Te haere mai ra te tāne fa’aipoipo ’āpī ra, nā Elizabeth Gibbons

15–21 nō Novema

Te Parau Ha’api’ira’a ʼe te mau Parau Fafau 133–134

« Fa’aineine ia ’outou nō te taera’a mai o te tāne fa’aipoipo ’āpī ra »

’A feruri i te mau hina’aro o te mau tamari’i o tā ’outou e ha’api’i ra—nō rātou ’o tē tuatāpapa ra ’e ’o tē ha’api’i mai ra i te fare ’e nō rātou ’aita roa ïa. Nāhea ’outou i te tauturu ia rātou ’ia ha’api’i i te tahi ’e te tahi i te mau mea tā rātou i ha’api’i mai ?

Pāpa’i i te mau mana’o e tae mai

Tītau i te mana’o

’A fa’a’ite i te hō’ē hōho’a ’o tā ’outou i fa’a’ohipa ’aita i maoro a’enei i roto i te hō’ē ha’api’ira’a i te Paraimere, ’e e ani i te mau tamari’i ’ia fa’a’ite mai i te mea tā rātou e ha’amana’o ra nā roto mai i te ha’api’ira’a.

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 133:19-21, 25

E ho’i fa’ahou mai Iesu Mesia.

I roto i te tuha’a 133, tē fa’ata’a nei te Fatu i tōna tae-piti-ra’a mai ’e tē ani nei ’oia i tōna mau ta’ata ’ia fa’aineine nō teie ’ohipa hanahana e tupu. Nāhea ’outou i te tauturu i te mau tamari’i ’ia tīa’i i te ho’ira’a mai o te Fa’aora ?

Mau ’ohipara’a e nehenehe e rave

• E huna i te hō’ē hōho’a nō te tae-piti-ra’a mai o te Fa’aora i muri i te hō’ē ’ahu, mai te mea ra ē te ’ahu, ’o te hō’ē ïa pāruru (e nehenehe ’outou e fa’a’ohipa i te hōho’a i roto i te arata’i nō teie hepetoma i roto i te Mai, pee mai—nō te taata hō’ē ’e te ’utuāfare ’aore rā, te Buka hōho’a o te ’evanelia, no. 66). E ani i te mau tamari’i e heheu i te « pāruru » ’e ’ia fa’ahua tē hi’o ra rātou nā te hō’ē ha’amāramarama. E ani ia rātou ’ia fa’a’ite mai e aha tā rātou e fāri’i, mai te mea e hi’o rātou nā te ha’amāramarama ’e ’ia ’ite ia Iesu i te poura’a mai nā te ra’i mai. Tai’o i te pereota « haere ’outou e fārerei atu iāna » (’īrava 19), ’e e tauturu i te mau tamari’i i fa’ahiti fa’ahou i te pereota.

• I raro a’e i te pārahira’a o te tamari’i tāta’itahi, ’a huna i te hō’ē hōho’a e fa’a’ite ra i te hō’ē mea tā tātou e nehenehe e rave nō te fa’aineine nō te tae-piti-ra’a mai o Iesu Mesia (mai te tai’ora’a i te mau pāpaira’a mo’a, fa’a’ite i te ’evanelia, ’aore rā, tāvinira’a i tō tātou ’utuāfare). E vaiiho i te mau tamari’i ’ia ’imi i te mau hōho’a, ’e e parau e nāhea teie mau mea i te tauturu ia tātou ’ia fa’aineine nō te fārerei i te Fa’aora ’ia ho’i mai ’oia.

• Hīmene ’āmui i te hō’ē hīmene nō ni’a i te tae-piti-ra’a mai o te Fa’aora, mai te « Quand Jésus reviendra » (Chants pour les enfants, 46–47). ’A fa’a’ite i tō ’outou here i te Fa’aora ’e i tō ’outou mau ’āehuehu nō ni’a i tōna ho’ira’a mai i te fenua nei. E ani i te mau tamari’i ’ia fa’a’ite ato’a mai i tō rātou ato’a mau ’āehuehu.

Te Parau Ha’api’ira’a ’e te mau Parau Fafau 133:52–53

E mea here ’e te maita’i ’o Iesu Mesia.

Tē fa’ata’a nei teie mau ’īrava i te tahi mau rāve’a e rave rahi i te fa’a’itera’a te Fatu i tōna « aroha rahi » i tōna mau ta’ata. E aha te ti’a ia ’outou ’ia rave nō te tauturu i te mau tamari’i ’ia ’ite i te here o te Fa’aora nō rātou ?

Mau ’ohipara’a e nehenehe e rave

• E pia i te hō’ē hōho’a e fa’a’ite ra ē e mea here ’e te maita’i ’o Iesu Mesia (hi’o te Buka hōho’a o te ’evanelia, nos. 42, 47). E ani i te mau tamari’i ’ia fa’a’ite mai i te tahi atu mau mea tā Iesu i rave nō te fa’a’ite i tōna here ’e te maita’i. E tai’o i te parau « e fa’ahiti rātou i te aroha rahi o tō rātou Fatu ra » (’īrava 52), ’e e tauturu i te mau tamari’i ’ia feruri i te mau rāve’a e nehenehe ai rātou e paraparau ia vetahi ’ē nō ni’a i te here o te Fa’aora.

• Hīmene i te hō’ē hīmene nō ni’a i te aroha o Iesu, mai te « Jésus est notre ami » (Chants pour les enfants, 37). ’A fa’a’ite i tō ’outou ’itera’a pāpū e nāhea te Fa’aora i te fa’a’ite i tōna here nō ’outou.

Te Parau Ha’api’ira’a ’e te mau Parau Fafau 134:5

’Ua hina’aro te Fatu iā’u ’ia ha’apa’o i te ture.

E mea pinepine te mau tamari’i i te fāri’i i te mau arata’ira’a e pe’e i te fare, i te fare ha’api’ira’a, ’e i te tahi atu vāhi. E nehenehe ’outou e tauturu ia rātou ’ia ta’a maita’i ē, tē tītau nei te Fatu ia tātou ’ia pe’e i te mau arata’ira’a ’e te mau ture i roto i tō tātou ’oire ’e te fenua.

Mau ’ohipara’a e nehenehe e rave

• E ani i te mau tamari’i ’ia ha’uti i te hō’ē ha’uti ’ōhie ma te ’ore e pe’e i te mau arata’ira’a, ’e i muri iho e ani ia rātou ’ia ha’uti i te reira ’e te mau arata’ira’a. Nāhea te mau arata’ira’a i te tauturu ia tātou ? E fa’a’ite i tō ’outou māuruuru nō te mau ture o te fenua.

• Tauturu i te mau tamari’i ’ia fa’ahiti fa’ahou i te Hīro’a Fa’aro’o ’ahuru ma piti. ’A ha’apāpū i te ta’o tumu, mai te « ha’apa’ora’a, te fa’aturara’a, ’e te pāturura’a », ’e e parau i te mau tamari’i nō ni’a i te aura’a o taua mau ta’o ra. ’A fa’a’ite ia rātou nō te aha e mea faufa’a ’ia ha’apa’o i te ture.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 133:4–5, 14–15

Tē hina’aro nei te Fatu iā’u ’ia vai mā.

E tauturu Te Parau Ha’api’ira’a ’e te mau Parau Fafau 133 i te mau tamari’i ’ia hāro’aro’a e nāhea ’ia tāpe’a mā noa ia rātou iho i te mau ’umera’a a tō te ao nei e ha’ati ra ia rātou.

Mau ’ohipara’a e nehenehe e rave

• E ani i te mau tamari’i ’ia tai’o « Babela, Babulonia » i roto i te Arata’i o te mau Pāpa’ira’a mo’a (scriptures.ChurchofJesusChrist.org) nō te ’ite mai ’o vai ’o Babulonia ’e e aha tāna e ti’a ra. I muri iho e tai’o ’āmui i Te Parau Ha’api’ira’a ’e te mau Parau Fafau 133:4–5, 14–15. E aha te aura’a « ’ia haere ’outou i rāpae’au ia Babulonia » ? (’īrava 5). Tehea mau vāhi ’e te mau huru orara’a ’o tā te Fatu e hina’aro ia tātou ’ia vai ātea ? E aha te ti’a ia tātou e rave nō te ’ape i te reira ?

• ’A tu’u i te hō’ē tāpa’o i te hō’ē pae o te piha e parau ra « Ziona », ’e e tu’u i te tahi atu tāpa’o i te tahi atu pae e parau ra « Babulonia ». Pāpa’i i ni’a i te mau ’api parau roroa te mau ta’o nō roto mai i Te Parau Ha’api’ira’a ’e te mau Parau Fafau 133:4–5, 14–15 e fa’ata’a ra nō Ziona ’aore rā, nō Babulonia (mai te « feiā ’ino », « mā », ’aore rā, « ha’amoura’a »), ’e e ani i te mau tamari’i ’ia tu’u i te ’api parau tāta’itahi i raro a’e i te tāpa’o tano.

Te Parau Ha’api’ira’a ’e te mau Parau Fafau 133:19–25, 46–52

E fa’atere ari’i Iesu i ni’a i te fenua nei.

’Ua parau o Elder D. Todd Christofferson ē, « E mea faufa’a rahi roa ’ia fa’aineine i te ao nei nō te tae-piti-ra’a mai o te Fatu o Iesu Mesia » (« Fa’aineine nō te ho’ira’a mai o te Fatu », Ensign ’aore rā Liahona, Mē 2019, 81). Nāhea ’outou i te tauturu te mau tamari’i ’ia māramarama e nāhea rātou e nehenehe ai e ’āmui mai i roto i teie ’ohipa fifi ?

Mau ’ohipara’a e nehenehe e rave

• Fa’a’ite i te hōho’a nō roto mai i te arata’i nō teie hepetoma i roto Mai, peʼe mai—nō te ta’ata hō’ē ’e te ’utuāfare ’e e ani i te mau tamari’i ’ia tāpura mai i te mau mea tā rātou i ’ite nō ni’a i te tae-piti-ra’a mai ’o Iesu Mesia. I muri iho, ma te fa’a’ohipa i Te Parau Ha’api’ira’a ’e te mau Parau Fafau 133:19–25, 46–52, e ani ia rātou ’ia tu’u atu i te mau mea i tā rātou tāpura. ’A fa’a’ite i tō ’outou ’itera’a pāpū ē e riro te tae-piti-ra’a mai, ’ei mahana ’oa’oa nō te feiā parauti’a.

• Nō te tauturu i te mau tamari’i ’ia māramarama i te ’īrava 19, e parau ia rātou e nāhea te hō’ē vahine fa’aipoipo ’ia fa’aineine nō tōna fa’aipoipora’a (penei a’e te hō’ē ta’ata tei fa’aipoipohia ’aita i maoro a’enei e tauturu mai i teie tāu’ara’a parau). Mai tehea tātou e riro ai mai te hō’ē vahine fa’aipoipo e fa’aineine ra « nō te taera’a mai o te tāne fa’aipoipo ’āpī ra », ’o Iesu Mesia ? Mai te mea e mana’o ’outou ē, e mea maita’i roa ’ia hi’o fa’ahou ’e te mau tamari’i te parabole o nā paretenia hō’ē ’ahuru (hi’o Mataio 25:1–13). Nō te aha e mea faufa’a ’ia fa’aineine nō te tae-piti-ra’a mai o te Fa’aora ? E aha tā tātou e nehenehe e rave i teienei nō te fa’aineine ia tātou ?

Te Parau Ha’api’ira’a ’e te mau Parau Fafau 134:1–2

Tē hina’aro nei te Fatu iā’u ’ia ha’apa’o i te ture.

Noa atu tē vai nei e rave rahi mau huru fa’aterera’a hau nā te ao ato’a nei, tē hina’aro nei te Fatu ia tātou « ’ia pāturu ’e ’ia turu i … te mau fa’aterera’a hau tei roto [tātou] e noho ai » (Te Parau Ha’api’ira’a ’e te mau parau fafau 134:5).

Mau ’ohipara’a e nehenehe e rave

• E ani i te mau tamari’i ’ia tāpura i te mau arata’ira’a ’aore rā i te mau ture ’o tā rātou e ha’apa’o ra. E aha te huru o te orara’a mai te mea ē ’aita te ta’ata e ha’apa’o i teie mau ture ? Tai’o Te Parau Ha’api’ira’a ’e te mau Parau Fafau 134:1–2 ’e te mau tamari’i, ma te tauturu ia rātou ’ia māramarama i te mau ta’o ’aore rā te mau pereota ’o tā rātou e ’ore e ta’a ra. Nō te aha te Fatu e hina’aro ai ia tātou ’ia vai te fa’aterera’a hau ’e te mau ture ?

• Pāpa’i i te ta’o ’aore rā te pereota nō roto mai i Te mau Hīro’a Fa’aro’o ’ahuru ma hō’ē ’e te ’ahuru ma piti i ni’a i te hō’ē ’api parau ta’a ’ē. E ’āno’i haere i te mau ’api parau, ’e e ani i te mau tamari’i ’ia ’ohipa ’āmui nō te tu’u i te reira i roto i te ’āna’ira’a ti’a. Nāhea tātou e fa’a’ite ai ē, tē ti’aturi nei tātou i tā teie mau hīro’a fa’aro’o e ha’api’i nei ?

Fa’aitoito i te ’apora’a mai i te fare

Hōro’a i te tamari’i tāta’itahi hō’ē uira’a nō te ui i te hō’ē melo o te ’utuāfare i te fare. ’Ei hi’ora’a, mai te mea ’ua ha’api’i mai ’outou nō ni’a i te tae-piti-ra’a mai o te Fa’aora, e ui atu te hō’ē tamari’i ē, « E aha tā tātou e nehenehe e rave nō te fa’aineine nō te taera’a mai o Iesu ? »

Haʼamaitaʼiraʼa i tā tātou haʼapiʼiraʼa

’A ’imi i te hāro’aro’a i te mau tamari’i i tā ’outou e ha’api’i ra. ’Ua ’ite ’outou i te mau tamari’i tā ’outou e ha’api’i ra. E nehenehe te mau mana’o i roto i teie arata’i e tāuiuihia nō te pāhono maita’i a’e i tō rātou mau hina’aro. Nō te tauturu ia ’outou, ’a hi’o i te mau ’ohipara’a ato’a tei tāpurahia i roto i teie arata’i, ’eiaha noa nō ni’a i te fāito matahiti o te mau tamari’i tā ’outou e ha’api’i ra. (Hi’o Ha’api’ira’a mai tā te Fa’aora, 7.)