“5–11 Siulai. Tokāteline mo e Ngaahi Fuakava 76: ʻʻE Lahi ʻa ʻEnau Totongí pea Taʻengata ʻa Honau Nāunaú” Haʻu, ʻo Muimui ʻIate Au—Maʻá e Palaimelí: Tokāteline mo e Ngaahi Fuakava 2021 (2020)
“5–11 Siulai. Tokāteline mo e Ngaahi Fuakava 76,” Haʻu, ʻo Muimui ʻIate Au—Maʻá e Palaimelí: 2021
Hūfangaʻanga, tā fakatātaaʻi ʻe Shaelynn Abel
5–11 Siulai
Tokāteline mo e Ngaahi Fuakava 76
“ʻE Lahi ʻa ʻEnau Totongí pea Taʻengata ʻa Honau Nāunaú”
ʻI hoʻo ako ʻa e Tokāteline mo e Ngaahi Fuakava 76, fakalaulauloto pe ko e hā ʻoku finangalo e Tamai Hēvaní ke ʻiloʻi ʻe he fānau ʻi hoʻo kalasí fekauʻaki mo Ia, ko e Fakamoʻuí, pea mo kinautolu mo honau ikuʻanga taʻengatá.
Lekooti Hoʻo Ngaahi Ongó
Fakaafeʻi e Feʻinasiʻakí
Fakaʻaliʻali ki he fānaú ha ngaahi fakatātā pe ngaahi peesi ʻekitivitī mei he fokotuʻutuʻu fakalēsoni ki he uike ní pe ngaahi fokotuʻutuʻu fakalēsoni kimuʻá. Tuku ke nau talaatu ʻa e meʻa ʻoku nau sio ki ai ʻi he ngaahi fakatātā ko ʻení mo e meʻa ʻoku nau manatuʻi ne nau ako meiate kinautolú.
Akoʻi e Tokāteliné: Fānau Iiki Angé
Tokāteline mo e Ngaahi Fuakava 76:24
Ko e fānau kotoa kitautolu ʻa e ʻOtuá.
Naʻe pehē ʻe Palesiteni Tāleni H. ʻOakesi kapau te tau akoʻi “ha taha kei talavou ʻa e fakakaukau mālohi ko e fānau ia ʻa e ʻOtuá,” te tau lava ʻo ʻoange kiate ia ʻa e “fakaʻapaʻapa fakataautaha mo e ʻuhinga ke ne fakafepakiʻi ai e ngaahi palopalema ʻo e moʻuí” (“Powerful Ideas,” Ensign, Nov. 1995 25).
Ngaahi ʻEkitivitī ʻe Ala Fakahokó
-
Ke tokoniʻi e fānaú ke mahino kiate kinautolu ʻa e malava ko ia ke hoko ʻo hangē ko e ʻOtuá, kumi ha ngaahi founga ke fakahaaʻi ange kiate kinautolu ʻoku tupu ʻa e fanga kiʻi monumanu īkí ʻo hangē pē ko ʻenau mātuʻá—mahalo ʻe lava e fānaú ʻo fakatauhoa e ngaahi fakatātā ʻo e fanga monumanú mo e fakatātā ʻo honau ngaahi ʻuhikí. Fakaava e folofolá ki he Tokāteline mo e Ngaahi Fuakava 76:24, pea talaange ki he fānaú ko kitautolú kotoa “ko [ha] ngaahi foha mo [ha] ngaahi ʻofefine [ia] kuo fakatupu ki he ʻOtuá.” Fai hoʻo fakamoʻoni ko e ʻOtuá ʻa ʻetau Tamaí pea te tau lava ʻo tupulaki ke hoko ʻo hangē ko ʻetau Mātuʻa Fakalangí.
-
Hivaʻi fakataha ʻa e “Fānau Au ʻa e ʻOtua” (Tohi Hiva ʻa e Fānaú, 2 –3), pea fakaafeʻi ʻa e fānaú ke nau tuhu kiate kinautolu ʻi heʻenau hivaʻi ʻa e “Au” pea kole ange ke nau toe hivaʻi ʻa e foi hivá, kae fetongi ʻa e “au” ʻaki ʻa e “koe” pea tuhu ki ha taha kehe ʻi he kalasí.
Tokāteline mo e Ngaahi Fuakava 76:40–42
Ko Sīsū Kalaisi ʻa e Fakamoʻui ʻo e māmaní.
ʻOku ʻuhinga ʻa e foʻi lea ongoongoleleí ki he ongoongo ʻoku lelei. Ko e ongoongo lelei ko ia ‘oku ‘omi ‘e he ongoongoleleí ko e “haʻu [ʻa Sīsū Kalaisi] ki he māmaní, … pea fakamaʻa ia mei he taʻe-māʻoniʻoni kotoa pē”(veesi 41).
Ngaahi ʻEkitivitī ʻe Ala Fakahokó
-
Fakamatala ki he fānaú fekauʻaki mo ha ongoongo lelei naʻá ke toki fanongo ai. Kole ange ke nau vahevahe ha ongoongo lelei kuo nau fanongo ai. Hili ia pea vahevahe mo kinautolu ʻa e ongoongo lelei ʻo e ongoongoleleí ʻaki hano lau ʻo e Tokāteline mo e Ngaahi Fuakava 76:41–42. ʻEke ki he fānaú pe ko e hā ʻa e ongo ʻoku nau maʻu ʻi he ongoongo lelei ko ʻení. Vahevahe mo kinautolu ʻa e fiefia ʻoku ʻomi ʻe he ongoongo lelei ko ʻení kiate koe.
-
Fakaʻaliʻali ha fakatātā ʻo Sīsū Kalaisi. ʻEke ki he fānaú pe ʻoku nau ʻilo ʻa e meʻa ne fai ʻe Sīsū Kalaisi maʻatautolú. Fakaʻaliʻali ki he fānaú ha meʻa ʻoku ʻuli mo ha meʻa ʻoku maʻa (hangē ko ha holoholo hinehina pe laʻipepa), pea fakamatalaʻi ange ko e angahalá ʻoku hangē ia ko e ʻuli ʻi hotau laumālié, ka naʻe hāʻele mai ʻa Sīsū Kalaisi ke tokoniʻi kitautolu ke tau toe hoko ʻo maʻa.
ʻĪmisiko Sīsū mo e fānaúTuku ʻa e Fānau Īkí, tā fakatātaaʻi ʻe J Kirk Richards
Tokāteline mo e Ngaahi Fuakava 76:62
ʻOku finangalo e Tamai Hēvaní ke u toe foki ange ʻo nofo mo Ia ʻo taʻe-ngata.
ʻOku fakahā ʻe he mata meʻa-hā-mai ʻa Siosefa Sāmita mo Sitenei Likitoni ki he nāunau fakasilesitialé ʻa e ngaahi tāpuaki maʻongoʻonga kuo teuteu ʻe he ʻOtuá maʻa ʻEne fānaú, pea pehē ki he ngaahi meʻa ʻoku totonu ke tau fai ke maʻu e ngaahi tāpuaki ko iá.
Ngaahi ʻEkitivitī ʻe Ala Fakahokó
-
Fakamatala ki he fānaú fekauʻaki mo e ngaahi puleʻanga ʻe tolu ʻo e nāunau ne mamata ki ai ʻa Siosefa mo Sitenei ʻi heʻena mata meʻa-hā-maí. (Mahalo te ke fie lau ki he fānaú ha konga pe kotoa ʻo e “Vahe 26: Ko e Ngaahi Nāunau ʻe Tolu ʻo e Langí” [Ngaahi Talanoa ʻo e Tokāteline mo e Ngaahi Fuakava, 97–103] pe huluʻi ʻa e vitiō ʻi he ChurchofJesusChrist.org.) ʻEke ki he fānaú pe ko e hā ha meʻa ʻoku nau manako ai ʻi he mata meʻa-ha-maí. Fakatefito hoʻo tokangá ki hono fakamatalaʻi ʻo e puleʻanga fakasilesitialé, pea fakamoʻoni ko e feituʻu ʻeni ʻoku finangalo e Tamai Hēvaní ke tau ʻi aí.
-
Lau ki he fānaú ʻa e Tokāteline mo e Ngaahi Fuakava 76:62, pea fakaafeʻi kinautolu ke nau tā ha ngaahi fakatātā ʻo kinautolu pē pea mo e Tamai Hēvaní mo Sīsū Kalaisi ʻi he puleʻanga fakasilesitialé.
Akoʻi e Tokāteliné: Fānau Lalahi Angé
Tokāteline mo e Ngaahi Fuakava 76:5, 41–42, 69
Ko Sīsū Kalaisi ʻa hoku Fakamoʻuí.
Tokoni ke mahino ki he fānaú ʻoku malava pē ke maʻu e ngaahi tāpuaki nāunauʻia kuo talaʻofa ʻe he ʻOtuá ki he kau faivelengá, ʻi he maama ka hokó, koeʻuhí ko e Fakamoʻui ko Sīsū Kalaisí.
Ngaahi ʻEkitivitī ʻe Ala Fakahokó
-
Hiki ʻi he palakipoé ʻa e Ko e hā kuo fai ʻe Sīsū Kalaisi maʻaku? Kole ki he fānaú takitaha ke nau lau fakalongolongo e veesi 5, veesi 41–42, pe veesi 69 ʻi he vahe 76, ʻo kumi ha ngaahi tali ki he fehuʻi ʻi he palakipoé. Tuku ke nau vahevahe ʻenau ngaahi talí (vakai foki “Naʻá Ne Fekau Hono ʻAló,” Tohi Hiva ʻa e Fānaú, 20–21). Te tau lava fēfē ʻo fakahaaʻi ʻetau houngaʻia ʻi he meʻa kuo fai ʻe he Fakamoʻuí maʻatautolú?
-
Hiki ʻa e tefito ʻo e tui hono tolú ʻi he palakipoé, ʻo tuku ʻatā pē e ngaahi feituʻu ʻoku ʻi ai e ngaahi foʻi lea mahuʻingá. ʻOange ki he fānaú ha laʻipepa kuo hiki ai e ngaahi foʻi lea ko ʻeni ʻoku puliá, pea fakaafeʻi kinautolu ke fokotuʻu ʻenau ngaahi foʻi leá ʻi he feituʻu totonú ʻi he palakipoé. Ko e hā ʻoku akoʻi mai ʻe he tefito ʻo e tui ko ʻení kiate kitautolu fekauʻaki mo e ʻuhinga ʻoku tau fie maʻu ai ʻa Sīsū Kalaisí?
Tokāteline mo e Ngaahi Fuakava 76:12, 15–19, 114–16.
ʻE lava ke tokoni kiate au hono ako e folofolá ke “mahino… ʻa e ngaahi meʻa ʻa e ʻOtuá”
Naʻe maʻu ʻe Siosefa Sāmita mo Sitenei Likitoni e Tokāteline mo e Ngaahi Fuakava 76 ʻi he taimi naʻá na fakalaulauloto ai ki he folofolá. Tokoniʻi e fānaú ke nau vakai ki he founga ʻoku lava ai ʻe hono ako e folofolá ʻo fakaafeʻi e fakahaá ʻo fakafou ʻi he Laumālie Māʻoniʻoní.
Ngaahi ʻEkitivitī ʻe Ala Fakahokó
-
Fehuʻi ki he fānaú pe ʻoku nau ʻiloʻi e meʻa ne lolotonga fai ʻe Siosefa Sāmita mo Sitenei Likitoni ʻi he taimi naʻá na maʻu ai ʻa e mata meʻa-hā-mai ʻi he Tokāteline mo e Ngaahi Fuakava 76. Fakaafeʻi kinautolu ke lau ʻa e veesi 15–19 ke ʻiloʻi. Vahevahe ki ha taimi naʻá ke maʻu ai ha ueʻi fakalaumālie ʻi hono lau ʻo e folofolá, pea kole ki he fānaú ke nau talanoa ki he ngaahi ongo fakalaumālie ʻoku nau maʻu ʻi he taimi ʻoku nau lau ai e folofolá.
-
Kole ki he fānaú ke kuikui honau matá pea feinga ke fai ha ngāue, hangē ko hono valivali ha fakatātā pe fakaava e folofolá ki ha veesi pau. Ko e hā ha ngaahi meʻa ʻoku faingataʻa ke fakahoko ʻi he taimi ʻoku kui fakalaumālie ai hotau matá? Lau fakataha ʻa e Tokāteline mo e Ngaahi Fuakava 76:12, 15–19, 114 –16 ke ʻiloʻi pe ko e hā ʻoku fie maʻu ke tau fai ke fakaʻā fakalaumālie ai hotau matá.
Tokāteline mo e Ngaahi Fuakava 76:50–70
Kuo teuteuʻi ʻe he Tamai Hēvaní ha puleʻanga ʻo e nāunau fakasilesitialé maʻaku.
ʻE lava ke ueʻi fakalaumālie e fānaú ʻi he ʻilo ko ia ki he nāunau fakasilesitiale kuo teuteu ʻe he ʻOtuá ke “ikuna [ʻaki] ʻi he tui” (veesi 53) ʻa e ngaahi faingataʻa mo e ngaahi ʻahiʻahi ʻoku nau fehangahangai mo iá.
Ngaahi ʻEkitivitī ʻe Ala Fakahokó
-
Kapau ʻe fehuʻi mai ʻe ha taha kiate kitautolu, “Ko e hā ʻoku totonu ai ke u muimui ʻia Sīsū Kalaisi mo tauhi ʻEne ngaahi fekaú?” ko e hā te tau talaangé? Fakaafeʻi e fānaú ke kumi ha ngaahi tali ʻi he Tokāteline mo e Ngaahi Fuakava 76: 50–70, ʻa ia ʻoku fakamatalaʻi ai ʻa kinautolu ʻoku nau maʻu ʻa e nāunau fakasilesitialé. Tuku e fānaú ke nau fakatātaaʻi hono tali e fehuʻí. Fai hoʻo fakamoʻoni ki he ngaahi tāpuaki maʻongoʻonga kuo teuteu ʻe he Tamai Hēvaní maʻatautolu ʻo kapau ʻoku tau muimui kia Sīsū Kalaisi.
-
Tā ha fakatātā lahi ʻo e laʻaá ʻi ha laʻipepa, kosikosi ia ki ha ngaahi kongokonga pāsolo. ʻOange ki he tamasiʻi takitaha ha konga fakataha mo e ngaahi potufolofola ke laú: Tokāteline mo e Ngaahi Fuakava 76:51; 76:52; 76:53; 131:1– 2. Kole ki he fānaú ke nau kumi ʻi heʻenau ngaahi vēsí ha meʻa kuo pau ke tau fai ke maʻu e moʻui taʻengatá ʻi he puleʻanga fakasilesitialé (ʻoku kau he ngaahi veesi ʻe niʻihi ha tali lahi ange he tahá), pea hiki ia ʻi heʻenau laʻipepa ʻo e laʻaá. ʻI heʻenau ngāue fakataha ke fokotuʻutuʻu e pāsoló, fakahaaʻi hoʻo loto-falala kiate kinautolu te nau lava ʻo feʻunga mo e puleʻanga fakasilesitialé ʻi he tokoni ʻa e Fakamoʻuí.
Poupouʻi e Ako ʻi ʻApí
Fakaafeʻi ʻa e fānaú ke nau fakaʻaongaʻi ʻa e peesi ʻekitivitī ʻo e uike ní ke akoʻi ki honau fāmilí ʻa e meʻa kuo nau ako fekauʻaki mo e mata meʻa-hā-mai ne maʻu ʻe Siosefa Sāmita mo Sitenei Likitoní.
Fakatupulaki ʻEtau Founga Akoʻí
Fakaʻaongaʻi e folofolá. Tatau ai pē pe ʻoku lava e fānau ʻokú ke akoʻí ʻo laukonga, fakaʻaongaʻi e folofolá ʻi he lahi taha te ke lavá ʻi hoʻo akoʻi kinautolú. ʻAi ke nau sio ko e ngaahi moʻoni ʻokú ke vahevahé ʻoku maʻu ia mei he folofolá.