Era qito tiko na kalasi ni Lalai

Vakayagataki ni Lako Mai, Mo Muri Au—Me Baleti Ira na Lalai

Vakavakarau ni Veivakavulici ena Lalai

Vuli yadudua kei na matavuvale e vale me usutu ni vuli kosipeli. E dina sara oqo me baleti iko kei ira na gone o vakavulica. Ni o vakavakarau mo veivakavulici, tekivu ena nomu vakila vakataki iko na veika sotavi ena ivolanikalou. Na vakavakarau bibi duadua vei iko ena yaco ni o vakasaqara na ivolanikalou ka segata na veivakauqeti ni Yalo Tabu.

NaLako Mai, Mo Muri Au—Baleta na Tamata Yadua kei na Matavuvale sai koya talega e dua na tiki bibi ni nomu vuli vakai iko kei na nomu vakavakarau mo veivakavulici. Ena vukea nomu rawata e dua na kilaka titobu ena ivakavuvuli vakaivunau e kunei ena ivolanikalou.

Ena nomu gauna ni vakavakarau, ena yaco mai vei iko eso na vakanananu kei na veivakauqeti me baleti ira na gone o vakavulica. O na ciqoma na raikiloma eso e baleta na ivakarau ena vakalougatataka kina nodra bula na ivakavuvuli ni ivolanikalou. O na tuberi mo uqeti ira me ra kunea na ivakavuvuli oqori ni ra vuli tiko vakataki ira vakakina kei na nodra matavuvale mai na ivolanikalou. Nanuma mo qaqarauni me baleti ira na gone ka sega ni dau rawa ena nodra matavuvale na vuli ivolanikalou vakamatavuvale kei na lotu ni matavuvale.

Vakatutu ni Vuli

Ni o vakavakarau tiko mo veivakavulici, o na rairai rawata na ikuri ni veivakauqeti ena nomu vadikeva na ituvatuva ena ivurevure ni vuli oqo. Kakua ni raica na veivakasama oqo me idusidusi muri vakamatailalai ia me ra sa vakatutu ga ni kena vakayadrati na nomu veivakauqeti. O sa kilai ira na gone oqo — ka na yaco mo kilai ira vinaka cake sara me vaka ni o na dau veitaratara vata kei ira ena kalasi. Na Turaga e kilai ira talega, ka na vakauqeti iko O Koya ki vei ira na sala vinaka duadua me ra vakavulici ka vakalougatataki ira.

E tu e vuqa na ivurevure tale eso sa rawa ni o vakayagataka ena nomu vakavakarau, oka kina na vakasama mai na Lako Mai, Mo Muri Au—Baleta na Tamata Yadua kei na Matavuvale kei na mekasini ni Lotu. Me baleta eso tale na itukutuku ni ivurevure ni vuli oqo kei na so tale, raica na “Additional Resources for Teaching Children” ena ivurevure oqo.

Eso na Ka Me Nanumi Tiko

• Sa nodra icolacola taumada na itubutubu me ra vakavulici ira na luvedra. Ni o qasenivuli, sa dua na nomu icolacola bibi mo tokona, vakayaloqaqataka, ka tara cake na vuli kosipeli ena vuvale. Dau qaqarauni baleti ira na gone e sega ni dau vakavulici mai vei ira na itubutubu na kosipeli ena nodra vuvale. Dau vakaitavitaki ira na gone kece sara ena veivosaki vakosipeli veitalia na ituvaki ni nodra bula vakavuvale.

• E vinaka na tokaruataki. E dau mana cake nodra vulica na dina vakosipeli na gone ni dau tokaruataki na veidina oqo ena veimataqali itaviqaravi. Kevaka o raica ni mana vei ira na gone e dua na itaviqaravi vakavuli, nanuma mo tokaruataka, vakauasivi ni o vakavulici ira era gone sobu. E rawa tale beka ga ni o railesuva e dua na itaviqaravi ni dua na lesoni sa oti.

• E vinakata na Tamada Vakalomalagi mo qaqa ena nomu itavi vaqasenivuli. Sa vakarautaka tu O Koya e vuqa na ivurevure me vukei iko mo qaqa, okati kina na soqoni ni matabose ni qasenivuli. Ena vei soqoni oqo ena rawa mo veitalanoataka kina kei ira eso tale na qasenivuli na vei bolebole o sotava tiko. E rawa talega ni o veitalanoataka ka vakatovotovotaka na ivakavuvuli eso ni veivakavulici va-Karisito.

• Kevaka o vakavulici ira tiko na gone sobu ka gadreva na ikuri ni veivuke, raica na “Sotava Nodra Gagadre na Gonelalai Sobu” ena ivurevure ni vuli oqo.

• Sa okati ena ivurevure ni vuli oqo na ituvatuva vakamacawa ni yabaki vakavo ga na Sigatabu e rua ena yaco tiko kina na koniferedi raraba. Ena Sigatabu e sega ni vakayacori kina na Lalai ena vuku ni koniferedi ni iteki se dua tale na ka, me ra qai tomana tiko mai vale na veimatavuvale na wiliwili ena iVola i Momani me vaka sa tuvalaki taumada. Me rawa ni donu tiko na toso ena kalasi ni Lalai, e rawa ni o digitaka mo rikata e dua na lesoni se cokota vata e rua na lesoni. Me levei na veilecayaki, era na gadreva beka na peresitedi ni Lalai me ra vakasalataki ira taumada na qasenivuli ena veika oqo ni se bera na gauna.

e ratou vuli tiko na matavuvale ena dua na laptop