Jikin Kalbuuj Liberty Jibriin, jān Al Rounds

Oktoba 18–24

Katak im Bujen Ko 121–123

“O Anij, kwo pād ia?”

Ilo am ekkatak Katak im Bujen Ko 121–23, ļōmņake ta ajri ro ilo kūlaaj eo am rejeļā kadede. Jar n̄an jeļā elmen kalōk ta eo rejeļā.

Je En̄jake ko Rej Im̧we Eok

Kajjitōk bwe ren Kwaļo̧k

Eļan̄n̄e kwaar rōjan̄ ajri ro n̄an kwaļo̧k men eo raar ekkatak ilo kūlaaj wiik eo ļo̧k ippān baam̧le ko aer, letļo̧k n̄an er iien n̄an kwaļo̧k en̄jake ko aer.

Katakin Katak eo: Ajri ro Reddikļo̧k

Katak im Bujen Ko 121:7–8; 122:7

Iien ko reppen remaron̄ ad n̄an em̧m̧an.

Naan ko an Irooj n̄an Josep Smith ilo jikin kalbuuj Liberty ej letok juon iin em̧m̧an n̄an jipan̄ ajri ro kile bwe jet iien pen mour, ak Jemedwōj Ilan̄ im Jisōs Kraist remaron̄ jipan̄ kōj.

Makūtkūt ko Maron̄ Kōm̧m̧ani

• Karuwaineneik ajri ro n̄an ron̄jake naan in “aenōm̧m̧an” ilo am̧ kwaļo̧k n̄an er “Jebta 46: Josep Smith ilo Liberty Jail” (Bwebwenato ko ilo Katak im Bujen Ko, 172–74) ak Katak im Bujen Ko 121:7–8. Jipan̄ ajri ro ļōmņak wāween ko jemaron̄ leke Irooj āinwōt kar Josep bwe jen maron̄ en̄jake aenōm̧m̧an. Kōmeļeļeik bwe men̄e Josep eaar ioon men ko reppen, Irooj eaar pād ippān.

• N̄an jipan̄ ajri ro kile bwe apan̄ ko ad “rej n̄an em̧m̧an eo [ad]” (Katak im Bujen Ko 122:7), kōnono n̄an er kōn wāween an m̧ajōļ ko ad kajoorļo̧k n̄e jej kotak men ko reddo. Kōtļo̧k bwe ren kōtan wōt n̄e rej kotak juon men eddo ak kōm̧m̧an jerbal eddo. Kōmeļeļeik bwe dipļo̧ki men ko reppen emaron̄ jipan̄ jetōb ko ad kajoorļo̧k—eļan̄n̄e jej oktaļo̧k n̄an Irooj kōn jipan̄. Kwaļo̧k jet waanjon̄ok ko me ajri ro kwoj katak remaron̄ keidiļo̧k. Karuwaneneik er n̄an āliji ippam̧ naan in “Aolep men kein otemjeļo̧k renaaj … n̄an em̧m̧an eo [am].”

Katak im Bujen Ko 122:8

Jisōs Kraist ejeļā wāween aō en̄jake.

Ilo jikin kalbuuj Liberty, Jisōs Kraist eaar ba n̄an Josep Smith bwe wanlaļļo̧k ium̧weier aolep (lale Katak im Bujen Ko 122:8). Meļeļein bwe Ejeļā ta eo jej jelm̧ae im jemaron̄ oktak n̄an E.

Makūtkūt ko Maron̄ Kōm̧m̧ani

• N̄an jipan̄ ajri ro jeļā oktakļo̧k n̄an Kraist n̄e rej ioon men ko reppen, kajjitōk ippaer n̄an kwaļo̧k elmen mejeer n̄e rej būrom̧ōj ak metak ak mijak. Wōn emaron̄ jipan̄ kōj n̄e jej en̄jake jekjek in? Riit Katak im Bujen Ko 122:8, im kōmeļeļeik bwe meļeļe bwe Jisōs Kraist ejeļā ad en̄jake, im E maron̄ jipan̄ kōj.

• Al ippān doon “Jesus Once Was a Little Child” (Children’s Songbook, 55), im kam̧ool bwe Jisōs Kraist emaron̄ jipan̄ kōj kōnke Ejeļā ad en̄jake.

  

  Jisōs ejeļā ad en̄taan. A En Jab Ankil Aō, A Am̧ Wōt, jān Walter Rane.

Katak im Bujen Ko 123:17

Anij ekōņaan bwe in m̧ōņōņōik ta eo imaron̄ kōm̧m̧ane.

Men̄e Josep Smith ekar pād ilo kalbuuj im ro Rekwojarjar kar kadiwōjļo̧k jen m̧oko m̧weer, eaar rōjan̄ ro Rekwojarjar n̄an “kōm̧m̧ani aolep men ilo m̧ōņōņō ko im rej pād ilo ad kajoor.”

Makūtkūt ko Maron̄ Kōm̧m̧ani

• Riit n̄an ajri ro Katak im Bujen Ko 123:17, im karuwaineneik er n̄an jutak im m̧ōņōņō n̄e rej ron̄ naan eo “m̧ōņōņō.” Karuwaineneik er n̄an katen wōt n̄e kōm̧m̧an m̧akūtkūt in jipan̄ ilo juon wāween em̧ōņōņō.

• Al ippān doon juon al kōn jerbal in jipan̄, eo āinwōt “When We’re HelpingChildren’s Songbook, 198). Jipan̄ ajri ro ļōmņak kōn wāween ko remaron̄ m̧ōņōņō in jerbal n̄an baam̧le im ro m̧ōttāer.

Katakin Katak Ko: Ajri ro Rerūttoļo̧k

Katak im Bujen Ko 121:7–9; 122:7–9

Apan̄ ko aō remaron̄ n̄an em̧m̧an eo aō.

Juon wāween Rilo̧mo̧o̧r eaar kaenōm̧m̧an Josep Smith ke eaar en̄taan ilo jikin kalbuuj Liberty n̄an katakin e bwe “aolep men kein otemjeļo̧k renaaj lewōj n̄an eok imminene, im naaj n̄an em̧m̧anļo̧k eo am” (Katak im Bujen Ko 122:7). Mool in emaron̄ kōjeraam̧m̧an ajri ro n̄e rej ioon apan̄ ko aer make.

Makūtkūt ko Maron̄ Kōm̧m̧ani

• Karuwaineneik ajri ro n̄an kwaļo̧k ta eo rejeļā kōn en̄jake eo an Josep Smith ilo kalbuuj im ro Rekwojarjar kar kadiwōjļo̧k er jān Missouri (lale jebta 45–47 in Bwebwenato ko an Katak im Bujen Ko, 167–75). Kajjitōk ippān ajri ro ewi wāween aer maron̄ kar en̄jake eļan̄n̄e ren kar Josep Smith ak juon iaan ro Rekwojarjar ilo tōre eo. Riit n̄an ajri ro Katak im Bujen Ko 121:7–9; 122:7–9, im karuwaineneik er n̄an pukot men ko Irooj eaar ba bwe enaaj bōktok aenōm̧m̧an n̄an er. Elmen an men ko reppen jej iooni maron̄ erom n̄an “em̧m̧anļo̧k eo [ad]”?

• Kajjitōk ippān ruo ajri n̄an jibwe jabōn to eo me ebwe n̄an rājet in ruum̧ eo. Kajjitōk ippān ajri eo juon n̄an jibwe jabōn to eo kōn pein. Riiti Katak im Bujen Ko 121:7–8, im kōmeļeļeiki bwe to ej bōk jikin iiō ko indeeo im bwe ibwikewonkwon ko reddik rej āinwōt iiō ko ad ioon laļin. Ta meļeļe bwe apan̄ ko ad rej an “jidik wōt iien”?

• Jipan̄ ajri ro antoone ta enaaj waļo̧k n̄an joļo̧k emen allōn̄ ko ilo juon jikin eo āinwōt jikin kalbuuj Liberty. Ta eo jenaaj lukkuun miji? Elmen ad naaj joļo̧k ad iien ie? Ta eo Josep Smith eaar jeļā ilo Katak im Bujen Ko 121:7–9; 122:7–9 me ekar jipan̄ e nikniki en̄jake in? Rōjan̄ ajri ro n̄an je juon leta n̄an juon eo ej ioon apan̄, im ba rej kōjerbal jet men jen Katak im Bujen Ko 121:7–9; 122:7–9 ilo leta eo.

Katak im Bujen Ko 121:34–46

Jej aikuj in mour jim̧we n̄an bōk “kajoor ko an lan̄.”

Jipan̄ ajri ro kwoj katakin n̄an kile bwe jemaron̄ bōk kajoor in Anij ilo mour ko ad wōt eļan̄n̄e jej mour jim̧we.

Makūtkūt ko Maron̄ Kōm̧m̧ani

• Jin̄aik juōn ļain kōn naan kein eļap kajoor ilo jemļo̧kin edik kajoor ilo rājet. Jin̄aik juon m̧ade ej jitōn̄ļo̧k io̧lepen ļain eo. Kālet jen naan ak eoon jān Katak im Bujen Ko 121:34–46 me ekatak kilen ad kadikļo̧k ak kōļapļo̧k kajoor in lan̄ ilo mour ko ad (āinwōt “ņooj bōd ko ad,” “utiej bōro,” “ettā,” im “iakwe”). Karuwaineneik ajri ro n̄an bōk kuņaer kālet juon naan, kālet eļan̄n̄e naan eo ej tōlļo̧k n̄an kadikļo̧k ak kōļapļo̧k kajoor, im kōm̧akūt m̧ade eo ekkar kake. Kōnono n̄an ajri ro kōn armej ro rejeļā kajjier me reim̧we ro jet kōn kōm̧m̧an ko aer kōnke rej ļoor kapilōk eo an Irooj ilo eoon kein.

• Riiti Katak im Bujen Ko 121:41–42, 45, im kajjitōk ippān ajri ro n̄an laajraki em̧m̧an ko ilo eoon kein me Irooj ekōņaan bwe jen būki. Jipan̄ er kōmeļeļeik jabdewōt naan ko rejjab meļeļe. Leļo̧k n̄an kajjjojo ajri juon em̧m̧an, im jipan̄ er ļōmņake juon wāween remaron̄ kwaļo̧ke. N̄e em̧ōj aer aolep kwaļo̧ke, kajjitōk ippāer n̄an riiti eoon 45–46 im laajrake kōjeraam̧m̧an ko renaaj būki eļan̄n̄e renaaj kwaļo̧k em̧m̧an kein.

• Riiti ļain eo m̧oktata jān Katak im Bujen Ko 121:46. Elmen an Jetōb Kwojarjar maron̄ “m̧ōttad iien otemjej”? Al ippān doon “The Holy Ghost” (Children’s Songbook, 105) ak bar juon al kōn menin letok eo an Jetōb Kwojarjar. Ta eo al in ej katakin kōj kake etke jekōņaan bwe Jetōb Kwojarjar en m̧ōttan iien otemjej?

Kōketak Ekkatak ilo M̧weo

Karuwaineneik ajri ro n̄an ļōmņake juon eo ej ioon men eppen. Jipan̄ ajri ro n̄an kalikkar jet men Josep Smith ekar jeļā ilo jikin kalbuuj Liberty bwe ren maron̄ kwaļo̧k n̄an armej eo.

Kōkōm̧anm̧anļo̧k Ad Katakin

Kōketak Ekkatak ilo M̧weo “Ro jinen im jemān rej rūkaki ro raorōktata ilo gospel eo n̄an ajri ro nejier—ewōr ippād jim̧or eddo im kajoor eo eļaptata n̄an ukōt ajri ro nejier (lale Deuteronomi 6:6–7). Ilo am̧ katakin ajri ro ilo mōnjar eo, jar im kappukōt wāween ko n̄an rie ro jineer im jemāer” (Katakin ilo Wāween eo an Rilo̧mo̧o̧r,25).