Kitautolu mo Kinautolu pea mo Kinautolu mo Kitautolu, tā fakatātaaʻi ʻe Caitlin Connolly

1–7 Nōvema

Tokāteline mo e Ngaahi Fuakava 125–128

“Ko ha Leʻo ʻo e Fiefia ki he Kakai Moʻuí pea mo e Kau Pekiá”

Kapau ʻokú ke akoʻi e fānau iiki angé pea fie maʻu ha toe tokoni, vakai ki he “Ko Hono Feau e Ngaahi Fie Maʻu ʻa e Fānau Iiki Angé” ʻi he kamataʻanga ʻo e maʻuʻanga tokoni ko ʻení.

Lekooti Hoʻo Ngaahi Ongó

Fakaafeʻi e Feʻinasiʻakí

Tokoni ki he fānaú ke nau fakakaukau ki ha meʻa ne nau ako ʻi he uike ko ʻení ʻi ʻapi pe ʻi he Palaimelí. ʻOange kiate kinautolu ha ngaahi miniti siʻi ke tā ha fakatātā ʻo e meʻa ʻoku nau fakakaukau ki aí pea vahevahe ia mo e kalasí.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 126:3

ʻOku ou ʻofa ʻi hoku fāmilí.

Hili e foki ʻa Pilikihami ʻIongi ki ʻapi mei hono malanga ʻaki e ongoongoleleí, ne folofola ange e ʻEikí ke tāfataha ki hono tokangaʻi hono fāmilí.

Ngaahi ʻEkitivitī ʻe Ala Fakahokó

• Vahevahe mo e fānaú e fakamatala fekauʻaki mo Pilikihami ʻIongi ʻi he “Vahe 49: Ko e Kāingalotu ʻi Nāvuú” (Ngaahi Talanoa ʻo e Tokāteline mo e Ngaahi Fuakava, 184), pe fakanounouʻi e Tokāteline mo e Ngaahi Fuakava 126 ʻi he lea pē ʻaʻau. Lau leva ki he fānaú e Tokāteline mo e Ngaahi Fuakava 126:3 ʻo fakamamafaʻi e kupuʻi lea “tokangaʻi makehe ʻa ho fāmilí.” Ko e ʻuhinga ki he hā ke tokangaʻi makehe hotau ngaahi fāmilí? Tokoni ki he fānaú ke nau fakakaukau ki he ngaahi founga te nau lava ʻo fakahaaʻi ai ʻenau ʻofá ki he kau mēmipa honau fāmilí.

• Kimuʻa he kalasí, fakaafeʻi e fānaú ke nau ʻomi ha fakatātā honau fāmilí (pe kole kiate kinautolu ke tā ha ngaahi fakatātā). Kole ange leva kiate kinautolu ke vahevahe ha meʻa ʻoku nau saiʻia ai fekauʻaki mo honau fāmilí. Vahevahe ha tā ʻo ho fāmilí, pea fakahoko e meʻa tatau. Fakamatalaʻi e ʻuhinga ʻoku finangalo ai e Tamai Hēvaní ke tau tokanga ki he kau mēmipa hotau fāmilí. Hivaʻi ha foʻi hiva ʻokú ne akoʻi e foʻi moʻoni ko ʻení, hangē ko e “ ʻI Heʻetau Tokoní” (Tohi Hiva ʻa e Fānaú, 108).

Tokāteline mo e Ngaahi Fuakava 128:5, 12

ʻOku fie maʻu ʻe he fānau kotoa ʻa e ʻOtuá ʻa e faingamālie ke papitaiso kinautolú.

Makehe mei hono tokoniʻi e fānaú ke nau teuteu ke fakahoko ʻenau ngaahi fuakava ʻi he papitaisó, akoʻi ange te tau lava ʻo tokoniʻi kinautolu kuo mate teʻeki papitaisó ke nau maʻu e ngaahi tāpuaki tatau.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo hono papitaiso ʻo Sīsū Kalaisí (vakai, Tohi Fakatātā ʻo e Ongoongoleleí, fika 35). ʻEke ki he fānaú pe kuo nau sio hano papitaiso ha taha. Ko e hā ʻoku nau manatuʻi mei aí? Fakaʻaongaʻi e fakatātaá pe foʻi vitioó ke fakahaaʻi ki he fānaú ʻi he taimi ʻoku tau papitaiso aí, ʻoku tau puli kakato hifo ʻi he vaí pea tau toe tuʻu hake, hangē tofu pē ko ia ne fai ʻe Sīsuú. ʻAlu ki he Tokāteline mo e Ngaahi Fuakava 128:12, pea fakamatalaʻi ange naʻe akoʻi ʻe Siosefa Sāmita ʻoku fakamanatu mai ʻe he papitaisó ʻa e Toetuʻú kkiate kitautolu.

• Talanoa ki he fānaú fekauʻaki mo ha taha ʻokú ke ʻilo (hangē ko haʻo kui) ne mate teʻeki papitaiso. Lau e Tokāteline mo e Ngaahi Fuakava 128:5, pea tuku ke nau taufetongi hono puke hake ha fakatātā ʻo ha faiʻanga papi ʻi he temipalé (vakai, fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakamoʻoni ange ʻoku fakaʻatā kitautolu ʻe he Tamai Hēvaní ke papitaiso ʻi he māmaní maʻá e kakai kuo pekiá. ʻI he foungá ni ʻe lava ke papitaiso kotoa ai e fānau ʻa e ʻOtuá mo fakahoko ha ngaahi fuakava mo Ia.

Tokāteline mo e Ngaahi Fuakava 128:18

ʻOku finangalo e Tamai Hēvaní ke u ako fekauʻaki mo hoku hisitōlia fakafāmilí.

ʻOku ʻi ai ha fanga kiʻi founga faingofua ʻe lava ke kau ai e fānau īkí ʻi he ngāue hisitōlia fakafāmilí. Tokoniʻi kinautolu ke nau ongoʻi ha ʻofa maʻá e kakai ʻi heʻenau ʻakau fakafāmilí.

Ngaahi ʻEkitivitī ʻe Ala Fakahokó

• Faʻu ha sēini laʻipepa ʻo e ngaahi hingoa ʻo e kakai ʻi ho fāmilí (vakai ki he fokotuʻutuʻu ʻi he peesi ʻekitivitī ʻo e uike ní), pea ʻomi ia ke fakaʻaliʻali ki he kalasí. Fakamatalaʻi ha ngaahi meʻa ʻe niʻihi fekauʻaki mo e kakai ʻi hoʻo seiní. Lau ki he fānaú mei he Tokāteline mo e Ngaahi Fuakava 128:18, pea fakamatalaʻi ange naʻe akoʻi ʻe Siosefa Sāmita “[ʻoku] ʻi ai ha fehokotakiʻanga mālohi … ʻi he vahaʻa ʻo e ngaahi tamaí mo e fānaú.” Tokoni ki he fānaú ke faʻu haʻanau seini fakafāmilí, pea fakaafeʻi kinautolu ke nau ō mo ia ki ʻapi pea ʻai ke tokoniʻi kinautolu ʻe heʻenau mātuʻá ʻi hono tānaki atu ha ngaahi hingoa ʻo e ngaahi kuí.

• Kole ki he fānaú ke vahevahe ha meʻa fekauʻaki mo ha taha ʻo ʻenau ngaahi kuí. Fai ha taha ʻo e ngaahi talanoa ʻokú ke manako taha ai fekauʻaki mo hoʻo mātuʻá pe ngaahi kuí. Fakaʻaliʻali ha ngaahi fakatātā kapau ʻe lava. Poupouʻi e fānaú ke nau ako lahi ange fekauʻaki mo ʻenau ngaahi kuí mo e ngaahi kui kehé.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 126

Te u lava ʻo tokoni ke tokangaʻi hoku fāmilí.

Te ke lava fēfē ʻo tokoni ki he fānau ʻokú ke akoʻí ke nau fakahoko ha ngāue tokoni maʻá e kau mēmipa honau fāmilí ʻi ha ngaahi founga mahuʻingamālie?

Ngaahi ʻEkitivitī ʻe Ala Fakahokó

• Lau fakataha e Tokāteline mo e Ngaahi Fuakava 126:3. Ko e hā nai e ʻuhinga ne kole ai e Tamai Hēvaní kia Pilikihami ʻIongi ke “tokangaʻi makehe ʻa [hono] fāmilí”? Te tau lava fēfē ʻo fakahoko e meʻa tatau maʻa hotau ngaahi fāmilí? ʻAi ha lisi ʻo e ngaahi meʻa te tau lava ʻo fai he taimí ni ke tokoniʻi hotau ngaahi fāmilí. ʻE tokoniʻi fēfē kitautolu ʻe hono fakahoko e ngaahi meʻa ko ʻení ke tau hangē ange ai ko e Tamai Hēvaní?

• Vahevahe mo e fānaú e talanoa ʻo Sisitā Kalo M. Sitīveni fekauʻaki mo hono mokopuna tangata ko Polotá (vakai, “ ʻOku ʻi Ai ha ʻUhinga Maʻongoʻonga ke Tau Fiefia Ai,” Ensign pe Liahona, Nōvema 2013, 115). Ko e hā naʻe fai ʻe Polota ke tokangaʻi hono fāmilí? Te tau muimui fēfē ki heʻene tā sīpingá?

Tokāteline mo e Ngaahi Fuakava 128:1, 15–18

ʻOku foʻu ʻe he papitaiso maʻá e pekiá “ha fehokotakiʻanga mālohi” ʻi hoku vahaʻá mo ʻeku ngaahi kuí.

Naʻe akoʻi ʻe Siosefa Sāmita ʻoku haʻi kitautolu ʻe he papitaiso maʻá e pekiá ki heʻetau ngaahi kuí ʻo hangē ko e fehokotaki ʻa ha sēiní. Te ke tokoni fēfē nai ki he fānáu ke nau ongoʻi e fiefia ʻoku maʻu mei he ako fekauʻaki mo ʻetau ngaahi kuí pea mo hono fakapapauʻi ʻoku fakahoko e ngāue fakatemipalé maʻanautolu?

Ngaahi ʻEkitivitī ʻe Ala Fakahokó

• Vahevahe e kalasí ki ha kulupu ʻe ua, pea kole ange ki he ʻuluaki kulupú ke nau lau e Tokāteline mo e Ngaahi Fuakava 128:1 ke ʻiloʻi pe ko e hā ne moʻua ki ai e fakakaukau ʻa Siosefa Sāmitá. Kole ki he kulupu ʻe tahá ke nau lau e veesi 17 pea kumi pe ko e hā e kaveinga naʻá ne pehē ʻoku “fakaʻofoʻofa tahá.” Tuku ke nau vahevahe e meʻa ʻoku nau maʻú, pea talanoa fekauʻaki mo e ʻuhinga ʻoku nāunauʻia ai e tefito ko ʻení. Kapau ʻe lava, fakaafeʻi ha toʻu tupu kuó ne fakahoko e papitaiso maʻá e pekiá ke ne vahevahe ʻene aʻusiá mo fakamatalaʻi e ʻuhinga ʻoku tau fai ai e ngāue ko ʻení.

• Fakakaukau ke fakaʻaongaʻi ha lēsoni fakataumuʻa ke fakahaaʻi ʻoku fie maʻu ke tau tokoni ki heʻetau ngaahi kui ne teʻeki papitaisó. Hangē ko ʻení, fakaʻaliʻali ha meʻaʻofa pe ko ha meʻa lelei, ka ke tuku ia ʻi ha feituʻu he ʻikai aʻu ki ai ha taha ʻo e fānaú. Talaange ki he kiʻi tamasiʻi/taʻahine ko iá ʻe lava ke ne maʻu e meʻá ka he ʻikai lava ʻo ʻunu mei hono nofoʻangá. ʻEke ki he fānau kehé pe ko e hā te nau lava ʻo fakahoko ke tokoni ki he kiʻi tamasiʻí /taʻahiné ke ne maʻu iá. Lau fakataha e Tokāteline mo e Ngaahi Fuakava 128:15, pea talanoa fekauʻaki mo ʻene felāveʻi mo e lēsoni fakataumuʻá.

• Fakaafeʻi e fānaú ke nau faʻu ha seini pepa ʻaki e ngaahi hingoa ʻenau mātuʻá, ngaahi kuí, kui uá, pea fai pehē atu ai (vakai ki he peesi ʻekitivitī ki he lēsoni ko ʻení). Kapau ʻoku ʻikai ʻilo ʻe he fānaú e ngaahi hingoa ʻenau ngaahi kuí, poupouʻi kinautolu ke nau fekumi ki he ngaahi hingoá pea hiki kinautolu ʻi he sēini ʻi ʻapí. Lau fakataha e Tokāteline mo e Ngaahi Fuakava 128:18 ke iloʻi pe ko e hā ʻa e “fehokotakiʻanga mālohi” ʻokú ne ʻai hotau hisitōlia fakafāmilí ke “kakato mo fakakātoá.” Fakahoko ha talanoa fekauʻaki mo haʻo kui ʻoku tokoni atu ke ke ongoʻi ha fehokotaki kiate ia. .

• Fakaʻaliʻali ki he fānaú ha lekomeni temipale, pea talaange kiate kinautolu e founga naʻá ke maʻu ai iá. Tokoni kiate kinautolu ke nau ʻamanaki atu ki hano maʻu ʻenau lekomeni temipalé ke nau lava ʻo ʻalu ki he temipalé pea papitaiso maʻa ʻenau ngaahi kuí.

  

  Te tau lava ʻo kumi e ngaahi hingoa ʻo ʻetau ngaahi kuí pea fakahoko e ngaahi ouau fakatemipalé maʻanautolu.

Poupouʻi e Ako ʻi ʻApí

Fakaafeʻi e fānaú ke nau kole ki ha tokotaha ʻi ʻapi ke tokoniʻi kinautolu ke nau ako lahi ange fekauʻaki mo honau hisitōlia fakafāmilí. Te nau lava ʻo kole ke fanongo ki ha ngaahi talanoa fekauʻaki mo haʻanau kui pe fakaʻaongaʻi e FamilySearch.org ke kumi ʻaki e ngaahi hingoa ʻo ʻenau ngaahi kui ʻoku teʻeki papitaisó.

Fakatupulaki ʻo ʻEtau Founga Akoʻí

Tokoni ki he fānaú ke fakahaaʻi ʻenau mohu foungá. ʻI he taimi ʻoku langa, tā pe valivali ai ʻe he fānaú ha meʻa ʻoku felāveʻi mo e talanoá pe tefitoʻi moʻoni ʻoku nau akó, ʻoku nau faʻa manatuʻi lelei ange ia ai. Te nau lava foki ʻo fakaʻaongaʻi e meʻa ʻoku nau faʻú ke akoʻi ʻaki e niʻihi kehé. (Vakai Ko e Faiako ʻi he Founga ʻa e Fakamoʻuí,25