Ko Hono Fakafoki Mai [ʻo e Ongoongoleleí], tā ʻe Liz Lemon Swindle.

26 Siulai–1 ʻAokosi

Tokāteline mo e Ngaahi Fuakava 84

“[Ko e] Mālohi ʻo e Anga Faka-ʻOtuá”

ʻI hoʻo lau ʻa e Tokāteline mo e Ngaahi Fuakava 84, ko e hā ha ngaahi moʻoni ʻokú ke ongoʻi ke fakamamafaʻi ki he fānau ʻokú ke akoʻí? Hiki ʻa e ngaahi fakakaukau ʻoku haʻu kiate koe mei he Laumālie Māʻoniʻoní.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaafeʻi ʻa e fānaú ke nau vahevahe ʻa e meʻa ʻoku nau ʻiloʻi fekauʻaki mo e lakanga fakataulaʻeikí. ʻE lava ke ke fakaʻaliʻali ha fakatātā ʻo ha tokotaha ʻoku tāpuakiʻi ʻe he mālohi ʻo e lakanga fakataulaʻeikí ʻo hangē ko e Tohi Fakatātā ʻo e Ongoongoleleí, fika 103–10, pea ʻeke ange ki he fānaú pe ko e hā e founga ʻoku faitāpuekina ai ʻe he lakanga fakataulaʻeikí e ngaahi fāmilí.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 84: 19–22; 26–27

Ko e lakanga fakataulaʻeikí ko e mālohi ia ʻo e ʻOtuá.

ʻOku ʻiloʻi nai ʻe he fānau ʻokú ke akoʻí e ngaahi taumuʻa ʻo e lakanga fakataulaʻeikí? ʻI he Tokāteline mo e Ngaahi Fuakava 84, ʻoku fakahā ai ʻe he ʻEikí ha taumuʻa ʻe taha: ke tokoniʻi kitautolu ke tau foki ki he Tamai Hēvaní. (Ke ʻilo lahi angé, vakai ki he Ngaahi Tefito ʻo e Ongoongoleleí, Lakanga Fakataulaʻeikí,” topics.ChurchofJesusChrist.org.)

Ngaahi ʻEkitivitī ʻe Ala Fakahokó

• Lau ʻa e Tokāteline mo e Ngaahi Fuakava 84:20, pea kole ki he fānaú ke nau tuʻu ʻi heʻenau fanongo ki he foʻi lea ko e “ngaahi ouau.” Ke tokoni ke mahino kiate kinautolu pe ko e hā ʻa e ouau, fakaʻaliʻali ha ngaahi fakatātā ʻo ha niʻihi ʻo e ngaahi ouau ʻo e lakanga fakataulaʻeikí, ʻo hangē ko e Tohi Fakatātā ʻo e Ongoongoleleí, fika 103–8, pea kole ki he fānaú ke nau fakamatalaʻi e meʻa ʻoku nau sio ki ai he fakatātā takitaha (vakai foki, Fakahinohino ki he Ngaahi Folofolá, “[Ngaahi] Ouaú,” scriptures. ChurchofJesusChrist.org). Fakamatalaʻi ange kuo foaki mai kiate kitautolu ʻe he Tamai Hēvaní e ngaahi ouau ko ʻení ke tokoni ke tau foki hake ʻo nofo mo Ia.

• Tuku ke valivali ʻe he fānaú e peesi ʻekitivitií. ʻI heʻenau fai iá, fakamatalaʻi ange e ngaahi ouau kehekehe ʻo e lakanga fakataulaʻeikí ʻoku ʻasi ʻi he pēsí pea mo e ʻuhinga ʻokú ke houngaʻia ai ʻi he ngaahi ouau ko iá.

Tokāteline mo e Ngaahi Fuakava 84:77

Ko ha kaungāmeʻa au ʻo Sīsū ʻi he taimi ʻoku ou muimui ai kiate Iá.

Te ke tokoniʻi fēfē ʻa e fānaú ke nau ʻiloʻi ʻoku ʻofaʻi lahi ange kitautolu ʻe he Fakamoʻuí ʻi hatau kaungāmeʻa mamae?

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo e Fakamoʻuí ʻi hoʻo lau ʻa e Tokāteline mo e Ngaahi Fuakava 84:77. Fakaafeʻi ʻa e fānaú ke nau tuhu ki he fakatātā ʻo e Fakamoʻuí ʻi he taimi kotoa pē ʻoku nau fanongo ai ki he foʻi lea ko e “ngaahi kaumeʻa.” Fakamatalaʻi ange ko e taimi ʻoku tau feinga ai ke tauhi e ngaahi fekaú, ʻoku tau fakahaaʻi ai kia Sīsū ʻetau ʻofa ʻiate Iá. Vahevahe ange ʻa e ʻuhinga kiate koe ke hoko ʻa Sīsū ko ho kaumeʻá.

• Tokoni ki he fānaú ke hiki ha ngaahi meʻa te nau lava ʻo fai ke fakahaaʻi ki honau kaungāmeʻá ʻoku nau ʻofa ʻiate kinautolu. Ko e hā naʻe fai ʻe Sīsū ke fakahaaʻi mai kiate kitautolu ko hotau kaumeʻa Iá? Ko e hā te tau lava ʻo fai ke fakahaaʻi ki he Fakamoʻuí ko Hono ngaahi kaumeʻa kitautolu? Hivaʻi fakataha ha foʻi hiva kau kia Sīsū, hangē ko e “Sīsū Hotau Kaumeʻa ʻOfá” (Tohi Hiva ʻa e Fānaú,37).

Tokāteline mo e Ngaahi Fuakava 84:88

ʻOku tokoniʻi ʻe he Tamai Hēvaní ʻa ʻEne kau faifekaú.

ʻE lava ke fakafiefia e fakakaukau atu ki he hoko ko ha faifekau ʻi ha ʻahó ka ʻe lava ke fakailifia ia ki ha fānau ʻe niʻihi. ʻE lava ke akoʻi kinautolu ʻe he Tokāteline mo e Ngaahi Fuakava 84:88 ki he founga ʻoku tokoniʻi ai ʻe he Tamai Hēvaní ʻa kinautolu ʻokú Ne fekauʻi atu ke malanga ʻaki ʻEne ongoongoleleí.

Ngaahi ʻEkitivitī ʻe Ala Fakahokó

• Tokoniʻi e fānaú ke nau fakakaukau ki ha kau faifekau ʻoku nau ʻiloʻi. Talaange kiate kinautolu kuo fai ʻe he Tamai Hēvaní ha talaʻofa makehe ki he kau faifekaú. Lau ʻa e Tokāteline mo e Ngaahi Fuakava 84: 88, pea tokoni ki he fānaú ke nau fakakaukau ki ha ngaahi ngāue ʻoku ʻalu fakataha mo e ngaahi talaʻofa ʻi he veesi ko ʻení. Fakamatala ki ha taimi naʻá ke ngāue ai ki he ʻEikí mo ongoʻi ʻokú Ne ʻiate koe ʻo hangē ko ia ʻoku fakamatalaʻi ʻi he veesi 88.

• Vahevahe ʻa e talanoa ʻo e kiʻi tamasiʻi taʻu fā ʻi he pōpoaki ʻa ʻEletā Takasi Uata ko e “Keinanga ʻi he Folofola ʻa Kalaisí” (Ensign pe Liahona, Mē 2019, 38–40). Tokoniʻi e fānau takitaha ke nau fakakaukau ki ha meʻa te nau lava ʻo lea ʻaki ke vahevahe ʻenau fakamoʻoní mo ha taha—hangē ko hono vahevahe ha taha ʻo e tefito ʻo e tuí. Kole ki he fānaú takitaha ke pehē pē ʻoku nau vahevahe ʻa e ongoongoleleí mo hanau kaungāmeʻa. Fakamoʻoni ange ʻoku tokoni mai ʻa e Tamai Hēvaní kiate kitautolu ke tau ʻiloʻi ʻa e meʻa ke lea ʻakí ʻi heʻetau talanoa mo e niʻihi kehé ʻo kau ki he ongoongoleleí.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 84: 4–5, 18–28, 30

ʻOku tokoni ʻa e ngaahi ouau ʻo e lakanga fakataulaʻeikí ke u mateuteu ke toe nofo mo e Tamai Hēvaní.

ʻI he fakaʻau ke nau lalahi angé, ʻe lava e fānau ʻokú ke akoʻí ʻo kau atu ki ha ngaahi ouau lahi ange ʻo e lakanga fakataulaʻeikí, kau ai ʻa e papitaiso mo e hilifakinima ʻi he temipalé maʻá e kau pekiá. Te ke tokoni fēfē ke mahino kiate kinautolu ʻa e ngaahi taumuʻa mo e mālohi ʻo e ngaahi ouau ʻo e lakanga fakataulaʻeikí?

Ngaahi ʻEkitivitī ʻe Ala Fakahokó

• Tohiʻi ʻa e Lakanga Taulaʻeiki Faka-ʻĒloné mo e Lakanga Taulaʻeiki Faka-Melekisētekí ʻi he palakipoé. Lau fakataha ʻa e Tokāteline mo e Ngaahi Fuakava 84:18, 26–28, 30, pea tokoni ki he fānaú ke hiki e ngaahi moʻoni ʻoku nau ako fekauʻaki mo e Lakanga Taulaʻeiki Faka-ʻĒloné mei he ngaahi veesi ko ʻení. Lau fakataha leva ʻa e Tokāteline mo e Ngaahi Fuakava 84:18–25, pea hiki e ngaahi moʻoni fekauʻaki mo e Lakanga Taulaʻeiki Faka-Melekisētekí.

• Fakaafeʻi e fānaú ke nau hiki e ngaahi ouau ʻo e lakanga fakataulaʻeikí kuo nau kau atu pe mamata aí, hangē ko e papitaisó, hilifakinimá, ngaahi tāpuaki lakanga fakataulaʻeikí pe ko e sākalamēnití. Kole ange ke nau vahevahe ʻenau ngaahi aʻusia ʻi he ngaahi ouau ko ʻení. Lau fakataha ʻa e Tokāteline mo e Ngaahi Fuakava 84:20 (tokoni ke mahino kiate kinautolu e ngaahi lea ʻoku ʻikai ke nau maheni mo iá). Ko e hā ʻoku fakaafeʻi ai kitautolu ʻe he ʻEikí ke tau kau ʻi he ngaahi ouaú? ʻOku tokoni fēfē ʻa e lakanga fakataulaʻeikí ke tau foki ki he Tamai Hēvaní?

  

  ʻOku tokoni e ngaahi ouaú ke tau manatuʻi ʻetau ngaahi palōmesi ki he ʻOtuá.

• Faʻu ha pāsolo mei ha fakatātā ʻo ha temipale. Lau mo e fānaú ʻa e Tokāteline mo e Ngaahi Fuakava 84:5, pea kole ange ke nau fakafanongo pe ko e hā naʻe fekau ʻe he ʻEikí ke langa ʻe he kāingalotú. ʻOange ki he fānaú takitaha ha konga ʻo e pāsoló pea kole ange ke nau vahevahe ha meʻa ʻe lava ke nau fai ke nau mateuteu ai ke hū ʻi he temipalé.

Tokāteline mo e Ngaahi Fuakava 84; 64–72; 81–88

ʻOku maluʻi pea fakaivia ʻe he ʻEikí ʻa e kau faifekaú.

ʻOku ʻi he veesi ko ʻení ha ngaahi talaʻofa ne fai ʻe he ʻEikí kiate kinautolu kuó Ne ui ke malanga ʻaki ʻa e ongoongoleleí. ʻE lava foki ke ueʻi fakalaumālie ʻe he ngaahi talaʻofa ko ʻení e fānaú ʻi heʻenau vahevahe ʻa e ongoongolelei ʻo Sīsū Kalaisí mo e niʻihi kehé.

Ngaahi ʻEkitivitī ʻe Ala Fakahokó

• Vahevahe e fānaú ke nau tauhoa pea ʻoange ki he hoa takitaha ke nau lau ha ngaahi veesi mei he Tokāteline mo e Ngaahi Fuakava 84:64–72, 81–88. Fakaafeʻi kinautolu ke kumi ha ngaahi talaʻofa ʻoku fai ʻe he ʻEikí kiate kinautolu ʻoku vahevahe ʻa e ongoongoleleí. Kole ange ke nau vahevahe e meʻa ne nau ako mo e kalasí. Tokoniʻi e fānaú ke nau fakakaukau ki ha kakai ʻoku nau ʻiloʻi pe kakai ʻi he folofolá ne nau maʻu ʻa e tokoni ʻa e ʻEikí ʻi heʻenau malanga ʻaki e ongoongoleleí (hangē ko Samuela ko e tangata Leimaná [vakai, Hilamani 13:2–4; 16:6–7.] pe ko ʻĀmoni [vakai, ʻAlamā 17:32–38]). Vahevahe ha meʻa ne hoko ʻi ha taimi naʻá ke ongoʻi ai e poupou ʻa e ʻEikí lolotonga hoʻo ngāue kiate Iá.

• ʻOmi ha ngaahi ipu pe ha ngaahi faʻoʻanga meʻa tatau ki he kalasí. Hiki ʻi ha ngaahi laʻipepa ha ngaahi founga ʻe lava ke hoko ai e fānaú ko ha kau faifekau ʻi he taimí ni pea faʻo e laʻipepá ʻi ha ipu. Tuku fakatahaʻi e ʻū ipú ʻi he falikí ʻo fakahanga kinautolu ki ʻolunga. Fakaafeʻi e fānaú ke nau taufetongi ʻi hono tolo ha meʻa ki ha taha ʻo e ngaahi ipú pea fakatātaaʻi e meʻa ʻoku ʻi he laʻipepa ʻi he loto ipú. ʻE tokoniʻi fēfē kitautolu ʻe he Tamai Hēvaní ʻi he taimi ʻoku tau vahevahe ai e ongoongoleleí mo e niʻihi kehé neongo ʻe ngali faingataʻa pe te tau ongoʻi tailiili?

• Tokoniʻi e fānaú ke nau ʻiloʻi ʻoku tau hoko kotoa ko ha kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní koeʻuhí ko e ngāue fakafaifekaú—ne akoʻi e ongoongoleleí ʻe he kau faifekaú kiate kitautolu, ki heʻetau mātuʻá pe ko ʻetau ngaahi kuí. Fakamatala ange ki he fānaú e founga ne tokoniʻi ai ʻe he kau faifekaú koe pe ko hoʻo ngaahi kuí ke maʻu ʻa e ongoongoleleí. Tuku ange ke vahevahe ʻe he fānaú ha ngaahi aʻusia faitatau. Poupouʻi kinautolu ke ʻeke ki heʻenau mātuʻá e founga ne ʻilo ai ʻe he fuofua kau mēmipa ʻo e Siasí ʻi honau fāmilí ʻa e ongoongoleleí.

Poupouʻi e Ako ʻi ʻApí

Fakaafeʻi e fānaú ke nau fai ha meʻa he uiké ni ke vahevahe ʻa e ongoongoleleí mo ha taha ʻi honau ʻapí pe ko ha kaungāmeʻa. Poupouʻi kinautolu ke kolea e tokoni ʻa e Tamai Hēvaní pea ʻilo e meʻa ʻokú Ne fai ke tokoniʻi kinautolú.

Fakatupulaki ʻEtau Founga Akoʻí

Fakakau atu ʻa e ngaahi ongoʻangá. “ʻOku ako lelei taha ha fānau (mo e kakai lalahi) tokolahi ʻi he taimi ʻoku fakakau atu ai ha ngaahi ongoʻanga (senses) kehekehé. Kumi ha ngaahi founga ke tokoniʻi ai e fānaú ke nau fakaʻaongaʻi honau ngaahi ongoʻanga ke sió, fanongó, mo e alá ki heʻenau akó” (Faiako ʻi he Founga ʻa e Fakamoʻuí, 25).