kau tāupoʻou poto ʻe toko nimá

Ko e Hāʻele Mai ʻa e Tangata Taʻané, tā fakatātaaʻi ʻe Elizabeth Gibbons

15–21 Nōvema

Tokāteline mo e Ngaahi Fuakava 133–134

“Mou Teuteu ki he Hāʻele Mai ʻa e Tangata Taʻané”

Fakakaukau ki he ngaahi fie maʻu ʻa e fānau ʻokú ke akoʻí—ʻa kinautolu kotoa ʻoku ako mei ʻapí mo kinautolu ʻoku ʻikaí. Te ke lava fēfē ʻo tokoni kiate kinautolu ke nau feakoʻiʻaki e ngaahi meʻa ʻoku nau akó?

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Fakaʻaliʻali ha fakatātā kuó ke fakaʻaongaʻi ʻi ha lēsoni Palaimeli kimuí ni mai, pea fakaafeʻi e fānaú ke vahevahe e meʻa ʻoku nau manatuʻi mei he lēsoní.

fakaʻilonga akoʻí

Akoʻi e Tokāteliné: Fānau Iiki Angé

Tokāteline mo e Ngaahi Fuakava 133:19–21, 25

ʻE toe hāʻele mai ʻa Sīsū Kalaisi.

ʻI he vahe 133, ʻoku fakamatalaʻi ai ʻe he ʻEikí ʻEne Hāʻele ʻAnga Ua Maí mo fakaafeʻi Hono kakaí ke nau teuteu ki he meʻa nāunauʻia ko ʻeni ʻe hokó. Te ke tokoni fēfē nai ki he fānaú ke nau hanganaki atu ki he liuaki mai ʻa e Fakamoʻuí?

Ngaahi ʻEkitivitī ʻe Ala Fakahokó

• Fūfuuʻi ha fakatātā ʻo e Hāʻele ʻAnga Ua Mai ʻa e Fakamoʻuí ʻi mui ʻi ha konga tupenu, ʻo pehē ko ha puipui e konga tupenú (te ke lava ʻo fakaʻaongaʻi e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pe Tohi Fakatātā ʻo e Ongoongoleleí, fika 66). Fakaafeʻi e fānaú ke nau taufetongi hono toho e “puipuí” ki he tafaʻakí ʻo pehē pē ʻoku nau sio ki tuʻa ʻi ha matapā sioʻata. Kole ange ke nau vahevahe e ongo ne nau mei maʻu kapau ne nau sio ki tuʻa he matapā sioʻatá ʻo mamata kia Sīsū ʻoku hāʻele hifo mei he langí. Lau e kupuʻi lea “mou ʻalu atu ke fakafetaulaki kiate ia” (veesi 19), pea tokoni ki he fānaú ke toe lau e kupuʻi leá.

• Fūfuuʻi ʻi lalo ʻi he sea ʻo e leka takitaha ha fakatātā ʻokú ne fakahaaʻi ha meʻa te tau lava ʻo fai ke teuteu ki he Hāʻele ʻAnga Ua Mai ʻa Sīsū Kalaisí (hangē ko hono lau e folofolá, vahevahe e ongoongoleleí, pe tokoniʻi hotau ngaahi fāmilí). Tuku ke kumi ʻe he fānaú e ngaahi fakatātaá, peá ke talanoa fekauʻaki mo e founga ʻe tokoni mai ai hono fakahoko e ngaahi meʻa ko ʻení ke tau mateuteu ke feʻiloaki mo e Fakamoʻuí ʻi Heʻene liuaki maí.

• Hivaʻi fakataha ha foʻi hiva fekauʻaki mo e Hāʻele ʻAnga Ua Maí, hangē ko e “ ʻO Ka Ne Ka Toe Haʻú” (Tohi Hiva ʻa e Fānaú, 46). Vahevahe fekauʻaki mo hoʻo ʻofa ki he Fakamoʻuí pea mo e ngaahi ongo ʻokú ke maʻu fekauʻaki mo ʻEne toe liuaki mai ki he māmaní. Fakaafeʻi e fānaú ke vahevahe foki mo ʻenau ngaahi ongó.

Tokāteline mo e Ngaahi Fuakava 133:52–53

ʻOku manavaʻofa mo angaʻofa ʻa Sīsū Kalaisi.

ʻOku fakamatalaʻi ʻe he ngaahi veesi ko ʻení ha niʻihi ʻo e ngaahi founga lahi kuo fakahaaʻi ai ʻe he ʻEikí ʻEne “loto manavaʻofa” ki Hono kakaí. Ko e hā te ke lava ʻo fai ke tokoni ke ongoʻi ʻe he fānaú e ʻofa ʻoku maʻu ʻe he Fakamoʻuí kiate kinautolú.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻokú ne fakahaaʻi ʻoku manavaʻofa mo angaʻofa ʻa Sīsū (vakai, Tohi Fakatātā ʻo e Ongoongoleleí, fika 42, 47). Kole ki he fānaú ke vahevahe ha ngaahi meʻa kehe kuo fakahoko ʻe Sīsū ke fakahaaʻi ʻEne manavaʻofá mo e angaʻofá. Lau e kupuʻi lea “te nau lau ki he loto manavaʻofa ʻa honau ʻEikí” (veesi 52), pea tokoni ki he fānaú ke nau fakakaukau ki ha ngaahi founga te nau lava ʻo talanoa ai ki he niʻihi kehé fekauʻaki mo e ʻofa ʻa e Fakamoʻuí.

• Hivaʻi ha foʻi hiva fekauʻaki mo e ʻofa ʻa e Fakamoʻuí, hangē ko e “Sīsū Hotau Kaumeʻa ʻOfá” (Tohi Hiva ʻa e Fānaú, 37). Vahevahe hoʻo fakamoʻoni ki he founga kuo fakahaaʻi mai ai ʻe he Fakamoʻuí ʻEne ʻofa kiate koé.

Tokāteline mo e Ngaahi Fuakava 134:5

ʻOku finangalo e ʻEikí ke u talangofua ki he fonó.

ʻOku faʻa ʻi ai maʻu pē ha ngaahi lao ke muimui ki ai e fānau īkí ʻi ʻapi, ʻi he akó pea ʻi he feituʻu kotoa pē. Te ke lava ʻo tokoni ke mahino kiate kinautolu ʻoku finangalo e ʻEikí ke tau muimui he ngaahi fono mo e ngaahi lao ʻo hotau tukui koló mo e fonuá.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakahoko ha foʻi keimi faingofua taʻe ʻi ai ha lao ke nau muimui ai, pea nau toe vaʻinga pē ai kae ʻi ai ha ngaahi lao. ʻOku tokoni fēfē e ngaahi laó kiate kitautolu? Fakahaaʻi hoʻo loto houngaʻia ki he ngaahi lao ʻo e fonuá.

• Tokoni ki he fānaú ke nau toe lau e tefito ʻo e tui hono hongofulu mā uá. Fakamamafaʻi e ngaahi lea hangē ko e “talangofua, fakaʻapaʻapaʻi mo e poupou,” pea talanoa mo e fānaú fekauʻaki mo e ʻuhinga ʻo e ngaahi lea ko iá. Vahevahe mo kinautolu e ʻuhinga ʻoku mahuʻinga ai ke talangofua ki he laó.

fakaʻilonga akoʻí

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 133:4–5, 14–15

ʻOku finangalo e ʻEikí ke u maʻa.

ʻE lava ke tokoni e Tokāteline mo e Ngaahi Fuakava 133 ke mahino ki he fānaú e founga ke tauhi ai kinautolu ke nau maʻa mei he ngaahi tākiekina fakaemāmani ʻi honau ʻātakaí.

Ngaahi ʻEkitivitī ʻe Ala Fakahokó

• Fakaafeʻi e fānaú ke lau e “Pāpilone, Pēpeli” ʻi he Fakahinohino ki he Ngaahi Folofolá (scriptures.ChurchofJesusChrist.org) ke ʻiloʻi pe ko e hā ʻa e Papilone pea ko e hā ʻokú ne fakafofongaʻí. Lau fakataha leva e Tokāteline mo e Ngaahi Fuakava 133:4–5, 14–15. Ko e ʻuhinga ki he hā ʻa e “ʻalu atu mei Pāpilone”? (veesi 5). Ko e fē ha ngaahi feituʻu mo ha ngaahi tūkunga ʻoku finangalo e ʻEikí ke tau fakamamaʻo mei ai? Ko e hā te tau lava ʻo fai ke fakaʻehiʻehi mei aí?

• Fokotuʻu ha fakaʻilonga ʻi ha taha ʻo e ongo tafaʻaki ʻo e lokí ʻoku pehē “Saione,” pea fokotuʻu ha fakaʻilonga he tafaʻaki ʻe tahá ʻoku pehē “Pāpilone.” To hi ʻi ha ʻū laʻipepa iiki ha ngaahi foʻi lea mei he Tokāteline mo e Ngaahi Fuakava133:4–5, 14–15 ʻokú ne fakamatalaʻi ʻa Saione pe ko Pāpilone (hangē ko e “fai angahalá,” “maʻa,” pe “fakaʻauhá”), pea fakaafeʻi e fānaú ke tuku e laʻipepa takitaha ʻi lalo he fakaʻilonga totonú.

Tokāteline mo e Ngaahi Fuakava 133:19–25, 46–52

ʻE pule ʻa Sīsū ʻi he māmaní.

Naʻe pehē ʻe ʻEletā D. Toti Kulisitofasoni, “ʻOku fuʻu mahuʻinga ʻaupito ke teuteuʻi ʻa e māmaní ki he Hāʻele ʻAnga Ua Mai ʻa e ʻEiki ko Sīsū Kalaisí” (“Teuteu ki he Toe Hāʻele Mai ʻa e ʻEikí,” Ensign pe Liahona, Mē 2019, 81). Te ke tokoni fēfē nai ke mahino ki he fānaú e founga ʻe lava ke nau kau ai ʻi he ngāue mahuʻingá ni?

Ngaahi ʻEkitivitī ʻe Ala Fakahokó

• Fakaʻaliʻali e fakatātā mei he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau hiki ha lisi ʻo e ngaahi meʻa ʻoku nau ʻilo fekauʻaki mo e Hāʻele ʻAnga Ua Mai ʻa Sīsū Kalaisí. Fakaʻaongaʻi leva e Tokāteline mo e Ngaahi Fuakava 133:19–25, 46–52, fakaafeʻi kinautolu ke tānaki ha ngaahi meʻa ki heʻenau lisí. Vahevahe hoʻo fakamoʻoní, ʻe hoko e Hāʻele ʻAnga Ua Maí ko ha ʻaho fakafiefia ki he kau māʻoniʻoní.

• Ke tokoni ke mahino ki he fānaú e veesi 19, talanoa kiate kinautolu fekauʻaki mo e founga ʻe ala teuteu ai ha taʻahine mali ki heʻene malí (mahalo ʻe lava ke tokoni ha tokotaha ne toki mali ʻi he fepōtalanoaʻaki ko ʻení). ʻOku tau fēfē nai ʻetau hangē ko ha taʻahine teu mali ʻoku teuteu “ki he hāʻele mai ʻa e Tangata Taʻane,” ko Sīsū Kalaisí? Kapau ʻokú ke pehē ʻe ʻaonga, toe vakaiʻi mo e fānaú e talanoa fakatātā ʻo e kau tāupoʻou ʻe toko hongofulú (vakai, Mātiu 25:1–13). Ko e hā ʻoku mahuʻinga ai ke tau teuteu ki he Hāʻele ʻAnga Ua Mai ʻa e Fakamoʻuí? Ko e hā te tau lava ʻo fai he taimí ni ke tau teuteu aí?

Tokāteline mo e Ngaahi Fuakava 134:1–2

ʻOku finangalo e ʻEikí ke u talangofua ki he laó.

Neongo ʻoku ʻi ai ha ngaahi faʻunga kehekehe ʻo e puleʻangá ʻi he funga ʻo e māmaní, ʻoku finangalo e Tamai Hēvaní ke tau “tauhi mo poupouʻi ʻa e ngaahi puleʻanga takitaha ʻa ia ʻoku [tau] nofo aí” (Tokāteline mo e Ngaahi Fuakava 134:5).

Ngaahi ʻEkitivitī ʻe Ala Fakahokó

• Fakaafeʻi e fānaú ke lisi e ngaahi tuʻutuʻuni mo e ngaahi lao ʻoku nau talangofua ki aí. ʻE mei fēfē nai e moʻuí kapau ne ʻikai talangofua ha taha ia ki he ngaahi lao ko ʻení? Lau mo e fānaú e Tokāteline mo e Ngaahi Fuakava 134:1–2, tokoni ke mahino kiate kinautolu ha ngaahi lea pe pe ngaahi kupuʻi lea ʻe ngali taʻemahino. Ko e hā ʻoku finangalo ai e ʻEikí ke ʻi ai hotau ngaahi puleʻanga mo ha ngaahi laó?

• Hiki e foʻi lea pe kupuʻi lea takitaha mei he tefito ʻo e tui hongofulu mā taha mo e hongofulu mā uá ʻi ha laʻipepa makehe. Tuifio e ʻū laʻipepá, pea kole ange ki he fānaú ke nau ngāue fakataha ke fokotuʻutuʻu kinautolu ki honau hokohoko totonú. ʻOku tau fakahaaʻi fēfē ʻoku tau tui ki he meʻa ʻoku akoʻi ʻe he ngaahi tefito ʻo e tui ko ʻení?

fakaʻilonga akó

Poupouʻi e Ako ʻi ʻApí

ʻOange ki he kiʻi tamasiʻi/taʻahine takitaha ha fehuʻi ke ne ʻeke ki ha mēmipa ʻo e fāmilí ʻi ʻapi. Hangē ko ʻení, kapau ne mou ako fekauʻaki mo e Hāʻele ʻAnga Ua Mai ʻa e Fakamoʻuí, ʻe lava ke fehuʻi ʻe ha kiʻi tamasiʻi/taʻahiné, “Ko e hā te tau lava ʻo fai ke teuteu ki he toe hāʻele mai ʻa Sīsuú?”

Fakatupulaki ʻEtau Akoʻí

Feinga ke mahino kiate koe ʻa e fānau ʻokú ke akoʻí. ʻOkú ke ʻiloʻi e fānau ʻokú ke akoʻí. Mahalo naʻa fie maʻu ke fulihi e ngaahi fakakaukau ʻi he lēsoni ko ʻení ke lava ʻo feau lelei ʻenau ngaahi fie maʻu. Ke tokoni atú, vakai ki he ngaahi ʻekitivitī kotoa pē naʻe lisi ʻi he fokotuʻutuʻu lēsoni ko ʻení, kae ʻikai ko e ngaahi ʻekitivitī pē ki he toʻu ʻo e fānau ʻokú ke akoʻí. (Vakai, Ko e Faiako ʻi he Founga ʻa e Fakamoʻuí,7

peesi ʻekitivitií: ʻoku finangalo e ʻEikí ke u talangofua ki he laó