Ngaahi Maʻuʻanga Tokoni Makehe ki hono Akoʻi ʻo e Fānaú

ʻE lava ke maʻu e ngaahi maʻuʻanga tokoni ko ʻení ʻi he polokalama Gospel Library mo e ChurchofJesusChrist.org

Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí

Te ke lava ʻo liliu ʻa e ngaahi ʻekitivitī mei he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke ngāue ʻaki ʻi hoʻo kalasi Palaimelí. ʻOua te ke hohaʻa kapau kuo ʻosi fai ʻe he fānaú ʻa e ngaahi ʻekitivitī ko ʻení mo honau ngaahi fāmilí ʻi ʻapi; ʻe tokoni hono toutou fakahokó ke ako ai e fānaú. Lolotonga ʻa e Palaimelí, mahalo ʻe fie vahevahe ʻe he fānaú mo e niʻihi kehé e meʻa ʻoku nau ako ʻi ʻapi fekauʻaki mo e Fakamoʻuí mo ʻEne ongoongoleleí.

Ngaahi Himí mo e Tohi Hiva ʻa e Fānaú

ʻOku fakaafeʻi ʻe he hiva toputapú ʻa e Laumālié mo akoʻi e tokāteliné ʻi ha founga fakangalongataʻa. Makehe mei he ngaahi tatau kuo paaki ʻo e Ngaahi Himí mo e Tohi Hiva ʻa e Fānaú, te ke lava ʻo maʻu e hiki tatau ʻo e ngaahi fasi mo e ngaahi vitiō ʻo ha ngaahi himi lahi mo ha ngaahi hiva maʻá e fānaú ʻi he music.ChurchofJesusChrist.org mo e Sacred Music pea mo e polokalama Gospel Media.

Vakai Ki Hoʻomou Fānau Īkí

Ko e lahi taha ʻo e ngaahi tefito ʻoku ʻasi ʻi he tohi lēsoni Vakai ki Hoʻomou Fānau Īkí: Tohi Lēsoni Nesilií ʻoku tatau ia mo e ngaahi tefito te ke akoʻi ʻi he Palaimelí. Tautautefito kapau ʻokú ke akoʻi e fānau iiki angé, fakakaukau ke fekumi ʻi he tohi lēsoni ʻa e nesilií ki ha ngaahi hiva, talanoa, ngaahi ʻekitivitī mo e ngāue fakameaʻa makehe.

ʻŪ Makasini Friend mo e Liahona

ʻOku ʻomi ʻi he ongo makasini Friendmo e Liahona ha ngaahi talanoa mo e ʻekitivitī ʻe lava ʻo fakalahi ki he ngaahi tefitoʻi moʻoni ʻokú ke akoʻi mei he Haʻu, ʻo Muimui ʻIate Au—Maʻá e Palaimelí.

Ngaahi Talanoa mei he Tokāteline mo e Ngaahi Fuakavá

ʻOku ngāue ʻaki ʻe he Ngaahi Talanoa ʻo e Tokāteline mo e Ngaahi Fuakavá ha ngaahi fakatātā mo ha lea faingofua ke tokoni ke ako e fānaú mei he Tokāteline mo e Ngaahi Fuakavá. Te ke lava foki ʻo maʻu ha ngaahi vitiō ʻo e ngaahi talanoa ko ʻení ʻi he polokalama Gospel Library mo e Gospel Media Library ʻi he ChurchofJesusChrist.org.

ʻOku ʻi he maʻuʻanga tokoni ko ʻení ha ngaahi peesi ʻekitivitī naʻe faʻu ke fakatupulaki e ako ʻa e fānaú mei he Tokāteline mo e Ngaahi Fuakavá.

Ngaahi Vitioó mo e Tā Fakatātaá

ʻE lava e ngaahi fakatātaá, ngaahi vitiō mo e ngaahi mítia kehé ʻo tokoni kiate kinautolu ʻokú ke akoʻí ke nau sioloto ki he tokāteliné mo e ngaahi talanoa ʻoku fekauʻaki mo e ngaahi folofolá. ʻAlu ki he Gospel Media Library ʻi he ChurchofJesusChrist.org ke vakaiʻi e ngaahi maʻuʻanga tokoni fakamītia kuo tānaki ʻe he Siasí. ʻOku maʻu foki e ngaahi maʻuʻanga tokoni ko ʻení ʻi he polokalama Gospel Media, pea ʻoku maʻu foki ha ngaahi fakatātā lahi ʻi he Tohi Fakatātā ʻo e Ongoongoleleí.

Ko e Faiako ‘i he Founga ‘a e Fakamoʻuí

ʻE lava ke tokoni atu ʻa e Ko e Faiako ‘i he Founga ‘a e Fakamo‘uí ke ke ako mo ngāue ʻaki ʻa e ngaahi tefitoʻi moʻoni ʻo e faiako faka-Kalaisí. ʻOku aleaʻi mo akoako fakahoko ʻa e ngaahi tefitoʻi moʻoni ko ʻení ʻi he ngaahi fakataha alēlea fakafaiakó.

Kau Māʻoniʻoni

Ko e Kau Māʻoniʻoní ko ha ngaahi vōliume fakamatala hisitōlia ia ʻo e Siasí. ʻOku maʻu ʻi he voliume 1, Ko e Fuka ʻo e Moʻoni, mo e voliume 2, ʻIkai Ha Nima Taʻe Maʻá, ʻa e vahaʻa taimi tatau ʻo e hisitōlia ʻo e Siasí ʻo hangē ko e Tokāteline mo e Ngaahi Fuakavá. ʻE lava ke ʻoatu ʻe he ngaahi hisitōlia ko ʻení ha ngaahi fakakaukau ki he puipuituʻa ʻo e ngaahi fakahā ʻokú ke ako ʻi he Tokāteline mo e Ngaahi Fuakavá.