Xq’ehil li q’olok sa’ Francia, xb’aan laj James Taylor Harwood

18–24 enero

Tzol’leb’ ut Sumwank 3–5

“Lin k’anjel taaxik chi uub’ej”

Naq yooqat chixtzolb’al Tzol’leb’ ut Sumwank 3–5, naru nakak’ul aana’leb’ chirix li k’a’ru neke’raj ru xtawb’al ru li kok’al nakatzoleb’. Eb’ li kok’ k’anjel re li tusleb’ aatin a’in naru ajwi’ neke’xk’e aana’leb’.

Tz’iib’a li nakak’oxla

Xkanab’ankileb’ chi wotzok

K’ut xjalam-uuch laj Jose Smith wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixyeeb’al aawe k’a’ru neke’xnaw chirix li seraq’ naxk’utb’esi. Tenq’aheb’ chixjultikankil li hoonal naq laj Martin Harris kixsach li xb’eenileb’ perel re xjaltesinkil ru lix Hu laj Mormon (chi’ilmanq “Ch’ol 4: Laj Martin Harris ut eb’ li perel sachenaqeb’,” Eb’ li Esilal sa’ li Tzol’leb’ ut Sumwank, 18–21; malaj Santos, 1:51–56).

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 3:7–10

Naru ninb’aanu li us naq wankeb’ li kristiaan neke’xyal xjalb’al ink’a’uxl re xb’aanunkil k’a’ruhaq ink’a’ us.

Tenq’aheb’ li kok’al chixtzolb’al li k’a’ru kixtzol laj Jose Smith: wi neke’xkanab’ rib’ sa’ ruq’ li qaChoxahil Yuwa’, a’an taawanq “rik’ineb’ sa’ li junjunq chi rahil kutan” (Tzol’leb’ ut Sumwank 3:8).

Kok’ k’anjel naru chi b’aanumank

• Il wi’chik ru li seraq’ chirix laj Martin Harris ut eb’ li perel sachenaqeb’ (chi’ilmanq Eb’ li Esilal sa’ li Tzol’leb’ ut Sumwank, 18–21, malaj li video sa’ ChurchofJesusChrist.org). Wotz rik’ineb’ li kok’al junjunq hoonal b’ar wi’ naq maare te’reek’a li aaleek re xb’aanunkil k’a’ruhaq neke’xnaw naq moko us ta. Chan ru naru nokoxtenq’a li qaChoxahil Yuwa’ chixb’aanunkil li k’a’ru us? (chi’ilmanq Tzol’leb’ ut Sumwank 3:8).

  

  Laj Martin Harris, xb’aan laj Lewis A. Ramsey

• Yaab’asiheb’ li aatin neke’tawman sa’ Tzol’leb’ ut Sumwank 3:8: “Kixye’ raj lix tel ut katxtenq’a raj.” Kanab’eb’ li kok’al chi xaqliik ut te’xye’ lix tel naq yooqat wi’chik chirilb’al ru li ch’ol aatin. Wotz rik’ineb’ a’an junjunq chan ru naq li Qaawa’ naru naxye’ lix tel re xtenq’ankileb’ naq wankeb’ chik kristiaan neke’xyal xjalb’al xk’a’uxleb’ re naq te’xb’aanu k’a’ruhaq ink’a’ us. Kanab’eb’ chixk’eeb’aleb’ xhoonal chirib’ileb’ rib’ re xye’b’aleb’ lix tel naq yooqeb’ chixyeeb’al chan chik ru naq li Qaawa’ naxye’ lix tel re qatenq’ankil.

Tzolʼlebʼ ut Sumwank 4

Li Qaawa’ naraj ru naq laa’in tinb’aanu lix k’anjel.

Eb’ li kok’al naru “neke’ok chi k’anjelak chiru li Dios” (Tzol’leb’ ut Sumwank 4:2) chi naab’al paay ru ut naru neke’xkawresi rib’ anajwan choq’ re li kutan chalel.

Kok’ k’anjel naru chi b’aanumank

• Il ru Tzol’leb’ ut Sumwank 4:1 choq’ reheb’ li kok’al. K’ameb’ junjunq li jalam-uuch li neke’xk’ut lix “sachb’a-ch’oolejil k’anjel” li Dios sa’ roso’jikeb’ li kutan (jo’ xjalam-uucheb’ li misioneer, li santil ochoch, ut lix Hu laj Mormon). Kanab’eb’ li kok’al chixk’eeb’aleb’ xhoonal chirib’ileb’ rib’ re xsik’b’al ru junaq li jalam-uuch ut te’aatinaq chirix a’an. Wotz rik’ineb’ k’a’ut naq sachb’a-ch’oolejil lix k’anjel li Qaawa’ choq’ aawe.

• Tenq’aheb’ li kok’al chixk’oxlankileb’ eek’asink-ib’ malaj chixyiib’ankileb’ jalam-uuch li te’xk’utb’esi li ch’ol aatin “texk’anjelaq chiru chi anchal eech’ool, eemetz’ew, eek’a’uxl ut eekawilal” (Tzol’leb’ ut Sumwank 4:2) Wotz resil anihaq li nakanaw ru li nak’anjelak chiru li Dios chi jo’kan.

• B’ichahomaq sa’ komonil jun li b’ich na’aatinak chirix xwotzb’al li evangelio, jo’ “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90). K’oxlan chirix li k’a’ru naxk’ut li b’ich chirix chan ru naru naqatenq’a li Dios chixb’aanunkil lix k’anjel.

Tzol’leb’ ut Sumwank 5:10

Qak’ulum li raatin li Dios sa’ xtz’uumal re laj Jose Smith.

Chan ru naru nakatenq’aheb’ li kok’al chixkawob’resinkil lix nawom xch’ooleb’ chirix naq laj Jose Smith ut xkomoneb’ chik li profeet neke’xk’ut li raatin li Dios?

Kok’ k’anjel naru chi b’aanumank

• Muq junaq xjalam-uuch laj Jose Smith sa’ junaq na’ajej sa’ li tzoleb’aal (chi’ilmanq Hu reheb’ li Jalam-uuch re li Evangelio, 87). Il ru Tzol’leb’ ut Sumwank 5:10 ut kanab’eb’ li kok’al chirilb’al li jalam-uuch re xsik’b’al ani aj-e nayeeman li aatin “sa’ xtz’uumal aawe.” Wotz lix nawom aach’ool chirix naq qak’ulum li raatin li Dios sa’ xtz’uumal re laj Jose Smith.

• K’ut chiruheb’ li kok’al lix Hu laj Mormon ut li Tzol’leb’ ut Sumwank. Ch’olob’ chiruheb’ naq li Dios kixk’eheb’ qe li hu a’in rik’in laj Jose Smith. Wotzeb’ junjunq li raqal neke’wulak chawu sa’eb’ li hu a’an ut ye k’a’ut naq nakab’antioxiheb’.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 3:5–10; 5:21–22

Tento tink’e inch’ool chixb’aanunkil li k’a’ru nawulak chiru li Dios ut ink’a’ li nawulak chiruheb’ li kristiaan.

Naq eb’ li kok’al yooqeb’ chixtzolb’al li k’a’ru kixk’ul laj Jose Smith rik’ineb’ li perel sachenaqeb’ re lix jaltesinkil ru lix Hu laj Mormon, naru neke’musiq’aak re wank chi tiik naq wankeb’ chik kristiaan neke’xyal raalenkileb’ chi q’etok aatin.

Kok’ k’anjel naru chi b’aanumank

• Wiib’ oxib’ kutan chaq rub’elaj, k’e xb’oqb’al jun reheb’ li ch’ina al chi chalk sa’ li tzoleb’aal chi kawresinb’il re xwotzb’al li seraq’ b’ar wi’ laj Jose Smith ut laj Martin Harris ke’xsach li xb’eenileb’ perel re xjaltesinkil ru lix Hu laj Mormon (chi’ilmanq Eb’ li Esilal sa’ li Tzol’leb’ ut Sumwank, 18–21; malaj Santos, 1:51–56). Ilomaq ru sa’ komonil Tzol’leb’ ut Sumwank 3:5–8; 5:21–22, ut sik’omaqeb’ li osob’tesihom naqak’ul wi nokokana chi tiik chiru li Dios.

• K’e xhoonaleb’ li kok’al re naq te’xk’oxla jun hoonal b’ar wi’ jun ramiiweb’ kixyal xq’unb’esinkileb’ xch’ool re te’xb’aanu k’a’ruhaq ink’a’ us. Kanab’eb’ chixtawb’al junaq raqal sa’ Tzol’leb’ ut Sumwank 3:5–8; 5:21–22, li naru natenq’ank reheb’ sa’eb’ li hoonal a’an. K’utb’esihomaq junjunqeb’ li eetalil.

Tzolʼlebʼ ut Sumwank 4

Li Qaawa’ naraj ru naq laa’in tinb’aanu lix k’anjel.

Tzol’leb’ ut Sumwank 4 naru naxmusiq’aheb’ li kok’al chi tz’aqonk sa’ lix “sachb’a-ch’oolejil k’anjel” li Qaawa’ (raqal 1)

Kok’ k’anjel naru chi b’aanumank

• Tz’iib’a sa’ li pizarron K’anjelak chiru li Dios. Kanab’eb’ li kok’al chi sik’ok sa’ Tzol’leb’ ut Sumwank 4 ut te’xyiib’ jun xtusulal li k’a’ru xe’xtzol chirix k’a’ru naraj naxye li k’anjelak chiru li Dios. Kanab’eb’ chixyiib’ankil jun xtusulal li k’a’ru te’xtzol sa’ li b’ich “Kawaq inch’ool” (B’ichleb’aal choq’ reheb’ li Kok’al, 85) malaj junaq chik li b’ich na’aatinak chirix k’anjelak chiru li Dios.

• K’ameb’ k’anjeleb’aal (malaj xjalam-uucheb’) li naru naroksi anihaq re k’anjelak sa’ pim. Chan ru nokohe’xtenq’a li k’anjeleb’aal a’in? Tenq’aheb’ li kok’al chixtawb’aleb’ k’a’aq re ru sa’ Tzol’leb’ ut Sumwank 4:5–6 li naru neke’oksiman jo k’anjeleb’aal re xb’aanunkil lix k’anjel li Dios.

• K’e xb’oqb’aleb’ li misioneer malaj li misioneer re li teep chixwotzb’al k’a’ruhaq re Tzol’leb’ ut Sumwank 4 li kimusiq’ank reheb’ chixb’aanunkil xk’anjel li Dios. K’a’ru naru naqab’aanu re tenq’ank sa’ lix k’anjel li Dios?

Tzol’leb’ ut Sumwank 5:1–7, 11, 16, 23–24

Naru ninwan jo’ aj yehol nawom chirix naq lix Hu laj Mormon tz’aqal yaal.

Kiyeechi’iik re laj Martin Harris naq naru nawan jo’ jun reheb’ laj yehol nawom chirixeb’ li perel ch’iich oor wi nawan chi tiik. Laa’o moko taqileb’ ta li perel ch’iich oor jo’ laj Martin, a’b’an naru naqak’ul sa’ musiq’ej qanawom naq yaal lix Hu laj Mormon. Chan ru naru nakatenq’aheb’ li kok’al chixnimob’resinkil ut chixwotzb’al lix nawom xch’ooleb’ chirix lix Hu laj Mormon?

Kok’ k’anjel naru chi b’aanumank

• Tz’iib’aheb’ patz’om chiru li pizarron jo’eb’ a’in ut tenq’aheb’ li kok’al chixsik’b’al xsumenkileb’ sa’ Tzol’leb’ ut Sumwank 5:1–3, 7, 11: K’a’ru kiraj xnawb’al laj Martin Harris? Ani chi aj-u kiru chixk’utb’al li perel ch’iich oor laj Jose Smith? K’a’ut naq rik’in ka’ajwi’ rilb’aleb’ ru li perel ch’iich moko taatz’aqloq ta raj re xjalb’al xch’ool anihaq chirix naq lix Hu laj Mormon tz’aqal yaal?

• Patz’ reheb’ li kok’al k’a’ru a’an jun aj yehol nawom ut k’a’ut naq aajel ru naq wanq junaq aj yehol nawom. K’a’ru tento kixb’aanu laj Martin Harris re naq taawanq jo’ jun aj yehol nawom chirixeb’ li perel ch’iich oor? (chi’ilmanq Tzol’leb’ ut Sumwank 5:23–24) Us ta ink’a’ qilomeb’ ru li perel ch’iich, k’a’ru naru naqab’aanu re wank jo’ aj yehol nawom chirix lix Hu laj Mormon? (chi’ilmanq Tzol’leb’ ut Sumwank 5:16; Moroni 10:3–5).

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixtz’iib’ankil lix nawomeb’ xch’ool chirix lix Hu laj Mormon ut chixwotzb’al rik’in anihaq neke’xnaw ru.

Xchaab’ilob’resinkil li qak’utum

Oksiheb’ li kok’ k’anjel re xk’eeb’aleb’ chi tz’aqonk li kok’al wankeb’ xpaaltil. Lix sik’b’al chan ru roksinkileb’ li kok’ k’anjel naru natenq’an re naq chixjunileb’ li kok’al te’tzoloq rik’in a’an. Qayehaq, wi junaq li ch’ina k’anjel naxye naq taak’ut jun jalam-uuch, naru teeb’icha jun li b’ich na’aatinak chirix ajwi’ a’an re naq te’tz’aqonq li kok’al ink’a’ neke’ilok.