ko e hiva ʻa ha fānaú

Ko Hono Feau e Ngaahi Fie Maʻu ʻa e Fānau ʻoku Faingataʻaʻia Fakaesinó

ʻOku fatongiaʻaki ʻe he kau taki ʻo e Palaimelí ʻa hono akoʻi ʻo e ongoongolelei ʻo Sīsū Kalaisí ki he fānau kotoa pē, kau ai ʻakinautolu ʻoku nau faingataʻaʻia fakaesinó. ʻI he Palaimelí, ʻoku totonu ke talitali lelei, ʻofaʻi, tokangaʻi, mo fakakau ʻa e kiʻi tamasiʻi/taʻahine kotoa pē. ʻI he ʻātakai ko ʻení, ʻoku faingofua ange ke mahino ki he fānau kotoa pe ʻa e ʻofa ʻa ʻetau Tamai Hēvaní mo Sīsū Kalaisí, pea ke ongoʻi mo fakatokangaʻi ʻa e ivi tākiekina ʻo e Laumālie Māʻoniʻoní. ʻE lava ke tokoni atu ʻa e ngaahi fakakaukau ko ʻení ke feau ʻa e ngaahi fie maʻu ʻo e fānau ʻoku faingataʻaʻia fakaesinó.

• Ako ki he ngaahi fie maʻu pau ʻa e fānau takitaha. Ko e founga lelei taha ke fakahoko ʻaki ʻení ko e talanoa ki he mātuʻa ʻo e fānaú pe kau tauhí. Feinga ke ʻiloʻi ʻa e founga lelei taha ʻoku ako ai ʻa e fānaú pea mo e founga ʻoku tokoni lahi tahá. Te ke lava foki ʻo fealeaʻaki mo e kau taki kehe mo e kau faiako Palaimeli ʻoku nau taukeí mo maʻu ha ngaahi fakakaukau ke vahevahé.

• Faʻu ha ʻātakai lelei ʻa ia ʻe ongoʻi malu mo ʻofaʻi ai ʻa e fānaú kotoa. Ako ʻa e ngaahi hingoa ʻo e fānau kotoa ʻi hoʻo kalasí, pea tokoniʻi kinautolu ke nau ongoʻi ʻoku talitali lelei, ʻofaʻi, mo fakakau mai kinautolu. ʻOku faʻa fakaangaʻi ʻa e fānau ʻoku faingataʻaʻia fakaesinó, ko ia kumi ha ngaahi faingamālie ke fakalangilangiʻi ai kinautolu ʻi heʻenau ngaahi ʻulungaanga leleí. Tokoni ki he fānau kehé ke nau ʻofa mo talitali lelei kinautolu.

• Fai ha ngaahi liliu kae lava ke kau mai ʻa e tokotaha kotoa pē. ʻE lava ke fai ha ngaahi liliu iiki ki he ngaahi ʻekitivitií ke fakapapauʻi ʻoku lava ʻe he fānaú kotoa ʻo ako, kau ai kinautolu ʻoku ʻi ai honau ngaahi fakangatangata fakaesino pe faingataʻa ke akó. Hangē ko ʻení, kapau ʻoku fokotuʻu mai ʻe ha ʻekitivitī ke fakaʻaliʻali ha fakatātā, te ke lava ʻo hivaʻi ha foʻi hiva fekauʻaki mo ia kae lava ke kau mai ʻakinautolu ʻoku faingataʻa ke nau sió.

• Fokotuʻu ha ngaahi founga pe faʻunga angamaheni ʻi he loki akó. Ko e founga ʻe taha ke fai ai ʻeni ko hono faʻu mo e kalasí ha pousitā fokotuʻutuʻu ʻo e taimi-tēpile ki he anga hono fakalele ʻo e kalasí. ʻE ala kau atu ki hoʻo taimi-tēpilé ʻa e lotú, taimi akoʻí mo e taimi ʻekitivitií. ʻE lava ke tokoni ʻeni ke holoki ʻa e ngaahi ongo veiveiua ʻa ia te ne fakalahi ʻa e loto hohaʻa ʻi ha niʻihi ʻo e fānaú.

• Fakaʻaongaʻi ha ngaahi fakaʻilonga ʻoku ʻilongá. ʻE ʻaonga ki he fānau ʻoku ʻi ai haʻanau ngaahi faingataʻaʻia fakaesino pe faingataʻaʻia fakaʻulungāngá, ʻa e ngaahi fakaʻilongá hangē ko ha ngaahi fakatātā ʻokú ne fakaʻaliʻali mai ʻa e ngaahi ʻulungaanga ʻoku tāú hangē ko hono hiki ʻo e nimá kimuʻa pea tali ha fehuʻí.

• Maʻu ha mahino ki he ʻuhinga ʻoku hoko ai ha ngaahi faingataʻaʻia fakaʻulungāngá. Ako ki he ngaahi faingataʻaʻia fakaesinó pe ngaahi tūkunga te ne ala tākiekina ha kiʻi tamasiʻi/taʻahine ke ne fai ha tōʻonga taʻetaau. Tokanga ʻaupito ki he meʻa ʻoku hoko ʻi he taimi ʻoku hoko ai ha ngaahi ʻulungaanga ʻoku faingataʻa. Fakakaukau ʻi he faʻa lotu ki he founga ke fakaleleiʻi ʻaki ʻa e tūkungá kae lava ke poupouʻi lelei ange ʻa e kiʻi tamasiʻí/taʻahiné.

• Tokoniʻi e kiʻi tamasiʻi/taʻahine takitaha ke tupulaki mo fakalakalaka. Naʻe akonaki ʻa Siosefa Sāmita ʻo pehē, “Ko e kau maʻu ʻatamai mo e laumālie kotoa pē kuo fekauʻi mai ʻe he ʻOtuá ki māmani ʻoku nau tuʻu ke fakalakalaka” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 241). ʻOua naʻá ke fakamahamahalo ʻoku ʻikai lava ʻo ako pe tokoni ha kiʻi tamasiʻi/taʻahine ʻoku faingataʻaʻia fakaesino. Kole ki he ʻEikí ke tokoni atu ke ke ʻilo e founga ke tokoniʻi ai e fānaú ke nau aʻusia honau tuʻunga malava fakalaumālié.