Te menema o te ’ō

15-21 nō ’Ēperēra.

Pāsa

« E hade ē, teihea tō ’oe rē?"

’A fa’a’ohipa i tō ’outou taime i pīha’i iho i te mau tamari’i nō te tauturu ia rātou ’ia hi’o i te Pāsa ’ei pu’e tau nō te ’oa’oa i roto i te Fa’aora ’e nō te fa’ahōhonu i tō rātou māuruuru nō tāna tusia. E nehenehe i te mana’o i roto i teie fa’anahora’a e fa’atanohia nō te tauturu ia ’outou ’ia ha’api’i i te mau tamari’i nō te mau huru matahiti ato’a.

Pāpa’i i tō ’outou mau mana’o

tāpa’o nō te fa’a’itera’a

Ani ’ia fa’a’ite

Nō te tauturu i te mau tamari’i ’ia fa’a’ite mai i te mea tā rātou i ’ite nō ni’a ia Iesu Mesia ’e tāna tāra’ehara, e ti’a ia ’outou ’ia fa’a’ite i te mau hōho’a o te Fa’aora i Gētēsemāne, i ni’a i te sātauro, ’e i muri a’e i tōna ti’afa’ahoura’a (’a hi’o i te hōho’a i roto i te fa’anahora’a nō teie hepetoma i roto Mai, pe’e mai—Nō te ta’ata iho ’e te ’utuāfare ’e Gospel Art Book, nos. 56, 57, 58, 59, ’e 60).

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i ’āpī a’e

O Iesu to’u Fa’aora

’A tai’o ai ’outou nō ni’a i te tāra’ehara a Iesu Mesia, a feruri māite nāhea e ti’a ai ia ’outou ’ia tauturu i te mau tamari’i ’ia ’ite, e here rahi tō Iesu ia rātou.

Te mau ’ohipara’a e ti’a ’ia rave

• ’A ha’api’i i te mau tamari’i ē, nō te mea, e hara tātou pā’āto’a, e’ita e ti’a ia tātou ’ia ho’i i te Atua ra ’aita ana’e hō’ē Fa’aora tei mamae nō tā tātou mau hara. E nehenehe Iesu Mesia e fa’aora ia tātou i tā tātou mau hara mai te mea e tātarahapa tātou. ’A tāpe’a i te hō’ē hi’o, ’e ’a vaiiho i te mau tamari’i ’ia hi’o tāta’itahi i roto. ’A nā reira ai te tamari’i tāta’itahi, ’a parau, « ’ua here Iesu ia [te i’oa ’o te tamari’i], ’e e nehenehe ’oia e fa’aora ia [te i’oa o te tamari’i] ».

• ’A fa’a’ite i te hōho’a Te purera’a Iesu i Gētēsemāne (Gospel Art Book, no. 56) ’a fa’ati’a ai ’outou i te ’ā’amu ’o Iesu e mamae ra i Gētēsemāne nō te mau hara a tō te ao nei (’a hi’o Mataio 26:36–46; Luka 22:39–44). ’A fa’ata’a ē, nā roto i tōna mamae, e nehenehe tā tātou hapa e fa’a’orehia ’ia rave ana’e tātou i te hō’ē mā’itira’a tano ’ore. E nehenehe tā ’outou e fa’a’ohipa i te « Pene 51 : ’Ua mamae Iesu i roto i te ’ō nō Gētēsemāne », Te mau ’ā’amu nō te Faufa’a ’Āpī, 129-32, ’e ’aore rā, te video e tano (LDS.org).

• ’A hīmene ’āmui « Je ressens son amour », Chants pour les enfants, 42–43. E aha te mau ta’o i roto i te hīmene o tē fa’ata’a nei i te here ’o te Fa’aora ? ’A ani i te mau tamari’i nāhea e ti’a ai ia rātou ’ia tauturu ia vetahi ’ē ’ia ’ite i te here o te Fa’aora.

Nō te mea ’ua ti‘afa’ahou Iesu, e ti’a ïa iā’u ’ia ora fa’ahou .

Nā hea e ti’a ai ia ’outou ’ia tauturu i te mau tamari’i ’ia ’ite ē, aua’e Iesu Mesia, e ti’afa’ahou ai tātou ’e tei herehia e tātou, i te hō’ē mahana ?

Te mau ’ohipara’a e ti’a ’ia rave

• ’A ha’api’i i te mau tamari’i i te ’ā’amu nō te Pāsa ma te fa’a’ohipa i te mau hōho’a ’o te Mesia i roto i Gētēsemāne, i ni’a i te sātauro, e i muri a’e i tōna ti’afa’ahoura’a, e ’itehia i roto i Gospel Art Book (nos. 56, 57, 58, 59, ’e  60), e te ’api hōho’a tā’āto’a i roto i te fa’anahora’a nō teie hepetoma i roto Mai, pe’e mai—Nō te ta’ata iho ’e te ’utuāfare. ’A vaiiho i te tahi mau tamari’i ’ia tāpe’a i te mau hōho’a ’a fa’ati’a ai ’outou i te ’ā’amu. A parau i te mau tamari’i nō ni’a i te tahi mau ta’ata tei ’ite ia Iesu i muri a’e i tōna ti’afa’ahoura’a, mai ia Maria (’a hi’o Ioane 20:1–18) ’e ’aore rā, Thomas (a hi’o Ioane 20:24–29).

• ’A hi’o atu nā, ’ua ’ite ānei te mau tamari’i nō te aha tātou e fa’ahanahana ai i te Pāsa. ’A fa’ata’a ē, i te Pāsa e fa’ahanahana tātou i te mahana faufa’a roa a’e i roto i te ’ā’amu—te mahana ’a ti’afa’ahou ai Iesu Mesia. ’A ani atu, e hina’aro ānei te tahi mau tamari’i e fa’a’ite mai, e aha tā tō rātou ’utuāfare e rave nō te ha’amana’o i te ti’afa’ahoura’a ’o Iesu Mesia.

• ’A fa’ata’a ē, te aura’a ’o te parau ti’afa’ahou ’e ora fa’ahou ïa i muri a’e i tō tātou pohera’a. ’A fa’a’ite i tō ’outou ’itera’a pāpū ē, maoti Iesu Mesia, e ti’afa’ahou ai tātou—e ora fa’ahou tātou i muri a’e i tō tātou pohera’a, ’e e ’ore roa tātou e pohe fa’ahou.

• ’A fa’a’ohipa i te hō’ē rimarima nō te ha’api’i i te mau tamari’i ē, e tino tō tātou pā’āto’a (fa’ahōho’ahia e te rimarima) ’e te vārua (fa’ahōho’ahia e te hō’ē rima). ’Ia pohe ana’e tātou, e tāmau noa tō tātou vārua i te ora, ’eiaha rā tō tātou tino. ’Ia ti’afa’ahou ana’e tātou, e ’āmui-fa’ahou-hia tō tātou vārua ’e te tino. ’A vaiiho i te tamari’i tāta’itahi ’ia ’ō’omo i te rimarima ’e ’ia tatara.

• ’A hīmene ’āmui i te hō’ē hīmene Pāsa, mai teie « Jésus est-il ressuscité ? » ’e ’aore rā « Jésus est ressuscité », Chants pour les enfants, 45, 44, ’e ’a fa’a’ite i te mau tamari’i i te mau hōho’a nō Iesu i muri a’e ’a ti’afa’ahou ai ’oia (Gospel Art Book, nos. 59, 60, 61).

• ’A fa’a’ite i te hō’ē hōho’a o te hō’ē ta’ata tā ’outou i ’ite tei pohe. ’A fa’a’ite i tō ’outou ’itera’a pāpū ē, e ti’afa’ahou mai ’oia nā roto i te tāra’ehara ’e te ti’afa’ahoura’a ’o Iesu Mesia.

• ’A māta’ita’i ’āmui i te mau video « ’Ua ti’afa’ahou Iesu » ’e ’aore rā « ’Ua fā mai te Fatu tei ti’afa’ahou i te mau ’āpōsetolo » (LDS.org). E ’itehia te tahi atu mau parau poro’i nō te Pāsa i ni’a i te mormon.org/easter.

Te Mesia e ’o Maria i te mēnema ta’ata ’ore i roto

’Ua ti’afa’ahou ’oia, nā Greg Olsen

tāpa’o nō te ha’api’ira’a

Ha’api’i i te ha’api’ira’a tumu

Te mau tamari’i pa’ari a’e

’Ua mamae Iesu nō’u i Gētēsemāne ’e i ni’a i te sātauro.

’A tuatāpapa ai ’outou i te tāra’ehara ’o te Fa’aora, ’a feruri nāfea e ti’a ai ia ’outou ’ia tauturu i te mau tamari’i ’ia ’apo mai ’e ’ia ha’amana’o ē, ’ua mamae te Mesia i Gētēsemāne ’e i ni’a i te sātauro nō tā rātou mau hara, mau ma’i, ’e mau ’oto.

Te mau ’ohipara’a e ti’a ’ia rave

• ’A tai’o ’e te mau tamari’i Luka 22:39–44 ’e ’a mā’iti i te mau ’īrava i roto i te Mataio 27:29–50. ’A ani ia rātou ’ia ’imi i te mau ta’o o te tauturu ia rātou ’ia hāro’aro’a i te mea tā te Fa’aora i fārerei i Gētēsemāne ’e i ni’a i te sātauro.

• ’A tauturu i te mau tamari’i ’ia tāmau ’ā’au i te hiro’a fa’aro’o toru. ’A fa’a’ite i tō ’outou ’itera’a pāpū ē, e mana tō Iesu Mesia nō te fa’aora ia tātou i te hara ’e i te pohe.

• ’A tauturu i te mau tamari’i ’ia fa’aineine i te mau a’ora’a poto nō ni’a i te tāra’ehara o Iesu Mesia ’o tā rātou e nehenehe e fa’a’ite atu ia vetahi ’ē. ’A fa’aitoito ia rātou ’ia tu’u i te hō’ē pāpa’ira’a mo’a ’e tō rātou ’itera’a pāpū i roto i tā rātou a’ora’a. Mai te mea ē, e hina’aro rātou i te tahi atu tauturu, e nehenehe tā rātou e tai’o « Tāra’ehara o Iesu Mesia »” i roto Mau Māite i te Fa’aro’o (14–21).

Nō te mea ’ua pohe Iesu ’e ’ua ti‘afa’ahou, e ora fa’ahou ïa vau.

E fārerei te mau tamari’i tā ’outou e ha’api’i ra, i te hō’ē mahana, i te pohe o te hō’ē tei herehia, mai te mea ’aita ā rātou i fārerei atura. ’A tauturu ia rātou ’ia ’ite ē, nō te mea ’ua ti‘afa’ahou Iesu, e ti‘afa’ahou ïa tātou pā’āto’a.

Te mau ’ohipara’a e ti’a ’ia rave

• ’A fa’a’ite i Gospel Art Book, nos. 57, 58, ’e 59, ’e ’a ani i te mau tamari’i ’ia fa’atano i te mau hōho’a i ni’a i te mau tuha’a parau i muri nei : Mataio 27:29–38, 59–60; Ioane 20:10–18.

• ’A ani i te mau tamari’i ’ia tai’o « Ti’afa’ahoura’a » i roto i te fa’atoro Bibilia ’e ’ia pāpa’i i te mau uira’a hi’opo’a tā rātou e nehenehe e ui nō ni’a iho i te mea tā rātou i tai’o. ’A hōro’a i te mau tamari’i i te taime nō te ui i te tahi ’e te tahi i tā rātou mau uira’a, ’e ’ia ’imi ’āmui i te mau pāhonora’a.

• ’A tauturu i te mau tamari’i ’ia hi’o i roto i te fa’ahorora’a tumu parau o te Chants pour les enfants nō te ’ite i te hō’ē hīmene o tā rātou e hina’aro e ha’api’i mai nō ni’a ia Iesu Mesia ’e ’aore rā nō ni’a i te ti’afa’ahoura’a. ’A hīmene ’āmui i te tā’āto’ara’a o te hīmene, te tahi ma’a taime. ’A ani i te mau tamari’i e aha tā rātou i ha’api’i mai nā roto mai i teie hīmene.

• Hou te ha’api’ira’a, ’a ani i te tahi mau tamari’i ’ia haere mai ma te ineine e fa’a’ite i tō rātou ’itera’a pāpū nō ni’a i te tāra’ehara ’e te ti’afa’ahoura’a o te Fa’aora. ’A ani i te mau tamari’i ’ia pāpa’i i tō rātou ’itera’a pāpū nō te fa’a’ite i te fare.

tāpa’o nō te ’apora’a mai

Fa’aitoito i te ha’api’ira’a mai i te fare

Nō te tauturu i te mau tamari’i ’ia fa’a’ite i tō rātou ’utuāfare i te mea tā rātou i ’apo mai, ’a fa’aitoito ia rātou ’ia hīmene i te hō’ē hīmene i te fare, nō ni’a ia Iesu Mesia, i teie hepetoma.

Ha’amaita’i i tā tātou ha’api’ira’a

E fāna’o te mau tamari’i nā roto mai i te tāpiti-noa-ra’a. ’Eiaha e mata’u i te nā ni’a-fa’ahou-noa-ra’a te mau ’ohipara’a e rave rahi taime, nō te mau tamari’i ’āpī a’e ihoa ra. E tauturu te tāpiti-noa-ra’a i te mau tamari’i ’ia ha’amana’o i te mea tā ’outou i ha’api’i.

’api ’ohipara’a : E ora fa’ahou vau