« ថ្ងៃទី ៧–១៣ ខែ មិថុនា ។ គោលលទ្ធិ និងសេចក្ដីសញ្ញា ៦៣ ៖ ‹ អ្វីដែលមកពីលើ គឺពិសិដ្ឋ ›» ចូរមកតាមខ្ញុំ—សម្រាប់ថ្នាក់បឋមសិក្សា ៖ គោលលទ្ធិ និង សេចក្ដីសញ្ញា ឆ្នាំ ២០២១( ឆ្នាំ ២០២០ )
« ថ្ងៃទី ៧–១៣ ខែ មិថុនា ។ គោលលទ្ធិ និង សេចក្តីសញ្ញា ៦៣ »ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០២១
ស្រ្ពីងហៀល ដេវីស ខោនទ្រី មិសសួរីដោយ ហ្គាត រ៉ូប៊ីនសុន អូប៊ឺន
ថ្ងៃទី ៧–១៣ ខែ មិថុនា
គោលលទ្ធិ និង សេចក្តីសញ្ញា ៦៣
« អ្វីដែលមកពីលើ គឺពិសិដ្ឋ »
សេចក្តីពិតដែលបានបង្រៀននៅក្នុង គោលលទ្ធិ និងសេចក្តីសញ្ញា ៦៣ អាចជួយកុមារដែលអ្នកបង្រៀនកសាងសេចក្តីជំនឿរបស់ពួកគេលើព្រះវរបិតាសួគ៌ និងព្រះយេស៊ូវ គ្រីស្ទ ។ ពីព្រោះពេលវេលារបស់អ្នកជាមួយពួកគេមានកំណត់ សូមពិចារណាថាតើសេចក្តីពិតណាមួយដែលមានអត្ថន័យបំផុតចំពោះពួកគេ យោងតាមសេចក្តីត្រូវការរបស់ពួកគេ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមគិតពីវិធីងាយៗ និងការច្នៃប្រឌិត ដើម្បីផ្តល់ឱកាសឲ្យកុមារចែកចាយអ្វីដែលពួកគេកំពុងរៀន ។ ឧទាហរណ៍ សូមរៀបចំចម្រៀកក្រដាសដែលមានទំហំខុសៗគ្នា ហើយឲ្យកុមារជ្រើសរើសក្រដាសមួយដោយព្រាវៗ ។ សូមអញ្ជើញកុមារដែលមានក្រដាសវែងជាងគេបំផុតឲ្យចែកចាយមុនគេ ។
បង្រៀនគោលលទ្ធិ ៖ កុមារតូចៗ
គោលលទ្ធិ និង សេចក្តីសញ្ញា ៦៣:២៣
ព្រះវរបិតាសព្វព្រះទ័យឲ្យខ្ញុំរៀនពីដំណឹងល្អនេះ ។
កុមារគឺត្រូវរៀនជានិច្ចជាកាល ។ សូមជួយពួកគេមើលឃើញថា ព្រះវរបិតាសួគ៌នឹងជួយពួកគេរៀនអំពីទ្រង់ ប្រសិនបើពួកគេគោរពព្រះបញ្ញត្តិរបស់ទ្រង់ ។
សកម្មភាពដែលអាចជ្រើសរើស
-
សូមអាន គោលលទ្ធិ និងសេចក្តីសញ្ញា ៦៣:២៣ ឲ្យកុមារស្តាប់ ហើយសូមឲ្យពួកគេស្តាប់រកអ្វីដែលព្រះប្រទានដល់យើង ប្រសិនបើយើងគោរពតាមព្រះបញ្ញត្តិរបស់ទ្រង់ ។ សូមជួយពួកគេឲ្យយល់ថា « សេចក្ដីអាថ៌កំបាំងទាំងឡាយ » គឺជារឿងដែលព្រះអាចបង្រៀនយើងបន្ថែមទៀត គឺដូចជារបៀបដែលយើងកាន់តែអាចប្រែក្លាយដូចជាព្រះយេស៊ូវ គ្រីស្ទ ។
-
សូមយករូបភាពដែលតំណាងឲ្យប្រធានបទដំណឹងល្អមកថ្នាក់ ជារូបភាពដែលកុមារអាចរៀនបន្ថែមទៀត ដូចជា ពិធីបុណ្យជ្រមុជទឹក ព្រះអង្គសង្រ្គោះ និងព្រះវិហារបរិសុទ្ធ ជាដើម ។ សូមផ្កាប់រូបភាពទាំងអស់ចុះនៅលើឥដ្ឋ ហើយសូមឲ្យកុមារប្តូរវេណគ្នាផ្ងារមុខរូបភាពឡើង ។ សូមឲ្យពួកគេចែកចាយអ្វីដែលពួកគេដឹង ហើយមានសំណួរណាមួយអំពីប្រធានបទដំណឹងល្អនីមួយៗ ។
គោលលទ្ធិ និង សេចក្តីសញ្ញា ៦៣:៤៩
ខ្ញុំនឹងរស់ឡើងវិញ ។
មិនថា ឥឡូវនេះ ឬពេលអនាគតនោះទេ កុមារដែលអ្នកបង្រៀននឹងត្រូវបានលួងលោមដែលដឹងថា ដោយសារដង្វាយធួនរបស់ព្រះអង្គសង្រ្គោះ នោះមនុស្សទាំងអស់ដែលបានស្លាប់នឹងត្រូវបានរស់ឡើងវិញនៅថ្ងៃណាមួយ ។
សកម្មភាពដែលអាចជ្រើសរើស
-
សូមបង្ហាញរូបភាពមនុស្សដែលអ្នកស្រឡាញ់ ដែលបានទទួលមរណភាពទៅកុមារ ហើយសូមចែកចាយរឿងអំពីបុគ្គលនោះ ។ សូមអាន គោលលទ្ធិ និងសេចក្តីសញ្ញា ៦៣:៤៩ ឲ្យកុមារស្តាប់ ហើយសូមថ្លែងទីបន្ទាល់ថា នៅថ្ងៃណាមួយបុគ្គលរូបនោះនឹង « រស់ពីស្លាប់ឡើងវិញ » ហើយនឹងមិនស្លាប់ទៀតឡើយ ។ សូមសួរកុមារប្រសិនបើ ពួកគេស្គាល់នរណាម្នាក់ដែលបានទទួលមរណភាព ។ សូមថ្លែងទីបន្ទាល់ថា ដោយសារព្រះយេស៊ូវគ្រីស្ទយើងនឹងត្រូវបានរស់ឡើងវិញ ។
-
សូមបង្ហាញរូបភាពការបញ្ចុះសព និងការរស់ឡើងវិញរបស់ព្រះអង្គសង្គ្រោះ ( សូមមើល សៀវភៅរូបភាពដំណឹងល្អលេខ ៥៨៥៩) ។ សូមអញ្ជើញពួកគេឲ្យនិយាយអំពីអ្វីដែលកំពុងកើតឡើងនៅក្នុងរូបភាព ។ សូមអញ្ជើញកុមារឲ្យដេកចុះ នៅពេលអ្នកប្រាប់អំពីការបញ្ចុះសពរបស់ព្រះយេស៊ូវ ហើយក្រោកឈរឡើង នៅពេលអ្នកប្រាប់អំពីការរស់ឡើងវិញរបស់ទ្រង់ ។ សូមអាន គោលលទ្ធិ និងសេចក្តីសញ្ញា ៦៣:៤៩ ហើយសូមថ្លែងទីបន្ទាល់ថា យើងទាំងអស់គ្នានឹងរស់ឡើងវិញពីសេចក្តីស្លាប់នៅថ្ងៃណាមួយ គឺដូចជាព្រះយេស៊ូវ បានមានព្រះជន្មឡើងវិញដែរ ។
រូបភាពព្រះយេស៊ូវកំពុងបង្ហាញព្រះកាយដល់ម៉ារាទីបញ្ចុះសពដោយ ចូន ម៉ាក់ណាត់តុន
គោលលទ្ធិ និង សេចក្តីសញ្ញា ៦៣:៦៤
ខ្ញុំគួរតែគោរពដល់កិច្ចការពិសិដ្ឋដោយគារវភាព ។
យើងរស់នៅក្នុងសម័យដែលជាញឹកញាប់គេមិនឲ្យតម្លៃ ឬសើចចំអកដល់កិច្ចការពិសិដ្ឋ ។ អ្នកអាចជួយកុមារអភិវឌ្ឍន៍ស្មារតីនៃការគោរពចំពោះកិច្ចការពិសិដ្ឋ ។
សកម្មភាពដែលអាចជ្រើសរើស
-
សូមអានឲ្យកុមារស្តាប់ចេញពី គោលលទ្ធិ និងសេចក្តីសញ្ញា ៦៣:៦៤ « អ្វីដែលមកពីលើ គឺពិសិដ្ឋ » ។ សូមឲ្យពួកគេគិតពីវត្ថុមួយដែលពិសេសចំពោះពួកគេ ដូចជា ប្រដាប់លេង ឬសៀវភៅដែលពួកគេចូលចិត្ត ។ តើពួកគេថែរក្សា ឬការពារវត្ថុនោះយ៉ាងដូចម្តេច ? សូមជួយពួកគេគិតពីរឿងដែលពិសេសៗ—ឬ ពិសិដ្ឋ—ចំពោះព្រះវរបិតាសួគ៌ ។ តើយើងគួរនិយាយពីរឿងទាំងនេះយ៉ាងដូចម្តេច ? តើយើងធ្វើយ៉ាងណាចំពោះរឿងទាំងនោះ ?
-
សូមច្រៀងជាមួយកុមារនូវចម្រៀងអំពីគារវភាព ដូចជាបទ « ដោយគោរព ដោយស្ងៀមស្ងាត់សៀវភៅចម្រៀងកុមារទំព័រ ១១ ) ។ សូមជួយពួកគេគិតពីវិធីទាំងឡាយណាដែលពួកគេអាចបង្ហាញគារវភាពចំពោះកិច្ចការពិសិដ្ឋ ។
បង្រៀនគោលលទ្ធិ ៖ កុមារធំៗ
គោលលទ្ធិ និង សេចក្ដីសញ្ញា ៦៣:៩–១០
ទីសម្គាល់កើតមានដោយសារជំនឿ និងព្រះទ័យរបស់ព្រះ
អែសរ៉ា ប៊ូត បានផ្លាស់ប្រែចិត្តជឿចូលសាសនាចក្រ បន្ទាប់ពីឃើញ យ៉ូសែប ស្ម៉ីធ ព្យាបាលដៃរបស់អ៊ែលស្សា ចនសុន ។ ប៉ុន្តែ អែសរ៉ា ក្រោយមកបានបាត់បង់សេចក្តីជំនឿ ហើយគាត់ក៏រិះគន់ដល់ព្យាការី ។គោលលទ្ធិ និងសេចក្តីសញ្ញា ៦៣មាននូវការព្រមានប្រឆាំងនឹងការព្យាយាមកសាងជំនឿរបស់យើងលើទីសម្គាល់ ដូចជា អព្ភូតហេតុនៃការព្យាបាល ជំនួសឲ្យការបញ្ជាក់ពីសេចក្តីពិតខាងវិញ្ញាណ ។
សកម្មភាពដែលអាចជ្រើសរើស
-
សូមបង្ហាញរូបភាពនៅក្នុង គម្រោងមេរៀនប្រចាំសប្ដាហ៍នេះនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមប្រាប់កុមារថា យ៉ូសែប ស្ម៉ីធ បានប្រើប្រាស់បព្វជិភាពដើម្បីព្យាបាលដៃរបស់ អ៊ែលស្សា ចនសុន ដែលនាងមិនអាចប្រើដៃរបស់នាងអស់រយៈពេលពីរឆ្នាំហើយ ។ សូមអញ្ជើញកុមារឲ្យអាន គោលលទ្ធិ និង សេចក្តីសញ្ញា ៦៣:៩-១០ ហើយសូមឲ្យពួកគេចែកចាយអ្វីមួយដែលព្រះអម្ចាស់មានបន្ទូលអំពីសេចក្តីជំនឿ និងទីសម្គាល់ ( ឬអព្ភូតហេតុ ) ។
-
សូមអញ្ជើញកុមារឲ្យគូររូបផ្ទះនៅលើរាងចតុកោណកែងមួយ ហើយផ្ទះមួយទៀតនៅលើរាងត្រីកោណមួយ ។ សូមប្រាប់កុមារថា ផ្ទះទាំងនេះតំណាងឲ្យសេចក្តីជំនឿ និងទីបន្ទាល់របស់យើង ។ សូមឲ្យពួកគេអានគោលលទ្ធិ និង សេចក្ដីសញ្ញា ៦៣:៩-១០និងហេលេមិន ៥:១២។ បន្ទាប់មកសូមឲ្យពួកគេសរសេរនៅក្នុងរាងចតុកោណកែងនូវអ្វីដែលយើងគួរកសាងសេចក្តីជំនឿរបស់យើងនៅលើ ហើយនៅក្នុងរាងត្រីកោណនូវអ្វីដែលយើងមិនគួរកសាងសេចក្តីជំនឿយើងនៅលើ ។ សូមលើកឡើងថា រាងចតុកោណកែងផ្តល់នូវកន្លែងដ៏រឹងមាំដើម្បីកសាង ប៉ុន្តែរាងត្រីកោណគឺមិនមានសុវត្ថិភាព និងសន្តិសុខឡើយ ។ ហេតុអ្វីបានជាវាសំខាន់ដើម្បីកសាងសេចក្តីជំនឿរបស់យើងលើព្រះយេស៊ូវ គ្រីស្ទ ជាជាងរឿងអ្វីផ្សេងៗ ?
គោលលទ្ធិ និង សេចក្តីសញ្ញា ៦៣:២៣
នៅពេលខ្ញុំរក្សាព្រះបញ្ញត្តិ នោះព្រះនឹងបង្រៀនខ្ញុំពីសេចក្តីពិតរបស់ទ្រង់ ។
« សេចក្ដីអាថ៌កំបាំងទាំងឡាយនៃនគរ [ របស់ព្រះ ] » គឺមានតែដល់ជនទាំងឡាយណាដែលរក្សាព្រះបញ្ញត្តិរបស់ព្រះប៉ុណ្ណោះ ។ នេះជាមូលហេតុដែលវាជាសេចក្ដីអាថ៌កំបាំងចំពោះមនុស្សជាច្រើន ។ គោលការណ៍នេះនឹងជួយកុមារនៅពេលពួកគេស្វែងរកសេចក្តីពិត ។
សកម្មភាពដែលអាចជ្រើសរើស
-
សូមបង្ហាញកុមាររូបភាពអណ្តូងទឹក ហើយសូមឲ្យពួកគេគូររូបអណ្តូងទឹកមួយ ។ បន្ទាប់ពីអានជាមួយគ្នា គោលលទ្ធិ និង សេចក្តីសញ្ញា ៦៣:២៣ សូមជួយពួកគេឲ្យគិតពីសេចក្តីពិត ដែលពួកគេដឹងអំពីដំណឹងល្អ ហើយអញ្ជើញពួកគេឲ្យសរសេរសេចក្តីពិតទាំងនេះនៅជុំវិញអណ្តូងទឹករបស់ពួកគេ ។ តើសេចក្តីពិតទាំងនេះដូចជា « អណ្តូងទឹករស់ » យ៉ាង ដូចម្តេច ?
គោលលទ្ធិ និង សេចក្ដីសញ្ញា ៦៣:៥៨–៦៤
ខ្ញុំមិនគួរប្រើព្រះនាមរបស់ព្រះដោយអសារឥតការឡើយ ។
កុមារដែលអ្នកបង្រៀនអាចឭអ្នកដទៃប្រើព្រះនាមព្រះដោយមិនគោរព និងប្រមាថ ។ តើអ្នកអាចជួយពួកគេយល់ថា ព្រះនាមរបស់ព្រះវរបិតាសួគ៌ និងព្រះយេស៊ូវ គ្រីស្ទ « ត្រូវពោលដោយមានការគោរព » របៀបណា ?(គោលគោលលទ្ធិ និង សេចក្ដីសញ្ញា ៦៣:៦៤) ។
សកម្មភាពដែលអាចជ្រើសរើស
-
សូមអានទៅកាន់កុមារចេញមកពី គោលលទ្ធិ និង សេចក្ដីសញ្ញា ៦៣:៥៨ « ត្បិតនេះជាថ្ងៃនៃការព្រមាន » ។ សូមឲ្យពួកគេនិយាយពីពាក្យព្រមានដែលពួកគេឭពីឪពុកម្តាយរបស់ពួកគេ គ្រូបង្រៀន និងថ្នាក់ដឹកនាំសាសនាចក្រ ។ បន្ទាប់មក សូមជួយពួកគេស្វែងរកការព្រមានចេញពីព្រះអម្ចាស់ នៅក្នុង ខទី ៥៨-៦៤) ។ តើមានវិធីសមរម្យអ្វីខ្លះដើម្បី « ប្រើព្រះនាមនៃព្រះអម្ចាស់ » ? (ខទី ៦២) ។
-
សូមមើលជាមួយគ្នា « ភាសា» នៅក្នុង ដើម្បីកម្លាំងនៃយុវជន ( ទំព័រ ២០–២១ ) ។ សូមឲ្យកុមារធ្វើបដាតូចៗដែលរំលឹកដល់ពួកគេពីអ្វីដេលពួកគេបានរៀនអំពីរបៀបប្រើប្រាស់ព្រះនាមនៃព្រះវរបិតាសួគ៌ និងព្រះយេស៊ូវគ្រីស្ទ ។
-
សូមច្រៀងចម្រៀងមួយបទជាមួយគ្នាបទអំពីគារវភាព ដូចជាបទ « គារវភាពជាក្តីស្នែហ៍» (សៀវភៅចម្រៀងកុមារទំព័រ ១២ ) ។ តើយើងអាចបញ្ជាក់ថា យើងមានគារវភាព នៅពេលយើងនិយាយអំពីព្រះនាមវរបិតាសួគ៌ និងព្រះយេស៊ូវគ្រីស្ទ យ៉ាងដូចម្តេច ?
លើកទឹកចិត្តឲ្យមានការរៀនសូត្រនៅឯគេហដ្ឋាន
ប្រសិនបើអ្នក មិនមានពេលដើម្បីធ្វើទំព័រសកម្មភាពប្រចាំសប្តាហ៍នេះក្នុងថ្នាក់ទេ សូមពិចារណាដើម្បីផ្តល់ឲ្យកុមារម្នាក់ៗសំណៅចម្លងម្នាក់មួយយកទៅធ្វើនៅផ្ទះជាមួយគ្រួសាររបស់ពួកគេ ។
ការអភិវឌ្ឍន៍ការបង្រៀនរបស់យើង
សូមបង្កើតការទុកចិត្តដល់កុមារ ។ កុមារមួយចំនួនពុំមានអារម្មណ៍ថា មានសមត្ថភាពរៀនដំណឹងល្អដោយខ្លួនឯងនោះទេ ។ របៀបមួយដើម្បីសាងទំនុកចិត្តរបស់ពួកគេគឺ សរសើរពួកគេពេលពួកគេចូលរួមក្នុងថ្នាក់ ។ សូមសន្យាជាមួយកុមារថា ព្រះវិញ្ញាណបរិសុទ្ធនឹងជួយពួកគេរៀន ។