2–8 ʻAokosi

Tokāteline mo e Ngaahi Fuakavá 85–87

“Tuʻu ʻi he Ngaahi Potu Toputapú”

Koeʻuhi ko e siʻisiʻi ho taimi mo e fānaú, fekumi ki ha tataki fakalaumālie ke ʻiloʻi pe ko e hā ha ngaahi tefitoʻi moʻoni mei he folofolá ʻoku totonu ke ke fakamamafaʻi. Falala ki he ngaahi ueʻi ʻokú ke maʻú.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaʻaliʻali ki he fānaú ha ngaahi fakatātā pe ngaahi peesi ʻekitivitī naʻá ke toki fakaʻaongaʻi ʻi he ngaahi lēsoni kimui ní, pea fakaafeʻi e fānaú ke nau vahevahe ha meʻa ʻoku nau manatuʻi ne nau ako ʻo kau kiate kinautolu ʻi he kalasí pe ʻi ʻapi.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 85:6

ʻOku fanafana ʻa e Laumālié ʻi ha “kihiʻi leʻo siʻi.”

Naʻe pehē ʻe ʻEletā Lisiate G. Sikoti, “Kapau he ʻikai te ke lava ʻo fakahoko ha meʻa ʻi ho vā fetuʻutaki mo hoʻo kau akó ka ko hono tokonia kinautolu ke ʻiloʻi pea muimui ki he ngaahi ueʻi ʻa e Laumālié, te ke faitāpuekina taʻefaʻalaua mo taʻengata ʻa ʻenau moʻuí” (“To Learn and to Teach More Effectively” [ Brigham Young University Education Week devotional, Aug. 21, 2007], 5, speeches.byu.edu).

Ngaahi ʻEkitivitī ʻe Ala Fakahokó

• Lau ki he fānaú ʻa e founga hono fakamatalaʻi ʻe Siosefa Sāmita e Laumālié: “ʻIo, ʻoku folofola pehē ʻe he kihiʻi leʻo siʻí” (Tokāteline mo e Ngaahi Fuakava 85:6). Kole ki he fānaú ke nau talamai ha ngaahi meʻa ʻoku siʻisiʻi (fakaʻaliʻali ha ngaahi fakatātā ʻo kapau te nau fie maʻu tokoni). Fakaafeʻi kinautolu ke nau tūʻulutui ʻi he falikí pea feinga ʻi he lahi taha te nau malavá ke nau hā siʻisiʻi pea tuʻu maʻu. Tokoniʻi kinautolu ke nau fakakaukau ki ha founga ʻe lava ke leʻo siʻi ai ha leʻo pea tuku ke nau akoako ke fakafanongo pea lea ʻi ha kihiʻi leʻo siʻi. Fakamatala ki ha taimi ne lea ai ʻa e Laumālié kiate koe ʻi ha kihiʻi leʻo siʻi.

• Hivaʻi fakataha ha foʻi hiva fekauʻaki mo e Laumālié, hangē ko e “Ko e Laumālie Māʻoniʻoní” (Tohi Hiva ʻa e Fānaú, 56). Fakaafeʻi kinautolu ke mou hivaʻi leʻo siʻi fakataha ia. Ko e hā ʻoku akoʻi mai ʻe he foʻi hiva ko ʻení fekauʻaki mo e Laumālie Māʻoniʻoní? Tokoni ke ʻiloʻi ʻe he fānaú ha taimi ne nau ongoʻi ai ʻa Hono ivi tākiekiná (hangē ko e taimi lotú, hivaʻi ha ngaahi himi pe tokoni ki he niʻihi kehé).

Tokāteline mo e Ngaahi Fuakava 86:11

Te u lava ʻo hoko ko ha maama ki he niʻihi kehé.

ʻOku fakamatalaʻi ʻe he vahe 86 ʻa e ngāue mahuʻinga ʻoku finangalo e ʻEikí ke fakahoko ʻe Heʻene kau tamaioʻeikí ʻi he ngaahi ʻaho kimui ní. Ko e founga ʻe taha ʻe lava ke tokoni ai e fānaú ki he ngāué ni ko e hoko ko ha maama ki he kakai ʻoku nau feohí.

Ngaahi ʻEkitivitī ʻe Ala Fakahokó

• Lau ki he fānaú ʻa e kupuʻi lea ko ʻeni mei he Tokāteline mo e Ngaahi Fuakava 86:11: “ʻOku mou monūʻia ʻo kapau ʻoku mou fai atu ʻi heʻeku angaleleí, ko ha maama ki he kau Senitailé, [pe ko e kakai ʻoku ʻikai ke nau maʻu ʻa e ongoongoleleí].” ʻOku tāpuakiʻi fēfē kitautolu ʻe he māmá? ʻOku fēfē ʻa e taimi ʻoku ʻikai ke tau maʻu ai ha māmá? Te tau lava fēfē ʻo hoko ko ha maama ki he kakai kehe ʻoku ʻikai ke nau ʻilo ki he ongoongoleleí? Tokoni ki he fānaú ke nau fakakaukau ki ha ngaahi founga te tau lava ai ʻo vahevahe ʻa e lelei ʻo Sīsuú mo e niʻihi kehé.

• Kole ki he fānaú ke nau fakakaukauloto ʻoku ʻi ai ha kaumeʻa ʻoku feinga ke lue ʻi he fakapoʻulí (tamateʻi e māmá ʻo kapau ʻe tokoni). Ko e hā ʻoku faingataʻa ai ke lue ʻi he fakapoʻulí? Ko e hā te tau lava ʻo fai ke tokoni ki hotau kaumeʻá? Fakamatalaʻi ange ko e taimi ʻoku tau muimui ai ki he Fakamoʻuí, ʻoku hangē ia ko e ulo atu ha maama ke fakahinohino ki he niʻihi kehé ʻa e hala ke nau fou aí.

• ʻOku faʻa ʻi ai ha ngaahi talanoa ʻi he ngaahi makasini Liahona mo e Kaumeʻá fekauʻaki mo ha fānau ʻoku hoko ko ha faʻifaʻitakiʻanga lelei. Kumi ha talanoa ke vahevahe mo e fānaú ʻa ia te ne ueʻi fakalaumālie kinautolu ke nau hoko foki mo kinautolu ko ha kau faʻifaʻitakiʻanga lelei.

Tokāteline mo e Ngaahi Fuakava 87

ʻE lava ke hoko hotau ngaahi ʻapí ko ha “ngaahi potu toputapu.”

ʻOku ʻikai ha ʻapi ia ʻe haohaoa, ka ʻoku ʻi ai ha ngaahi meʻa te tau lava kotoa ʻo fai ke ngaohi hotau ngaahi ʻapí ke hoko ko ha ngaahi feituʻu toputapu ʻo e nongá.

Ngaahi ʻEkitivitī ʻe Ala Fakahokó

• Fakamatalaʻi ange ki he fānaú naʻe hohaʻa ʻa Siosefa Sāmita fekauʻaki mo e ngaahi meʻa ne hoko ʻi he māmaní. Fakamatalaʻi fakanounou ange ʻa e ʻuluʻi fakamatala ki he vahe 87, pe lau e “Vahe 30: Ko e Fakahā Kau Ki he Taú” (Ngaahi Talanoa ʻo e Tokāteline mo e Ngaahi Fuakavá, 117–18; vakai foki ki he vitiō ʻi he ChurchofJesusChrist.org). Kole ki he fānaú ke nau fakafanongo ki ha ngaahi meʻa ne mei lava ke hohaʻa ki ai ʻa Siosefa. Lau ʻa e Tokāteline mo e Ngaahi Fuakava 87:8 ke akoʻi e meʻa ne folofola ʻaki ʻe he ʻEikí ʻoku totonu ke tau fai fekauʻaki mo e ngaahi palopalema ko iá.

• Fakaʻaliʻali ha fakatātā ʻo ha temipale, pea vahevahe ʻa e ʻuhinga ʻoku hoko ai e temipalé ko ha feituʻu toputapú. Fakaʻaliʻali ha fakatātā ʻo ha ʻapi pea tokoniʻi e fānaú ke nau fakakaukau ki ha ngaahi founga ʻe lava ke nau ngaohi ai honau ʻapí ke toputapu ʻo hangē ko e temipalé (vakai, peesi ʻekitivitī ʻo e uike ní). Ko e hā e ʻuhinga ʻoku tau fie maʻu ai ke tau ʻi he ngaahi feituʻu toputapú?

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 85:6

ʻOku fanafana ʻa e Laumālié ʻi ha “kihiʻi leʻo siʻi.”

ʻOku lahi e ngaahi meʻa ʻi he māmaní ʻokú ne tohoakiʻi e tokangá pea faingataʻa ai ke tau fanongo ki he Laumālié. Te ke tokoniʻi fēfē ʻa e fānaú ke fakafanongo ki he leʻo ʻo e Laumālié?

Ngaahi ʻEkitivitī ʻe Ala Fakahokó

• ʻEke ki he fānaú pe ko e hā te nau talaange ki ha taha te ne fehuʻi ange pe ʻoku nau ʻiloʻi fēfē ʻa e taimi ʻoku lea ange ai e Laumālie Māʻoniʻoní kiate kinautolú. Fakaafeʻi kinautolu ke nau laukonga fekauʻaki mo ha founga ʻe taha ne fakamatalaʻi ʻaki ʻe Siosefa Sāmita e leʻo ʻo e Laumālié ʻi he Tokāteline mo e Ngaahi Fuakava 85: 6.

• Tā leʻo siʻi ha himi pe ko ha hiva ʻa e fānaú, pea kole ki ha taha ʻo e fānaú ke ne mateʻi pe ko e hā e foʻi hiva ko iá kae fakahoko ʻe he niʻihi kehé ha ngaahi longoaʻa fakatuta, hangē ko haʻanau pasipasi pe punopuna. Kole ange leva ki he fānau kehé ke tuku pea aleaʻi ʻa e founga ʻoku hangē ai ʻeni ko e fakafanongo ki he Laumālie Māʻoniʻoní ʻi he taimi ʻoku tau toʻo ai e ngaahi meʻa fakahohaʻá mei heʻetau moʻuí. Tokoni ki he fānaú ke fakakaukau ki he ngaahi fakahohaʻa te nau lava ke toʻo kae lava ke ke ongoʻi lahi ange ai e Laumālié.

Tokāteline mo e Ngaahi Fuakava 86

ʻE lava ke u tokoni ʻi hono tānaki ʻo e kakai ʻa e ʻOtuá.

Ko e talanoa fakatātā ko ia ʻo e uité mo e teá ko e talanoa ia ʻo kau ki he “ngaahi ʻaho fakaʻosí, ʻio ʻi he taimí ni” (Tokāteline mo e Ngaahi Fuakava 86:4). Fakaʻaongaʻi ʻa e talanoa fakatātā ko ʻení ke tokoni ki he fānaú ke ongoʻi e ueʻi fakalaumālie ke kau atu ʻi hono “tānaki leva ʻo e uité” (veesi 7).

Ngaahi ʻEkitivitī ʻe Ala Fakahokó

• Fakamatalaʻi ange ki he fānaú ʻa e talanoa fakatātā ʻo e uité mo e teá, pe fakaafeʻi ha taha ʻo e fānaú ke ne fakamatalaʻi ia (vakai, Mātiu 13:24–30). Fakaafeʻi e fānaú ke nau tā ha fakatātā ʻo ha meʻa mei he talanoa fakatātaá. Hili iá pea mou lau fakataha ʻa e Tokāteline mo e Ngaahi Fuakava 86:1–7, pea fakaafeʻi ʻa e fānaú ke tohi ʻi heʻenau fakatātaá ʻa e meʻa ʻoku fakafofongaʻi ʻe he meʻa ne nau taá.

• Teuteu ha fanga kiʻi fakatātā pe ngaahi tā valivali ʻo ha uite, pea fufuuʻi takai kinautolu ʻi he lokí. Fakaafeʻi e fānaú kotoa ke nau tokoni ʻi hono tānaki ʻo e uité pea tohiʻi ai ʻa e hingoa ʻo ha taha ʻe lava ke nau “tānaki” kia Sīsū Kalaisi. ʻOku ʻuhinga ki he hā ke tānaki e kakaí kia Sīsū Kalaisi? Ko e hā ha ngaahi founga te tau lava ʻo fai ai ʻeni? Ko e ʻuhinga ki he hā ʻa e “fai atu ʻi he [angalelei ʻa e Fakamoʻuí]” pea ʻoku tokoniʻi fēfē ai kitautolu ke tau tānaki ʻa e kakaí kiate Iá? (Tokāteline mo e Ngaahi Fuakava 86:11).

Tokāteline mo e Ngaahi Fuakava 87

Te u lava ʻo “tuʻu ʻi he ngaahi potu toputapú.”

ʻE fehangahangai e fānau ʻokú ke akoʻí mo ha ngaahi meʻa fakatuʻutāmaki fakalaumālie mo fakatuʻasino ʻi heʻenau moʻuí. ʻE lava ke ke tokoniʻi kinautolu ke mateuteu ke fehangahangai mo e ngaahi meʻa fakatuʻutāmaki ko iá ʻaki hono akoʻi kinautolu ke kumi pea tuʻu ʻi he ngaahi potu toputapú.

Ko e ngāue fakatemipalé ko ha taha ia ʻo e ngaahi founga te tau lava ai ʻo tānaki e kakai ʻa e ʻOtuá.

Ngaahi ʻEkitivitī ʻe Ala Fakahokó

• Lau fakataha ʻa e Tokāteline mo e Ngaahi Fuakava 87:6 ke ʻilo ki he ngaahi meʻa naʻe folofola e ʻEikí ʻe hoko ʻi he ngaahi ʻaho kimui ní. Kole ki he fānaú ke nau talanoa fekauʻaki mo e ngaahi faingataʻa ʻoku faʻa fehangahangai mo e fānau ʻi honau toʻú. Fakaafeʻi kinautolu ke kumi ʻi he veesi 8 ʻa e meʻa ne folofola e ʻEikí ʻoku totonu ke tau fai lolotonga e ngaahi taimi faingataʻá. Talaange ki he fānaú ha ngaahi potu toputapu ʻi hoʻo moʻuí.

• Tokoni ki he fānaú ke nau hiki ha lisi ʻo e ngaahi feituʻu toputapú, ngaahi fakakaukau toputapú, mo e ngaahi ngāue toputapu ʻe lava ʻo tokoni kiate kinautolu ke nau fehangahangai mo e ngaahi fakatamaki fakalaumālié (ki ha ngaahi fakakaukau, vakai ki he ongo foʻi vitiō “Standing in Holy Places” mo e “Stand Ye in Holy Places—Bloom Where You’re Planted,” ChurchofJesusChrist.org). Fakaafeʻi kinautolu ke tauhi ʻenau lisí ke nau toutou vakai maʻu pē ki ai ʻi he taimi ʻe fie maʻu aí.

Poupouʻi e Ako ʻi ʻApí

Fakaafeʻi e fānaú ke nau fili ha meʻa ʻe taha te nau fai ke ngaohi ai honau ʻapí pe ko ʻenau moʻuí ke hoko ko ha “potu toputapu.”

Fakatupulaki ʻEtau Founga Akoʻí

ʻAi ke ke mohu founga. ʻOua te ke fakangatangata koe ki he ngaahi ʻekitivitī ʻoku fokotuʻu atu ʻi he fokotuʻutuʻu fakalēsoni ko ʻení. Tuku ke fakatupu ʻe he ngaahi fakakaukau ko ʻení hoʻo mohu foungá. Fakakaukau ki he meʻa ʻe fiefia ai e fānau ʻi hoʻo kalasí pea mo e meʻa ʻe tokoni kiate kinautolu ke nau akó.