Kalasi Palaimeli ʻoku fakahoko ʻenau ʻekitivitī

Ko Hono Fakaʻaongaʻi ʻo e Haʻu, ʻo Muimui ʻIate Aú—Maʻá e Palaimelí

Ko e Teuteu ke Faiako ʻi he Palaimelí

ʻOku totonu ke hoko ʻa e ako fakataautaha mo fakafāmili ʻi ʻapí ko e uho ʻo e ako ʻo e ongoongoleleí. Ko e meʻa moʻoni ʻeni kiate koe mo e fānau ʻokú ke akoʻí. ʻI hoʻo teuteu ke faiakó, kamata ʻaki hano vahevahe hoʻo ngaahi aʻusia ʻi he folofolá. ʻE hoko hoʻo teuteu mahuʻinga tahá ʻi he taimi ʻokú ke fekumi ai ʻi he folofolá mo fekumi ki he ueʻi ʻa e Laumālie Māʻoniʻoní.

ʻOku hoko foki ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ko ha konga mahuʻinga ʻo hoʻo ako fakatāutahá mo hoʻo teuteu ke akoʻí fakatouʻosi. ʻE tokoni ia ke ke maʻu ha mahino lahi ange ki he ngaahi tefitoʻi moʻoni ʻoku maʻu ʻi he folofolá.

Lolotonga hoʻo teuteú, te ke maʻu ha ngaahi fakakaukau mo ha ngaahi ongo fekauʻaki mo e fānau ʻokú ke akoʻí. Te ke maʻu ha ngaahi fakakaukau ki he founga ʻe faitāpuekina ai ʻe he ngaahi tefitoʻi moʻoni ʻi he folofolá ʻa ʻenau moʻuí. ʻE tataki koe ke ke ueʻi fakalaumālie kinautolu ke nau ʻiloʻi e ngaahi tefitoʻi moʻoni ko iá, ʻi heʻenau ako mei he folofolá maʻanautolu pea mo honau ngaahi fāmilí. Manatuʻi ke ke ongoʻingofua e fānau ʻoku ʻikai ke poupouʻi ʻe he tūkunga honau fāmilí ʻa e ako folofola angamaheni fakafāmilí mo e efiafi fakafāmili ʻi ʻapí.

Ngaahi Fakakaukau ki hono Akoʻí

ʻI hoʻo teuteu ke akoʻí, ʻe malava ke ke maʻu ha ueʻi fakalaumālie makehe ʻaki hoʻo fekumi ʻi he ngaahi fokotuʻutuʻu ki hono akoʻí ʻi he maʻuʻanga tokoni ko ʻení. ʻOua te ke pehē ko e ngaahi fakakaukau ko ʻení ko ha ngaahi fakahinohino fakahokohoko, ka ko ha ngaahi fokotuʻu ke tokoni ke ke maʻu ha ngaahi ueʻi fakalaumālie ʻiate koe pē. ʻOkú ke ʻiloʻi ʻa e fānau ko ʻení—pea te ke ʻiloʻi lelei ange kinautolu ʻi hoʻo ngāue fakataha mo kinautolu ʻi he kalasí. ʻOku ʻafioʻi foki mo kinautolu ʻe he ʻEikí, pea te Ne ueʻi fakalaumālie koe ʻaki ʻa e ngaahi founga lelei taha ke akoʻi mo tāpuekina ʻaki kinautolú.

ʻOku lahi ʻa e ngaahi maʻuʻanga tokoni kehe te ke lava ʻo ngāue ʻaki ʻi hoʻo teuteú, kau ai ʻa e ngaahi fakakaukau ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e ngaahi makasini ʻo e Siasí. Ki ha toe fakamatala lahi ange fekauʻaki mo e ngaahi meʻá ni, vakai ki he Ngaahi Maʻuʻanga Tokoni Makehe ki hono Akoʻi ʻo e Fānaú” ʻi he maʻuʻanga tokoni ko ʻení.

Ko Ha Ngaahi Meʻa ke Manatuʻi

• ʻOku maʻu ʻe he mātuʻá ʻa e tefitoʻi fatongia ke akoʻi ʻenau fānaú. ʻI hoʻo hoko ko ha faiakó, ʻokú ke maʻu ha fatongia mahuʻinga ke poupouʻi, fakalotolahi, mo langaki hono ako ʻo e ongoongoleleí ʻi ʻapi. Ongoʻingofua e fānau ʻoku ʻikai akoʻi ʻe heʻenau ngaahi mātuʻá ʻa e ongoongoleleí ʻi honau ʻapí. Fakakau e fānau kotoa pē ʻi he fealēleaʻaki ʻi he ongoongoleleí neongo honau ngaahi tūkunga ʻi ʻapí.

• ʻE lava ke ako e fānaú ʻaki ʻenau vahevahe e meʻa ʻoku nau ʻiló. Ko e taimi ʻe niʻihi ʻoku hoko e ngaahi momeniti akoʻi maʻongoʻonga tahá ʻi he taimi ʻoku feakoʻiʻaki ai e fānaú ha meʻa kuo nau ako mei he folofolá. ʻOange ha ngaahi faingamālie lahi maʻá e fānaú ke vahevahe.

• ʻOku faingofua ange ke mahino ki he fānaú e ngaahi akonaki ʻi he Tokāteline mo e Ngaahi Fuakavá ʻi he taimi ʻoku nau ʻilo ai e ngaahi puipuituʻa fakahisitōlia ʻo e ngaahi akonaki ko iá. Te ke lava ʻo maʻu e ngaahi puipuituʻa fakahisitōliá ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e Ngaahi Talanoa ʻo e Tokāteline mo e Ngaahi Fuakavá.

• ʻOku lelei hono toutou fakahoko ha meʻa. ʻOku lelei ange hono ako ʻe he fānaú e ngaahi moʻoni ʻo e ongoongoleleí ʻi he taimi ʻoku toutou akoʻi ai e ngaahi moʻoni ko ʻení, ʻi ha ngaahi ʻekitivitī kehekehe. Kapau te ke ʻiloʻi ʻoku lelei ʻa e ngaahi ʻekitivitī akó ki he fānaú, fakakaukau ke toutou fakahoko ia, tautefito kapau ʻokú ke akoʻi ha fānau iiki ange. Te ke lava foki ʻo toe vakaiʻi ha ʻekitivitī mei ha lēsoni kimuʻa.

• ʻOku finangalo e Tamai Hēvaní ke ke lavameʻa ʻi hoʻo hoko ko ha faiako. Kuó Ne ʻomi ha ngaahi maʻuʻanga tokoni lahi ke tokoniʻi koe, kau ai e ngaahi fakataha alēlea fakafaiakó. ʻI he ngaahi fakataha ko ʻení, ʻoku lava ke ke fealeaʻaki mo e kau faiako kehé fekauʻaki mo ha faʻahinga faingataʻa ʻokú ke fehangahangai mo ia. Te ke lava foki ʻo aleaʻi mo akoako fakahoko e ngaahi tefitoʻi moʻoni ʻo e faiako hangē ko Kalaisí.

• Kapau ʻokú ke akoʻi e fānau iiki angé pea fie maʻu ha tokoni makehe, vakai ki he “Ko Hono Feau e Ngaahi Fie Maʻu ʻa e Fānau Iiki Angé” ʻi he maʻuʻanga tokoni ko ʻení.

• ʻOku kau ʻi he maʻuʻanga tokoni ko ʻení ha ngaahi fokotuʻutu;u fakalēsoni ki he uike kotoa pē ʻo e taʻú. ʻI he ʻaho Sāpate ʻoku ʻikai fakahoko ai e Palaimelí koeʻuhi ko e konifelenisi lahí, konifelenisi fakasiteikí pe ko ha faʻahinga ʻuhinga pē, ʻoku totonu ke hokohoko atu hono lau ʻe he ngaahi fāmilí e Tokāteline mo e Ngaahi Fuakavá ʻi ʻapi ʻo fakatatau mo e taimi-tēpile kuo fokotuʻutuʻú. ʻOua naʻá ke hohaʻa koeʻuhí ko e ngaahi lēsoni ne ʻikai te ke akoʻí; akoʻi pē e ngaahi lēsoni kuo fokotuʻutuʻu fakauiké.

fefine ʻokú ne ako ha tohi lēsoni