“Kabonganan Nakomai, Iriirai—Ibukin te Moanrinan,” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Kabonganan Nakomai, Iriirai—Ibukin te Moanrinan,” Nakomai, Iriirai—Ibukin te Moanrinan: 2021
Kabonganan Nakomai, Iriirai—Ibukin te Moanrinan
Katauraoi n Anga reirei n te Moanrinan
Te kamatebwai i bon iroum ao n te utu n te mweenga e riai n riki bwa te tienta ibukin kamatebwaian te euangkerio. Aio e koaua ibukim ao ibukiia ataei ake ko reireniia. N am katauraoi ibukin am anga reirei, waaki man karekean oin am atatai man koroboki aika tabu. Am katauraoi ae moan te kakawaki e na riki n am tai n ukori koroboki aika tabu ao n ukora ana kairiiri te Tamnei ae Raoiroi.
Nakomai, Iriirai—Ibukiia Aomata n Tatabeman ao Utu bon te mwakoro naba ae kakawaki n am kamatebwai ao am katauraoi ibukin te anga reirei. E na buokiko ni karekea ootam ae nano riki n taian reirei ake a kuneaki ni koroboki aika tabu.
N am tai ni katauraoi, iango ao namakin a na roko nakoim ibukiia ataei ake ko na reireiniia. Ko na karekei naba nonoori bwa a na kanga reirei ake ni koroboki aika tabu ni kakabwaiai maiuia. Ko na kairaki ni kaungai nanoia n reiakinii reirei akanne ngkai a reirei man koroboki aika tabu i bon irouia ma aia utu. Uringnga n taraia ataei ake iai baika a riki n aia utu ao aki boutokaki ni kakaraoa te kamatebwai n te utu ao te bootaki n utu n te tairiki.
Iango ibukin te Anga reirei
N am tai ni katauraoi n anga reirei, ko na kona ni karekei rakan riki kairam mairoun te tamnei man norakin waaki ni kamataata n te anga reirei n te bwai n ibuobuoki aei. Tai iangoi iango aikai bwa kaetieti aika a na iraki ma iangoi bwa iango aika a na karekea oin am iango. Ko kinaia ataei aikai—ao ko na kinaia riki ngkana ko reitaki ma ngaia n te kiraati. Te Uea e kinaia naba, ao E na anganiko kawai aika tamaroa ibukin reiakinaia ao ni kakabwaiaia.
E mwaiti riki bwaai ni kairi aika a tauraoi bwa ko na kabonganai n am katauraoi, n ikotaki ma iango ake n Nakomai, Iriirai—Ibukiia Aomata n Tatabemaniia ao Utu ao ana maekatiin te Ekaretia. Ibukin rongorongon riki bwaai ni kairi aikai ao ake tabeua, taraa “Bwai ni Kairi Riki Tabeua ibukin Reiakinaia Ataei” n te boki aei.
Tabeua Bwaai aika a na Uringaki
-
Kaaro ma tiina bon tabeia reiakinakia natiia. Ngkai ngkoe te tia reirei, iai tabem ae kakawaki bwa ko na boutoka, kaunga, ao ni kateitei iaon are e kamatebwaiaki n te mweenga. Uringiia ataei ake aia karo a aki reireiniia te euangkerio ni mweengaia. Kairia ataei ni kabane n taian marooro n te euangkerio, n aki taraia bwa aekakira mweengaia.
-
Ataei a kona n reiakinna man tibwauakin bwaai ake atai. N tabetai taai aika te kabanea ni korakora n anga reirei e riki ngkana a bon reireiniia ataei i bon irouia n te bwai are a tia n reiakinna man booki aika tabu. Katauraoa te tai ae mwaiti ibukin aia tai n tibwatibwa ataei.
-
Ootaia n taian anga reirei ake inanon Reirei ao Berita aika Tabu e bebete ibukiia ataei ngkana a atai rongorongon bwaai aika riki n te aro ibukin reirei akanne. Ko kona ni kunei rongorongon bwaai aika riki n te aro inanon Nakomai, Iriirai—Ibukiia Aomata n Tatabemaniia ao Utu ao Karaki n Reirei ao Berita aika Tabu.
-
E tamaroa kaokiokan bwaai. Ataei a reiakinii riki koaua n te euangkerio ngkana a kaokiokaki koaua aikai rinanon waaki ni kakukurei aika a kakaokoro. Ngkana ko nooria bwa te mwakuri ni kauring e raoiroi ibukiia ataei, iangoia bwa ko na kaokiokia, riki ngkana ko reireiniia ataei aika a uarereke. Ko kona naba n rinanon te mwakuri ni kauring man te reirei ae nako.
-
Tamara are i Karawa e tangiria bwa kona nakoraoi n nakoam ae te tia reirei. E a tia ni katauraoi bwaai n ibuobuoki aika a mwaiti, n ikotaki ma aia bootaki ni kauntira taan reirei. N tain te bootaki aei kam kona n reirei ma tia reirei ake tabeman iaon taian kakaewenako ake kam kaaitarai. Ko kona naba ni maroroakin ao ni maiuakin reirei n aron ana anga reirei Kristo.
-
Ngkana ko reireiniia ataei aika a uarereke ao ko kainnanoa riki te ibuobuoki, taraa “Tobwaan Kainnanoia Ataei aika a Uarereke” n te boki aei.
-
Te bwai n reirei aei iai inanona kamataata n reirei ibukin wiiki nako n te ririki. N Tabati are ngkana akea iai te reirei n te Moanrinan ibukin te maungatabu ni kabuta, te maungatabu n te titeiki ke n iai riki bukina tabeua, utu a riai n reitinako ni wareka Reirei ao Berita aika Tabu n te mweenga ni kaineti ma te tai are e a tia ni baireaki. Tai raraoma ibukin te reirei are e aki reke taina iroum n anga; anga reirei iaon are e a tia ni baireaki ibukin kanoan te wiiki.