Te U ʻOhake ʻA Kimoutolu mei he Loloto ʻo e Tahí, tā ʻe Jonathan Arthur Clarke

16–22 Nōvema

ʻEta 6–11

“Koeʻuhí Ke Fakangata ʻa e Angahalá”

Ko e ngaahi fakakaukau ʻi he fokotuʻutuʻu ko ʻení ʻoku ʻikai ko ha ngaahi fakahinohino ia kuo pau ke ke muimui ki ai. ʻOku ʻuhinga ia ke kamata ai hoʻo palaní mo fakaafeʻi mai ha ueʻi fakalaumālie.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaongaʻi e ngaahi fakatātā mei he fokotuʻutuʻu ki he uike ní mo e mo e uike kuo ʻosí ʻi he Haʻu, ʻo Muimui ʻIate au—Maʻá e Fakafoʻituituí mo e Ngaahi Fāmilí ke tokoniʻi ke toe vakaiʻi ʻe he fānaú ʻa e meʻa ne nau ako fekauʻaki mo e fononga ʻa e kakai Sēletí ʻi he tahí. Tuku ke nau taufetongi ʻi hono vahevahe ʻa e meʻa ʻoku nau ʻiló.

Akoʻi e Tokāteliné: Fānau Iiki Angé

ʻEta 6:2–12

ʻOku lava ke fakanonga au ʻe he Tamai Hēvaní ʻi he taimi ʻoku ou ilifia aí.

Pau pē naʻe fakailifia ki he kakai Sēletí ke “fetekeʻaki ʻa kinautolu ʻi he ngaahi peau ʻo e tahí ʻe he matangí” ( ʻEta 6:5). Ka naʻe maluʻi mo tokoniʻi kinautolu ʻe he ʻEikí. Te ke tokoniʻi fēfē ʻa e fānaú ke nau tafoki ki he ʻEikí ʻi he taimi ʻoku nau ongoʻi ilifia aí?

Ngaahi ʻEkitivitī ʻe Ala Fakahokó

• Fakaʻaongaʻi e ngaahi lea mo e kupuʻi lea mei he ʻEta 6:2–12, ke fakamatalaʻi ki he fānaú ʻa e fononga e kakai Sēletí ʻi he tahí. Fakaafeʻi ʻa e fānaú ke nau pehē pē ʻoku nau kaka ki ha ngaahi vaka pea ʻoku ueʻi mo kāpui ʻa e vaká ʻe he ngaahi peaú. Ko e hā ʻa e ongo ʻe maʻu ʻokapau ʻokú te ʻi ha vaka moʻoni ʻi ha tahi hou? Ko e hā te tau lava ʻo fai ʻi he taimi ʻoku tau ilifia aí? Lau fakataha ʻa e veesi 7 mo e 9 ke vakai ki he meʻa naʻe fai ʻe he kakai Sēletí ʻi he taimi ne nau ilifia aí.

• Talanoa ki ha taimi naʻá ke ilifia ai pea fakanonga koe ʻe he Tamai Hēvaní. Vahevahe mo e fānaú ha himi pe ko ha foʻi hiva ʻokú ne tokoniʻi koe ke ke “fakamālō mo fakafetaʻi ki he ʻEikí” ( ʻEta 6:9) ʻi Heʻene tokoní. Tuku ki he fānaú ke nau vahevahe ʻenau ngaahi hiva manako ʻi he Palaimelí, pea hivaʻi fakataha ha niʻihi ʻo e ngaahi hiva ko iá.

• Fakaʻaongaʻi e peesi ʻekitivitī ki he uike ní ke tokoniʻi e fānaú ke nau faʻu ha fanga kiʻi vaka laʻi pepa. Fakamatalaʻi ange naʻe tokoni ʻa e ngaahi vaká ke malu ʻa e kakai Sēletí neongo e taimi naʻe ʻātakaiʻi ai kinautolu ʻe he vaí (vakai ki he ʻEta 6:7, 10). Ko e hā kuo foaki mai ʻe he Tamai Hēvaní kiate kitautolu ke tau malu ʻi heʻetau faifononga foki kiate Iá?

ʻEta 6:9, 12, 30; 7:27; 10:2

Te u lava ʻo fakamālōʻia.

Hili ʻenau tūʻuta hao ki he fonua ʻo e talaʻofá, naʻe fakamālōʻia ʻa e kakai Sēletí ko ia ne nau “tangi ʻa loʻimata ʻi heʻenau fiefiá” ( ʻEta 6:12). Te ke poupouʻi fēfē ha laumālie ʻo e fakamālōʻia ʻi he fānau ʻokú ke akoʻí?

Ngaahi ʻEkitivitī ʻe Ala Fakahokó

• Lau ki he fānaú ha ngaahi kupuʻi lea mei he ʻEta 6:9 mo e 12 ke akoʻi kiate kinautolu e founga naʻe fakahaaʻi ai ʻe he kakai Sēletí ʻenau houngaʻia ʻi hono tokoniʻi kinautolu ʻe he ʻEikí ke nau tūʻuta ki he fonua ʻo e talaʻofá. Kole ki he fānaú ke nau talaatu ha ngaahi meʻa ʻoku nau houngaʻia ai. Hangē ko ia naʻe fai ʻe he kakai Sēletí, hivaʻi ha foʻi hiva ʻokú ne fakahaaʻi ʻa e houngaʻiá, hangē ko e “ ʻOku ou Fakamālō Atu ʻe Tamai” (Tohi Hiva ʻa e Fānaú, 9).

• Lau ki he fānaú ʻa e ʻEta 10:2 ke fakahaaʻi neongo ne ʻosi ha ngaahi taʻu lahi, ka naʻe manatuʻi ʻe he kakai Sēletí ʻa hono tokoniʻi ʻe he ʻEikí ʻenau ngaahi kuí ke nau kolosi ʻi he ʻōsení. Tokoniʻi e fānaú ke nau fakakaukau ki ha ngaahi founga kuo faitāpuekina ai kinautolu ʻe he ʻEikí. Tuku leva ki he fānaú ke nau tā ha ngaahi fakatātā ke fakamanatu kiate kinautolu ʻa e ngaahi tāpuaki ko ʻení (pe tokoniʻi kinautolu ke nau fili mei ha niʻihi ʻo e ngaahi fakatātā ʻokú ke ʻomí, mahalo mei ha makasini ʻa e Siasí).

ʻEta 7:24–27

ʻOku tāpuekina au ʻi heʻeku muimui ki he palōfitá.

ʻOku hā mahino mai ʻi he tohi ʻa ʻEtá, ko e taimi naʻe muimui ai ʻa e kakai Sēletí ki he kau palōfitá, naʻe faitāpuekina kinautolu, pea ko e taimi ne nau fakasītuʻaʻi ai ʻa e kau palōfitá, naʻe faingataʻa ange ʻenau moʻuí. Fakakaukau ki ha ngaahi founga te ke lava ai ʻo tokoniʻi e fānaú ke nau ʻiloʻi ʻoku hoko tatau ʻeni kiate kitautolu.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo e palōfita moʻuí, pea fehuʻi ki he fānaú ʻa e meʻa ʻoku nau ʻilo fekauʻaki mo iá. Ko e hā e meʻa ʻoku fai ʻe ha palōfita? Fakamatalaʻi ange naʻe ʻi ai foki mo ha kau palōfita ʻa e kakai Sēletí, pea ko e taimi pē ne nau muimui ai ki he palōfitá, naʻe tāpuekina kinautolu pea nau fiefia (vakai ki he ʻEta 7:24–27). Te tau lava fēfē ʻo muimui ki he palōfitá?

• Hivaʻi fakataha ha foʻi hiva fekauʻaki mo e kau palōfitá, hangē ko e “Muimui He Palōfitá” (Tohi Hiva ʻa e Fānaú, 58–59; vakai foki ki he Tohi Fakatātā ʻo e Ongoongoleleí, fika 4–27, 67–87). Talanoa mo e fānaú kau ki he ngaahi meʻa kuo akoʻi mai ʻe he kau palōfitá ke tau fai (hangē ko e lau fakaʻaho ʻetau ngaahi folofolá, tauhi e ʻaho Sāpaté ke māʻoniʻoní, pe tokoniʻi e niʻihi kehé), pea fakaafeʻi kinautolu ke nau fakatātaaʻi e talangofua ki he akonaki ko iá ʻi he taimi te ke pehē ai “Muimui ki he palōfitá!”

Akoʻi e Tokāteliné: Fānau Lalahi Angé

ʻEta 6:2–12

Te u lava ʻo falala ki he Tamai Hēvaní ke Ne tataki au ki he moʻui taʻengatá.

ʻE lava ke fakafehoanaki e talanoa ʻo e faifononga ʻa e kakai Sēletí ʻi he tahí, ki heʻetau faifononga ʻi he moʻui fakamatelié. ʻOku fakatuʻutāmaki ʻi he taimi ʻe niʻihi ʻa e ongo faifonongá pea fie maʻu ʻa e tui ʻe fakahinohinoʻi mo maluʻi kitautolu ʻe he ʻEikí.

Ngaahi ʻEkitivitī ʻe Ala Fakahokó

• Lau fakataha ʻa e ʻEta 6:2–12, ʻo taʻofi ʻi ha ngaahi taimi kae lava ke tā ʻe he fānaú ha ngaahi fakatātā ʻo e ngaahi meʻa ʻoku nau laú. ʻOku tatau fēfē nai ʻa e faifononga ʻa e kakai Sēletí, mo ʻetau moʻuí? Tokoniʻi ʻa e fānaú ke nau feinga ke ʻiloʻi mo fakahingoa e ngaahi meʻa ʻoku ala fakafofongaʻi ʻe he konga kehekehe ʻo ʻenau ngaahi fakatātaá, ʻi heʻetau ngaahi moʻuí. Hangē ko ʻení, ʻe lava ke fakafofongaʻi ʻe he kakai Sēletí ʻa kitautolu. ʻE lava ke fakafofongaʻi ʻe he ngaahi vaká ʻa hotau ngaahi ʻapí, ʻa e Siasí, pe ko e ongoongoleleí. Ko e hā ʻoku ala fakafofongaʻi ʻe he matangí, vaí, ngaahi foʻi maka ngingilá mo e fonua ʻo e talaʻofá?

• Tokoniʻi e fānaú ke nau kumi ha ngaahi foʻi lea pe kupuʻi lea ʻi he ʻEta 6:2–12 ʻokú ne fakahaaʻi ʻa e falala e kakai Sēletí ki he ʻOtuá. Vahevahe ha ngaahi sīpinga ʻo e founga kuo tokoniʻi ai koe ʻe he falala ki he ʻOtuá, lolotonga e ngaahi taimi faingataʻa ʻi hoʻo moʻuí. Poupouʻi e fānaú ke nau vahevahe ha faʻahinga aʻusia tatau kuo nau maʻu.

  

  Fononga ʻa e kakai Sēletí ʻo fou atu ʻi ʻĒsiá, tā ʻe Minerva Teichert

ʻEta 6:30; 7:27; 10:2

ʻOku ʻomi ʻe hono manatuʻi ʻa e meʻa kuo fai ʻe he ʻEikí maʻakú, ʻa e melino.

Ko e taha ʻo e ngaahi meʻa naʻe kehe ai ʻa e ngaahi tuʻi angatonu ʻo e kakai Sēletí mei he ngaahi tuʻi faiangahalá, ko e ngaahi tuʻi angatonú naʻa nau “manatuʻi ʻa e ngaahi meʻa maʻongoʻonga kuo fai ʻe he ʻEikí” maʻanautolú ( ʻEta 7:27). Te ke lava fēfē ʻo ueʻi fakalaumālie ʻa e fānaú ke nau manatuʻi ʻa e meʻa kuo fai ʻe he ʻEikí maʻanautolú?

Ngaahi ʻEkitivitī ʻe Ala Fakahokó

• Kole ki he fānaú ke nau lau fakafoʻituitui ʻa e ʻEta 6:30; 7:27; mo e 10:2 pe ʻi ha ngaahi kulupu iiki, pea kumi ha meʻa ʻoku faitatau ai ʻa e ngaahi veesi ko ʻení. Vahevahe hoʻo ngaahi ongo kau ki he meʻa kuo fai ʻe he ʻEikí maʻau, pea fakaafeʻi ʻa e fānaú ke nau fai ʻa e meʻa tatau.

• Vahevahe ki he fānaú kau ki he founga ʻokú ke feinga ai ke manatuʻi e ngaahi founga kuo tāpuekina ai koe mo hoʻo fāmilí ʻe he ʻEikí. Tokoniʻi e fānaú ke nau fakakaukau ki ha ngaahi founga te nau lava ai ʻo fakamanatu kiate kinautolu ʻa e meʻa kuo fai ʻe he ʻEikí maʻanautolú. ʻOange kiate kinautolu takitaha ha laʻipepa, pea fakaafeʻi kinautolu ke nau fakalaulauloto pea tohiʻi ha meʻa kuó Ne fai maʻanautolu kimuí ni mai. Fokotuʻu ange ke nau feinga ke nau anga ki hono hiki e ngaahi tāpuaki ʻoku nau fakatokangaʻi ʻoku mei he ʻEikí (vakai, “O Remember, Remember” [vitiō, ChurchofJesusChrist.org]).

ʻEta 9:28–35; 11:5–8

ʻOku ʻaloʻofa ʻa e ʻEikí ʻi he taimi ʻoku ou fakatomala aí.

Neongo naʻe faʻa fakasītuʻaʻi ʻe he kakai Sēletí ʻa e kau palōfitá pea nau faiangahala, ka naʻe fakamolemoleʻi maʻu pē kinautolu ʻe he ʻEikí ʻi he taimi naʻa nau loto-fakatōkilalo ai mo fakatomalá.

Ngaahi ʻEkitivitī ʻe Ala Fakahokó

• Lau fakataha ʻa e ʻEta 9:28–35, pea tokoniʻi e fānaú ke nau fakakaukau ki ha ngaahi sētesi ʻe tolu pe fā ʻokú ne fakamatala fakanounouʻi ʻa e meʻa naʻe hoko ʻi he ngaahi veesi ko ʻení. Lau leva ʻa e ʻEta 11:5–8, pea tokoniʻi e fānaú ke nau feinga ke ʻiloʻi e ngaahi faitatau ʻi he vahaʻa ʻo e ongo talanoá. Ko e hā ʻoku tau ako mei he ngaahi talanoa ko ʻení?

• Kole ki he fānaú ke nau fakakaukau ki ha niʻihi kehe ʻi he Tohi ʻa Molomoná naʻa nau loto-fakatōkilalo pea fakamolemoleʻi ai kinautolu. Fakaʻaongaʻi e ngaahi fakatātā mei he Tohi Fakatātā ʻo e Ongoongoleleí pe Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke tokoni ke nau manatuʻi. Vahevahe hoʻo fakamoʻoni ʻoku fakamolemoleʻi kitautolu ʻe he ʻEikí ʻi he taimi ʻoku tau fakatomala fakamātoato aí.

Poupouʻi e Ako ʻi ʻApí

Fakaafeʻi ʻa e fānaú ke nau vahevahe mo honau ngaahi fāmilí ha meʻa kuo fai ʻe he Tamai Hēvaní maʻanautolu, ʻoku nau houngaʻia ai.

Fakatupulaki ʻo ʻEtau Founga Akoʻí

Tokoniʻi e fānaú ke nau mohu founga. “ʻI hoʻo akoʻi ʻa e fānaú, tuku ke nau faʻu, tā fakatātaaʻi, valivali, tohi pe faʻu. ʻOku mahulu hake e ngaahi meʻá ni ia ko ha fanga kiʻi ʻekitivitī fakafiefia peé—ʻoku mahuʻinga ia ki he akó” (Ko e Faiako ʻi he Founga ʻa e Fakamoʻuí,25).