« ការប្រើសៀវភៅ ចូរមកតាមខ្ញុំ—សម្រាប់ថ្នាក់អង្គការបឋមសិក្សា » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ២០២០ )

« ការប្រើសៀវភៅ ចូរមកតាមខ្ញុំ—សម្រាប់ថ្នាក់អង្គការបឋមសិក្សា » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

ការប្រើសៀវភៅ ចូរមកតាមខ្ញុំ—សម្រាប់ថ្នាក់អង្គការបឋមសិក្សា

ការរៀបចំបង្រៀននៅក្នុងថ្នាក់អង្គការបឋមសិក្សា

ការសិក្សាផ្ទាល់ខ្លួន និងការសិក្សាជាគ្រួសារនៅគេហដ្ឋាន គួរតែជាមជ្ឈមណ្ឌលនៃការរៀនសូត្រដំណឹងល្អ ។ ការណ៍នេះពិតចំពោះអ្នក និងចំពោះកុមារដែលអ្នកបង្រៀន ។ នៅពេលអ្នករៀបចំខ្លួនបង្រៀន សូមចាប់ផ្ដើមដោយមានបទពិសោធន៍ផ្ទាល់ខ្លួននៅក្នុងបទគម្ពីរ ។ ការរៀបចំខ្លួនដ៏សំខាន់បំផុតរបស់អ្នកនឹងកើតឡើង នៅពេលអ្នកស្រាវជ្រាវបទគម្ពីរ និងស្វែងរកការបំផុសគំនិតមកពីព្រះវិញ្ញាណបរិសុទ្ធ ។

ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ក៏ជាផ្នែកមួយដ៏សំខាន់ទាំងសម្រាប់ការសិក្សាផ្ទាល់ខ្លួនរបស់អ្នក និងការរៀបចំខ្លួនរបស់អ្នកដើម្បីបង្រៀន ។ វានឹងជួយអ្នកឲ្យទទួលបានការយល់ដឹងដ៏ស៊ីជម្រៅមួយអំពីគោលការណ៍ខាងគោលលទ្ធិទាំងឡាយដែលមាននៅក្នុងបទគម្ពីរ ។

អំឡុងពេលអ្នករៀបចំមេរៀន នោះគំនិត និងចំណាប់អារម្មណ៍ផ្សេងៗនឹងកើតឡើងដល់អ្នកអំពីកុមារដែលអ្នកបង្រៀន ។ អ្នកនឹងទទួលបានការយល់ដឹងអំពីរបៀបដែលគោលការណ៍នៅក្នុងព្រះគម្ពីរទាំងនេះនឹងប្រទានពរជ័យដល់ជីវិតរបស់ពួកគេ ។ អ្នកនឹងត្រូវបានដឹកនាំដើម្បីបំផុសគំនិតពួកគេឲ្យរកឃើញនូវគោលការណ៍ទាំងនោះ កាលពួកគេរៀនចេញពីព្រះគម្ពីរដោយខ្លួនឯង និងជាមួយនឹងក្រុមគ្រួសាររបស់ពួកគេ ។ សូមកុំភ្លេចត្រូវប្រយ័ត្នជាមួយនឹងកុមារដែលមានគ្រួសារមិនសូវគាំទ្រដល់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារជាប្រចាំ ។

គំនិតសម្រាប់ការបង្រៀន

ពេលអ្នករៀបចំបង្រៀន អ្នកអាចទទួលបានការបំផុសគំនិតបន្ថែមដោយការមើលពីគម្រោងមេរៀនបង្រៀននៅក្នុងធនធាននេះ ។ សូមកុំគិតថា គំនិតទាំងនេះគឺជាសេចក្ដីណែនាំលម្អិតឡើយ ប៉ុន្តែផ្ទុយទៅវិញសូមគិតថា វាជាយោបល់ដើម្បីបង្កើតការបំផុសគំនិតផ្ទាល់របស់អ្នកប៉ុណ្ណោះ ។ អ្នកស្គាល់កុមារទាំងនេះ—ហើយអ្នកនឹងស្គាល់ពួកគេកាន់តែច្បាស់ថែមទៀត ពេលអ្នកទាក់ទងជាមួយពួកគេនៅក្នុងថ្នាក់ ។ ព្រះអម្ចាស់ស្គាល់ពួកគេផងដែរ ទ្រង់នឹងបំផុសគំនិតដល់អ្នកតាមវិធីដ៏ល្អបំផុតដើម្បីបង្រៀន និងផ្ដល់ពរជ័យដល់កុមារទាំងនេះ ។

មានធនធានផ្សេងៗទៀតជាច្រើនសម្រាប់អ្នក ដើម្បីប្រើប្រាស់ ពេលអ្នករៀបចំខ្លួន រួមបញ្ចូលទាំងគំនិតនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ និងទស្សនាវដ្ដីសាសនាចក្រផងដែរ ។ សម្រាប់ព័ត៌មានបន្ថែមអំពីធនធានទាំងនេះ និងធនធានផ្សេងទៀត សូមមើល « ធនធានបន្ថែមសម្រាប់បង្រៀនកុមារ » នៅក្នុងធនធាននេះ ។

រឿងមួយចំនួនដែលត្រូវចងចាំ

ឪពុកម្តាយមានការទទួលខុសត្រូវជាចម្បងក្នុងការបង្រៀនដល់កូនៗរបស់ពួកគេ ។ ក្នុងនាមជាគ្រូបង្រៀនម្នាក់ អ្នកមានការទទួលខុសត្រូវដ៏សំខាន់មួយដើម្បីគាំទ្រ លើកទឹកចិត្ត ហើយស្ថាបនាលើការរៀនសូត្រដំណឹងល្អនៅក្នុងគេហដ្ឋាន ។ សូមប្រយ័ត្នជាមួយនឹងកុមារដែលមានឪពុកម្ដាយដែលមិនបង្រៀនដំណឹងល្អនៅឯគេហដ្ឋានរបស់ពួកគេ ។ សូមរួមបញ្ចូលកុមារទាំងអស់នៅក្នុងការពិភាក្សាអំពីដំណឹងល្អ ដោយមិនគិតអំពីកាលៈទេសៈកើតឡើងនៅផ្ទះរបស់ពួកគេឡើយ ។
ការធ្វើសារឡើងវិញគឺល្អ ។ កុមាររៀនពីសេចក្ដីពិតដំណឹងល្អយ៉ាងមានប្រសិទ្ធភាពជាងមុន នៅពេលដែលសេចក្ដីពិតទាំងនេះត្រូវបានបង្រៀនម្ដងហើយម្ដងទៀតតាមរយៈសកម្មភាពផ្សេងៗគ្នា ។ ប្រសិនបើអ្នករកឃើញថា សកម្មភាពរៀនសូត្រមួយមានប្រសិទ្ធភាពសម្រាប់កុមារ សូមពិចារណាធ្វើវាសារឡើងវិញ ជាពិសេសនៅពេលដែលអ្នកបង្រៀនដល់កុមារតូចៗ ។ អ្នកក៏អាចរំឭកសកម្មភាពមួយមកពីមេរៀនមុនផងដែរ ។
ព្រះវរបិតាសួគ៌សព្វព្រះទ័យឲ្យអ្នកទទួលបានជោគជ័យក្នុងនាមជាគ្រូបង្រៀនម្នាក់ ។ ទ្រង់បានប្រទានធនធានជាច្រើនដើម្បីជួយអ្នក រួមបញ្ចូលទាំងការប្រជុំក្រុមប្រឹក្សាគ្រូបង្រៀនផងដែរ ។ នៅក្នុងការប្រជុំទាំងនេះ អ្នកអាចប្រឹក្សាជាមួយនឹងគ្រូបង្រៀនផ្សេងទៀតអំពីឧបសគ្គនានាដែលអ្នកជួបប្រទះ ។ អ្នកក៏អាចពិភាក្សា ហើយអនុវត្តគោលការណ៍ទាំងឡាយនៃការបង្រៀនដូចជាព្រះគ្រីស្ទផងដែរ ។
ប្រសិនបើអ្នកបង្រៀនដល់កុមារតូចៗ ហើយត្រូវការជំនួយបន្ថែម សូមមើល « ការបំពេញតាមតម្រូវការរបស់កុមារតូចៗ » នៅក្នុងធនធាននេះ ។
ធនធាននេះរួមមាននូវគម្រោងមេរៀនរាល់សប្ដាហ៍សម្រាប់ឆ្នាំនោះលើកលែងតែពីរសប្ដាហ៍ពេលមានសន្និសីទទូទៅប៉ុណ្ណោះ ។ នៅថ្ងៃអាទិត្យណាដែលមិនមានថ្នាក់អង្គការបឋមសិក្សា ដោយសារតែមានសន្និសីទស្ដេក ឬហេតុផលផ្សេងទៀតណាមួយ នោះក្រុមគ្រួសារគួរតែបន្ដអានព្រះគម្ពីរមរមននៅគេហដ្ឋាន ស្របតាមកាលវិភាគនៃគម្រោងមេរៀន ។ ដើម្បីបង្រៀនឲ្យទាន់កាលវិភាគថ្នាក់អង្គការបឋមសិក្សារបស់អ្នក អ្នកអាចរំលងមេរៀនមួយ ឬបញ្ចូលមេរៀនពីរទៅជាមេរៀនតែមួយក៏បាន ។ ដើម្បីចៀសវាងការភាន់ច្រឡំនានា នោះប្រធានថ្នាក់បឋមសិក្សានឹងផ្ដល់ការណែនាំដល់គ្រូបង្រៀនអំពីការកែតម្រូវទាំងនេះទុកជាមុន ។

ក្រុមគ្រួសារសិក្សាដោយប្រើកុំព្យូទ័រយួរដៃ