vaituloto i le oso a’e o le la

10–16 Me

Mataupu Faavae ma Feagaiga 49–50

“O Le Mea e Mai i le Atua o le Malamalama Lea”

A o e faitau i le Mataupu Faavae ma Feagaiga 49–50, vaavaai mo savali po o mataupu faavae e te manatu o le a sili ona anoa i tamaiti o loo e aoaoina. O loo fautuaina atu i le otootoga lenei ni nai mataupu faavae.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Faaali atu se ata mai le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma fesoasoani i tamaiti e talatalanoa pe faapefea ona avea Iesu Keriso ma se leoleo mamoe lelei.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 49:12–14

E mafai ona ou mulimuli ia Iesu Keriso.

Fesoasoani i tamaiti ia malamalama e mafai ona latou mulimuli ia Iesu Keriso e ala i le talitonu ia te Ia, salamo, papatisoina, ma le mauaina o le Agaga Paia.

Gaoioiga e Mafai Ona Fai

• Faaali ni tulaga vae se fa e fai i pepa ma ni ata se fa e faaalia ai le talitonu ia Iesu Keriso, salamo, papatisoina, ma le mauaina o le Agaga Paia. Faitau le Mataupu Faavae ma Feagaiga 49:12–14, ma fai atu i tamaiti e faasino atu i le ata sao pe a ta’ua ia mea taitasi i fuaiupu. Tuu atu i tamaiti e fesoasoani ia te oe e faatulaga tulaga vae i le foloa ma tuu i ai i autafa ia ata, ma valaaulia tamaiti e auauai e savavali i luga o tulagavae. Faasoa atu lau molimau afai tatou te faia uma vaega o loo i luga o nei ata, ua tatou mulimuli i le Faaola.

• Faaaoga le itulau o gaoioiga o lenei vaiaso e fai ai ni papeti i tamatamailima e mafai ona fesoasoani i tamaiti e aoao ai pe faapefea ona latou mulimuli ia Iesu Keriso e ala i le faatuatua, salamo, papatisoina, ma le mauaina o le meaalofa o le Agaga Paia.

Mataupu Faavae ma Feagaiga 50:23–25

E mafai ona faateteleina le susulu o lo’u moli faaleagaga.

O manatu faigata e pei o le upumoni ma le agaga e mafai ona faigata ona malamalama i ai tamaiti laiti, ae e mafai ona fesoasoani le faatusatusaina o na mea i le malamalama, e pei ona faia e le Alii i le Mataupu Faavae ma Feagaiga 50:23–25.

Gaoioiga e Mafai Ona Fai

• Faaaoga se gaoioiga e mafai ona faaalia ai le auala e mafai ai ona faaopoopo atili le susulu o o tatou moli faaleagaga. E mafai ona e faaali atu ni ata o mea e maua mai ai le malamalama (e pei o se moligao, matauila, ma le la) ma tuu atu i tamaiti e faatulaga mai le malamalama laitiiti sei oo i le malamalama sili. Valaaulia tamaiti e faafoliga o ni moli o loo faateteleina le susulu e ala i le punonou i lalo ma tutu lemu a’e ma fālō i luga o latou lima. Fesoasoani i tamaiti e mafaufau i mea lelei e mafai ona latou faia e faateteleina ai le susulu o o latou moli faaleagaga.

• Usu faatasi ma tamaiti se pese e faatatau i o latou moli faaleagaga, e pei o le “Susulu Pea” (Tusipese a Tamaiti, 96). Molimau atu i auala na fesoasoani ai le Tama Faalelagi e faasusulu atili lou moli. Taʻu atu i tamaiti e uiga i le malamalama e te vaaia ia i latou.

Mataupu Faavae ma Feagaiga 50:41–44

E alofa Iesu Keriso ia te a’u.

O Iesu Keriso o le Leoleo Mamoe Lelei. O i tatou o Ana mamoe, ma e alofa o Ia ia i tatou. O le a se mea e fesoasoani ai i tamaiti o e aoaoina ia lagona ai Lona alofa mo i latou?

Gaoioiga e Mafai Ona Fai

• Faaali atu se ata o Iesu Keriso ma tamaiti (tagai Tusi Ata o le Talalelei, nu. 47, 84, po o le 116), ma fesili atu i tamaiti pe faapefea ona latou iloa e alofa Iesu i tamaiti. Faasoa atu le auala e te iloa ai e alofa Iesu ia te oe ma tamaiti uma i le vasega.

• Fai ni mamoe pepa, tusi ai i luga igoa o tamaiti o le vasega, ma nanā solo i totonu o le potu. Faaali atu se ata o le Faaola, ma faitau le Mataupu Faavae ma Feagaiga 50:41–42. Fesoasoani i tamaiti ia malamalama i mea o loo aoao mai e nei fuaiupu e faatatau i lagona o Iesu Keriso ia i latou. Tuu atu ia latou sue solo mamoe i totonu o le potu ma tuu i luga o le laupapa i talane o le ata o Iesu ina ia “leai so i latou … e leiloa” (fuaiupu 42).

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 49:12–14

E mafai ona ou mulimuli ia Iesu Keriso.

E manaomia i tatou uma e le Alii e aoao atu i isi e mafai ona latou omai ia te Ia i le i ai o le faatuatua, salamo, papatisoina, ma le mauaina le meaalofa o le Agaga Paia.

Gaoioiga e Mafai Ona Fai

• Valaaulia tamaiti e faatusatusa le Mataupu Faavae ma Feagaiga 49:12–14 ma le mea na aoao mai e Peteru i le Galuega 2:38 ma le mataupu faavae o le faatuatua lona fa. O a ni tulaga e tutusa ai na e mauaina? Aisea e taua ai nei upumoni?

• Valaaulia tamaiti e galulue taitoalua ma faafoliga e manao se tasi o i laua e iloa pe faapefea ona mulimuli ia Iesu Keriso. O le isi tamaitiiti e mafai ona aoaoina lana paga e faaaoga ai le Mataupu Faavae ma Feagaiga 49:12–14.

Mataupu Faavae ma Feagaiga 49:15–17

O le faaipoipoga i le va o le alii ma le tamaitai e taua i le fuafuaga a le Atua.

Atonu o loo feagai tamaiti o loo e aoaoina ma ni savali le manino e faatatau i le faaipoipoga. O le Mataupu Faavae ma Feagaiga 49:15–17 e mafai ona fesoasoani ia i latou ia malamalama i lagona o le Faaola e uiga i le faaipoipoga.

Gaoioiga e Mafai Ona Fai

• Faamatala atu o le au Sieka [Shakers] o se vaega na talitonu e le tatau ona faaipoipo tagata (tagai i le ulutala o le Mataupu Faavae ma Feagaiga 49). Valaaulia tamaiti e saili mea na aoao mai e le Faaola e faatatau i le faaipoipoga i totonu o le Mataupu Faavae ma Feagaiga 49:15–17.

• Fesoasoani i tamaiti ia malamalama i le uiga o le fuaitau “o le faaipoipoga ua faauuina e le Atua”. Valaaulia i latou e galulue taitoalua ma faatusatusa le Mataupu Faavae ma Feagaiga 49:15–17 ma parakalafa muamua e tolu o le “O le Aiga: O le Folafolaga i le Lalolagi.” Aisea la e matua taua ai le faaipoipoga i le Tama Faalelagi?

• Usu faatasi le fuaiupu lona lua o le “E Mafai Ona Faavavau Aiga” (Tusipese a Tamaiti, 98) po o se isi pese e faatatau i aiga. Fesoasoani i tamaiti e mafaufau i auala e mafai ai ona latou saunia e faaipoipo i le malumalu i se aso ma maua se aiga e faavavau.

  ulugalii i fafo o le malumalu

  O le faaipoipoga i le va o se alii ma se tamaitai ua faauuina e le Atua.

Mataupu Faavae ma Feagaiga 50:40–46

O Iesu Keriso o le Leoleo Mamoe Lelei.

O le Mataupu Faavae ma Feagaiga 50:40–46 o loo i ai faamatalaga faatusa e mafai ona fesoasoani i tamaiti o loo e aoaoina ia malamalama i lagona o le Faaola mo i latou.

Gaoioiga e Mafai Ona Fai

• Fai se taaloga faafetaui e faaaoga ai fuaitau mai le Mataupu Faavae ma Feagaiga 50:40–46. Mo se faataitaiga, e mafai ona e tusia “Aua le matatau, le fanau laiti e” i se tasi kata e fetaui ma se isi kata o loo faapea mai “ona o outou o a’u” (fuaiupu 41). Faitau faatasi le Mataupu Faavae ma Feagaiga 50:40–46. Ona faafefiloi lea o kata i luga o le foloa, po o se laulau, po o le laupapa ma fai atu i tamaiti e faafetaui fuaitau. O a ni mea o loo aoao mai e nei fuaitau ia i tatou e uiga ia Iesu Keriso?

• Ina ia fesoasoani i tamaiti ia malamalama i le auala e pei ai le Faaola o se leoleo mamoe lelei, fai atu ia i latou e faitau faatasi le Mataupu Faavae ma Feagaiga 50:40–46. Ona faaali lea o le vitio “Jesus Declares the Parable of the Lost Sheep” (ChurchofJesusChrist.org), ma fai atu ia i latou e vaai se vaega o le vitio e faamanatu atu ia i latou mea na latou faitauina. E faapefea ona laveai i tatou e Iesu Keriso? E mafai faapefea ona avea i tatou ma leleo mamoe lelei i isi?

aikona o le aoaoina

Fautuaina le Aoaoina i le Aiga

Saunia se faamatalaga mo tamaiti taitoatasi e i ai upu nei: Fesili mai ia te a’u e uiga. Tuu atu i tamaiti e faatumu le avanoa i se mea na ia aoaoina i totonu o le vasega (tuu atu le fesoasoani pe a manaomia) ma faapipii le faamatalaga i o latou ofu e uunaia ai se talanoaga i le fale.

Faaleleia o Lo Tatou Aoao Atu

Fetuunai gaoioiga mo le matutua o tamaiti e te faiaoga ai. Ao tuputupu ae tamaiti, ua amata ona tele o latou sao i le vasega. Ua tele lo latou aafiaga ma ua alualu i luma le lelei i le faasoaina o o latou manatu. I le aoaoina o tamaiti laiti, e ono manaomia ona faamalamalama atili nai lo o tamaiti matutua. Ia tuu atu i tamaiti se avanoa e auai ai i latou lava, ma fesoasoani ia i latou pe a manaomia.

itulau o gaoioiga: E mafai ona ou mulimuli ia Iesu Keriso