faifaatoaga ma ni povi

Peti Muamua, saunia e James Taylor Harwood

17–23 Me

Mataupu Faavae ma Feagaiga 51–57

“O Se Tausimea Faamaoni, Fai Mea Tonu, ma Atamai”

E faaopoopo atu i manatu o loo tuuina atu ii, e mafai e le Agaga ona uunaia oe e taulai atu i se isi mea mai le Mataupu Faavae ma Feagaiga 51–57 atonu e taua mo tamaiti o loo e aoaoina.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Tuu atu i tamaiti o loo mananao e faasoa se mea o loo latou aoaoina e sei se numera mai se koneteina e iloa ai le faasologa o le a latou faasoa mai ai.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 51:9

E mafai ona ou faamaoni.

E toatele tamaiti laiti o loo aoaoina pea le uiga o le tau o le mea sao. Mafaufau pe faapefea ona e faamalosia le taua o le tautala ma le amio sao.

Gaoioiga e Mafai Ona Fai

• Faitau atu i tamaiti mai le Mataupu Faavae ma Feagaiga 51:9: “Ia tuu atu i tagata uma taitoatasi ia faamaoni i mea e fai” (tagai foi Mataupu Faavae o le Faatuatua 1:13). Fesili atu i tamaiti pe latou te iloa le uiga o le ia faamaoni. Ina ia fesoasoani ia latou malamalama atili, tuu atu ia i latou ni faataitaiga o faatinoga faamaoni.

• Faasoa atu ni tala faigofie e faatatau i ni tamaiti na feagai ma ni filifiliga e faatatau i le faamaoni, e pei o le filifiliga e tau le mea sao ina ua latou faia se mea sese. Faaaoga ata, papeti totini, po o pepe meataalo e faamanaia atili ai nei tala. Fesili atu i tamaiti pe o faamaoni nei tagata pe leai.

• Usu se pese e faatatau i le faamaoni, e pei o le “Tu Mo Le Mea Tonu” (Tusipese a Tamaiti, 81). Faasoa atu lau molimau e faatatau i le taua o le faamaoni.

Mataupu Faavae ma Feagaiga 52:10; 53:3; 55:1

O le meaalofa o le Agaga Paia e mauaina e ala i le faaee atu o lima.

O le mauaina o le Agaga Paia e ala i le faaee atu o lima, o loo ta’ua soo i totonu o le Mataupu Faavae ma Feagaiga 51–57. Atonu o se avanoa lelei lenei e aoao ai tamaiti e uiga i lenei sauniga.

Gaoioiga e Mafai Ona Fai

• Faaali atu se ata o se tamaitiiti o faamauina lona papatisoga (tagai Tusi Ata o le Talalelei, nu.105). Valaaulia tamaiti e faamatala mai le mea lea o loo tupu i le ata. Fai atu ia i latou e patipati o latou lima pe a latou faalogoina le fuaitau “faaee atu o lima” po o le “faaee o lima” ao e faitauina se fuaiupu se tasi pe sili atu o fuaiupu nei: Mataupu Faavae ma Feagaiga 52:10; 53:3; 55:1.

• Faamatala i tamaiti e uiga i le taimi na e mauaina ai le meaalofa o le Agaga Paia e ala i le faaee atu o lima ina ua uma ona papatisoina oe. Fesoasoani ia tulimatai atu ma le fiafia tamaiti i le taimi e maua ai e i latou lava lenei meaalofa. Talanoaina ma i latou auala e mafai ona tatou valaaulia ai le Agaga i o tatou olaga.

• Usu le pese “O Le Agaga Paia” (Tusipese a Tamaiti, 56) po o se isi pese faapea. Faailoa atu upu ma fuaitau o loo aoao mai e uiga i le meaalofa o le Agaga Paia.

  tamaitiiti o loo faamauina lona papatisoga

  Ata o se tamaitiiti o loo faamauina lona papatisoga saunia e Dan Burr

Mataupu Faavae ma Feagaiga 54:4–6

E tatau ona ou tausia a’u folafolaga i taimi uma.

Na osifeagaiga Leman Copley e faataga se vaega o le Au Paia mai Colesville, Niu Ioka, e nonofo i lona fanua i Ohaio. Ae ina ua taunuu le Au Paia, na ia solia lana feagaiga ma tutuliese i latou.

Gaoioiga e Mafai Ona Fai

• Faasoa atu i tamaiti le mea na tupu i le Au Paia lea na malaga mai e nonofo i le fanua o Leman Copley (tagai ulutala o le Mataupu Faavae ma Feagaiga 54; tagai foi “Mataupu 21: O Se Faaaliga e Faamautu i Misuri,” Tala o le Mataupu Faavae ma Feagaiga, 81–83). Fesoasoani ia i latou e mafaufau po o a ni lagona atonu na oo i le Au Paia ina ua solia e Leman lana folafolaga.

• Ooti faa’afa se fatu pepa, ma tuu atu ia afa taitasi i ni tamaiti eseese se toalua. Fai atu ia i laua e uu faatasi i luga a lua ’afa fatu ina ia maua ai se fatu atoa. Tuu i isi tamaiti e feauauai i le uuina i luga o se vaega o le fatu. Fesoasoani i tamaiti e faatusatusa lenei mea i folafolaga po o feagaiga tatou te osia ma le Atua. O le a uu pea i luga e le Atua ia Lana vaega o le feagaiga pe a tatou uuina i luga la tatou itu.

• Faamanatu i tamaiti, pe a papatisoina i latou, o le a latou osifeagaiga, pe tautino, e tausi poloaiga a le Atua. Faitau atu ia i latou mai le Mataupu Faavae ma Feagaiga 54:6 i le auala e faamanuia ai e le Alii ia tagata e tausia a latou feagaiga.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 51:19; 55

E mafai ona ou faaaogaina faamanuiaga na aumai e le Atua ia te a’u e faamanuia ai isi.

Ua faamanuiaina i tatou taitoatasi e le Alii i ni meaalofa ma faamanuiaga e mafai ona tatou faaaogaina e fausia ai Lona malo.

Gaoioiga e Mafai Ona Fai

• Nana solo upu “faamaoni,” “fai mea tonu,” ma le “atamai” i totonu o le potu. Valaaulia tamaiti e sue ia upu i totonu o le potu ma saili i totonu o le Mataupu Faavae ma Feagaiga 51:19. Faitau faatasi le fuaiupu, ma talanoa e uiga i le avea ai ma tagata tausimea. Pe a manaomia, faitau faatasi le parakalafa muamua o le “Tausimea, Tagata Tausimea” i le Taiala i Tusitusiga Paia (scriptures.ChurchofJesusChrist.org).

• Faamatala atu i tamaiti e uiga ia Viliamu W. Phelps, o lē sa galue o se lomitusi mo se niusipepa ao lei faalogo i le talalelei ma masii atu ai i Katelani. Fai atu i tamaiti e faitau le Mataupu Faavae ma Feagaiga 55:1–4 ma lisi mea na finagalo le Atua e faia e Viliamu. O fea o nei mea e mafai ona faatatau ia i tatou uma, ae o fea e patino ia Viliamu ona o ana taleni? Fai atu i tamaiti e faailoa mai ni taleni o latou vaaia i le tasi ma le isi, ma talanoa pe faapefea ona latou faaaogaina na taleni e auauna atu ai i le Atua ma Ana fanau.

Mataupu Faavae ma Feagaiga 52:14–19

E i ai le mamanu a le Atua e fesoasoani ia te a’u ina ia le faaseseina a’u.

I nei fuaiupu, ua tuuina mai e le Alii se mamanu ina “ia le faaseseina ai i [tatou]” (Mataupu Faavae ma Feagaiga 52:14) e faiaoga ma feau tusitusia sese.

Gaoioiga e Mafai Ona Fai

• Faaali atu i tamaiti se faataitaiga o se mamanu (e pei o se mamanu mo le suiina o ofu po o le faiga o se mea), ma talanoa pe aisea e aoga ai ia mamanu. Ina ia fesoasoani i tamaiti e aoao i se mamanu mai le Alii, tusi i luga o le laupapa fuaitau e pei O ia o lē, o ia lava lea , O ia o lē  o le a , ma O ia o lē  ua lē . Valaaulia tamaiti e faitau le Mataupu Faavae ma Feagaiga 52:15-18 ma faatumu avanoa. Aisea e fesoasoani ai lenei mamanu ia i tatou? (tagai fuaiupu 14, 19).

• Tusi se ata faigofie, ma valaaulia tamaiti e mulimuli i lau mamanu ina ia mafai ona latou tusia le ata lava lea e tasi. Ona sailiili lea ma i latou le mamanu a le Faaola o loo faamaumauina i le Mataupu Faavae ma Feagaiga 52:14–19.

Mataupu Faavae ma Feagaiga 54

E tatau ona ou tausia a’u feagaiga i taimi uma.

E ui o a tatou feagaiga e patino ia i tatou lava, o le tatou faamaoni i le tausiga o na feagaiga e mafai ona aafia ai olaga o isi tagata. O le tala ia Leman Copley ma le Au Paia mai Colesville, Niu Ioka, o loo faaalia ai lenei upu moni.

Gaoioiga e Mafai Ona Fai

• Faasoa atu i tamaiti le mea na tupu i le Au Paia mai Colesville, Niu Ioka, lea na malaga mai e nonofo i le fanua o Leman Copley (tagai ulutala o le Mataupu Faavae ma Feagaiga 54; tagai foi “Mataupu 21: O se Faaaliga e Faamautu i Misuri,” Tala o le Mataupu Faavae ma Feagaiga, 81–82). E faapeī ni o tatou lagona pe afai o i tatou o le Au Paia ma ua tatou iloa ua solia e Leman lana feagaiga e faasoa mai lona fanua? O le a se mea ua aoao mai e lenei tala ia i tatou e uiga i le tausiga o tatou feagaiga? Faitau faatasi le Mataupu Faavae ma Feagaiga 54:6 e aoao ai e uiga i se faamanuiaga e tuuina mai e le Alii ia i latou e tausia a latou feagaiga.

• Faamanatu i tamaiti folafolaga na latou faia ina ua papatisoina i latou (tagai Mosaea 18:8–10). Fesoasoani ia i latou e mafaufau i auala o loo latou tausia ai nei feagaiga, ma fesoasoani ia i latou ia iloa pe faapefea ona saunia ai i latou e osia feagaiga faaopoopo i le lumanai.

aikona o le aoaoina

Fautuaina le Aoaoina i le Aiga

Afai na fiafia tamaiti i se tasi o gaoioiga o le asō, fautua atu ia i latou e toe fai lena gaoioiga i le fale ma o latou aiga.

Faaleleia o Lo Tatou Aoao Atu

Ola i mea e te aoao atu. O lou aoaoga o le a sili atu ona mamana pe a mafai ona e molimau mai se aafiaga patino ia te oe lava ia e faatatau i faamanuiaga o le ola ai i le talalelei. Ao e filifilia mataupu faavae e aoao atu i tamaiti, mafaufau loloto pe faapefea ona e ola atoatoa atili i na mataupu faavae. (Tagai foi Aoao Atu i le Ala o le Faaola, 13–14.)

itulau o gaoioiga: o se feagaiga o se folafolaga i le va o a’u ma le Atua