Kalaisi mo e Talavou Koloaʻiá, tā ʻe Heinrich Hofmann

19–25 Siulai

Tokāteline mo e Ngaahi Fuakava 81–83

Ko ia “ʻOku Foaki Ki Ai ʻa e Meʻa Lahí ʻOku ʻEkeʻi ʻa e Meʻa Lahi Meiate Ia”

ʻE tokoni fēfē ʻa e ngaahi fakahā ʻi he Tokāteline mo e Ngaahi Fuakava 81–83 ki he fānau ʻokú ke akoʻí ke nau fai lelei ʻi heʻenau feohi mo honau fāmilí mo e kaungāmeʻá.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaafeʻi e fānaú ke nau vahevahe ha meʻa naʻa nau fai ke tokoni ki ha taha kehe he uiké ni. ʻE tokoni fēfē ʻetau tokoniʻi e niʻihi kehé ke tau hoko ʻo hangē ai ko hotau Fakamoʻuí?

Akoʻi e Tokāteliné: Fānau Iiki Angé

Tokāteline mo e Ngaahi Fuakava 81:3

ʻOku totonu ke u lotu maʻu pē.

ʻI hono ui ʻe he ʻEikí ʻa Feletiliki G. Uiliamisi ko ha tokoni ki he Palōfita ko Siosefa Sāmitá, naʻá ne faleʻi ʻa Feletiliki ke “tui faivelenga … ʻi he lotu maʻu ai pē.”

Ngaahi ʻEkitivitī ʻe Ala Fakahokó

• Lau ki he fānaú ʻa e faleʻi ʻa e ʻEikí ke “faivelenga…ʻi he lotu maʻu ai pē, ʻaki ʻa e leʻo pea ʻi ho lotó, ʻi he ʻao ʻo e kakaí pea ʻi he lilo” (Tokāteline mo e Ngaahi Fuakava 81: 3). Fakamatalaʻi ange ʻa e ʻuhinga ke lotu ʻi hotau lotó pea vahevahe ha sīpinga fakataautaha. Tokoniʻi e fānaú ke nau fakakaukau ki ha ngaahi taimi te nau lava ai ʻo lotu “ʻi he ʻao ʻo e kakaí pea ʻi he lilo.”

• Akoʻi e fānaú ʻi he founga ʻo e lotú. Fakamamafaʻi ange te nau lava ʻo fakamālō ki he Tamai Hēvaní koeʻuhí ko honau ngaahi tāpuakí pea kole kiate Ia ʻa e ngaahi meʻa ʻoku nau fie maʻú. ʻE lava ke tokoni ha foʻi hiva fekauʻaki mo e lotú, ʻo hangē ko e “ʻOku ou Fakamālō Atu ʻe Tamai” (Tohi Hiva ʻa e Fānaú, 9), ke ʻiloʻi ʻe he fānaú ʻa e meʻa ke nau lea ʻaki ʻi heʻenau ngaahi lotú. ʻOange ki he fānau takitaha ha faingamālie ke fai ha lotu nounou.

• Kole ki he fānaú ke nau fakakaukau ki ha ngaahi meʻa te nau ala fakamālō ai ki he Tamai Hēvaní pe kole meiate Ia. ʻAi ke nau tā ha ngaahi fakatātā ʻo e ngaahi meʻa ko ʻení pea vahevahe kinautolu mo e kalasí.

Tokāteline mo e Ngaahi Fuakava 81:5; 82:19

Te u lava ʻo tokoniʻi e niʻihi ʻoku mau feohí.

ʻOku ʻafioʻi ʻe he Tamai Hēvaní ʻa e fiemaʻu ʻa ʻEne fānaú takitaha pea ʻokú Ne ngāue ʻaki ʻa e niʻihi kehé—ʻo hangē ko e fānau ʻokú ke akoʻí—ke feau e ngaahi fiemaʻu ko iá. Te ke lava fēfē ke tokoniʻi e fānaú ke ʻiloʻi e ngaahi fiemaʻu ʻa e niʻihi kehé pea tokoniʻi kinautolu?

Ngaahi ʻEkitivitī ʻe Ala Fakahokó

• Lau ki he fānaú ʻa e Tokāteline mo e Ngaahi Fuakava 81: 5 pea tokoni ke mahino kiate kinautolu e ngaahi kupuʻi lea hangē ko e “Tokoniʻi ʻa e vaivaí” mo e “hiki hake ʻa e ngaahi nima ʻoku tautau ki laló.” Tuku ke nau fakatātaaʻi e ngaahi founga te tau lava ai ʻo fai e meʻa ʻoku kole mai ʻe he ʻEikí ʻi he veesi ko ʻení. Fakaʻaongaʻi e ngaahi fakatātaá ke fai ha ngaahi talanoa faingofua ki hono tokoniʻi ʻe Sīsū Kalaisi e niʻihi kehé (vakai, Tohi Fakatātā ʻo e Ongoongoleleí, fika 41, 42, 46, 47, 55; biblevideos.ChurchofJesusChrist.org). Te tau lava fēfē ʻo muimui ʻi he tā sīpinga ʻa e Fakamoʻuí ʻi hono tokoniʻi e niʻihi kehé?

• Hivaʻi ʻa e veesi fā ʻo e “ʻOku Ongo ʻa e ʻOfá” (Tohi Hiva ʻa e Fānaú, 42–43) pe ko ha hiva ʻe taha fekauʻaki mo e ngāue tokoní. Fakamatala ki ha taimi ne tokoniʻi ai koe ʻe ha taha ke ke ongoʻi ʻa e ʻofa ʻa e Fakamoʻuí ʻaki hono tokoniʻi koe.

• Lau ki he fānaú ʻa e Tokāteline mo e Ngaahi Fuakava 82:19 ʻo fakamamafaʻi ʻa e kupuʻi lea ko ia ko e “feinga … ki he meʻa ʻoku lelei ki hono kaungāʻapí.” Fakamatalaʻi ʻoku ʻuhinga ʻeni ke fai e ngaahi meʻa ʻoku tokoni ki hotau kaungāʻapí—kau ai hotau fāmilí. Tokoni ki he fānaú ke nau fakakaukau ki ha ngaahi founga ʻe lava ke nau tokoni ai ki ha taha kehe he uiké ni.

  

  ʻOku folofola mai e ʻOtuá ke tau tokoniʻi e niʻihi kehé ke fakahaaʻi ʻetau ʻofa kiate Iá.

Tokāteline mo e Ngaahi Fuakava 82:10

ʻOku talaʻofa mai ʻe he ʻOtuá ha ngaahi tāpuaki ʻi he taimi ʻoku tau talangofua ai kiate Iá.

ʻI he fakaʻau ke tupu hake e fānaú, mahalo te nau faʻa fifili pe ko e hā ʻoku ʻomi ai ʻe he ʻOtuá kiate kitautolu ha ngaahi fekau lahi pehē fau. Te ke lava foki ʻo tokoni ke mahino ki he fānaú, ʻokú Ne ʻomi e ngaahi fekaú ke faitāpuekina ai kitautolu.

Ngaahi ʻEkitivitī ʻe Ala Fakahokó

• Tokoniʻi e fānaú ke nau fakakaukau ki ha ngaahi fekau kuo ʻomi ʻe he ʻOtuá kiate kitautolu (hangē ko éní, ʻEkesōtosi 20:4–17; Mātiu 22:37–39; Tokāteline mo e Ngaahi Fuakava 89: 5–17). Tā ha ngaahi fakatātā ʻi he palakipoé ke tokoni ke mahino ki he fānaú pea manatuʻi e ngaahi fekau ko ʻení. ʻOmi ha ngaahi sīpinga ʻo e founga ʻe lava ke faitāpuekina mo maluʻi ai kitautolu ʻe he ngaahi fekaú.

• Lau ki he fānaú ʻa e “Ko au, ko e ʻEikí, ʻoku ou haʻisia ʻo ka mou ka fai ʻa e meʻa ʻoku ou lea ʻakí” (Tokāteline mo e Ngaahi Fuakava 82:10). Kole ki he fānaú ke nau toutou lea ʻaki fakataha mo koe ʻa e kupuʻi lea ko ʻení, pea fakakaukau ki ha ngaahi founga ke tokoni ke nau manatuʻi ai ia, ʻo hangē ko hono fakaafeʻi kinautolu ke nau pasi ki he taimi ʻo e kupuʻi leá. Fakamoʻoni ko e taimi ʻoku tau talangofua ai ki he ngaahi fekau ʻa e ʻOtuá, ʻokú Ne tauhi ʻEne ngaahi talaʻofa kiate kitautolú.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 81:3

Te u lava ʻo lotu “ʻaki e leʻó pea ʻi [hoku] lotó.”

Te ke lava fēfē ʻo ueʻi fakalaumālie e fānaú ke nau tafoki ki he ʻEikí “ʻi he lotu maʻu ai pē” ʻi heʻenau fie maʻu tokoní?

Ngaahi ʻEkitivitī ʻe Ala Fakahokó

• Fakaafeʻi ha taha ke lau ʻa e Tokāteline mo e Ngaahi Fuakava 81: 3, pea ʻeke ki he fānaú pe ko e hā e ʻuhinga ʻo e lotu “ʻi [homou] lotó.” Vahevahe ha aʻusia ʻi ha taimi naʻá ke lotu leʻo lahi ai pe ʻi ho lotó pea tokoniʻi koe ʻe he ʻEikí. Fakaafeʻi foki e fānaú ke vahevahe ha meʻa ne hoko tonu kiate kinautolu. ʻE lava fēfē ʻe he lotú ʻo ʻomi ke tau toe ofi ange ai ki he Tamai Hēvaní?

• Lau pe hivaʻi mo e fānaú ha himi fekauʻaki mo e lotú, hange ko e “Fai Haʻo Lotu” pe “Ko e Lotu Liló” (Ngaahi Himí, fika 70, 74). Fakaafeʻi ʻa e fānaú ke vahevahe ha kupuʻi lea mei he himí oku tokoni ke mahino kiate kinautolu ha meʻa fekauʻaki mo e lotú. Tuku ange ha taimi ke nau fakalaulauloto ki he meʻa te nau lava ʻo fai ke fakaleleiʻi ʻaki ʻenau ngaahi lotú pea hiki ʻenau ngaahi fakakaukaú.

Tokāteline mo e Ngaahi Fuakava 81:5

ʻOku finangalo e ʻOtuá ke u tokoniʻi mo fakamālohia ʻa kinautolu ʻoku faingataʻaʻiá.

Tokoniʻi e fānaú ke mahino kiate kinautolu ʻoku lahi e ngaahi founga ʻe lava ke nau tokoniʻi ai honau fāmilí, kaungāmeʻá mo e kaungāʻapí he ʻaho kotoa pē.

Ngaahi ʻEkitivitī ʻe Ala Fakahokó

• Tā ha ngaahi fakatātā ʻo ha ngaahi nima mo ha ngaahi tui ʻi he palakipoé. Kole ki he fānaú ke lau ʻa e Tokāteline mo e ngaahi Fuakava 81: 5 ke ʻilo ʻa e meʻa ne folofola ki ai e ʻEikí fekauʻaki mo e ongo konga ko ʻeni ʻo e sinó. Mamata ʻi he foʻi vitiō ko e “Pass It On” (ChurchofJesusChrist.org), pe vahevahe ha founga naʻá ke mamata ai mo e fānaú ki ha fetokoniʻaki ʻa e kakaí. ʻE lava fēfē ke tau toe fakatokangaʻi ange ʻa e kakai ʻoku tau feohí? Fakaafeʻi e fānaú ke nau tokoniʻi ha tokotaha ʻi he uiké ni. Ke maʻu ha ngaahi fakakaukau ki ha ngaahi founga ke tokoniʻi ai e niʻihi kehé, hivaʻi ha foʻi hiva fekauʻaki mo e ngāue tokoní, ʻo hangē ko e “Kuó u Fai Ha Lelei?” (Ngaahi Himi, fika 129).

• Fakaafeʻi e fānaú ke nau taufetongi ʻi hono fokotuʻutuʻu ha ngaahi foʻi pate (pe ko ha ngaahi meʻa tatau mo ia) lolotonga ia hono fakalau e ngaahi founga ʻe lava ke nau tokoniʻi ai e niʻihi kehé. Kole ki ha taha ʻo e fānaú ke ne ʻai ke tō ha taha ʻo e ngaahi foʻi pate tominoó pea fakatokangaʻi e founga ʻokú ne uesia ai e ngaahi foʻi pate kehé. ʻE lava fēfē ke maʻu ʻe heʻetau tokoní ha ola tatau ʻi he kakai ʻoku tau feohí? (Vakai foki ki he vitiō ko e “Dominoes,” ChurchofJesusChrist.org.) Fakamatala ki ha tokoni ʻofa ʻa ha taha naʻá ne poupouʻi koe ke ke tokoni ki ha taha kehe.

Tokāteline mo e Ngaahi Fuakava 82:8–10

ʻOku talaʻofa mai ʻe he ʻOtuá ha ngaahi tāpuaki ʻi he taimi ʻoku tau talangofua ai kiate Iá.

ʻI he fakatupulaki ʻe he fānaú ha falala ki he ngaahi talaʻofa ʻa e ʻOtuá, ʻe tupulaki foki mo ʻenau loto fiemālie ke talangofua ki Heʻene ngaahi fekaú.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakakaukauloto ʻoku ʻi ai honau kaungāmeʻa ʻoku fakakaukau ʻoku fuʻu lahi e ngaahi fekau kuo ʻomi ʻe he ʻOtuá. Kole ange ke nau fekumi ʻi he Tokāteline mo e Ngaahi Fuakava 82:8–10 ki ha meʻa ʻe tokoni ke mahino ki honau kaungāmeʻá ʻa e ʻuhinga ʻoku ʻomi ai ʻe he ʻOtuá e ngaahi fekaú. Vahevahe ʻa e founga kuo faitāpuekina ai koe ʻe he ngaahi fekau ʻa e ʻOtuá pea fakaafeʻi e fānaú ke vahevahe foki mo ʻenau ngaahi fakakaukaú.

• Ke tokoni ke mahino ki he fānaú e ngaahi talaʻofa ʻa e Tamai Hēvaní kiate kitautolú, vahevahe e kalasí ki ha kulupu ʻe tolu, pea ʻoange ki he kulupu takitaha ha taha ʻo e ngaahi potufolofola ko ʻení ke lau: Tokāteline mo e Ngaahi Fuakava 1:37–38; 82: 10; 130: 20–21. Fakaafeʻi kinautolu ke vahevahe e meʻa naʻa nau ako fekauʻaki mo e ngaahi talaʻofa ʻa e Tamai Hēvaní. ʻOku kaunga fēfē ʻa ʻetau talangofuá ki he ngaahi tāpuaki ʻe lava ke tau maʻú? Tokoni ki he fānaú ke nau fakakaukau ki ha ngaahi sīpinga mei heʻenau moʻuí pe mei he folofolá ne ʻomi ai ʻe he talangofuá ha ngaahi tāpuaki mei he ʻOtuá.

• Vahevahe ha aʻusia fakataautaha ʻokú ne fakamoʻoniʻi ʻa e tefitoʻi moʻoni ʻoku akoʻi ʻi he Tokāteline mo e Ngaahi Fuakava 82:8–10. Ko e hā e founga kuó ke lava ai ʻo falala ki he ʻEikí pea mo ʻEne ngaahi talaʻofá?

Poupouʻi e Ako ʻi ʻApí

Fakaafeʻi e fānaú ke nau fakakaukau ki ha founga te nau fie tokoni ai ki ha taha ʻi honau fāmilí ʻi he uiké ni. Lolotonga e kalasi ʻi he uike kahaʻú, tuku ke nau vahevahe ʻa e meʻa naʻa nau faí.

Fakatupulaki ʻEtau Founga Akoʻí

Tokoniʻi e fānaú ke nau hoko ko ha kau ako lelei ange. ʻOku mahulu atu ʻa e akoʻí ʻi hano vahevahe pē ʻo ha ngaahi moʻoni. ʻOku ʻuhinga ia ke tokoniʻi e niʻihi kehé ke fakatupulaki ʻenau fakafalala fakalaumālie pē kiate kinautolú. Hangē ko ʻení, poupouʻi e fānaú ke nau fakakaukau pē ʻiate kinautolu kae ʻikai ko hano talaange kiate kinautolu ʻa e founga te nau lava ai ʻo tokoni ki he niʻihi kehé.