Ngkoe Aia Tia Reirei Ataei

Ko a tia ni weteaki iroun te Atua bwa ko na tangiriia ao n reireiniia Natina n ana kawai te Tia Kamaiu. Ko kamatoaaki ibukin te wewete aei man te kariaia are irouia Ana nakoanibonga aika tabu. Riki ngkana tiaki ngkoe te tia reirei ae taneiai, ngkai ko maiuakina ae tau, tataro ni katoabong, ao ni kamatebwai koroboki aika tabu, Tamara are i Karawa e na anganiko te wirikiriki ao mwaakan te Tamnei ae Raoiroi bwa e na buokiko bwa ko na nakoraoi (taraa 2 Nibwaai 33:1).

Naake ko onimakinaki bwa ko na tararuaia bon natin Tamara are i karawa, ao E ata te bwai ae a kainnanoia ao te kawai ae tamaroa are a na buokaki iai. Rinanon te Tamnei ae Raoiroi, te Atua e na kairiko ngkai ko katauraoi ao ngkai ko anga reirei. E na kaoti nakoim bwaai ake ko na riai n taekin ao bwaai ake ko riai ni karaoi (taraa 2 Nibwaai 32:5).

N aron taraan maiuia, ataei aika a kakaawaki aikai a teimatoa ni karekei rongorongo, ni katabwanini ao ni kaitiaki aia iango, ni karaoi ao n tibwai kukune. Aio bon koauana riki ma te euangkerio, bwa irouia ataei a tauraoi ao a ingainga n reiakin koauana ae bebete. Aia onimaki ni bwain te maiu n tamnei e korakora ao e itiaki, ao a noori ni katoa tai bwa aia tai n reiakinaki. A tatauraoi ni mwakuri iaon te bwai are a reiakinna, riki ngkana otaia e teimatoa n aki bwanin. Aio aron ae ti riai ni bane ni butimwaea iai te euangkerio. N aron are e reirei iai te Tia Kamaiu, “Ba ane aki taua bukin uean te Atua n ai aron te tei ae uarereke ao e bon aki rin iai.” (Ruka 18:17).

Te wewete n riki bwa aia tia reirei ataei bon te onimakinaki ae tabu, ao bon te bwai ae riiriki namakinan ae ko aki kona uotam n taai tabetai. Ma uringnga bwa Tamara are i Karawa e wetei ngkami, ao e na bon aki katinanikui ngkami. Aio bon ana mwakuri te Uea, ao ngkai kam beku “ma nanomi, marurungimi, ami iango ao korakorami ni kabane” (Reirei ao Berita aika Tabu 4:2). E na karababa riki ami konabwai, bwaintangira, ao tarena, ao ami beku e na kakabwaiai maiuia ataei ake kam reireiniia.