25–31 enero

Tzol’leb’ ut Sumwank 6–9

“A’in li musiq’ej re k’utb’esink”

Re xtikib’ankil xkawresinkil aawib’ re k’utuk, il ru Tzol’leb’ ut Sumwank 6–9. Kim, Taaqehin—Choq’ reheb’ li komon ut li junkab’al ut li tusleb’ aatin a’in naru neke’xk’e aana’leb’ chirix chan ru taatzoleb’ li kok’al re laa tzoleb’aal.

Tz’iib’a li nakak’oxla

Xkanab’ankileb’ chi wotzok

Ma neke’xnaw ru li kok’al li seraq’ chirix laj Oliver Cowdery naq kixk’ul xsumenkil jun xtij? (chi’ilmanq Santos, 1:58–60). Maare eb’ a’an ajwi’ wan k’a’ru xk’ulumeb’ rik’in li tijok li naru neke’xwotz.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 6:5; 8:2; 9:7–9

Li qaChoxahil Yuwa’ naru nokoraatina rik’in li Santil Musiq’ej

Tenq’aheb’ li kok’al chixtawb’al ru naq wan jun xChoxahil Yuwa’eb’ aj rahonel li na’ab’in reheb’ lix tij ut naxsumeheb’ rik’in li Santil Musiq’ej.

Kok’ k’anjel naru chi b’aanumank

• Oksi li “Ch’ol 5: Laj Jose Smith ut laj Oliver Cowdery” (Eb’ li Esilal sa’ li Tzol’leb’ ut Sumwank, 22–25, malaj li video sa’ ChurchofJesusChrist.org) re aatinak rik’ineb’ li kok’al chirix laj Oliver Cowdery ut li k’a’ru kixtzol chirix chan ru naq nokoraatina li qaChoxahil Yuwa’. Kanab’eb’ chixyeeb’al aawe k’a’ru li jwal nawulak chiruheb’ sa’ li seraq’ ut kanab’eb’ chixk’eeb’al xhoonaleb’ chirib’ileb’ rib’ re naq te’aatinaq chirix laj Oliver Cowdery.

• Ye reheb’ li kok’al naq laj Oliver Cowdery kixyal xjaltesinkil ru lix Hu laj Mormon a’b’an ink’a’ kiru, ut xb’aan a’an laj Jose kixpatz’ re li Qaawa’ k’a’ut. Il ru choq’ reheb’ li kok’al lix sumehom li Qaawa’: “Tento taak’oxla sa’ laa k’a’uxl; toja’ naq tento taapatz’ we ma us” (Tzol’leb’ ut Sumwank 9:8) Kanab’eb’ chixk’oxlankil naq yookeb’ chi tzolok ut chi tijok. Tenq’aheb’ chixtawb’al ru naq chi jo’kan naq laa’o ajwi’ naru naqak’ul qasumenkil: naq nokotzolok ut naq naqapatz’ lix tenq’.

  

  Laj Oliver Cowdery, xb’aan laj Lewis A. Ramsey

• Kanab’eb’ li kok’al chixch’e’b’aleb’ lix jolom ut lix maqab’eb’ naq taawil ruheb’ li aatin “k’a’uxl” ut “ch’ool” sa’ Tzol’leb’ ut Sumwank 8:2. Tenq’aheb’ chixtawb’al ru naq li qaChoxahil Yuwa’ nokoraatina rik’in li Santil Musiq’ej, li nak’ehok re qak’a’uxleb’aal ut qeek’ahom. B’ichahomaq sa’ komonil jun li b’ich li na’aatinak chirix li Santil Musiq’ej, jo’ “Li Santil Musiq’ej” (B’ichleb’aal choq’ reheb’ li Kok’al, 56). K’a’ru naxk’ut chiqu li b’ich a’an chirix chan ru naq li Santil Musiq’ej nokoraatina? Wotz junaq aanumsihom b’ar wi’ aaweek’ahom li Santil Musiq’ej sa’ laa k’a’uxl ut sa’ laa ch’ool.

Tzol’leb’ ut Sumwank 6:33–36

Rik’in xtenq’ li Qaawa’, ink’a’ na’ajman ru naq tinxuwaq.

Kiwan naab’al xyaalal naq te’xuwaq raj laj Jose Smith ut laj Oliver Cowdery; li rahob’tesiik ut li neb’a’il ka’ajwi’ a’an junjunqeb’ re li ch’a’ajkilal ke’xnumsi. Li raatin li Qaawa’ choq’ re laj Jose ut laj Oliver naru ajwi’ naxwaklesi xch’ooleb’ li kok’al rajlal sut naq wanqeb’ xxiw.

Kok’ k’anjel naru chi b’aanumank

• Kanab’eb’ li kok’al chixka’sutinkil li ch’ol aatin “mexxuwak, ex ch’ina teep inkarneer” (Tzol’leb’ ut Sumwank 6:34). Ch’olob’ naq laa’o chanchan jun teep chi karneer chiru li Kolonel. K’ut jun xjalam-uuch li Kolonel jo’ aj ilol karneer (chi’ilmanq Hu reheb’ li Jalam-uuch re li Evangelio, 64) ut ch’olob’ xyaalal naq a’an nokoril jo’ naq jun aj ilol karneer narileb’ lix karneer. Xb’aan naq a’an nokoxra, ink’a’ na’ajman ru naq tooxuwaq.

• Kanab’eb’ li kok’al chixk’oxlankil naq a’aneb’ jun ch’uut li karneer te’xuwaq. K’a’ raj ru li naru neke’xxuwa li karneer? Kanab’ jun li ch’ina al chixk’oxlankil naq a’an aj ilol karneer li naxkoleb’ rix li karneer. K’a’ru li naqaxuwa jo’q’ehaq? Wotz lix nawom aach’ool naq li Jesukristo a’an laj ilol qe ut naq a’an naru narisiheb’ li qaxiw. B’ichahomaq sa’ komonil jun li b’ich chirix li Kolonel, jo’ “Li Jesus narahok qe” (B’ichleb’aal choq’ reheb’ li Kok’al, 37).

• Il ru Tzol’leb’ ut Sumwank 6:36 choq’ reheb’ li kok’al ut kanab’eb’ chixka’sutinkil li ch’ol aatin “miwiib’an eech’ool, mexxuwak.” Tenq’aheb’ chixk’oxlankil chan ru naru “neke’ilok wan wi’,” malaj neke’xjultika li Kolonel chiru li xamaan chal re (chi’ilmanq ajwi’ li perel re kok’ k’anjel re li xamaan a’in).

Xk’utb’al li tzol’leb’: Kok’al ak ninqeb’

Tzol’leb’ ut Sumwank 6:5, 15–16, 22–23; 8:2; 9:7–9

Li Santil Musiq’ej na’aatinak sa’ ink’a’uxl ut sa’ lin ch’ool.

Eb’ li kok’al nakatzoleb’ maare ak xk’ulumeb’ li maatan re li Santil Musiq’ej. Ma neke’xtaw ru chan ru xk’eeb’al reetal li k’utb’esinb’il na’leb’ naxk’e li Musiq’ej?

Kok’ k’anjel naru chi b’aanumank

• Yiib’ xjalam-uuch jun jolomej ut jun aamej chiru li pizarron. Tenq’aheb’ li kok’al chirilb’aleb’ ru li raqal a’in ut chixk’eeb’al reetal b’ar wan reheb’ a’an neke’xch’olob’ naq li Santil Musiq’ej na’aatinak sa’ li qak’a’uxl, sa’ li qach’ool malaj sa’ xkab’ichal: Tzol’leb’ ut Sumwank 6:15, 23; 8:2; 9:8; 9:9. Ye reheb’ li kok’al, jo’ aawilom laa’at, chan ru na’aatinak li Musiq’ej sa’ laa k’a’uxl ut sa’ laa ch’ool.

• Ilomaq ru sa’ komonil Tzol’leb’ ut Sumwank 6:5 ut kanab’eb’ li kok’al chixwotzb’al xnumsihomeb’ b’ar wi’ xe’tijok ut xe’xk’ul xsumenkileb’. Tenq’aheb’ chixk’oxlankileb’ eetalil sa’eb’ li loq’laj hu b’ar wi’ anihaq kitijok ut kixk’ul xsumenkil lix patz’om (chi’ilmanq 1 Nefi 2:16; Enos 1:1–6; Eter 2:18–3:6).

• Tz’iib’a sa’ li pizarron: Chan ru naq nokoraatina li Santil Musiq’ej? Kanab’eb’ li kok’al chi sik’ok sa’ Tzol’leb’ ut Sumwank 6:15–16, 22–23; 8:2; 9:7–9 re xtawb’aleb’ xsumenkil li patz’om a’an. Wotzeb’ aanumsihom b’ar wi’ aaweek’ahom naq li Santil Musiq’ej nakatraatina.

Tzol’leb’ ut Sumwank 6:33–37

“Meexuwa xb’aanunkil li chaab’il.”

Eb’ li kok’al nakatzoleb’ maare wan naq te’xuwaq chixkolb’al rix li k’a’ru us. Li aatin sa’ Tzol’leb’ ut Sumwank 6:33–37 naru naxmusiq’aheb’ chi wank chi kaweb’ xch’ool toj sa’ li hoonal jwal ch’a’aj.

Kok’ k’anjel naru chi b’aanumank

• Ilomaq ru sa’ komonil Tzol’leb’ ut Sumwank 6:33 ut aatinanqex chirix k’a’ut naq junaq kristiaan taaxuwaq raj chixb’aanunkil li us (che’ilmanq ajwi’ li raqal 28–29) Tenq’aheb’ li kok’al chixtawb’aleb’ aatin malaj ch’ol aatin sa’eb’ li raqal 33–37 li tixk’e xkawil xch’ooleb’ chixb’aanunkil li us.

• Tenq’aheb’ li kok’al chixyiib’ankileb’ jalam-uuch li naru neke’xk’ut sa’eb’ li rochoch re naq taajultiko’q reheb’ “ilok wan wi’ li Jesukristo sa’ li junjunq xk’oxlahomeb’ ” (raqal 36). Naq yooqeb’ chixyiib’ankileb’ li jalam-uuch, aatinanqex chirix k’a’ru naraj naxye ilok wan wi’ li Kolonel ut chan ru naru nakole’ rixeb’ xb’aan a’an.

• B’ichahomaq sa’ komonil jun li b’ich chirix wank chi kaw ch’oolej, jo’ “Sik’ xb’aanunkil li tiikilal” (B’ichleb’aal choq’ reheb’ li Kok’al, 80) malaj “Sa’ xk’anjel li Dios chiqayal tz’aqal qaq’e” (Eb’ li B’ich, 155). Kanab’eb’ li kok’al chixsik’b’al sa’ li b’ich junjunq xyaalal naq “ink’a’ raj tooxuwaq” (raqal 36).

Tzol’leb’ ut Sumwank 8:10

Naru ninpatz’ok rik’in paab’aal.

Sa’eb’ li loq’laj hu, li Qaawa’ naxjultika qe naq tento taawanq qapaab’aal chirix a’an. Chan ru naru nakatenq’aheb’ li kok’al nakatzoleb’ chixnimob’resinkil lix paab’aaleb’ chirix li Jesukristo?

Kok’ k’anjel naru chi b’aanumank

• Tz’iib’a sa’ li pizarron Chi maak’a’ maak’a’ nakatru chixb’aanunkil; jo’kan ut, chatpatz’oq rik’in . Kanab’eb’ li kok’al chixyalb’al xk’oxlankil jun aatin li naru na’oksiman sa’eb’ li yamyo. Chirix a’an, ilomaq ru sa’ komonil Tzol’leb’ ut Sumwank 8:10 re xtawb’al xsumenkil. K’a’ruheb’ junjunq li k’a’aq re ru naru neke’qab’aanu wi wan qapaab’aal?

• Chirix rilb’al ru Tzol’leb’ ut Sumwank 8:10, tenq’aheb’ li kok’al chixk’oxlankileb’ k’a’aq re ru li naru neke’xpatz’ wi’ xtenq’ re li Qaawa’. Kanab’eb’ chixyiib’ankil jun jalam-uuch li taareetali k’a’ruhaq li tento raj te’xpatz’. Naq yooqeb’ chixk’utb’al lix jalam-uucheb’ sa’ li tzoleb’aal, kanab’eb’ xkomoneb’ li kok’al chixq’ehinkil k’a’ru neke’reetali li junjunq chi jalam-uuch.

Xb’oqb’aleb’ chi tzolok sa’ kab’l

Tenq’aheb’ li kok’al chixsik’b’al ru jun li ch’ol aatin sa’ Tzol’leb’ ut Sumwank 6–9 li neke’raj xwotzb’al rik’in anihaq sa’ kab’l, jo’: “meexuwa xb’aanunkil li chaab’il” (6:33), “miwiib’an eech’ool, mexxuwak” (6:36), malaj “chi maak’a’ aapaab’aal, maak’a’ nakatru chixb’aanunkil” (8:10).

Xchaab’ilob’resinkil li qak’utum

Oksiheb’ li seraq’. Eb’ li seraq’ neke’xtenq’aheb’ li kok’al chixtawb’aleb’ ru li na’leb’ re li evangelio xb’aan naq neke’xk’ut chan ru naq eb’ li kristiaan neke’xyu’ami li na’leb’ a’an. Naq yooqat chi k’utuk, sik’ chan ru taawoksiheb’ li seraq’—li wankeb’ sa’eb’ li loq’laj hu, sa’ li resilal li Iglees, malaj re laa yu’am laa’at—li neke’xk’utb’esi li na’leb’ neke’tawman sa’eb’ li loq’laj hu.