koe ʻe he ʻEikí.

ʻEta 3:4–17

Naʻe ngaohi au ʻi he ʻīmisi ʻo e ʻOtuá.

ʻE fetaulaki e fānau ʻokú ke akoʻí mo ha ngaahi pōpoaki hala lahi fekauʻaki mo e ʻOtuá, fekauʻaki mo kinautolu, pea mo honau ngaahi sino fakamatelié. Ko e ngaahi veesi ko ʻení ko ha faingamālie ia ke akoʻi ai ha ngaahi moʻoni taʻengata fekauʻaki mo e ngaahi tefito ko ʻení.

Ngaahi ʻEkitivitī ʻe Ala Fakahokó

• Lau mo e fānaú ʻa e ʻEta 3:6–16, pea tokoniʻi kinautolu ke nau faʻu ha lisi ʻo e ngaahi meʻa naʻe ako ʻe he tokoua ʻo Sēletí mei he aʻusia ko ʻení fekauʻaki mo e ʻEikí. Ko e hā e ʻuhinga ʻoku mahuʻinga ai ke tau ʻiloʻi e ngaahi meʻa ko ʻení? Hangē ko ʻení, ʻoku anga fēfē ʻa e kaunga ʻetau ʻilo naʻe fakatupu kitautolu ʻi he tatau ʻo e ʻEikí, ki he anga ʻetau vakai ki hotau sinó?

• Tohiʻi ʻa e sino fakamatelie mo e sino fakalaumālie ʻi he palakipoé. Fakaafeʻi ʻa e fānaú ke nau vahevahe ha ngaahi ʻulungāanga ʻo ha sino fakamatelie (ʻoku tau maʻu e kili, toto, mo e alā meʻa pehē), pea hiki ʻenau ngaahi talí ʻi he palakipoé. Lau fakataha ʻa e ʻEta 3:4–17 pea fakaafeʻi ʻa e fānaú ke nau fekumi ki he meʻa naʻa nau ako fekauʻaki mo hotau ngaahi sino fakalaumālié. Fakamoʻoniʻi ange, ko hotau ngaahi sinó mo e ngaahi laumālié “naʻe fakatupu ʻi [he] tatau [ʻo Sīsuú]” ( ʻEta 3:15).

ʻEta 5:2–4

Fakamoʻoni ʻa e toko tolu ki he Tohi ʻa Molomoná.

Naʻe kikite ʻa Molonai ʻe tokoni ha Kau Fakamoʻoni ʻe Toko Tolu ki hono fokotuʻu ʻa e moʻoni ʻo e Tohi ʻa Molomoná. Te ke lava ʻo fakaʻaongaʻi ʻa e kikite ko ʻení ke fakamālohia ʻaki ʻa e ngaahi fakamoʻoni ʻa e fānaú pea ueʻi fakalaumālie kinautolu ke nau hoko ko ha kau fakamoʻoni ʻo e Tohi ʻa Molomoná ʻi he ngaahi founga pē ʻanautolu.

Ngaahi ʻEkitivitī ʻe Ala Fakahokó

• Hikiʻi ʻi he palakipoé ha niʻihi ʻo e ngaahi lea mahuʻinga mei he ʻEta 5:2–4, hangē ko e ʻū peletí, mālohí, moʻoni, kau fakamoʻoní, mo e fakamoʻoni. Lau mo e fānaú ʻa e ngaahi veesi ko ʻení, pea fakaafeʻi kinautolu ke nau taʻofi ʻi he taimi te mou aʻu ai ki he taha ʻo e ngaahi foʻi lea ʻi he palakipoé pea talanoa kau ki he ʻuhinga ʻoku mahuʻinga ai ʻa e ngaahi lea ko ʻení. Ke akoʻi e fānaú kau ki he Kau Fakamoʻoni ʻe Toko Tolú, te ke lava ʻo fakafehokotaki ki he “Vahe 7: Ko e Mamata ʻa e Kau Fakamoʻoní ki he ʻŪ Lauʻi Peleti Koulá” (Ngaahi Talanoa ʻo e Tokāteline mo e Ngaahi Fuakavá, 31–33) mo e “Ko e Fakamoʻoni ʻa e Kau Fakamoʻoni ʻe Toko Tolú” ʻi he Tohi ʻa Molomoná. Ko e hā e ʻuhinga naʻe fie maʻu ai ʻe he ʻOtuá ha kakai ʻe toko tolu ke nau mamata ki he ʻū lauʻi peleti koulá?

• Talanoa ki he fānaú ʻa hoʻo ʻilo ʻoku moʻoni ʻa e Tohi ʻa Molomoná. Fakaafeʻi ʻa e fānaú ke nau vahevahe e ʻuhinga ʻoku nau ʻilo ai ʻoku moʻoní. Tokoniʻi kinautolu ke nau fakakaukau ki ha ngaahi founga te nau lava ai ʻo hoko ko ha kau fakamoʻoni ʻo e Tohi ʻa Molomoná, pea poupouʻi kinautolu ke vahevahe ʻenau fakamoʻoní mo ha taha ʻi he uiké ni.

Poupouʻi e Ako ʻi ʻApí

Fakaafeʻi ʻa e fānaú ke nau fakakaukau ki ha meʻa te nau lava ʻo kolea ki ai e tokoni ʻa e Tamai Hēvaní, ʻo hangē ko ia naʻe fai ʻe he tokoua ʻo Sēletí. Poupouʻi kinautolu ke nau fekumi ki Heʻene tokoní ʻo fakafou ʻi he lotu.

Fakatupulaki ʻo ʻEtau Founga Akoʻí

Akoʻi lolotonga ʻa e ngaahi ʻekitivitií. Lolotonga hono fai ʻe he fānaú ha ngaahi ʻekitivitī hangē ko e tā fakatātā pe ko e ngāue ʻi ha peesi ʻekitivitī, te ke lava ʻo fakaʻaongaʻi ʻa e taimi ko iá ke fakamamafaʻi ai e ngaahi moʻoni ʻoku akoʻi mai ʻi he ngaahi ʻekitivitī ko iá.