talavou i fafo o le malumalu

26 Aperila–2 Me

Mataupu Faavae ma Feagaiga 45

“O Folafolaga … O Le A Faataunuuina”

I le avea ai ma se faiaoga, o lau tapenaga pito sili ona taua o le faaleagaga. Amata i le suesueina o le Mataupu Faavae ma Feagaiga 45 ma tatalo mo le taitaiga a le Agaga Paia. O lenei otootoga o loo i ai ni manatu e ono mafai ona fesoasoani ia te oe. E mafai foi ona e maua ni manatu i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga po o totonu o le Liahona po o le Uo.

Tusi Faamaumau Ou Lagona Uunaia

aikona o le fefaasoaai

Valaaulia le Fefaasoaai

Fesili i tamaiti pe latou te mananao e faasoa atu se mea sa latou aoaoina mai i tusitusiga paia i lenei vaiaso. Filifili se tasi e faasoa, ma fai atu i isi tamaiti e sii o latou lima pe a talitutusa mea na latou aoaoina.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 45:32

E mafai ona ou “tu i nofoaga paia.”

I le Mataupu Faavae ma Feagaiga 45:32, na aoao mai le Alii o le a maua e Ona soo le saogalemu i aso e gata ai e ala i le tutu i nofoaga paia—nofoaga e faapitoa i le Alii. E mafai faapefea ona e fesoasoani i tamaiti ia iloa nofoaga paia i o latou olaga?

Gaoioiga e Mafai Ona Fai

• Tuu ata o se fale, o se falelotu, ma se malumalu i nofoaga eseese i totonu o le potu. Tuu atu ni faailoilo e faamatala ai nei nofoaga, ma valaaulia tamaiti e tutu i talaane o le ata o loo e faamatalaina. Faitau le laina muamua mai le Mataupu Faavae ma Feagaiga 45:32. Molimau atu e faamanuiaina i tatou pe a faaalu o tatou taimi i nofoaga paia e pei o tatou fale, tatou falelotu, ma le malumalu. Fai atu i tamaiti e talanoa e uiga i o latou lagona pe a i ai i nofoaga paia e pei o nofoaga nei.

• Valaaulia tamaiti e faamaea le itulau o gaoioiga o lenei vaiaso. Fesoasoani ia i latou e tusi “E mafai ona ou fesoasoani e avea lo’u fale ma se nofoaga paia” ma le “Mataupu Faavae ma Feagaiga 45:32” i luga o latou ata. O le a se mea e mafai ona latou faia e fesoasoani e avea ai o latou fale o se nofoaga paia?

• Ina ia fesoasoani i tamaiti ia mafaufau i le uiga o le “le masii ese,” fai atu ia i latou e tutu sao ma aua le minoi mo se minute e tasi. Faitau le laina muamua mai le Mataupu Faavae ma Feagaiga 45:32. Fesoasoani i tamaiti ia malamalama o le “tutu i nofoaga paia, ma … le masii ese” o lona uiga o le filifili o le mea tonu i taimi uma, e tusa lava po o le a le mea o loo tupu. Valaaulia i latou ia “le masii ese” mai mafaufauga ma gaoioiga amiotonu.

Mataupu Faavae ma Feagaiga 45:44–45

O le a toe afio mai Iesu Keriso.

Ina ua faalogo le Au Paia i Katelani, Ohaio, i le faaaliga o loo maua i le Mataupu Faavae ma Feagaiga 45, lea o loo talanoa mai e uiga i aso mulimuli ma le Toe Afio Mai Faalua o le Faaola, sa latou taliaina ma le olioli. Mafaufau pe faapefea ona e fesoasoani i tamaiti e sauni ma le fiafia mo le Afio Mai Faalua.

Gaoioiga e Mafai Ona Fai

• Fesoasoani i tamaiti e mafaufau e uiga i o latou lagona pe a latou iloa o le a sau se tagata taua e asiasi ia i latou, e pei o se tama/tina matua po o se uo. E faapefea ona latou saunia mo lea asiasiga? Faaali atu se ata o le Faaola, ma faitau se vaega po o le vaega atoa o le Mataupu Faavae ma Feagaiga 45:44–45. Taʻu i tamaiti ou lagona e uiga i le toe afio mai o le Faaola, ma tuu atu ia i latou e faasoa mai o latou lagona.

• Faaali atu se ata o le Afio Mai Faalua o le Faaola (tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga), ma fai i tamaiti e faasoa mai o latou lagona pe a vaai i le ata. Faasoa atu lau molimau o le a toe afio mai Iesu Keriso.

• Usu se pese e faatatau i le Afio Mai Faalua o le Faaola, e pei o le “Pe A Ia Toe Afio Mai” (Tusipese a Tamaiti, 46). Faaaoga le pese e talanoa ai i auala e mafai ai ona tatou sauni mo le toe afio mai o Iesu, e pei o le faia o le finagalo o le Atua ma le faasusulu atu o o tatou malamalama mo isi.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 45:3–5

O Iesu Keriso o lo tatou Fautua i le Tama.

E mafai faapefea ona e fesoasoani i tamaiti e faamalosia lo latou faatuatua o Iesu Keriso o lo latou Fautua? O faapefea ona e aoaoina lenei mea mo oe lava?

Gaoioiga e Mafai Ona Fai

• Tusi ni nai upu po o fuaitau o loo maua i le Mataupu Faavae ma Feagaiga 45:3–5 i ni fasipepa eseese. Tuu atu i tamaiti se minute e suesue ai i nei fuaiupu i totonu o latou tusitusiga paia, ona fai atu lea i ai e tapuni a latou tusitusiga paia ma faatulaga upu o loo tusia i fasipepa i le faasologa o loo i ai i le fuaiupu. E tusa ai ma nei fuaiupu, o a upu o loo fai atu e le Faaola e aioi ai mo i tatou i luma o le Tama Faalelagi?

• Fesoasoani i tamaiti e faamatala le uiga o le upu fautua, e ala i le sueina i totonu o se utugagana. O le a le mea na faia e le Faaola na mafai ai ona avea o Ia ma o tatou Fautua? Faasoa atu ou lagona e uiga i mea ua faia e Iesu Keriso mo i tatou, ma tuu atu i tamaiti e faasoa o latou lagona.

Mataupu Faavae ma Feagaiga 45:9

O le talalelei a Iesu Keriso o se malamalama i le lalolagi.

Fesoasoani i tamaiti o loo e aoaoina e mafaufau i auala e saunia ai e le talalelei le lalolagi mo le Afio Mai Faalua o le Faaola.

Gaoioiga e Mafai Ona Fai

• Faaali atu ni ata o se moli ma se tagavai, pe tusi i luga o le laupapa. Valaaulia tamaiti e faitau le Mataupu Faavae ma Feagaiga 45:9 ma mafaufau i auala e avea ai le talalelei e pei o se moli [malamalama], o se tagavai (po o se fu’a), ma se avefeau. E mafai ona e faamalamalama atu i aso anamua, o se ie po o se fu’a na avea ma tagavai e tauaveina i taimi o taua. E fesoasoani i fitafita e iloa ai le mea e faapotopoto i ai ma le mea e fai.

  O le Taitai ’Au o Moronae o loo uuina le Tagavai o le Saolotoga

  Tagavai o le Saolotoga, saunia e Larry Conrad Winborg

• Fesoasoani i tamaiti e tauloto le fuaiupu atoa po o se vaega o le fuaiupu 9 e ala i le tusi i luga o le laupapa ma auauai ona tape ni nai upu.

Mataupu Faavae ma Feagaiga 45:37–38

O le a toe afio mai Iesu Keriso.

E mafai ona lagona e tamaiti le fefe e faitau e uiga i taua, amioletonu, ma le faatafunaga lea na valoia o le a oo mai ae le’i oo i le taimi o le Afio Mai Faalua o le Faaola. E mafai faapefea ona e fesoasoani ia latou tulimatai atu ma le olioli i lenei aso folafolaina?

Gaoioiga e Mafai Ona Fai

• Fesili atu i tamaiti pe faapefea ona latou iloa ua lata mai se tau [season] fou. O a ni faailoga latou te vaavaai i ai? Faamalamalama atu e pei ona i ai faailoga o se tau fou, e i ai foi faailoga o le Toe Afio Mai Faalua. Faitau faatasi le Mataupu Faavae ma Feagaiga 45:37–38. O le a le tala a Iesu, o le a faapeī faailoga o Lona Afio Mai Faalua? Ina ia fesoasoani i tamaiti ia iloa faailoga e tatau ona tatou vaavaai i ai, tofi tamaiti taitoatasi (po o se vaega o tamaiti) e faitau ni nai fuaiupu mai le Mataupu Faavae ma Feagaiga 45 lea o loo faamatala mai ai nei faailoga. Mo se faataitaiga, e mafai ona faaaogafuaiupu 26–27, 31–33, 40–42. . Tuu atu i tamaiti e faasoa mai mea na latou mauaina. O fea o nei faailoga ua faataunuuina i aso nei?

• I ni fasipepa, tusi ni folafolaga e faatatau i mea o le a tutupu i le lumanai na e mauaina i lau suesuega o le vaega 45. O nisi faataitaiga o nei folafolaga e mafai ona maua i fuaiupu 44–45, 51–52, 55, 58–59, 66–71. Tusi i luga o le laupapa fuaiupu o loo maua ai na folafolaga. Tuu atu i tamaiti fasipepa, ma fai atu ia i latou e faaaoga a latou tusitusiga paia e faafetaui ai fuaiupu o loo i luga o le laupapa i folafolaga. Talanoa po o le a le uiga o nei folafolaga, ma valaaulia tamaiti e faasoa mai pe o fea o nei folafolaga e fesoasoani e faaosofia ai lo latou fiafia i le Afio Mai Faalua o le Faaola.

aikona o le aoaoina

Uunaia le Aoaoina i le Aiga

Valaaulia tamaiti e mafaufau i se mea se tasi sa latou aoaoina i le taimi o le vasega e mafai ona latou faasoa atu i o latou aiga. Fai atu i nisi o i latou e faasoa mai i le vasega se mea latou te fia faasoa atu ai i le fale.

Faaleleia o Lo Tatou Aoao Atu

Fesoasoani i tamaiti ia iloa le Agaga. Ao e aoaoina tamaiti, tau atu ia i latou pe a e lagonaina le Agaga Paia. Talanoa pe faapefea ona e iloaina o loo i ai o Ia iina. Mo se faataitaiga, e mafai ona e lagonaina le filemu po o le fiafia ao e usuina se pese e faatatau i le Faaola. O le iloaina o nei faalogona o le a mafai ona fesoasoani ai i tamaiti e iloa ai taimi latou te lagonaina ai le Agaga.

itulau o gaoioiga: E mafai ona ou tu i nofoaga paia