bōd ej kwaļo̧k pā in ej kwaļo̧k elōn̄ kain kōļar ko

To All Worthy Male Members, jān Emma Allebes

Tijem̧ba 6–12

Lale Laajrak in Tōmak ko im Kean̄ jān Kabun̄ 1 im 2

“Jej Tōmak”

Ilo am ekkatak wiik in im kōm̧m̧an juōn karōk n̄an katakin, ļōmņake elmen am maron̄ jipan̄ ajri ro ilo kūlaaj eo am kōkajoorļo̧k aer tōmak ilo m̧ool ko ilo gospel.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Joļo̧k juon booļ n̄an juon ajri im kajjitōk ippān ajri ro n̄an kwaļo̧k jet men ej tōmake kōn Jisōs Kraist ak Jemedwōj Ilan̄. Āliji m̧ae kajjojo ajri aolep ajri rebōk kūņaer n̄an kwaļo̧k.

pija in katakin

Katakin Katak eo: Ajri ro Reddikļo̧k

Lale Laajrak in Tōmak Ko

Ij tōmak ilo gospel eo an Jisōs Kraist.

Kwomaron̄ kōjerbal Laajrak in Tōmak Ko n̄an etale ippān ajri ro jet iaan tōmak ko an Kabun̄ in an Jisōs Kraist. Etke bwe ajri ro kwoj katakin ren tōmak m̧ool kein?

Makūtkūt ko Maron̄ Kōm̧m̧ani

• Kālet jet ian laajrak in tōmak ko me kwoj en̄jake raorōk n̄an ajri ro kwoj katakin. N̄an kajjojo laajrak in tōmak, kwaļo̧k juon pija (peij in m̧akūtkūt eo an wiik in) ak juon bwebwenato (jān jeje ko rekwojarjar ak mour eo am) me ej kōmeļeļeik ak kalikkar m̧ool eo ej ilo laajrak in. Ba n̄an ajri ro etke m̧ool in eaorōk n̄an eok, im kōtļo̧k bwe rn kwaļo̧k etke eaorōk n̄an er.

• Pukot al ko ak al in ajri ko me remaron̄ jjipan̄ ajri ro meļeļe jet iaan laajrak in tōmak ko. Bōlen ajri ro remaron̄ jipan̄ eok kāleti. Al ippān doon, im jipan̄ ajri ro lo wāween an al ko eiokļo̧k laajrak in tōmak ko.

Laajrak in Tōmak Ko 1:9; Kean̄ jān Kabun̄ 1 im 2

Irooj ej tōl Kabun̄ in An kōn rikanaan eo An.

Āinwōt membōr ro an Kabun̄ in kar ioon elōn̄ kapan̄pan̄ ko, jej lo aenōm̧m̧an n̄an jeļā bwe Jemedwōj Ilan̄ enaaj letok revelesōn n̄an tōl kōj. Jipan̄ ajri ro kwoj katakin kōkajoorļo̧k aer tōmak bwe Anij ej tōl Kabun̄ in kōn juon rikanaan emour.

ļaddik eo ej alooje kweilo̧k eo eļap

Jemedwōj Ilan̄ ej tōl kōj kōn rikanaan ro.

Makūtkūt ko Maron̄ Kōm̧m̧ani

• Kwaļo̧k jet jeje ko rekwojarjar im juon pija in rikanaan eo emour (ak juon ennaan jen kweilo̧k eļap Ensign ak Liaona). Jipan̄ ajri ro ļōmņake ta naan ko reiokļo̧k “aolep men em̧ōj an Anij kwaļo̧ki” im ta naan ko reiokļo̧k “aolep men ko E ej kwaļo̧ki kiiō” (Laajrak in Tōmak Ko 1:9).

• Kune tōm̧a ko, im likūt juon pijain Jisōs Kraist ioon bo̧o̧t eo. Romeļo̧k pija eo kōn juon teen̄ki n̄an kōmeļeļeik elmen an rikanaan eo, āinwōt teeen̄ki, jipan̄ kōj alikkar ļo̧k ad lo Rilo̧mo̧o̧r.

• Kapukkot tōl ko repidodo n̄an kōm̧m̧an men ko, āinwōt m̧ōn̄ā ak kein ikkure. Ļoor kōmeļeļe ko ippān ajri ro, im kōmeļeļeik bwe kōn rikanaan eo, Jemedwōj Ilan̄ ej letok n̄an kōj kōmeļeļe n̄an jipan̄ kōj jepļaakļo̧k im mour Ippān. Ta jet iaan men ko me rikanaan eo eaar katakin kōj bwe jen maron̄ ro̧o̧lļo̧k n̄an ippān Anij?

pija ej bōk jikin katakin

Katakin Katak Ko: Ajri ro Rerūttoļo̧k

Lale Laajrak in Tōmak Ko

Lale Laajrak in Tōmak Ko ej katakin m̧ool ko kōn gospel in.

Jet iien gospel in emaron̄ in depakpak im pen, eļaptata n̄an ajri ro. Lalel Laajrak in Tōmak Ko emaron̄ jipan̄ ajri ro meļeļe, ilo juon wāween epidodo, jet iaan m̧ool ko jej tōmaki āinwōt Armej ro Rekwojarjar.

Makūtkūt ko Maron̄ Kōm̧m̧ani

• Karuwaineneik kajjojo ajri n̄an kālet juon naan ak ennaan jān juon iaan laajrak in tōmak ko im kwaļo̧ke ilo kūlaaj. Innām kōtļo̧k an ajri ro jet kajidede (ak pukote) laajrak in tōmak rot naan ak ennaan ej tok jen ia. Kajjitōk ippān ajri ro etke naan ak eoon eo eaorōk raar bōke.

• Jejjo̧ raan m̧oktaļo̧k, kajjitōk ippān jejjo̧ ajri n̄an keppopo n̄an kwaļo̧k ilo kūlaaj jidik ennaan kōn laajrak in tōmak eo em̧m̧an ippāer. Ennaan eo aer emaron̄ in ilo pija, al, bwebwenato ak immineene, ak jeje ko rekwojar jet. Karuwaineneik ajri ro n̄an kwaļo̧k etke em̧m̧an ippāer laajrak in tōmak eo raar kālet.

• Je ioon bo̧o̧t eo jet kajjitōk ko emaron̄ wōr ippān armej ro kōn tōmak ko ad me emaron̄ in uwaak jen juon iaan laajrak in tōmak ko. Kajjitōk ippān ajri ro n̄an bōk juon kajjitōk im pukot laajrak in tōmak eo me ej uwaake. Kōtļo̧k aer kammineneik uwaaki kajjitōk eo kōjerbal laajrak in tōmak eo.

Kean̄ jān Kabun̄ 1 im 2

Rikanaan ro rejipan̄ kōj jeļā ankilaan Jemedwōj Ilan̄.

Kean̄ jān Kabun̄ 1 im 2 rej waanjon̄ok ko rem̧m̧antata kōn wāween an rikanaan ro bōk im jerbale revelesōn jān Anij. Elmen am maron̄ jipan̄ ajri ro kōļapļo̧k aer tōmak bw Anij ej tōl Kabun̄ in An kōn revelesōn?

Makūtkūt ko Maron̄ Kōm̧m̧ani

• Kajjitōk ippān ajri ro n̄an lale juon laajrak in tōmak me ej katakin kōn rikanaan ro im revelesōn. Karuwaineneik er n̄an kwaļo̧k etke rej kam̧m̧oolol bwe ewōr juon rikanaan emour. Kwaļo̧k jet waanjon̄ok kōn wāween an Anij kar tōl Kabun̄ in kōn revelesōn Kean̄ jān Kabun̄ 1 im 2, im kōtļo̧k an ajri ro kwaļo̧k waanjon̄ok ko me rejeļā kaki (āinwōt oktak ko an Kabun̄ kōn būrookram̧ im kakien ko).

• Leļo̧k n̄an ajri ro eoon in jipan̄ kein: 2 Nipai 26:33; Jekab 2:27. Karuwaineneik er n̄an ļōmņake eoon rot eo eiokļo̧k n̄an Kean̄ jān Kabun̄ 1 (me ej tōl n̄an kōjem̧ļo̧k m̧are elōn̄ļo̧k jen juon) im tao eo eiokļo̧k n̄an Kean̄ jān Kabun̄ 2 (ta kōjeraam̧m̧an ko an priesthood im tampeļ repād n̄an aolep armej). Kwaļo̧k am naan in kam̧ool bwe Irooj ej kwaļo̧k An kilaan n̄an etto im rikanaan ro raan kein.

• Je naan in jān Kean̄ jān Kabun̄ 1 ioon bo̧o̧t eo: “Kwoj aikuj ekajet eok make.” Ta meļeļein ekajet eok make n̄e rikanaan ro rej bōk revelesōn? N̄an jipan̄ ajri ro kajjitōk in, kwomaron̄ kwaļo̧k enaan in jān Būreejtōn Russell M. Nelson: “Kwomaron̄ jeļā kōn kwe make ta eo em̧ool im ta eo ejjab kōn bōklekōt kōn unoojdikdik eo an Jetōb” (“Iakwe im Kakien an Anij” [Brigham Young University devotional, Sept. 17, 2019], 4, speeches.byu.edu).

• Jin̄n̄a ak kwaļo̧k juon pija in laļin ioon bo̧o̧t eo. Karuwaineneik juon iaan ajri ro n̄an riiti pārokurāāp ko ruo āliktata jen Būreejtōnji eo Kein Kajuon leta ilo Juun 8, 1978 me ej kōmlet ilo Kean̄ jān Kabun̄ 2 (jino ilo “Ej ron̄jak jar ko ad …”). Kajjitōk ippān ajri ro n̄an bwine jete naan ko “kōjeraam̧m̧an” im “kōjeraam̧m̧an ko” rej waļo̧k. Ta kōjeraam̧m̧an ko rej itok jān gospel in? Karuwaineneik ajri ro n̄an kōlaajraki ioon bo̧o̧t eo ipeļaakin jin̄a eo ak pijain laļin. Kwaļo̧k am naan in kam̧ool bwe Anij ej iakwe aolep ro Nejin peļaakin laļin im ekōņaan kōjeraam̧m̧an er kōn gospel eo An.

pija ej bōk jikin ekkatak

Kōketak Ekkatak ilo M̧weo

Jipan̄ ajri ro kālet jon laajrak in tōmak remaron̄ kakkilōklōke, im jipan̄ er kōm̧m̧ane juon karōk n̄an kōm̧m̧ane.

Kōkōm̧anm̧anļo̧k Ad Katakin

Ajri ro rekōņaan kwaļo̧k ta eo rej ekkatak. Men̄e reiddik, ajri ro remaron̄ kōkajoorļo̧k tōmak ko an ro uwaan baam̧le ko aer. Kōketak er n̄an kwaļo̧k ippān baam̧le ko aer men ko rej katak ilo Būraimere. (Lale Katakin ilo Wāween eo an Rilo̧mo̧o̧r,30.)

pein in m̧akūtkūt: Lale Laajrak in Tōmak ko