4–10 ʻOkatopa

Tokāteline mo e Ngaahi Fuakava 111–114

“Te u Fakamaau ʻa e Ngaahi Meʻa Kotoa Pē Koeʻuhi ko Hoʻomou Leleí”xxxxx

Naʻe akoʻi ʻe Sisitā Siulolo A. ʻEsipilano, ko ha tokoni ki muʻa ʻi he Kau Palesitenisī Lahi ʻo e Palaimelí, ʻoku totonu ke tau “[tokoni ki heʻetau] fānaú ke fakatō ki honau lotó ʻa e tokāteliné ʻi ha founga te nau moʻui ʻaki pea hā ʻi heʻenau ngaahi fakakaukaú mo e tōʻongá ʻi heʻenau moʻuí kotoa” (“Ko Hono Akoʻi ke Mahino ki Heʻetau Fānaú,” Ensign pe Liahona, Mē 2012, 10).

Lekooti Hoʻo Ngaahi Ongó

Fakaafeʻi e Feʻinasiʻakí

ʻOmi ha ngaahi meʻa kehekehe ʻoku felāveʻi mo ha meʻa mei ha lēsoni kimuʻa ke tokoniʻi e fānaú ke nau vahevahe. Tuku ke nau talanoa fekauʻaki mo e meʻa ʻoku fakamanatu ange ʻe he meʻa takitaha.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 111:2, 10–11

ʻE lava ke hoko e ngaahi meʻa ʻa e ʻOtuá ko ha koloa mahuʻinga kiate au.

ʻI he taimi ʻoku fakakaukau ai e fānaú ki he foʻi lea ko e koloa, ʻe lava ke nau fakakaukauloto ki ha ngaahi meʻa kehe mei he koloa ʻoku ʻasi ʻi he Tokāteline mo e Ngaahi Fuakava 111:2, 10. Te ke lava fēfē ʻo tokoniʻi kinautolu ke fakamahuʻingaʻi e ngaahi meʻa ʻa e ʻEikí?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau tā e ngaahi meʻa ʻoku nau fakakaukau ki ai ʻi heʻenau fanongo ki he foʻi lea koloá. Fakafehoanaki e ngaahi meʻa ʻoku pehē ʻe he māmaní ko e koloá mo e ngaahi meʻa ʻoku fakamahuʻingaʻi ʻe he ʻEikí Tokāteline mo e Ngaahi Fuakava 111:2, 10–11), hangē ko e kakaí, potó mo e māʻoniʻoní, mo hono fakahoko e ngaahi fili ʻoku leleí.

• Tokoniʻi e fānaú ke nau fakakakato e peesi ʻekitivitī ʻo e uike ní. Ko e hā ʻoku tau ako fekauʻaki mo Sīsū mo e ngaahi meʻa ʻokú Ne fakamahuʻingaʻí. Te tau lava fēfē ʻo hoko ʻo hangē ange ko Iá?

Tokāteline mo e Ngaahi Fuakava 112:10

ʻE tatakinima au ʻe he ʻEikí mo tali ʻeku ngaahi lotú.

ʻE lava ke tokoni e Tokāteline mo e ngaahi Fuakava 112:10 ki he fānau ʻokú ke akoʻí ke fakatupulaki ʻenau tui ʻe tataki mo fakahonohinoʻi kinautolu ʻe Sīsū Kalaisi ʻi heʻenau moʻuí kotoa.

Ngaahi ʻEkitivitī ʻe Ala Fakahokó

• Tokoni ke fakakaukau e fānaú ki ha ngaahi tūkunga ʻe mahuʻinga ai ke puke e nima ʻo ha mēmipa ʻo e fāmilí, hangē ko e taimi kolosi ʻi he halá pe fakafiemālieʻi ha tahá. ʻE lava ke nau fiefia ʻi hano fakatātaaʻi ha niʻihi ʻo e ngaahi sīpinga ʻoku nau vahevahé. Lau e Tokāteline mo e Ngaahi Fuakava 112:10. Ko e hā ʻoku tau fie maʻu ai kee “tataki nima [kitautolú]” ʻe he ʻEikí?

• Haʻi e mata ʻo ha taha ʻo e fānaú, pea kole ange ke lue mei he tafaʻaki ʻe taha ʻo e lokí ki he tafaʻaki ʻe tahá kae taki ia ʻe ha kiʻi leka ʻe taha. Fakamatala fekauʻaki mo ha aʻusia naʻá ke ongoʻi ai hano tataki nima koe ʻe he ʻEikí.

  

  Tuʻu Hake Pea Lue, tā fakatātaaʻi ʻe Simon Dewey

Tokāteline mo e Ngaahi Fuakava 112:11

ʻOku finangalo ʻa Sīsū ke u ʻofa he tokotaha kotoa pē.

Tokoni ke ʻilo ʻe he fānaú ʻoku finangalo e Fakamoʻuí ke tau ʻofa he tokotaha kotoa pē, ʻo aʻu pē kiate kinautolu te nau ala ngaohikovia kitautolú.

Ngaahi ʻEkitivitī ʻe Ala Fakahokó

• ʻI hoʻo vahevahe fekauʻaki mo e “Vahe 41: Ko e Palopalema Naʻe Hoko ʻi Ketilaní” (Ngaahi Talanoa ʻo e Tokāteline mo e Ngaahi Fuakavá, 158–60), kole ange ki he fānaú ke nau faʻu ha foʻi haati (heart shape) ʻaki honau nimá ʻi heʻenau fanongo ki hano fai ʻe ha taha ha meʻa ʻoku totonu. Tokoni ke mahino kiate kinautolu ʻoku finangalo e ʻEikí ke tau ʻofa ki he taha kotoa, ʻo aʻu pé kiate kinautolu te nau ala fakahoko ha ngaahi fili halá.

• Tā ha fofonga mamahi ʻi he palakipoé, pea ʻeke ange ki he fānaú e founga ʻe lava ke tau fakahaaʻi ai ʻetau ʻofa ki he niʻihi kehe ʻoku mamahí (vakai, Tokāteline mo e Ngaahi Fuakava 112:11). ʻI hono fevahevaheʻaki ʻe he fānaú ʻenau ngaahi fakakaukaú, liliu e fofonga mamahí ki ha fofonga fiefia. Vahevahe hoʻo fakamoʻoni ki he mālohi ʻoku maʻu mei he ʻofa he niʻihi kehé. Hivaʻi fakataha ha foʻi hiva fekauʻaki mo e ʻofá, hangē ko e “Folofola ʻa Sīsū Feʻofaʻaki” (Tohi Hiva ʻa e Fānaú, 39).

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 112:10

ʻE lava ke u loto-fakatōkilalo mo fekumi ki he fakahinohino ʻa e ʻOtuá.

ʻOku finangalo e Tamai Hēvaní ke tau loto-fakatōkilalo kae lava ke Ne tataki kitautolu. Tokoni ke mahino ki he fānaú e founga ʻe lava ke nau fakahaaʻi ai e loto-fakatōkilaló ʻi he ʻao ʻo e ʻOtuá ʻaki hono fakahoko ha ngaahi meʻa hangē ko e lotu kiate Iá mo hono tali ʻEne akonakí.

Ngaahi ʻEkitivitī ʻe Ala Fakahokó

• ʻEke ki he fānaú pe ko e hā e ʻuhinga ke loto-fakatōkilaló. (ʻE lava ke nau lau e “Loto Fakatōkilaló” ʻi he Tuʻu Maʻu ʻi he Tuí [peesi 106-07] ʻo ka fie maʻu). Tokoni kiate kinautolu ke nau fakakaukau ki he ngaahi lea pe kupuʻi lea ʻoku felāveʻi mo e “loto-fakatōkilaló,” pea fakaafeʻi kinautolu ke nau lau e Tokāteline mo e Ngaahi Fuakava 112:10, ʻo fetongi ʻaki ha taha ʻo e ngaahi foʻi lea pe kupuʻi lea ko ʻení e “loto-fakatōkilaló” ʻi he vēsí. Ko e hā ʻoku finangalo ai e Tamai Hēvaní ke tau loto-fakatōkilaló? Ke ako lahi angé, ʻe lava ke lau ʻe he fānaú ha ngaahi veesi folofola kehe ʻoku lisi ʻi lalo ʻi he “Loto-fakatōkilaló” ʻi he Fakahinohino ki he Ngaahi Folofolá (scriptures.ChurchofJesusChrist.org).

• Hiki ʻi he palakipoé e ngaahi lea ʻo e Tokāteline mo e Ngaahi Fuakava 112:10, pea kole ange ki he fānaú ke lau leʻo lahi ia. Fakaafeʻi ha kiʻi leka ke ne laineʻi e ngaahi tāpuaki ʻoku ʻasi he veesi ko ʻení maʻanautolu ʻoku loto-fakatōkilaló. Poupouʻi e fānaú ke nau vahevahe ha ngaahi taimi ne nau fekumi ai ʻi he loto-fakatōkilalo ki he tokoni ʻa e ʻEikí pea naʻá Ne tataki kinautolu, hangē ko ha taimi ne tali ai ʻenau ngaahi lotú.

Tokāteline mo e Ngaahi Fuakava 112:11

ʻOku finangalo ʻa Sīsū ke u ʻofa ʻi he tokotaha kotoa pē.

Naʻe hoko ʻa Sīsū Kalaisi ko e sīpinga haohaoa ʻo e ʻofa he tokotaha kotoa peé, ʻo aʻu pē kiate kinautolu ne nau ngaohikovia Iá. Naʻe pau foki ke kātekina ʻe Siosefa Sāmita e fakatanga ʻa kinautolu ne hoko ko hono ngaahi kaungāmeʻá. Tokoni ki he fānaú ke nau ʻilo te tau lava ʻo ʻofa he niʻihi kehé ʻo hangē tofu pē ko ia ne fai ʻe he Fakamoʻuí mo Siosefa Sāmitá.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau taufetongi hono lau e “Vahe 41: Ko e Palopalema Naʻe Hoko ʻi Ketilaní” (Ngaahi Talanoa ʻo e Tokāteline mo e Ngaahi Fuakavá, 158–60). Ko hai ʻi he talanoá naʻá ne ʻai e ngaahi palopalema ʻi Ketilaní ke toe kovi angé? Ko hai naʻe feinga ke fakaleleiʻi kinautolú? Fakaafeʻi e fānaú ke nau lau e Tokāteline mo e Ngaahi Fuakava 112:11 pea talanoa fekauʻaki mo e ʻuhinga ʻoku mahuʻinga ai ke tau ʻofa he taha kotoá.

• Ko e hā ʻoku mahuʻinga ai ke tau ʻofa he kakai ʻoku kehe meiate kitautolú? Ko e hā nai ha ʻuhinga ne ʻomi ai ʻe he Tamai Hevaní ha ngaahi faikehekehe kiate kitautolú? Te tau lava fēfē ʻo “vahevahe [ʻetau] ʻofá ki he tokotaha kotoa pē,” ʻo aʻu kiate kinautolu ʻoku kehe meiate kitautolú? Hivaʻi mo e fānaú ha foʻi hiva fekauʻaki mo e ʻofa he niʻihi kehé, hangē ko e “Te u ʻAʻeva Pea mo Koe” (Tohi Hiva ʻa e Fānaú, 78).

• Tokoni ki he fānaú ke nau fakakaukau ki ha ngaahi sīpinga ʻo e taimi naʻe ʻofa ai e Fakamoʻuí ʻiate kinautolu ne nau ngaohikovia Iá (hangē ko ʻení, vakai ki he Luke 23:34).

Tokāteline mo e Ngaahi Fuakava 112:12–15, 26

ʻOku ʻiloʻi ʻe kinautolu ʻoku ului moʻoní ʻa Sīsū Kalaisi.

Ko e ului kia Sīsū Kalaisí ko ha ngāue ia he moʻuí kotoa, pea ʻoku maʻongoʻonga ange ia ʻi hano “lau [pē] ʻoku nau ʻiloʻi [Hono] hingoá” (Tokāteline mo e Ngaahi Fuakava 112:26). Tokoni ke mahino ange ki he fānaú e ʻuhinga ʻo e ʻiloʻi moʻoni e Fakamoʻuí.

Ngaahi ʻEkitivitī ʻe Ala Fakahokó

• Vahevahe ange ki he fānáu, naʻe tafoki ha niʻihi ʻo e kau ʻAposetoló ʻi he 1837 ʻo fakafepakiʻi e Palōfita ko Siosefa Sāmitá. Ko e hā ʻoku mahuʻinga ai ke muimui he palōfitá? (vakai, veesi 15). Tokoni ki he fānaú ke nau faʻu ha lisi ʻo e ngaahi meʻa naʻe fakahā ʻe he ʻEikí kia Tōmasi B. Maasi, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ke ne faí (vakai, Tokāteline mo e Ngaahi Fuakava 112:12–15). Fakaʻaongaʻi e lisí ke aleaʻi e founga te tau lava ʻo ʻului ange ai kia Sīsū Kalaisí.

• ʻEke ange ki he fānaú pe ʻoku nau pehē ʻoku ʻuhinga ki he hā ʻa e lau ʻokú te ʻiloʻi ʻa Sīsū Kalaisi kae ʻikai ke ʻiloʻi moʻoni Iá (vakai, Tokāteline mo e Ngaahi Fuakava 112:26). Ko e hā ʻoku akoʻi mai ʻe he veesi 14 te tau lava ʻo fai ke ʻiloʻi lelei ange ai Iá? Tokoni ke mahino ki he fānaú e ʻuhinga ʻo e “toʻo hake [hotau] kolosí” (Liliu ʻe Siosefa Sāmita, Mātiu 16:25–26 [ʻi he Fakahinohino ki he Ngaahi Folofolá]) pe ke “fafanga [ʻEne] fanga sipí.”

Poupouʻi e Ako ʻi ʻApí

Fakaafeʻi e fānaú ke nau fakamatalaʻi nounou e meʻa ne nau ako ʻi he kalasí he ʻaho ní. Tokoni kiate kinautolu ke nau hiki ha fakamatala pe tā ha fakatātā te ne fakamanatu ange e meʻa ne nau akó koeʻuhí ke nau lava ʻo vahevahe ia mo honau ngaahi fāmilí.

Fakatupulaki ʻEtau Akoʻí

ʻOku fieʻilo mo ako ʻa e fānaú ʻi ha ngaahi founga lahi. ʻOku fiefia ʻa e fānaú ʻi he ako ʻo fakafou ʻi ha ngaahi aʻusia foʻou mo kehekehe. Fakaʻaongaʻi ha ngaahi ʻekitivitī ngaungaue, fakaʻaongaʻi ʻenau ngaahi ongó, fekumi, mo fakahoko ha ngaahi meʻa foʻou. (Vakai, Ko e Faiako ʻi he Founga ʻa e Fakamoʻuí, 25–26.)