jun li junkab’al yookeb’ chirilb’al ruheb’ li loq’laj hu

28 diciembre–3 enero

Tzolʼlebʼ ut Sumwank 1

“Chex’ab’inq, ex tenamit”

Naru nakak’oxla Tzol’leb’ ut Sumwank 1 jo’ jun xtikib’ankil lix huhil lix k’utb’esihom li Qaawa’ sa’ roso’jikeb’ li kutan, li tz’iib’anb’il xb’aan ajwi’ a’an. K’a’ru naraj a’an naq taanaw laa’at chirix li Tzol’leb’ ut Sumwank? K’oxla li patz’om a’in, ut tz’iib’a li nakak’oxla naq yookat chirilb’al ru li tasal 1.

Tz’iib’a li nakak’oxla

Sa’ li po noviembre re 1831, ka’ajwi’ jun chihab’ rik’in meer chaq lix k’ojob’ankil wi’chik lix Iglees li Jesukristo. Us ta yoo chi nimank, a’an jun ch’ina ch’uut chi aj paab’anel li wankeb’ sa’ jun raqal chi ch’och’ b’ar wi’ moko k’iheb’ ta li tenamit, ut b’eresinb’ileb’ xb’aan jun li profeet maji’ naxket lajeebʼ xkaʼkʼaal chihab’ xyu’am. A’b’an li Dios kixnaw naq eb’ laj paab’anel a’in a’aneb’ lix moos ut laj k’amol re li resilal, ut a’an kiraj naq te’puktesimanq chiru li ruchich’och’ li k’utb’esinb’il na’leb’ li xk’eehom reheb’.

Li tasal 1 re li Tzol’leb’ ut Sumwank a’an k’eeb’il xb’aan li Qaawa’ jo’ lix tikib’ankil li ch’uut chi k’utb’esinb’il na’leb’ a’in, ut naxk’ut chi saqen ru naq us ta moko k’iheb’ ta chaq rajlankileb’ li komon re li Iglees, toj q’axal nim ru li esil kiraj li Dios naq te’xwotz lix santil paab’anel. A’an jun “yaab’ kuxej re tije’k” choq’ reheb’ “li wankeb’ sa’ li ruchich’och’,” ut naxk’ut chiruheb’ naq te’xjal xk’a’uxl ut te’xk’ojob’ lix sumwank li Dios “li junelik nakana” (eb’ li raqal 4, 8, 22). Eb’ li moos li neke’xk’am li esil a’in “q’uneb’ xmetz’ew ut moko nim ta xna’leb’eb’,” a’b’anan li Dios naraj ruheb’ li moos tuulaneb’ xch’ool—sa’ li kutan a’an jo’ ajwi’ sa’ li kutan a’in—re xk’eeb’al lix iglees “chi k’utmank chaq sa’ aak’ab’ ut sa’ chaq li q’ojyin” (eb’ li raqal 23, 30).

Re xtawb’al xkomon chik li na’leb’ chirix li resilal Tzol’leb’ ut Sumwank 1, chi’ilmanq Santos, 1:143–146.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 1

Li Qaawa’ nikinxb’oq “chixtz’ilb’aleb’ rix li taqlahom a’in.”

Jun aatin re tikib’ank na’aatinak chirix li k’a’ru wan sa’ jun li hu. Naxye resileb’ lix jolomil na’leb’ ut li rajom li hu ut naxtenq’aheb’ li ani te’iloq ru chixkawresinkil rib’ chirilb’al ru. Naq nakawil ru li tasal 1—li “raatin li Qaawa’ re xtikib’ankil” li Tzol’leb’ ut Sumwank (raqal 6)—sik’eb’ li jolomil na’leb’ ut eb’ li ajom ke’k’ehe’ xb’aan li Qaawa’ chirixeb’ lix k’utb’esinb’il na’leb’. K’a’ru nakatzol sa’ li tasal 1 li tatxtenq’a chixnimob’resinkil aana’leb’ naq yookat chixtzolb’al li Tzol’leb’ ut Sumwank? Qayehaq, maare taak’oxla k’a’ru naraj naxye “rab’inkil lix yaab’ xkux li Qaawa’ ” sa’eb’ li k’utb’esinb’il na’leb’ a’in (raqal 14) malaj k’a’ru naraj naxye “xtz’ilb’aleb’ rix li taqlahom a’in” (raqal 37).

Chi’ilmanq ajwi’ Xtikib’ankil li Tzol’leb’ ut Sumwank.

Tzol’leb’ ut Sumwank 1:1–6, 23–24, 37–39

Li Dios na’aatinak rik’in xtz’uumaleb’ re lix moos, ut taatz’aqloq ru li raatin.

Li tasal 1 natikla ut naraqe’ rik’in lix yeehom li Dios naq a’an na’aatinak rik’in xtz’uumaleb’ re lix moos sik’b’ileb’ ru (che’ilmanq li raqal 4–6, 23–24, 38). Tz’iib’a li k’a’ru nakatzol sa’ li k’utb’esinb’il na’leb’ a’in chirix li Qaawa’ ut lix yaab’ xkux. K’a’ru nakatzol chirixeb’ lix moos li Qaawa’? Jo’q’e aawab’ihom lix yaab’ xkux li Qaawa’ sa’ xyaab’ xkuxeb’ lix moos? (chi’ilmanq li raqal 38).

jun ch’utam re li jolomil ch’utub’aj-ib’

Eb’ li profeet ut li apostol neke’xk’ut chiqu lix taqlahom li Dios.

Tzol’leb’ ut Sumwank 1:3, 24–28, 31–33

Wi tuulan inch’ool, lix q’usum li Qaawa’ naru tixk’e chinjal ink’a’uxl.

K’e reetal naq sa’ li raqal 3 ut eb’ li raqal 24–28, li Qaawa’ kixye naq te’k’ehe’q chi nawmank lix maakeb’ ut lix sachik xna’leb’eb’ li tenamit. Wan naq a’in nokoxrahob’tesi ut nokoxk’e chi raho’k sa’ qach’ool, ut wan naq naxk’e li qana’leb’. K’a’ut naq jwal jalan jalanq li wiib’ chi na’leb’ a’in? K’oxla li k’a’ru nakab’aanu naq nakak’e reetaleb’ laa maak ut lix q’unil aametz’ew. K’a’ru nakataw sa’eb’ li raqal 24–28 li naru tatxtenq’a chixb’aanunkil li us sa’ li hoonal a’an? K’a’ru neke’xk’ut li raqal a’in, jo’eb’ ajwi’ li raqal 31–33, chirix chan ru naq li Qaawa’ naril lix q’unil aametz’ew ut laa maak?

Chi’ilmanq ajwi’ Proverbios 3:11–12; Eter 12:27; Moroni 6:8.

Tzol’leb’ ut Sumwank 1:12–30, 35–36

Li Qaawa’ kixk’ojob’ wi’chik lix evangelio re intenq’ankil chixk’ulb’aleb’ li ch’a’ajkilal wankeb’ sa’ roso’jikeb’ li kutan.

Us ta wan li qatijb’al sa’ li tasal 1 chirixeb’ li ch’a’ajkil kutan li te’chalq, wan ajwi’ jun esil aj k’ojob’anel ch’oolej: “Laa’in li Qaawa’, xb’aan naq kinnaw li nimla rahilal li taachalq sa’ xb’eeneb’ li wankeb’ sa’ li ruchich’och’, kinb’oq chaq inmoos aj Jose Smith, alalb’ej, ut kiwaatina chalen chaq sa’ choxa” (raqal 17).

K’e reetaleb’ li ninqi rahilal li ki’aatinak wi’ li Qaawa’ (che’ilmanq, jo’ eetalil, li raqal 13–16, 35). K’a’ chik li ninqi rahilal nakawil sa’ li ruchich’och’ anajwan—malaj sa’ laa yu’am laa’at? Eb’ li raqal 17–30 neke’xye resil li k’a’ru xb’aanuhom li Qaawa’ choq’ aawe re aakawob’resinkil chiruheb’ li ninqi rahilal a’in. K’oxla xtz’iib’ankil chi tustu li nakataw.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 1:1–6, 37–39.Re xtikib’ankil li aatinak chirixeb’ lix tijom li Qaawa’, taaruuq tat-aatinaq chirixeb’ li tijom naqak’ul rik’in jalaneb’ chik li kristiaan chirix li xiwxiw li ink’a’ naru naqil—jo’ junaq b’e li yolyol, junaq kaq-sut-iq’ li jwal kaw, malaj junaq li b’eleb’aal ch’iich’ li nume’k re. K’a’ru neke’xk’ut chiqu li na’leb’ a’in chirix chan ru naq li Qaawa’ nokoxtij? Jo’ naxye sa’ Tzol’leb’ ut Sumwank 1:1–6, 37–39, chan ru nokoxtij li Qaawa’? K’a’ru junjunqeb’ li na’leb’ toje’ xooxtij wi’? Maare tatruuq chirilb’al chi chapb’il xyaab’ malaj chi tz’iib’anb’il jun esil re li jolomil ch’utub’aj-ib’ re xtawb’al xkomon li “xyaab’ kuxej re tije’k” li k’eeb’il xb’aan li Dios.

Tzol’leb’ ut Sumwank 1:16.K’a’ru naraj naxye “xxaqab’ankil lix tiikilal” li Qaawa’? K’a’ru naru taqab’aanu re naq chi ch’olch’o yooko chixb’aanunkil a’an, ut ink’a’ yooko chi “beek chiru tz’aqal li qab’e” laa’o?

Tzol’leb’ ut Sumwank 1:30.K’a’ru naraj naxye xyeeb’al naq “yaal ut yo’yo” li Iglees? Re xtenq’ankil laa junkab’al chixk’oxlankil li patz’om a’in, maare taaruuq taak’ut chiruheb’ xjalam-uucheb’ li k’a’aq re ru yo’yo ut li k’a’aq re ru ink’a’ yo’yo. Taaruuq ajwi’ tex’aatinaq chirix li naru teeb’aanu jo’ junkab’al re tenq’ank “chixkeeb’al li Iglees chi k’utmank chaq sa’ aak’ab’ ut sa’ chaq li q’ojyin. ”

Tzol’leb’ ut Sumwank 1:37.K’oxla k’uub’ank na’leb’ jo’ junkab’al chirix chan ru “xtz’ilb’aleb’ rix li taqlahom a’in” sa’ li Tzol’leb’ ut Sumwank chiru li chihab’ a’in. K’a’ru teeb’aanu re texwanq chixtzolb’aleb’ li loq’laj hu jo’ junkab’al wulaj wulaj? K’a’ru li na’leb’ chirix li tzolok li naru texxtenq’a chixtzolb’aleb’ li loq’laj hu? (Chi’ilmanq “Li na’leb’ re xchaab’ilob’resinkil li tzolok sa’ junkab’al” li wan sa’ xtiklajik li hu a’in.)

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Jun li profeet,” B’ichleb’aal choq’ reheb’ li Kok’al, 58–59, jwal chaab’il li roso’jik raqal.

Xchaab’ilob’resinkil li tzolok aajunes

Sik’ li Jesukristo. Li rajomeb’ li loq’laj hu a’an xch’olob’ankil xyaalal li Jesukristo ut lix evangelio. Naq yookat chirilb’al ru Tzol’leb’ ut Sumwank 1, k’oxla xjuch’b’al malaj reetalinkileb’ li raqal li nakate’xtzol chirix li Jesukristo.

Hu re Taqlahom

Eb’ li xb’eenil k’utb’esinb’il na’leb’ choq’ re li Iglees li k’ojob’anb’il wi’chik ke’tz’iib’aman sa’ li Hu re Taqlahom.