“11–17 enero. Tzol’leb’ ut Sumwank 2; Jose Smith—Resilal 1:27–65: “Lix ch’ooleb’ li alal k’ajolb’ej te’sutq’iiq rik’ineb’ lix yuwa’,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)
“11–17 enero. Tzol’leb’ ut Sumwank 2; Jose Smith—Resilal 1:27–65,” Kim, Taaqehin—Choq’ reheb’ li komon ut li junkab’al: 2021
A’an kinixb’oq rik’in ink’ab’a’, xb’aan laj Michael Malm
11–17 enero
Tzol’leb’ ut Sumwank 2; Jose Smith—Resilal 1:27–65
“Lix ch’ooleb’ li alal k’ajolb’ej te’sutq’iiq rik’ineb’ lix yuwa’ ”
Li Santil Musiq’ej naru nakatxtzol rajlal sut naq nakawileb’ ru li loq’laj hu—us ta ak xawileb’ ru k’iila sut. Chi jo’kan, chatwanq chixk’ulb’aleb’ li ak’il na’leb’ ut musiq’ahom.
Tz’iib’a li nakak’oxla
Ak numenaq chik oxib’ chihab’ naq li Dios Yuwa’b’ej ut li Jesukristo, li Ralal, ke’xk’ut rib’ chiru laj Jose Smith sa’ li k’iche’, a’b’an laj Jose maajun chik k’utb’esinb’il na’leb’ kixk’ul chalen chaq a’an. A’an ki’ok xk’a’uxl chirix chan ru wan chiru li Qaawa’. Jo’ chiqajunilo, wan li ink’a’ us xb’aanuhom chaq, ut kireek’a naq jitb’il xb’aan a’an. A’ut toj wan jun k’anjel kiraj li Dios naq tixb’aanu. Ut li k’anjel li kib’oqe’ wi’ laj Jose a’an laq’lo rik’in li naxpatz’ li Dios qe chiqajunil. Laj Jose moqon tixk’e chi k’utmank lix Hu laj Mormon; k’a’ru napatz’man qe naq taqab’aanu rik’in? Laj Jose kixk’uleb’ li laawil re li tijonelil re xsutq’isinkileb’ xch’ooleb’ li alal k’ajolb’ej rik’ineb’ li yuwa’b’ej; chan ru yooko chixsutq’isinkil qach’ool rik’ineb’ li qaxe’ qatoon? Kiyehe’ re laj Jose resileb’ li profeetil aatin li sa’ junpaat te’tz’aqloq ru; k’a’ru li qak’anjel sa’ xtenq’ankil chixtz’aqob’resinkileb’ ru? Naq nokotz’aqon sa’ xk’anjel li Dios, ak re naq taawanq li ch’a’ajkilal ut li rahob’tesink naru naqak’ul, jo’ chanru naq kixk’ul li Profeet. A’b’anan, naru ajwi’ taawanq qapaab’aal naq li Qaawa’ tooxk’e jo’ k’anjeleb’aal sa’ ruq’, jo’ chanru naq kixb’aanu choq’ re laj Jose.
Chi’ilmanq ajwi’ Santos, 1:20–48.
Li na’leb’ re xtzolb’aleb’ li loq’laj hu aajunes
Wan jun li k’anjel naraj li Dios naq tinb’aanu.
Naq yookat chirilb’al ru Jose Smith—Resilal 1:27–33, k’e reetal naq wan jun li k’anjel naraj li Dios naq taab’aanu, jo’ chanru naq kiraj naq tixb’aanu laj Jose Smith. K’oxla li b’oqok a’in kixk’e li Awa’b’ej Russell M. Nelson: “Patz’ re laa Choxahil Yuwa’, sa’ xk’ab’a’ li Jesukristo, k’a’ru nareek’a chawix ut chirix laa k’anjel arin sa’ ruchich’och’. Wi nakattz’aaman chi anchal aach’ool, rik’in xnumik li hoonal li Musiq’ej tixhasb’a aawe li yaal li tixjal laa yu’am. … Ninye aawe naq sa’ li hoonal naq tat-ok chixk’eeb’al reetal yal ta jun miin raqal re chan ru nakatril laa Choxahil Yuwa’ ut li naraj a’an naq taab’aanu choq’ re, taajalaaq chi tz’aqal laa yu’am!” (“Como llegar a ser una verdadera generación del milenio” [ch’utam choq’ reheb’ li saaj maji’ sumsuukeb’ chiru chixjunil li ruchich’och’, 10 enero, 2016], broadcasts.ChurchofJesusChrist.org).
Wan naq maare nakaweek’a jo’ kireek’a laj Jose sa’eb’ li raqal 28–29. K’a’ru naru taatzol rik’in laj Jose chirix li tento taab’aanu naq laa b’aanuhom ink’a’ naxk’am rib’ rik’in li k’anjel b’oqb’ilat wi’ xb’aan li Dios?
Wan sa’ lix Hu laj Mormon “lix tz’aqalil li evangelio li junelik nakana.”
Naq yookat chirilb’al ru Jose Smith—Resilal 1:34–65, k’oxlaheb’ li na’leb’ sa’eb’ li raqal a’in li te’xtoch’ raj aach’ool wi ta maajun wa aawab’ihom resil lix Hu laj Mormon. Jo’ aj paab’anel, k’a’ut naq aajel ru li esil a’in choq’ re lix nawom aach’ool chirix lix Hu laj Mormon?
K’oxla chan ru naq lix Hu laj Mormon naxtz’aqob’resi ru li profeetil aatin wan sa’ Isaias 29:4, 11–18.
Kitz’aqob’resiik ru li najter profeetil aatin rik’in lix k’ojob’ankil wi’chik li evangelio.
Laj Moroni kixye re laj Jose resil junjunqeb’ li profeetil aatin re li Najter ut li Ak’ Chaq’rab’, jo’ Isaias 11; Hechos 3:22–23; ut Joel 2:28–32. K’a’ut naq aajel ru choq’ re laj Jose xnawb’aleb’ li profeetil aatin a’in? K’a’ut naq aajel ru naq taanaweb’ ru laa’at?
K’a’ru kik’ojob’aak wi’chik xb’aan laj Elias?
Li Awa’b’ej Henry B. Eyring kixye: “Aajel ru xnawb’al k’a’ut naq li Qaawa’ kixye naq tixtaqla laj Elias. Laj Elias a’an chaq jun xnimal ru profeet, k’eeb’il re nimla wankilal xb’aan li Dios. Kiwan rik’in a’an li wankilal q’axal nim naxk’e li Dios reheb’ li ralal xk’ajol: kiwan rik’in li wankilal re tz’apok, li wankilal re b’ak’ok sa’ ruchich’och’ re naq b’akb’ilaq sa’ choxa” (“Teniendo entrelazados sus corazones,” Liahona, mayo 2005, 78).
Chi’ilmanq ajwi’ Tzol’leb’ ut Sumwank 84:19–27; David A. Bednar, “Chikab’lamanq li ochoch a’in choq’ re lin k’ab’a’,” Jolomil ch’utub’aj-ib’ re abril 2020.
Li santil ochoch re Palmyra Nueva York. Neke’tz’ape’ sa’ junajil li junkab’al sa’ li santil ochoch xb’aan li wankilal li kik’ojob’aak wi’chik rik’in ruq’ laj Elias.
Laj Elias kichal re xsutq’isinkil inch’ool rik’ineb’ lin xe’toonil.
K’a’ru neke’xk’ut chawu li aatin jo’ “taaraw,” “ch’ooleb’,” ut “sutq’isink” sa’ li tasal a’in chirix lix k’anjel laj Elias ut chirixeb’ li osob’tesink reheb’ lix laawil li tijonelil li kixk’ojob’ wi’chik? Chan ru aaweek’ahom naq sutq’isinb’il aach’ool rik’ineb’ laa xe’toonil? K’oxla chan ru naru taak’uleb’ li eek’ahom a’an chi kok’ aj xsa’. Maare taaruuq taapatz’ re junaq laa wech alal naq tixwotz jun seraq’ aawik’in chirix jun reheb’ laa xe’toonil—ut chaab’ilaq ajwi’ naq taatz’iiba’ resil. Maare taaruuq taataw jun aaxe’toonil kamenaq li maji’ naxk’uleb’ li k’ojob’anb’il k’anjel re li evangelio, toja’ naq taab’aanu li k’anjel a’an sa’ li santil ochoch.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Jose Smith—Resilal 1:28–29.K’a’ru kireek’a laj Jose Smith chirix li ink’a’ us kixb’aanu? K’a’ru kixb’aanu xb’aaneb’ li eek’ahom a’an? K’a’ru naqatzol rik’in a’an chirix li tento taqab’aanu naq naqab’aanu li ink’a’ us?
-
Jose Smith—Resilal 1:33–54.Taaruuq taapatz’ re jun komon sa’ li junkab’al naq tixyaab’asi jun raqal malaj chixjunil li kixye laj Moroni sa’ Jose Smith—Resilal 1:33–42 kaahib’ sut (xb’aan naq laj Moroni kixye li esil a’in kaahib’ sut). Sa’ xyi li junjunq sut rilb’al ru li esil, patz’ reheb’ li komon sa’ li junkab’al naq te’xwotz li najultiko’ reheb’ chirix li raatin, chi ink’a’ neke’rileb’ li raqal. K’a’ut naq li Qaawa’ naxk’iilasutiheb’ raj li aajel ruhil aatin? K’a’ chik ru naxb’aanu li Qaawa’ re qatzolb’al rik’in li k’iilasutink?
-
Tzol’leb’ ut Sumwank 2:2Re xtenq’ankileb’ laa kok’al chixtawb’al ru “li k’a’ru yeechi’inb’il reheb’ li yuwa’b’ej,” taaruuq teeril ru Abraham 2:9–11 sa’ komonil malaj teeril li video “Testigos especiales de Cristo—Presidente Russell M. Nelson” (ChurchofJesusChrist.org). K’e reetaleb’ li yeechi’ihom kixk’e li Dios jo’ xcha’al lix sumwank rik’in laj Abraham. Chan ru “taqaweb’ ” li yeechi’ihom a’in sa’ li qach’ool?
-
Tzol’leb’ ut Sumwank 2:2–3.Re xtenq’ankileb’ li komon sa’ li junkab’al chixsutq’isinkileb’ xch’ool rik’ineb’ lix yuwa’eb’ (malaj xxe’ xtooneb’), taaruuq taab’oqeb’ chi tzolok chirix jun lee xe’toonil ut chixwotzb’al li neke’xtzol rik’in lix komoneb’ sa’ li junkab’al. K’a’ut naq li Qaawa’ naraj naq tootzoloq chirixeb’ li komon sa’ li qajunkab’al ut taqab’aanu li k’ojob’anb’il k’anjel re li santil ochoch choq’ reheb’? Chan ru naq noko’osob’tesiik naq nokotz’aqon sa’ li k’anjel re li resilal li junkab’al ut li santil ochoch? (chi’ilmanq Dale G. Renlund, “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink,” Jolomil ch’utub’aj-ib’ re abril 2018).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Jun li resilal li qajunkab’al,” B’ichleb’aal choq’ reheb’ li Kok’al, 100.
Xchaab’ilob’resinkil li tzolok aajunes
Roksinkil li k’anjeleb’aal sa’eb’ li loq’laj hu. Eb’ li k’anjeleb’aal jo’eb’ li kok’ tz’iib’ahom sa’eb’ li perel, li K’utul Raqal reheb’ li Loq’laj Hu, ut ChurchofJesusChrist.org naru tate’xtenq’a chixtawb’aleb’ ru li kristiaan, li k’a’ru kik’ulman, ut eb’ li ch’ol aatin sa’eb’ li loq’laj hu.
Laj Jose naxk’uleb’ li perel ch’iich, xb’aan laj Gary E. Smith