O Iko e Dua Nodra Qasenivuli na Gone

Sa kacivi iko na Kalou mo vakavulici ira na Luvena ena Nona ivakarau na Vakabula. O sa lesi ka vakatikori ki na veikacivi oqo ena lewa ni Nona matabete tabu. Kevaka mada ga o sega ni kenadau ena veivakavulici, ni ko bula kilikili, masu e veisiga, ka vulica na ivolanikalou, ena solia vei iko na Tamada Vakalomalagi na veiyavalati kei na kaukauwa ni Yalo Tabu me vukei iko mo gumatua (raica na 2 Nifai 33:1).

O ira ko sa nuitaki mo qarava era luvena na Tamada Vakalomalagi, ka sa kila tu o Koya na nodra gagadre kei na sala uasivi duadua mo tarai ira kina. Mai na liga ni Yalo Tabu, ena tuberi iko na Kalou ena nomu vakavakarau kei na gauna ni nomu veivakavulici. Ena vakatakila vei iko Ko koya na ka mo kaya kei na ka mo cakava 2 Nifai 32:5).

Ena mata kece sara ni nodra bula, era sa dau sokumuna tiko ga na gone mareqeti oqo na kila ka, yavuyavutaki ka vakamakaretaka nodra ivakamacala, ka bulia ka wasea nodra ka kunei. E dina sara oqo ena kosipeli, ni ra sa tu vakarau ka nanamaki tu na gone me ra vulica na kena dina rawarawa eso. Na nodra vakabauta na ka vakayalo e kaukauwa ka savasava, ka ra raica na vei tikinigauna kece me matamatayaga ni vuli. Era yalorawarawa me yavala ena veika era sa vulica rawa, kevaka sara mada ga e se sega ni taucoko sara nodra kila ka. Oqo na ivakarau e dodonu me da ciqoma kece sara kina na kosipeli. Me vaka ea vakavulica na iVakabula, “O koya ena sega ni vakabauta na matanitu ni Kalou me vaka na gonelailai, ena sega sara ni curu kina” (Luke 18:17).

Na veikacivi me vakavulici ira na gone sa dua na veinuitaki tabu, ka sa matau me tuburi keda na yalodruka ena veigauna eso. Ia mo nanuma tiko ni a kacivi iko na Tamamu Vakalomalagi, ka na sega vakadua ni laivi iko O Koya. Oqo na cakacaka ni Turaga, ia ni o veiqaravi “ena yalomu taucoko, igu, vakasama kei na kaukauwa” (VV 4:2), ena vakalevutaka Ko Koya na nomu kaukauwa, na isolisoli, kei na taledi, ka ena igu ni nomu veiqaravi ena vakalougatataka na nodra bula na gone o vakavulici ira tiko.