Naʻe Ulo Kiate Kinautolu ʻa e Maama ʻA Hono Fofongá, tā ʻe Gary L. Kapp

28 Sepitema–11 ʻOkatopa

3 Nīfai 17–19

“Vakai, ʻOku Kakato ʻa ʻEku Fiefiá”

ʻI hoʻo lau ʻa e 3 Nīfai 17–19, fakakaukau ki ha ngaahi potufolofola, aʻusia, ʻekitivitī, mo e ngaahi talanoa ʻe tokoni ke mahino ki he fānaú ʻa e ngaahi moʻoni ʻi he ngaahi vahe ko ʻení.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali ha fakatātā ʻo e Fakamoʻuí, pea fakaafeʻi ʻa e fānaú ke nau vahevahe ʻa e ongo te nau ala maʻu kapau te Ne ʻaʻahi mai kiate kinautolu ʻo hangē ko ʻEne ʻaʻahi ki he kau Nīfaí.

Akoʻi e Tokāteliné: Fānau Iiki Angé

3 Nīfai 17:7, 20–25

ʻOku ʻofa ʻa e Fakamoʻuí ki he kotoa ʻo e fānau ʻa e Tamai Hēvaní.

Naʻe fakahaaʻi ʻe Sīsū ʻEne ʻofa ki he fānaú ʻi he taimi naʻá Ne tāpuakiʻi mo lotua ai ʻakinautolú. Te ke tokoniʻi fēfē ʻa e fānau ʻokú ke akoʻí ke nau ongoʻi ʻEne ʻofa kiate kinautolú?

Ngaahi ʻEkitivitī ʻe Ala Fakahokó

• Fakamatala fakanounouʻi ʻa e talanoa ʻi he 3 Nīfai 17 lolotonga hono fakahaaʻi ha fakatātā ʻo hangē ko ia ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Pe te ke fakaʻaongaʻi ʻa e “Vahe 44: Ko Hono Tāpuakiʻi ʻe Sīsū Kalaisi ʻa e Fānau Īkí,” (Ngaahi Talanoa ʻo e Tohi ʻa Molomoná, 124–25, pe ko e vitiō kaunga ki ai ʻi he ChurchofJesusChrist.org). Lau ha ngaahi potufolofola pe veesi mei he 3 Nīfai 17 ʻokú ne fakamamafaʻi ʻa e ʻofa ʻa e Fakamoʻuí ki he kakaí (hangē ko e veesi 7 mo e 20–25). Tuku ki he fānaú ke nau taufetongi ʻi hono puke ʻa e fakatātaá pea talanoa ki he meʻa naʻe fai ʻe Sīsū koeʻuhi ko ʻEne ʻofa ʻi he kakaí.

• Fakaʻaongaʻi ʻa e peesi ʻekitivitī ki he uike ní ke tokoniʻi e fānaú ke nau tā ha fakatātā ʻo kinautolu mo Sīsū. ʻI heʻenau fai iá, tokoniʻi ke nau fakakaukau ki ha ngaahi founga kuo fakahaaʻi ai ʻe Sīsū ʻEne ʻofa kiate kinautolú.

  

  Vakai ki Hoʻomou Fānau Īkí, tā ʻe Gary L. Kapp

3 Nīfai 18:1–12

Te u lava ʻo fakakaukau kia Sīsū ʻi he taimi ʻoku ou maʻu ai ʻa e sākalamēnití.

ʻOku lahi ha ngaahi meʻa te ne lava ʻo fakahohaʻasi ha kiʻi tamasiʻi pe taʻahine lolotonga ʻa e sākalamēnití. Te ke tokoniʻi fēfē ʻa e fānau ʻi hoʻo kalasí ke mahino ʻa hono mahuʻinga ʻo e fakakaukau ki he Fakamoʻuí mo ʻEne ʻofa kiate kinautolu lolotonga ʻa e ouau toputapu ko ʻení?

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau talaatu ʻa e meʻa ʻoku hoko lolotonga ʻa e sākalamēnití. Lau ha ngaahi veesi mei he talanoa ʻo hono tāpuakiʻi ʻe Sīsū ʻa e sākalamēnití ki he kau Nīfaí (vakai ki he 3 Nīfai 18:1–12), pea kole ki he fānaú ke nau tuʻu ki ʻolunga ʻi he taimi ʻoku nau fanongo ai ki ha meʻa ʻoku tatau mo ia ʻoku tau fai lolotonga ʻa e sākalamēnití. Ko e hā e meʻa ʻoku finangalo ʻa Kalaisi ke tau “manatu” pe fakakaukau ki ai lolotonga ʻa e sākalamēnití? (vakai ki he 3 Nīfai 18:7, 11).

• Ngūnguuʻi, hivaʻi, pe tā ha foʻi himi pe ko ha hiva Palaimeli lolotonga hono valivali ʻe he fānaú ʻa e ngaahi fakatātā ʻe lava tokoni ke nau manatuʻi ʻa e Fakamoʻuí lolotonga ʻa e sākalamēnití (vakai ki he peesi ʻekitivitī ki he uike ní). Poupouʻi kinautolu ke nau vakai ki he ngaahi fakatātā ko ʻení ke tokoni ke nau manatuʻi ʻa Sīsū ʻi he taimi ʻoku nau maʻu ai ʻa e sākalamēnití.

3 Nīfai 18:15, 20–21, 24; 19:16–17, 30

ʻOku akoʻi au ʻe Sīsū ki he founga ʻo e lotú.

Ko e hā ʻokú ke ako fekauʻaki mo e lotú lolotonga hoʻo ako ʻa e 3 Nīfai 17–19? Te ke fakaʻaongaʻi fēfē ʻa e meʻa ʻokú ke akó ke akoʻi ʻa e fānaú ki he founga ʻo e lotú?

Ngaahi ʻEkitivitī ʻe Ala Fakahokó

• Fakaʻaliʻali ha ngaahi fakatātā ʻo ha kakai ʻoku nau lotu (hangē ko kinautolu ʻi he “Vahe 46: Ko e Akonaki mo Lotu ʻa Sīsū Kalaisi mo e Kau Nīfaí” ʻi he Ngaahi Talanoa ʻo e Tohi ʻa Molomoná, 128–30). Fakaafeʻi ʻa e fānaú ke nau tala atu ha ngaahi fakaikiiki ʻi he fakatātaá ʻokú ne fakahaaʻi ʻoku lotu ʻa e kakai ko ʻení. Lau ʻa e 3 Nīfai 19:16–17 ke fakamatalaʻi ki he fānaú naʻe akoʻi mai ʻe Sīsū ʻa e founga ki he lotú. Tuku ki he fānaú ke nau talaatu ʻa ʻenau ongo ʻi he taimi ʻoku nau lotu aí.

• Lau ʻa e 3 Nīfai 18:21, pea fakaafeʻi ʻa e fānaú ke nau tā ha fakatātā ʻoku nau lotu pe ko e lotu ʻa honau ngaahi fāmilí. Poupouʻi ʻa e fānaú ke nau fakaafeʻi honau ngaahi fāmilí ke lotu mo kinautolu.

• Hivaʻi fakataha ha foʻi hiva fekauʻaki mo e lotú, hangē ko e “Lotu ʻa ha Kiʻi TamasiʻiTohi Hiva ʻa e Fānaú, 6). Fakaafeʻi ʻa e fānaú ke vahevahe ʻa e meʻa ʻoku nau ako fekauʻaki mo e lotú mei he hivá. Vahevahe hoʻo fakamoʻoni ki he lotú.

Akoʻi e Tokāteliné: Fānau Lalahi Angé

3 Nīfai 17

ʻOku ʻofa ʻa e Fakamoʻuí ʻi he fānau ʻa e Tamai Hēvaní.

Naʻe akoʻi ʻe Palesiteni ʻEselā Tafu Penisoni ʻo pehē: “ʻOku ou palōmesi atu, siʻi fānau ʻofeina, ʻe tokoni atu foki ʻa e kau ʻāngeló kiate kimoutolu. Mahalo he ʻikai te mou mamata kiate kinautolu, ka te nau tokoni atu kiate kimoutolu, pea te mou ongoʻi ʻenau ʻiate kimoutolú” (“To the Children of the Church,” Ensign, May 1989, 83).

Ngaahi ʻEkitivitī ʻe Ala Fakahokó

• Lau fakataha ha ngaahi veesi mei he 3 Nīfai 17 ʻokú ke ongoʻi ʻe ʻuhingamālie ki he fānau ʻokú ke akoʻí. ʻI hoʻo lau ʻa e veesi takitaha, kole ki he fānaú ke nau fili ha foʻi lea pe kupuʻi lea ʻoku nau pehē ʻoku mahuʻinga pea vahevahe ʻa e ʻuhinga naʻe ʻuhingamālie ai ʻa e ngaahi lea ko iá kiate kinautolú. Fakamoʻoniʻi ange ʻoku ʻofa lahi ʻa Sīsū ʻi he fānaú, pea ko e ʻuhinga ʻeni naʻá ne tāpuekina mo lotua ai kinautolú.

• Fakaafeʻi ʻa e fānaú ke vahevahe ʻa e ongo te nau ala maʻu kapau ne nau ʻi he haʻohaʻonga ʻo e fānau ʻa ia naʻe tāpuekina ʻe he Fakamoʻuí. Kapau ʻe lava, huluʻi e vitiō, “My Joy Is Full” (ChurchofJesusChrist.org) ke tokoni ke nau fakakaukauloto ki he meʻa ko ʻeni naʻe hokó. Ko e hā naʻe fai ʻe he Fakamoʻuí ke fakahaaʻi ʻaki ʻEne ʻofá? Ko e hā te tau lava ʻo fai ke teuteuʻi ai kitautolu ke tau nofo mo Ia ʻi he taimi ʻe toe hāʻele mai aí?

3 Nīfai 18:1–12

ʻI heʻeku toʻo ʻa e sākalamēnití, ʻe lava ke fakafonu ʻaki au ʻa e Laumālie Māʻoniʻoní.

Te tau lava ʻo ako mei he 3 Nīfai 18 fekauʻaki mo e mahuʻinga ʻo e sākalamēnití ki he Fakamoʻuí. Te ke tokoniʻi fēfē ʻa e fānaú ke nau ongoʻi ʻoku mahuʻinga ia kiate kinautolu?

Ngaahi ʻEkitivitī ʻe Ala Fakahokó

• Tokoniʻi ʻa e fānaú ke nau lau ʻa e 3 Nīfai 18:1–12. Ko e hā ʻoku nau ako mei he ngaahi veesi ko ʻení fekauʻaki mo e sākalamēnití? Tokoniʻi kinautolu ke nau lau ʻa e lotu ʻo e sākalamēnití ʻi he Tokāteline mo e Ngaahi Fuakava 20:77 mo e 79 pea kumi ha ngaahi lea mo e ngaahi kupuʻi lea ʻi he lotú ʻoku toe maʻu ʻi he 3 Nīfai 18:1–12. ʻOku ʻuhinga nai ki he hā ʻa e ngaahi lea mo e ngaahi kupuʻi lea ko ʻení? Te tau teuteu fēfē ke tau maʻu ʻa e sākalamēnití? Ko e hā ʻoku tau palōmesi, pe fuakava, ke fai ʻi he taimi ʻoku tau maʻu ai ʻa e sākalamēnití?

• Hivaʻi fakataha ha foʻi hiva fekauʻaki mo e loto ʻapasiá, hangē ko e “Loto ʻApasia” (Tohi Hiva ʻa e Fānaú, 11). ʻE tokoniʻi fēfē nai kitautolu ʻe he maʻu ʻa e sākalamēnití ʻi he loto ʻapasiá, ke tau ongoʻi ai ʻa e Laumālié? ʻOkú ne tokoniʻi fēfē nai ai kitautolu ke tau fai ʻa e ngaahi fili māʻoniʻoní?

3 Nīfai 18:15–24; 19:6–9, 15–36

ʻE tokoniʻi au ʻe he lotú ke u ofi ki he Tamai Hēvaní.

Te tau lava ʻo ongoʻi ʻoku ofi mai ʻa e Tamai Hēvaní ʻo fakafou ʻi he lotu. Ko e hā ha ngaahi pōpoaki fekauʻaki mo e lotú ʻi he 3 Nīfai 18–19 ʻe tokoni ki he fānau ʻokú ke akoʻí ke fakatupulaki ʻenau ngaahi lotú?

Ngaahi ʻEkitivitī ʻe Ala Fakahokó

• Hiki ʻa e ngaahi fakamoʻoni fakafolofola ko ʻení ʻi ha ngaahi laʻipepa, pea ʻoange ia ki he fānau takitaha pe ki ha ngaahi kulupu iiki: 3 Nīfai 18:15; 3 Nīfai 18:20; 3 Nīfai 18:21; 3 Nīfai 19:19; mo e 3 Nīfai 19:24. Fakaafeʻi ʻa e fānaú ke nau lau a e ngaahi potufolofolá, ʻo kumi ha ngaahi meʻa naʻe akoʻi ʻe Sīsū Kalaisi pe ko ʻEne kau ākongá fekauʻaki mo e lotú. Kole ange ke nau lipooti ʻa e meʻa ʻoku nau akó ki he kalasí.

• Hiki ʻi he palakipoé ʻa e ʻOku ou fakamālō atu ʻi he . ʻOange ki he fānaú ha miniti ʻe taha ke nau fakakaukau ki he lahi taha ʻo e ngaahi meʻa te nau lava ke fakafonu ʻaki ʻa e ngaahi konga ʻataá. Ko e hā e ʻuhinga ʻoku lelei ai ke tau fakahaaʻi ʻetau houngaʻiá ki he Tamai Hēvaní? Hikiʻi leva ʻa e ʻOku ou kole atu ʻi he palakipoé, pea lau fakataha ʻa e 3 Nīfai 18:18–21 mo e 19:9, 23, ʻo kumi ki ha ngaahi fakakaukau fekauʻaki mo e meʻa ʻoku totonu ke tau lotuá.

• Vahevahe hoʻo fakamoʻoní pe ko ha aʻusia fakataautaha fekauʻaki mo e mālohi ʻo e lotú, pea poupouʻi ʻa e fānaú ke nau vahevahe ʻenau ngaahi fakamoʻoní pe ngaahi aʻusiá.

Poupouʻi e Ako ʻi ʻApí

Poupouʻi ʻa e fānaú ke nau talanoa ki heʻenau ngaahi mātuʻá pe mēmipa kehe ʻo honau fāmilí fekauʻaki mo e founga te nau lava ʻo maʻu ai ha aʻusia ʻuhingamālie ange ʻi he sākalamēnití ʻi he Sāpate ka hokó.

Fakatupulaki ʻEtau Akoʻí

Tokoniʻi e fānau īkí ke nau ako mei he folofolá. Ke tokoni ki he fānaú ke nau ako mei he folofolá, nofotaha ʻi ha veesi pē ʻe taha ʻo e folofolá pea naʻa mo ha kupuʻi lea mahuʻinga pē. Mahalo te ke lava fakaafeʻi ʻa e fānaú ke nau tuʻu ki ʻolunga ʻi he taimi ʻoku nau fanongo ai ki ha foʻi lea pau pe kupuʻi lea.