eb’ li winq neke’k’anjelak sa’ xch’och’eb’

Xq’ehil li q’olok sa’ Francia, xb’aan laj James Taylor Harwood

18–24 enero

Tzol’leb’ ut Sumwank 3–5

“Lin k’anjel taaxik chi uub’ej”

Tz’iib’a li k’a’ru nakatzol ut nakaweek’a naq yookat chixtzolb’aleb’ li loq’laj hu. A’in tatxtenq’a re taajultiko’q aawe li nakatmusiq’aak wi’ ut taawotz rik’ineb’ laa komon.

Tz’iib’a li nakak’oxla

Chiruheb’ li junjunq chihab’ naq okenaq jo’ lix profeet li Dios, laj Jose Smith maji’ naxnaw chixjunil chirix li “sachb’a-ch’oolejil k’anjel” li b’oqb’il chixb’aanunkil. A’b’an li kixtzol sa’ xtiklajik lix k’anjel a’an naq re taawanq xk’ulub’ re k’anjelak chiru li Dios, tento naq lix sa’ ru “junaj ru sa’ lix loq’al li Dios” (Tzol’leb’ ut Sumwank 4:1, 5). Qayehaq, wi ta li Qaawa’ kixk’e xna’leb’ li ink’a’ naxk’am rib’ rik’in li naraj laj Jose, tento naq tixb’aanu li yeeb’il re xb’aan li Qaawa’. Ut us ta raj “naxk’ul k’iila k’utb’esinb’il na’leb’, ut … wankilal chixb’aanunkil k’iila xninqal ru k’anjel,” wi li rajom xch’ool a’an aajel wi’ chik ru sa’ xsa’ ru chiru li rajom xch’ool li Dios, a’an “tento taat’ane’q” (Tzol’leb’ ut Sumwank 3:4). A’ut wan jun chik na’leb’ kixtzol laj Jose chirix xb’aanunkil lix k’anjel li Dios: “li Dios a’an aj uxtaan,” ut wi laj Jose tixjal xk’a’uxl chi maak’a’ xb’alaq’, toj “sik’b’il ru” (raqal 10). Chirix chixjunil, lix k’anjel li Dios a’an jun k’anjel re tojok-ix. Ut li k’anjel a’an “ink’a’ naru nasache’ xwankil” (raqal 1).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 3:1–15

Tento naq tinkanab’ wib’ chiru li Dios ut ink’a’ tinxuwaheb’ ru li winq.

Sa’ xtiklajik lix k’anjel laj Jose Smith, ch’a’aj xtawb’aleb’ chaab’il amiiw—jo’ laj Martin Harris, jun winq oxloq’inb’il ut wan xb’ihomal, li kiru chixk’eeb’al xtenq’aal chi naab’al. Ut kiwan xch’ool laj Martin chixtenq’ankil laj Jose, us ta xb’aan a’an ink’a’ chik sa taa’ile’q xb’aaneb’ li komon ut taa’ajmanq naq tixk’e xtumin.

Jo’kan ut naq moko ch’a’aj ta xk’eeb’al reetal k’a’ut naq laj Jose kiraj xb’aanunkil li kixpatz’ laj Martin, ut tixkanab’ chixk’amb’al li xb’een tasal re lix Hu laj Mormon li jaltesinb’il ru, re xk’utb’al chiru li rixaqil, li ink’a’ naxpaab’ naq yaal lix Hu laj Mormon. Laj Jose k’iila sut kipatz’ok chiru li Qaawa’ chirix li tz’aamahom a’in, us ta naq ak kiyehe’ re naq ink’a’ naru, toj reetal naq sa’ rox sut naq kipatz’ok laj Jose, li Qaawa’ kixkanab’ xb’aanunkil. Naq wan li hu rik’in laj Martin kisachman, ut q’axal naq ke’q’use’ laj Jose ut laj Martin xb’aan li Qaawa’ (chi’ilmanq Santos, 1:51–53).

Naq yookat chirilb’al ru Tzol’leb’ ut Sumwank 3:1–15, k’oxla chan ru naq li k’a’ru neke’xk’oxla jalan chik li kristiaan naru nawan xwankil aawik’in. Maare taak’e ajwi’ reetal naq us ta li Qaawa’ kixq’us laj Jose Smith, kixye ajwi’ re aatin re uxtaan. K’a’ru naqatzol rik’in chan ru naq li Qaawa’ kixq’us ut chan ru kixwaklesi xch’ool laj Jose? K’a’ru nakataw li naru tatxtenq’a naq aalenb’ilat chixxuwankileb’ li winq mas wi’chik chiru li Dios?

Chi’ilmanq ajwi’ “La contribución de Martin Harris,” Revelaciones en contexto, 1–10, history.ChurchofJesusChrist.org.

Tzolʼlebʼ ut Sumwank 4

Li Qaawa’ naxpatz’ we naq tink’anjelaq chiru chi anchal inch’ool.

Rajlal na’oksiman li tasal 4 re aatinak chirixeb’ li misioneer sa’ li mision. A’ut, chaab’il xk’eeb’al reetal naq li k’utb’esinb’il na’leb’ a’in kik’ehe’ xb’een wa re laj Jose Smith, yuwa’b’ej, li ink’a’ b’oqb’il chi wank sa’ jun li mision a’ut “wan rajom chi k’anjelak chiru li Dios” (raqal 3).

Naru rilb’al ru li tasal a’in rik’in xk’oxlankil naq a’an jun ch’olob’ank trab’aaj choq’ re li ani naraj xb’aanunkil lix k’anjel li Qaawa’. K’a’ru li patz’b’il? K’a’ut naq aajel ru li k’a’ru ch’olob’anb’il? Maare taaruuq taasik’ ru rik’in tijok k’a’ruhaq taaruuq tatchaab’ilo’q wi’ re xk’ulb’al “aak’ulub’il choq’ re li k’anjel” (raqal 5).

Tzolʼlebʼ ut Sumwank 5

Laa’in naru tink’ul injunes wib’ xnawom inch’ool chirix lix Hu laj Mormon.

Martin Harris

Laj Martin Harris, xb’aan laj Lewis A. Ramsey

Wi ta xatb’oqe’ chixch’olob’ankil xyaalil lix Hu laj Mormon sa’ li raqb’a-aatin, k’a’ruheb’ li reetalil lix yaalalil li taak’ut raj? A’an ajwi’ li patz’om wan sa’ xk’a’uxl laj Martin Harris naq li rixaqil, xLucy, kixjit laj Jose Smith chiru li chaq’rab’, ut kixye naq yoo chixb’alaq’inkileb’ li tenamit rik’in xpak’b’al naq yoo chixjaltesinkileb’ ru perel ch’iich’ re oor (chi’ilmanq Santos, 1:56–58). Jo’kan naq laj Martin kixpatz’ re laj Jose xkomon chik reetalil naq wankeb’ chi yaal li perel ch’iich’ oor. Tzol’leb’ ut Sumwank 5 a’an jun k’utb’esinb’il na’leb’ k’eeb’il re xsumenkil lix tz’aamahom laj Martin.

K’a’ru nakatzol sa’ Tzol’leb’ ut Sumwank 5 chirix a’in:

• K’a’ru nareek’a li Qaawa’ chirixeb’ li ink’a’ te’xpaab’ li musiq’ejil yaal wi ink’a’ naru neke’ril (che’ilmanq li raqal 5–8; chi’ilmanq ajwi’ Jwan 20:24–29).

• Lix k’anjeleb’ aj k’ehol eetal sa’ xk’anjel li Qaawa’ (che’ilmanq li raqal 11–15; chi’ilmanq ajwi’ 2 Korintios 13:1).

• Chan ru taak’ul aajunes aawib’ jun xnawom aach’ool chirix lix Hu laj Mormon (chi’ilmanq li raqal 16; chi’ilmanq ajwi’ Moroni 10:3–5).

Tzol’leb’ ut Sumwank 5:1–10

Li tasal tenamit a’in te’xk’ul li raatin li Dios sa’ xtz’uumal re laj Jose Smith.

K’a’ru naxk’ut Tzol’leb’ ut Sumwank 5:1–10 chawu chirix lix aajel ruhil k’anjel laj Jose Smith sa’ li k’ojlajik wanko wi’—ut sa’ laa yu’am? K’oxla chan ru naq aak’ulum li raatin li Dios sa’ xtz’uumal re li Profeet aj Jose Smith. K’oxla xtz’iib’ankil sa’ jun diario malaj xwotzb’al rik’in anihaq chik laa b’antioxihom choq’ reheb’ li yaalil na’leb’ li ke’k’ojob’aak wi’chik malaj ke’ch’olob’aak chi saqen ru rik’in xtz’uumal re.

Chi’ilmanq ajwi’ 2 Nefi 3:6–24.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 3:1–4.Patz’ re jun komon sa’ li junkab’al naq taab’eeq chanchan naq wan sa’ jun b’e “yokotz ru” ut chirix a’an chanchan naq wan sa’ jun b’e “tiik ru.” K’a’ru xyaalalil choq’ re li qajunkab’al xnawb’al naq “tiik ru li ruq’ xb’e” li Dios?

Tzol’leb’ ut Sumwank 3:7–10.Naq anihaq yoo chixq’unb’esinkil qach’ool chixq’etb’al xchaq’rab’ li Dios, k’a’ruheb’ li yaalil na’leb’ sa’eb’ li raqal a’in li naru toohe’xtenq’a chi kanaak chi tiik qapaab’aal? Maare eb’ li komon sa’ li junkab’al taaruuq te’xk’utb’esi chan ru naq junaq kristiaan nakana chi tiik xpaab’aal us ta jalaneb’ neke’xye naq tixq’et xchaq’rab’ li Dios.

Tzolʼlebʼ ut Sumwank 4.Naq laa junkab’al yookeb’ chi aatinak chirix k’a’ru naraj naxye k’anjelak sa’ rawimq li Dios, taaruuq te’k’anjelaq sa’ jun tz’aqal awimq (malaj te’xpak’ xb’aanunkil). K’a’ruheb’ li k’anjeleb’aal li aajeleb’ ru re k’anjelak sa’ jun awimq? K’a’ruheb’ li k’anjeleb’aal ch’olob’anb’il xb’aan li Dios sa’ li tasal 4 li aajeleb’ ru re xb’aanunkil lix k’anjel a’an? Laa junkab’al taaruuq te’aatinaq chirix k’a’ut naq aajel ru li junjunq chi k’anjeleb’aal sa’ xb’aanunkil lix k’anjel li Dios.

Tzol’leb’ ut Sumwank 5:7.K’a’ru junjunqeb’ li yaalil na’leb’ naqapaab’ us ta ink’a’ naru neke’qil? K’a’ raj ru taaruuq taqaye re jun li qamiiw li naraj jun eetalil naq yaal lix Hu laj Mormon?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Kawaq inch’ool,” B’ichleb’aal choq’ reheb’ li Kok’al, 85.

Xchaab’ilob’resinkil li tzolok aajunes

K’uula sa’ aak’a’uxl jun raqal reheb’ li loq’laj hu. “Xk’uulankil sa’ qak’a’uxl jun raqal reheb’ li loq’laj hu, a’an chanchan xtawb’al jun ak’ amiiw. A’an chanchan xtawb’al jun ak’ kristiaan li naru tooxtenq’a sa’ xhoonal li ajb’il ru, li naru tooxmusiq’a ut tixk’ojob’ qach’ool, ut li naru tooreek’asi chixjalb’al li qayu’am” (Richard G. Scott, “El poder de las Escrituras,” Liahona, noviembre 2011, 6).

laj Jose Smith rik’in xna’ xyuwa’

Li nimla rahilal chirixeb’ li 116 chi perel, xb’aan li xKwani Povi Winder