“25–31 ʻOkatopa. Tokāteline mo e Ngaahi Fuakava 124–125: ‘Ha Fale ki Hoku Hingoá,’” Haʻu, ʻo Muimui ʻIate Au—Maʻá e Palaimelí: Tokāteline mo e Ngaahi Fuakava 2021 (2020)
“25–31 ʻOkatopa. Tokāteline mo e Ngaahi Fuakava 124–125,” Haʻu, ʻo Muimui ʻIate Au—Maʻá e Palaimelí: 2021
Nāvū ko e Fakaʻofoʻofá, tā fakatātaaʻi ʻe Larry Winborg
25–31 ʻOkatopa
Tokāteline mo e Ngaahi Fuakava 124–125
“Ha Fale ki Hoku Hingoá”
Ko e hā ha ngaahi lēsoni ʻoku fie maʻu ke ako ʻe he fānaú mei he Tokāteline mo e Ngaahi Fuakava 124–25 ? Fakalaulauloto ki he fehuʻi ko ʻení ʻi hoʻo ako he uike ní.
Lekooti Hoʻo Ngaahi Ongó
Fakaafeʻi e Feʻinasiʻakí
Fakaʻaliʻali ha fakatātā ʻo e temipale ofi taha atu kiate kimoutolú. ʻEke ki he fānaú pe ko e hā ʻoku nau ʻilo fekauʻaki mo e ngaahi temipalé. Tuku ke nau vahevahe ʻenau ngaahi ongo fekauʻaki mo e ʻalu ʻi ha ʻaho ki he temipalé.
Akoʻi e Tokāteliné: Fānau Iiki Angé
Tokāteline mo e Ngaahi Fuakava 124:15, 20
ʻOku fiefia ʻa Sīsū ʻi heʻeku feinga ke fai leleí.
ʻI he fakahā ʻoku lekooti ʻi he vahe 124, naʻe fakahaaʻi ai ʻe he ʻEikí ʻEne hōifua kia Hailame Sāmita mo Siaosi Mila koeʻuhí ne na faifeinga ke muimui kiate Ia. Te ke tokoni fēfē ki he fānaú ke nau ʻiloʻi ʻoku hōifua mai e ʻEikí ʻi he taimi ʻoku nau feinga ai ke fai leleí?
Ngaahi ʻEkitivitī ʻe Ala Fakahokó
-
Tokoni ki he fānaú ke nau fakakaukau ki ha ngaahi meʻa te nau lava ʻo fai ʻa ia ʻoku lelei. Fakaʻaliʻali ha ngaahi fakatātā ke ʻoange kiate kinautolu ha ngaahi fakakaukau (te ke lava ʻo maʻu ha niʻihi ʻi he Tohi Fakatātā ʻo e Ongoongoleleí pe ngaahi makasini ʻa e Siasí). Kole ki he fānaú ke nau tuhu ki he ngaahi meʻa lelei ko ʻení. Lau ki he fānaú e Tokāteline mo e Ngaahi Fuakava 124:15, pea kole ange ke nau fakafanongo ki he finangalo ʻo e ʻEikí ʻi he taimi naʻe fili ai ʻa Hailame Sāmita ke fai leleí. Ko e hā ʻa e ongo ʻoku maʻu ʻe Sīsū ʻi he taimi ʻoku tau feinga ai ke fai ha ngaahi meʻa leleí?
-
ʻOange ki he fānaú ha ngaahi foʻi haati pepa, pea kole ange ke nau tā ha ngaahi fakatātā ʻo kinautolu pē ʻoku nau fakahoko ha ngaahi meʻa lelei. Fakaafeʻi kinautolu ke vahevahe mo e kalasí e meʻa ne nau taá. ʻOku tau ongoʻi fēfē ʻi heʻetau fai ha meʻa ʻoku leleí? Fakamoʻoni ʻoku fiefia ʻa Sīsū ʻi he taimi ʻoku tau feinga ai ke fai e meʻa ʻoku totonú.
-
Hivaʻi ha foʻi hiva fekauʻaki mo hono fai e ngaahi meʻa ʻoku finangalo ʻa Sīsū ke tau faí, hangē ko e “Fiemaʻu Au ʻe Sīsū Ke u Ulo Hangē ko ha Hueló” (Tohi Hiva ʻa e Fānaú, 38).
Tokāteline mo e Ngaahi Fuakava 124:28–29, 39
ʻOku fekauʻi ʻe Sīsū ʻa Hono kakaí ke nau langa ha ngaahi temipale.
Kuo hoko maʻu pē e ngaahi temipalé ko ha konga ʻo e palani ʻa e Tamai Hēvaní maʻa ʻEne fānaú. ʻE tokoni e mahino ko ʻení ki he fānau ʻokú ke akoʻí ke nau fakaʻapaʻapaʻi lahi ange e temipalé.
Ngaahi ʻEkitivitī ʻe Ala Fakahokó
-
Tokoni ke mahino ki he fānaú ʻi he taimi ne maʻu ai ʻe he Kāingalotú ha nofoʻanga foʻou ʻi Nāvuú, ne fekauʻi kinautolu ʻe he ʻEikí ke nau langa ha temipale (vakai, “Vahe 49: Ko e Kāingalotu ʻi Nāvuú” Ngaahi Talanoa ʻo e Tokāteline mo e Ngaahi Fuakavá, 183–84, pe ko e vitiō fekauʻaki mo iá ʻi he ChurchofJesusChrist.org). Fakaafeʻi e fānaú ke pehē pē ʻoku nau langa ha temipale.
-
Lau e kupuʻi lea ko ʻení mo e fānaú: “Hoku fale tapú, ʻa ia ʻoku fekau maʻu ai pē ki hoku kakaí ke nau langa ki hoku hingoa toputapú” (Tokāteline mo e Ngaahi Fuakava 124:39). ʻAi ke puke ʻe he fānaú ha fakatātā ʻo ha tempale he kuonga muʻá (vakai, Tohi Fakatātā ʻo e Ongoongoleleí, fika 52 pe peesi ʻekitivitī ʻo e uike ní) mo ha fakatātā ʻo ha temipale ʻi homou feituʻú. Fakamatalaʻi ange kuo fekauʻi maʻu pē ʻe he Tamai Hēvaní mo Sīsū Kalaisi Hona kakaí ke langa ha ngaahi temipale—ʻi he kuonga muʻá pea ʻi hotau kuongá. Vahevahe ha ngaahi foʻi lea pe kupuʻi lea mei he Tokāteline mo e Ngaahi Fuakava 124:28–29 ke tokoni ke mahino ki he fānaú e ʻuhinga ʻoku finangalo ai e ʻEikí ke tau langa ha ngaahi temipalé.
-
Fakaafeʻi e fānaú ke nau fakakakato e peesi ʻekitivitī ʻo e uike ní ke tokoni ke mahino kiate kinautolu ko e kakai kitautolu ʻa e ʻOtuá pea kuo fekauʻi maʻu pē e kakai ʻa e ʻOtuá ke nau langa ha ngaahi temipale.
Akoʻi e Tokāteliné: Fānau Lalahi Angé
Tokāteline mo e Ngaahi Fuakava 124:12–21
ʻOku hoifua mai e ʻEikí ʻi he taimi ʻoku ou moʻui faivelenga aí.
Naʻe fakahikihikiʻi ʻe he ʻEikí ʻi he vahe 124, ha Kāingalotu ʻe niʻihi ʻi heʻenau faivelengá. ʻE lava ke tokoni ʻEne ngaahi leá ki he fānaú ke nau ʻilo e ngaahi ʻulungaanga ʻoku totonu ke nau fakatupulakí.
Ngaahi ʻEkitivitī ʻe Ala Fakahokó
-
Fili ha ngaahi ʻulungaanga lelei ʻe niʻihi ʻoku ʻasi ʻi he Tokāteline mo e Ngaahi Fuakava 124:12–21, pea hiki takai kinautolu ʻi ha fakatātā ʻo e Fakamoʻuí ʻi he palakipoé. Kole ki he fānaú ke nau fekumi ki he ngaahi lea ko ʻení ʻi he veesi 12–21. Tokoni ke mahino kiate kinautolu e ngaahi lea ʻoku ngalingali ʻoku ʻikai ke nau maheni mo iá. Fakatatau mo e ngaahi veesi ko ʻení, ʻoku hōifua fēfē e ʻEikí ki he kakai ʻoku nau fakatupulaki e ngaahi ʻulungaanga ko ʻení?
Tokāteline mo e Ngaahi Fuakava 124:28–30, 38–41
ʻOku fekauʻi ʻe Sīsū Hono kakaí ke nau langa ha ngaahi temipale.
ʻE vavé ni pē ha fuʻu lahi feʻunga ʻa e fānau ʻokú ke akoʻí ke nau ʻalu ki he temipalé mo kau ʻi he ngaahi ouau ʻo e temipalé. Ko e hā te ke lava ʻo fai ke tokoniʻi ai kinautolu ke nau mateuteú?
Ngaahi ʻEkitivitī ʻe Ala Fakahokó
-
Kofukofuʻi ha fakatātā pe tā fakatātā ʻo ha temipale. Fakaafeʻi e fānaú ke nau lau e Tokāteline mo e Ngaahi Fuakava 124:38–41 ki ha ngaahi tokoni fekauʻaki mo e meʻa ʻi he fakatātaá. Tuku ke toʻo ʻe he fānaú e kofukofu ʻo e fakatātaá pea aleaʻi e meʻa ʻoku akoʻi ʻe he ngaahi veesi ko ʻení fekauʻaki mo e ʻuhinga ʻoku finangalo ai e ʻEikí ke tau langa ha ngaahi temipalé.
-
Fakaafeʻi e fānaú ke nau lau e Tokāteline mo e Ngaahi Fuakava 124:28–30 ʻo kumi ha ngaahi ʻuhinga ne ʻoange ʻe he ʻEikí kia Siosefa ki hono langa ʻo e Temipale Nāvuú. Vahevahe hoʻo ongo fekauʻaki mo e temipalé mo ha faʻahinga aʻusia pē kuó ke maʻu ʻi hono fakahoko ʻo e papitaiso maʻá e pekiá. Tokoni ki he fānaú ke nau fakafuofuaʻi e vahaʻataimi pea nau toki taʻu motuʻa feʻunga ai ke fakahoko e ngaahi papitaiso maʻá e pekiá ʻi he temipalé.
-
Kapau ʻoku ʻi ai haʻo lekomeni temipale, fakaʻaliʻali ange ia ki he fānaú, pe fakaafeʻi ha toʻu tupu ʻi he uōtí ke fakaʻaliʻali ki he fānaú ʻene lekomení. Talaange ki he fānaú e ʻuhinga ʻoku mahuʻinga ai ha lekomeni temipalé pea mo e meʻa ʻoku fie maʻu ke tau fai ke maʻu ai ha lekomení. Poupouʻi kinautolu ke nau kamata teuteu leva he taimí ni ke maʻu ʻenau lekomení.
ʻĪmisiSiosefa Sāmita mo ha kau tangata ʻi hono langa ʻo e Temipale NāvuúSiosefa Sāmita ʻi he Temipale Nāvuú, tā fakatātaaʻi ʻe Gary E. Smith
Tokāteline mo e Ngaahi Fuakava 124:91–92
ʻE lava ke ʻomi ʻe ha tāpuaki fakapēteliake ha tataki fakalaumālie kiate au.
Kapau kuó ke maʻu ha tāpuaki fakapēteliake, toe vakaiʻi ia kimuʻa pea akoʻi e fānaú fekauʻaki mo e ngaahi tāpuaki ko ʻení. Ko e hā ʻokú ke houngaʻia ai ʻi ho tāpuaki fakapēteliaké? Te ke ueʻi fakalaumālie fēfē nai e fānaú ke teuteu ke maʻu honau tāpuaki fakapēteliaké?
Ngaahi ʻEkitivitī ʻe Ala Fakahokó
-
Fakaafeʻi ha tokotaha ke ne lau e Tokāteline mo e Ngaahi Fuakava 124:91–92, pea fakaafeʻi e kalasí ke nau fakafanongo ki he meʻa naʻe ui ʻe he ʻEikí ʻa Hailame Sāmita ke ne faí. Ko e hā ʻoku ʻilo ʻe he fānaú fekauʻaki mo e ngaahi tāpuaki fakapēteliaké? Kapau kuó ke maʻu ha tāpuaki fakapēteliake, fakaʻaliʻali ki he fānaú hono fōtungá. (Manatuʻi ʻoku toputapu e kanotohi hoʻo tāpuaki fakapēteliaké.) Fakamatalaʻi ange ko e ngaahi tāpuaki fakapēteliaké ko ha ngaahi tāpuaki makehe ia ʻoku tau maʻu mei he pēteliaké. ʻE lava ke tokoniʻi kitautolu ʻe he ngaahi tāpuaki ko ʻení ke tau ako lahi ange fekauʻaki mo kitautolu mo e meʻa ʻoku fie maʻu ʻe he Tamai Hēvaní ke tau faí.
-
ʻE lava ke ke fakaafeʻi ha mātuʻa pe tokoua/tuongaʻane/tuofefine ʻo ha taha ʻo e fānau ʻokú ke akoʻí ke ne vahevahe mo e kalasí e ʻuhinga ʻoku houngaʻia ai ʻi hono tāpuaki fakapēteliaké. Kole ange ke nau vahevahe e founga ne nau fakapapauʻi ai ʻoku nau loto ke maʻu honau tāpuakí. Fakahoko hoʻo fakamoʻoni kau ki he ngaahi tāpuaki fakapēteliaké.
Poupouʻi e Ako ʻi ʻApí
Fakaafeʻi e fānaú ke vahevahe mo ha mēmipa ʻo e fāmilí ha meʻa ʻe taha ne nau ako fekauʻaki mo e ngaahi temipalé pea mo e ʻuhinga ʻoku nau fie ʻalu ai ki he temipalé ʻi ha ʻahó.
Fakatupulaki ʻo ʻEtau Akoʻí
ʻOku lava pē ke ʻiloʻi ʻe he fānaú ʻa e ivi tākiekina ʻo e Laumālié. Akoʻi e fānaú ʻoku haʻu mei he Laumālie Māʻoniʻoní ʻa e ongo ʻo e nongá, ʻofá, mo e fiefia ʻoku nau maʻu ʻi he taimi ʻoku nau talanoa pe hiva ai kau kia Sīsū Kalaisi mo ʻEne ongoongoleleí. ʻE lava ʻe he ngaahi ongo ko ʻení ʻo langaki ʻenau ngaahi fakamoʻoní.