matavuvale ena teveli ni vakayakavi

Sotavi na Nodra Gagadre na Gone era Vakaleqai tu

O ira na iliuliu ni Lalai e sa nodra itavi me ra vakavulica na kosipeli i Jisu Karisito vei ira kece na gone, oka kina o ira era vakaleqai tu vakayago. Ena Lalai, na gone yadudua me kidavaki, lomani, susugi cake ka okati. Ena draki ni bula oqori e rawarawa kina vei ira kece na gone me ra kila na loloma ni Tamada Vakalomalagi kei Jisu Karisito ka me ra vakila ka kidava na veivakauqeti ni Yalo Tabu. Na vakasama eso oqo ena rawa ni vukei iko mo sotava na nodra gagadre na gone era vakaleqai tu.

• Vulica me baleta na nona gagadre bibi o gone. Na sala vinaka duadua me caka kina oqo o ya mo veivosaki kei ira na itubutubu se o ira na dauveiqaravi nei gone. Vakasaqra na sala vinaka duadua ena vuli kina na gone kei na ituvatuva cava ena veivuke vakalevu duadua. Ni rawa talega ni kere ivakasala vei ira na iliuliu ni Lalai kei na qasenivuli ka tu na nodra kilamatua kei na raikiloma mera wasea.

• Me dua na gauna vinaka ka ra rawa ni vakila kina na gone yadudua na taqomaki kei na lomani. Vulica na yacadra na gone taucoko ena nomu kalasi, ka vukei ira mera vakila ni ra sa ciqomi, lomani, ka okati. Era dau vakalewai na gone era vakaleqai tu, mo rai ki na veimadigi mera vakacaucautaki ena nona itovo matadonu.

• Caka veisau me rawa ni ra vakaitavi taucoko. Na veisau lalai sa rawa ni caka ena itaviqaravi me vakadeitaka na nodra vuli kece na gone, oka kina o ira ka tu nodra yalani vakayago se dredre vakavuli. Me ivakaraitaki, kevaka e dua na itaviqaravi e vakatura na vakaraitaki ni iyaloyalo, o rawa ni lagata e dua na sere veisemati me isosomi mo okati ira kina na gone e vakaleqai tu na nodra rai.

• Tauyavutaka na ivakarau ni rumu ni vuli kei na ituvatuva vakamatautaki. E dua na sala me caka kina oqo sai koya me ra tauyavutaka e dua na ivolakabi e tiko kina na ituvatuva ni kalasi e tuvanaka na itosotoso ni kalasi. Na nomu ituvatuva e rawa ni oka kina na masu, na gauna ni veivakavulici, kei na gauna ni itaviqaravi. Oqo e rawa ni vukea na vakalailaitaki ni yalo ni veilecayaki ka rawa ni vakalevutaki na nuiqawaqawa vei ira eso na gone.

• Vakayagataka na iyaloyalo. O ira na gone malumalumu vakavuli se bolei vakaitovo e rawa ni yaga vei ira na ivakaraitaki taumada eso, me vaka na iyaloyalo e vakaraitaka na itovo veiganiti me vaka na lave liga ni bera ni sauma e dua na taro.

• Kila na cava e yaco kina na itovo veibolei. Vulica me baleta na malumalumu se ituvaki ka rawa ni yavalata e dua na gone me ivukivuki baleca. Yadrava sara vakamatau na ka e yaco tiko ni yaco mai na bolebole ni itovo. Vakasamataka ena masumasu na sala mera na vakavinakataka cake na ituvaki me rawa ni tokoni cake na gone.