“Ko ha Sīpinga ki hono Akoʻí,” Haʻu, ʻo Muimui ʻIate Au—Maʻá e Palaimelí: Tokāteline mo e Ngaahi Fuakava 2021 (2020)
“Ko ha Sīpinga ki hono Akoʻí,” Haʻu, ʻo Muimui ʻIate Au—Maʻá e Palaimelí: 2021
Ko ha Sīpinga ki hono Akoʻí
ʻI he maʻuʻanga tokoni ko ʻení, te ke maʻu ai e sīpinga sitepu ʻe tolu ʻoku toutou hoko ʻi he lēsoni takitaha: fakaafeʻi e vahevahé, akoʻi e tokāteliné, mo poupouʻi e akó ʻi ʻapi. ʻI he ngaahi meʻa lahi, ʻe ala fehulunaki pe hoko ʻa e ngaahi ʻelemēniti ʻo e sīpinga ko ʻení ʻi ha founga kehekehe lolotonga hoʻo faiakó. Hangē ko ʻení, fakakaukau ko e feʻinasiʻakí ko ha faingamālie ia ke akoʻi ai e tokāteliné, pea ʻoku totonu ke kau ʻi hono akoʻi ʻo e tokāteliné ha ngaahi fakaafe ke feʻinasiʻaki. Ko e meʻa tatau pē, ʻe lava ke poupouʻi ʻo e ako ʻi ʻapí ʻi ha fealēleaʻaki faka-kalasí. Tuku e liliu ko ʻení ke hoko fakanatula pē, ʻaki e muimui ki he ngaahi ueʻi ʻo e Laumālié ke feau e ngaahi fie maʻu ʻo e fānau ʻokú ke akoʻí.
Fakaafeʻi e Feʻinasiʻakí
ʻAi ke hoko hono fakaafeʻi e fānaú ke vahevahe ʻenau ngaahi ongó, fakakaukaú, mo e aʻusia fekauʻaki mo e ngaahi tefitoʻi moʻoni ʻokú ke akoʻí, ko ha konga ʻo e kalasi kotoa pē. ʻE ala kau ʻi heʻenau ngaahi fakamatalá ha ngaahi aʻusia kuo nau maʻu ʻi heʻenau ako ʻi ʻapí. Te ke lava foki ʻo toe vakaiʻi e ngaahi meʻa ne nau ako he uike kuo ʻosí pea ʻeke ange pe kuo tākiekina fēfē ia ʻenau moʻuí.
Akoʻi ʻa e Tokāteliné
ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino lelei ange e tokāteline te ke akoʻi ki he fānaú. Fakakaukau pe ko e hā e ngaahi veesi folofola, kupuʻi lea, aʻusia, fehuʻi, pe ngaahi maʻuʻanga tokoni te ke lava ʻo vahevahe ke tokoni ke ako mo fakahoko ai ʻe he fānaú ʻa e ngaahi tefitoʻi moʻoni ʻo e ongoongoleleí. Fekumi ki ha ngaahi founga mohu fakakaukau ke tokoniʻi ai kinautolu ke nau loto vēkeveke fekauʻaki mo e ngaahi meʻa ʻoku nau akó.
Poupouʻi e Ako ʻi ʻApí
Koeʻuhí ko e ʻapí ko e uho ia ʻo hono ako e ongoongoleleí, ko ha taha ʻo hoʻo ngaahi kaveinga ngāue ʻi hoʻo hoko ko e faiako Palaimelí ke poupouʻi e ako ʻi ʻapí. Te ke tokoniʻi fēfē e fānaú ke vahevahe mo honau ngaahi fāmilí e meʻa ne nau ako he kalasí? Te ke poupouʻi fēfē nai e fānaú mo ʻenau ngaahi mātuʻá ke hokohoko atu ʻenau ako mei he Tokāteline mo e Ngaahi Fuakavá ʻi ʻapí?