a anene ataei

Tobwaan Kainnanoia Ataei aika Aki Toamau

Taan kairiri n te Moanrinan iai tabeia bwa a na reirei ana euangkerio Iesu Kristo nakoia ataei ni kabane, n ikotaki ma ake aki toamau. N te Moanrinan, a riai ni kabane ataei ni butimwaeaki, n tangiraki, ni kamwarakeaki, man tabeakinaki. N te aekaki aei ao e bebete ibukia ataei ni kabane bwa a na oota n ana tangira Tamara are i Karawa ao Iesu Kristo ao n namakina man kinaa ana kairiri te Tamnei ae Raoiroi. Iango aikai a kona n tobwaa kainnanoia ataei aika aki toamau.

• Reiakina taekan kainnanon te ataei ae onoti. Te kawai ae rianako tamaroana ibukin karaoan aei bon te marooro nakoia ana karo ke naake a tararua te ataei anne. Kakaea bwa te aro raa ae e na reiakinaki raoi iai ao tera anga aika a rangi ni ibuobuoki. Ko kona naba ni marooro ma taan kairiri n te Moanrinan ake tabeman ao taan reirei ake iai aia atatai ao aia nonori iaon aei.

• Karaoa te tabo ae tamaroa n te aro are ataei ni kabane a namakina te mano ao te tangiraki. Kinai araia ni kabane ataei ake n am kiraati, ao buokiia bwa a na namakinna ae a butimwaeaki, a tangiraki, ao n tabeakinaki. Ataei aika aki toamau n angin te tai a bwainingareaki, ngaia are karekea te tai ni kamoamoaiia ibukin anuaia aika tamaroa. Buokiia ataei ake tabeman ni bwaina te tatangira ao te bubutimwaai.

• Karaoi bitaki bwa a aonga ataei ni kabane n ira te waaki. Bitaki aika uarereke a kona ni karaoaki nakon mwakuri ni kauring n taraia bwa ni kabane ataei a kona n reirei, n ikotaki ma ake aki tomau ke iai aia kaangaanga n te reirei. Te katooto, ngkana te mwakuri ni kauring e taekinaki bwa ko na kaota te tamnei, ko kona n onea mwiina n anenea te kuna ae irekereke ma ngaia ni kairiia ataei ake iai aia kaangaanga n aia taratara.

• Karaoi katein ao bairean te tekateka n te umwanreirei. Teuana te kawai ibukin karaon aei bon karaoan te boutita are e kaota bairean aron te kiraati. Te babaire e kona ni kaira te tataro, tain te reirei, tain te mwakuri ni kauring. Aio e kona ni kakerikaaka namakinan te aki barongaki are e kona ni karekea te raraoma irouia tabeman ataei.

• Kabongana tamnein te mwakuri. Ataei aika aki toamau ke ake aki rau a na rangi ni buokaki man tamnei aikai, n aron tamnei aika kaoti anua aika tamaroa n aron katean te bai imwain kaekan te titiraki.

• Oota bwa bukin tera a riki anua aika kakaewenako. Reiakina rongorongon te aki toamau ke taai ake a na kaira te ataei bwa e na karaoi mwakuri aika aki raoiroi. Taraia raoi bwa tera ae e riki n te tai are a kaoti iai anua aika a kakaewenako. Iango ma te tataro bwa ko na kanga ni biti waaki bwa ko aonga riki ni boutoka te ataei.

• Buokiia ataei n tatabmeniia bwa a na rikirake ao n tokanikai. Iotebwa Timiti e reirei, “Ni kabane iango ao tamnei are e kanakoi te Atua nakon te aonaaba a kona n rikirake ke n tamaroa” (Teachings of Presidents of the Church: Joseph Smith [2007], 210). Tai iangoia bwa te ataei ae aki toamau e aki kona n reiakinaki ke n tibwatibwa. Bubutiia te Uea bwa e na buokiko n ataia bwa kona kanga ni buokiia ataei ni karekea aroia n te maiu n tamnei.