« ថ្ងៃទី ៥–១១ ខែ សីហា រ៉ូម ១–៦ ៖ ‹ ព្រះចេស្តានៃព្រះ សម្រាប់នឹងជួយសង្គ្រោះ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ៥–១១ ខែ សីហា រ៉ូម ១–៦ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ថ្ងៃទី ៥–១១ ខែ សីហា
រ៉ូម ១–៦
« ព្រះចេស្តានៃព្រះ សម្រាប់នឹងជួយសង្គ្រោះ »
តើការបំផុសគំនិតណាខ្លះ ដែលអ្នកទទួលបានពេលអ្នកអាន រ៉ូម ១–៦ ? ការបំផុសគំនិតទាំងនេះអាចជួយអ្នក ជ្រើសរើសចេញពីគំនិតនៃការបង្រៀនខាងក្រោមនេះ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមអញ្ជើញកុមារឲ្យចែកចាយអ្វីដែលពួកគេបានធ្វើ ដើម្បីឆ្លើយតបទៅនឹងការអញ្ជើញនានា ដែលអ្នកបានផ្ដល់ដល់ពួកគេនៅក្នុងមេរៀនកាលពីសប្ដាហ៍មុន ។ ឧទាហរណ៍ តើពួកគេបានជជែកជាមួយក្រុមគ្រួសាររបស់ពួកគេ អំពីការលិចសំពៅដែលមានចែងនៅក្នុង កិច្ចការ ២៧ និងអំពីការធ្វើតាមព្យាការីដែរឬទេ ?
បង្រៀនគោលលទ្ធិ
កុមារតូចៗ
ខ្ញុំអាចបង្ហាញសេចក្ដីជំនឿរបស់ខ្ញុំលើព្រះយេស៊ូវគ្រីស្ទ តាមរយៈការធ្វើតាមទ្រង់ ។
ប៉ុលបានបង្រៀនថា ដំណឹងល្អមានអំណាចនាំយកសេចក្ដីសង្គ្រោះទៅដល់មនុស្សគ្រប់រូបដែលរស់នៅដោយសេចក្ដីជំនឿលើព្រះយេស៊ូវគ្រីស្ទ ។ តើអ្នកអាចជួយកុមារបង្ហាញសេចក្ដីជំនឿរបស់ពួកគេលើព្រះយេស៊ូវគ្រីស្ទ តាមរយៈការធ្វើតាមទ្រង់ តាមរបៀបណា ?
សកម្មភាពដែលអាចជ្រើសរើស
-
សូមជួយកុមារឲ្យស្គាល់ទីតាំងក្រុងរ៉ូមនៅផែនទី ។ សូមពន្យល់ថា គម្ពីររ៉ូមមាននូវសំបុត្រមួយច្បាប់ដែលប៉ុលបានសរសេរទៅកាន់ពួកបរិសុទ្ធនៅក្រុងរ៉ូម ដើម្បីឲ្យពួកគេយល់អំពីគោលការណ៍នៃដំណឹងល្អមានដូចជាសេចក្ដីជំនឿ ។
-
សូមអាន រ៉ូម ១:១៧ ឲ្យកុមារស្ដាប់ ហើយជួយពួកគេទន្ទេញចាំឃ្លា « មនុស្សសុចរិតនឹងរស់នៅ ដោយអាងសេចក្តីជំនឿ » ។ អ្នកអាចចាត់ឲ្យកុមារអានមួយពាក្យម្នាក់ៗនៅក្នុងឃ្លានោះ ហើយឲ្យពួកគេថាពាក្យនោះនៅពេលអ្នកចង្អុលទៅកាន់ពួកគេ ។ សូមពន្យល់ថា ឃ្លានេះមានន័យថា យើងគួរតែរស់នៅដោយមានសេចក្ដីជំនឿលើព្រះយេស៊ូវគ្រីស្ទជារៀងរាល់ថ្ងៃ ។ តើកុមារស្គាល់អត្ថន័យនៃសេចក្ដីជំនឿដែរឬទេ ? សូមបង្ហាញរូបភាពព្រះយេស៊ូវគ្រីស្ទ ហើយពន្យល់ថា យើងជឿថាទ្រង់មានព្រះជន្មពិត ទោះជាយើងមិនធ្លាប់មើលឃើញទ្រង់ក្ដី ។ នេះគឺជាសេចក្ដីជំនឿ—ដោយជឿលើអ្វីមួយទោះជាយើងមិនធ្លាប់ឃើញវាក្ដី ។
-
សូមពន្យល់ថា យើងបង្ហាញសេចក្ដីជំនឿរបស់យើងលើព្រះយេស៊ូវគ្រីស្ទ តាមរយៈការធ្វើតាមទ្រង់ ។ សូមលាក់រូបភាពនៅជុំវិញបន្ទប់រៀន ជារូបភាពនៃមនុស្សដែលធ្វើតាមអ្វីដែលព្រះយេស៊ូវបានត្រាស់បង្គាប់ឲ្យធ្វើ ។ សូមទុកឲ្យកុមារដាក់វេនគ្នាស្វែងរករូបភាព ហើយពិពណ៌នាអំពីរូបភាពទាំងនោះ ។ តើយើងអាចធ្វើអ្វីខ្លះ ដើម្បីធ្វើតាមព្រះយេស៊ូវ ?
-
សូមយកក្រណាត់ចងភ្នែកកុមារម្នាក់ ហើយដឹកដៃគាត់ដើរទៅកាន់រូបភាពរបស់ព្រះយេស៊ូវគ្រីស្ទ ។ សូមទុកឲ្យកុមារម្នាក់ៗមានឱកាសម្ដង ។ សូមជួយកុមារយល់ថា ពួកគេគួរតែធ្វើតាមការបង្រៀនរបស់ព្រះយេស៊ូវ គឺដូចជាពេលពួកគេបានធ្វើតាមការដឹកដៃរបស់អ្នកដែរ ។
ការទទួលពិធីបុណ្យជ្រមុជទឹក គឺដូចជាការក្លាយជាមនុស្សថ្មីម្នាក់ ។
កុមារដែលអ្នកបង្រៀន កំពុងតែរៀបចំខ្លួនទទួលពិធីបុណ្យជ្រមុជទឹក ។ តើពួកគេអាចរៀនអ្វីខ្លះអំពីពិធីបុណ្យជ្រមុជទឹក ចេញពីសេចក្ដីណែនាំរបស់ប៉ុលឲ្យ « ដើរក្នុងជីវិតបែបថ្មី » ?
សកម្មភាពដែលអាចជ្រើសរើស
-
សូមអញ្ជើញកុមារឲ្យថាតាមអ្នកនូវឃ្លា « ដើរក្នុងជីវិតបែបថ្មី » ( រ៉ូម ៦:៤ ) ។ សូមពន្យល់ថា នៅពេលយើងទទួលពិធីបុណ្យជ្រមុជទឹក យើងទទួលបានការអត់ទោសពីអំពើបាប ។ យើងមានឱកាសឆ្ពោះទៅមុខទៀតដោយការធ្វើជម្រើសត្រឹមត្រូវ ការប្រែចិត្តពេលយើងធ្វើកំហុស និង ការខិតខំឲ្យកាន់តែក្លាយដូចព្រះយេស៊ូវ ។ សូមប្រើទំព័រសកម្មភាពសម្រាប់សប្ដាហ៍នេះដើម្បីបង្រៀនកុមារថា ពិធីបុណជ្រមុជទឹកជួយយើងក្លាយជាមនុស្សថ្មីម្នាក់ ។
-
សូមប្រាប់កុមារអំពីអារម្មណ៍របស់អ្នកនៅពេលអ្នកទទួលពិធីបុណ្យជ្រមុជទឹក រួចអញ្ជើញពួកគេឲ្យចែកចាយបទពិសោធន៍នៅពេលពួកគេបានចូលរួមក្នុងពិធីបុណ្យជ្រមុជទឹក ។ សូមអញ្ជើញពួកគេឲ្យគូររូបខ្លួនឯងអំពីពិធីបុណ្យជ្រមុជទឹករបស់ពួកគេនៅថ្ងៃខាងមុខ រួចចែកចាយកិច្ចការដែលពួកគេអាចធ្វើ ដើម្បីត្រៀមខ្លួនទទួលពិធីបុណ្យជ្រមុជទឹក ។
-
សូមច្រៀងជាមួយកុមារនូវបទចម្រៀងអំពីពិធីបុណ្យជ្រមុជទឹក មានដូចជា « ពេលខ្ញុំបានជ្រមុជទឹក » ( សៀវភៅចម្រៀងកុមារ ទំព័រ ១០៣ ) ។ តើយើងរៀនអ្វីខ្លះអំពីពិធីបុណ្យជ្រមុជទឹក ចេញមកពីបទចម្រៀងនេះ ?
បង្រៀនគោលលទ្ធិ
កុមារធំៗ
ខ្ញុំអាចបង្ហាញសេចក្ដីជំនឿរបស់ខ្ញុំលើព្រះយេស៊ូវគ្រីស្ទ តាមរយៈការធ្វើតាមទ្រង់ ។
ប៉ុលបានបង្រៀនថា ដំណឹងល្អមានអំណាចនាំយកសេចក្ដីសង្គ្រោះទៅដល់មនុស្សគ្រប់រូបដែលរស់នៅដោយសេចក្ដីជំនឿលើព្រះយេស៊ូវគ្រីស្ទ ។ សេចក្តីជំនឿគឺជាគោលការណ៍ទីមួយនៃដំណឹងល្អ ។ វាជំរុញចិត្តយើងឲ្យគោរពប្រតិបត្តិតាមព្រះបញ្ញត្តិ ។ តើអ្នកអាចជួយកុមារ ឲ្យយល់អំពីសេចក្ដីជំនឿកាន់តែច្បាស់ តាមរបៀបណា ?
សកម្មភាពដែលអាចជ្រើសរើស
-
សូមឲ្យកុមារម្នាក់រកមើលទីតាំងក្រុងរ៉ូមនៅលើ ផែនទី ។ សូមជួយកុមារឲ្យយល់ថា នៅប៉ុន្មានសប្ដាហ៍ក្រោយទៀត ពួកគេនឹងរៀនអំពីសំបុត្រទាំងឡាយដែលប៉ុលបានសរសេរទៅកាន់សមាជិកសាសនាចក្រ នៅទីកន្លែងផ្សេងៗគ្នា ចាប់ផ្ដើមដោយសំបុត្ររបស់លោកទៅកាន់ពួករ៉ូម ។
-
សូមសរសេរអត្ថបទចេញពី រ៉ូម ១:១៦ នៅលើក្ដារខៀន ដោយលុបពាក្យខ្លះហើយ ជំនួសវិញដោយចន្លោះ ។ សូមឲ្យកុមារស្វែងរកខគម្ពីរនោះ ហើយបំពេញចន្លោះ ។ សូមចង្អុលបង្ហាញឃ្លា « ខ្ញុំគ្មានសេចក្តីខ្មាស ចំពោះដំណឹងល្អនៃព្រះគ្រីស្ទទេ » រួចអញ្ជើញកុមារឲ្យចែកចាយ ថា តើឃ្លានេះមានអត្ថន័យដូចម្ដេចចំពោះពួកគេ ។
-
សូមអញ្ជើញកុមារអានឮៗ រ៉ូម ១:១៧ រួចឲ្យកុមារដទៃទៀតស្ដាប់ ស្វែងរកពាក្យដែលថ្លែងដដែលៗ ។ តើ « រស់នៅ ដោយអាងសេចក្តីជំនឿ » មានន័យដូចម្ដេច ? សូមជួយកុមារឲ្យស្វែងរកនិយមន័យសេចក្ដីជំនឿ តាមរយៈធនធានមួយមានដូចជា សេចក្ដីណែនាំដល់បទគម្ពីរទាំងឡាយ « សេចក្តីជំនឿ » scriptures.lds.org ។ តើជីវិតរបស់យើងនឹងមានភាពខុសគ្នាដូចម្ដេច ប្រសិនបើយើងពុំមានសេចក្ដីជំនឿលើព្រះយេស៊ូវគ្រីស្ទ ?
-
សូមបង្ហាញដល់កុមារនូវរុក្ខជាតិមួយដើម និង គ្រាប់ពូជមួយគ្រាប់ រួចសួរអំពីរបៀបដែលយើងជួយឲ្យគ្រាប់ពូជមួយក្លាយជារុក្ខជាតិ ។ សូមពន្យល់ថា នៅពេលយើងដាក់ដាំ ហើយស្រោចទឹកគ្រាប់ពូជ នោះយើងកំពុងបង្ហាញថា យើងមានសេចក្ដីជំនឿថាវានឹងដុះធំឡើង ។ តើយើងអាចបង្ហាញថា យើងមានសេចក្ដីជំនឿលើព្រះយេស៊ូវគ្រីស្ទបានយ៉ាងដូចម្ដេច ? សូមគិតដល់ការច្រៀងចម្រៀងមួយបទអំពីសេចក្ដីជំនឿ មានដូចជា « ជំនឿ » ( សៀវភៅចម្រៀងកុមារ ទំព័រ ៥០ ) ទុកជាផ្នែកមួយនៃសកម្មភាពនេះ ។
យើងទាំងអស់គ្នាត្រូវការព្រះយេស៊ូវគ្រីស្ទ ដើម្បីបានការអត់ទោសពីអំពើបាបរបស់យើង ។
ប៉ុលចង់ឲ្យពួករ៉ូមយល់ថា សេចក្តីសង្គ្រោះកើតឡើងតែតាមរយៈព្រះយេស៊ូវគ្រីស្ទ និង ព្រះគុណរបស់ទ្រង់ប៉ុណ្ណោះ ។ សូមពិចារណាអំពីរបៀបដែលអ្នកអាចបង្រៀនសេចក្ដីពិតនេះដល់កុមារ ។
សកម្មភាពដែលអាចជ្រើសរើស
-
សូមអញ្ជើញកុមារម្នាក់អាន រ៉ូម ៣:២៣–២៤ ។ តើកុមារគិតថាខគម្ពីរទាំងនេះ បង្រៀនយើងពីអ្វីខ្លះ ? សូមពន្យល់ថា « ព្រះគុណ » នៅក្នុង ខទី ២៤ មានន័យជាអំណោយនៃសេចក្ដីស្រឡាញ់ និង សេចក្តីមេត្តាករុណារបស់ព្រះអង្គសង្គ្រោះ ដែលធ្វើឲ្យយើងអាចទទួលបានការអត់ទោសពីអំពើបាបរបស់យើង ។
-
សូមព្យួរវត្ថុមួយ ឬរូបភាពមួយខ្ពស់នៅលើជញ្ជាំង ឬទីកន្លែងផ្សេងទៀត ដែលកុមារមិនអាចឈោងដល់ដោយខ្លួនឯងបាន ។ សូមទុកឲ្យពួកគេព្យាយាមឈោងចាប់រួចប្រៀបធៀបការណ៍នេះទៅនឹងសេចក្ដីដែលប៉ុលបង្រៀននៅក្នុង រ៉ូម ៣:២៣ ។ បន្ទាប់មក សូមជួយពួកគេឲ្យឈោងចាប់វាឲ្យបាន ។ តើព្រះអង្គសង្គ្រោះបានធ្វើអ្វីខ្លះសម្រាប់យើង ដែលយើងមិនអាចធ្វើបានដោយខ្លួនយើង ? សូមអញ្ជើញកុមារឲ្យចែកចាយអារម្មណ៍ដែលពួកគេមានអំពីព្រះអង្គសង្គ្រោះ នៅពេលពួកគេគិតអំពីអ្វីៗដែលទ្រង់បានធ្វើសម្រាប់ពួកគេ ។
ការទទួលពិធីបុណ្យជ្រមុជទឹក គឺដូចជាការក្លាយជាមនុស្សថ្មីម្នាក់ ។
ប៉ុលបានបង្រៀនថា ពិធីបុណជ្រមុជទឹកតំណាងឲ្យការសុគត និង ការមានព្រះជន្មរស់ឡើងវិញរបស់ព្រះគ្រីស្ទ ។ វាក៏តំណាងឲ្យ « សេចក្ដីស្លាប់ » នៃបុគ្គលដែលពេញដោយអំពើបាប ហើយត្រូវបានលើកឡើងឲ្យ « ដើរក្នុងជីវិតបែបថ្មី » ដែរ ( រ៉ូម ៦:៤ ) ។ យើងរំឭកការតាំងចិត្តរបស់យើងថានឹងដើរក្នុងជីវិតបែបថ្មីនេះ នៅគ្រប់ពេលដែលយើងទទួលទានសាក្រាម៉ង់ ។
សកម្មភាពដែលអាចជ្រើសរើស
-
សូមអញ្ជើញកុមារម្នាក់អាន រ៉ូម ៦:៣–៦ ។ តើប៉ុលបានថ្លែងអំពីពិធីបុណ្យជ្រមុជទឹកថាជា « ការដែលជាគំរូ » យ៉ាងដូចម្ដេច ?
-
សូមពិភាក្សាអំពីនិមិត្តរូបនៃពិធីបុណ្យជ្រមុជទឹក ដែលជាសេចក្ដីស្លាប់ និង ការរស់ឡើងវិញ ។ សូមគិតដល់ការបង្ហាញវីដេអូ « The Baptism of Jesus » ( LDS.org ) ។ ហេតុអ្វីបានជាសេចក្ដីស្លាប់ និង ការរស់ឡើងវិញ គឺជានិមិត្តរូបដ៏ត្រឹមត្រូវ អំពីអ្វីដែលបានកើតឡើងនៅពេលយើងទទួលពិធីបុណ្យជ្រមុជទឹក ?
-
សូមអានការអធិស្ឋានសាក្រាម៉ង់ទាំងអស់គ្នា ( សូមមើល គ និង ស ២០:៧៧, ៧៩ ) ។ សូមរំឭកកុមារថា នៅពេលយើងទទួលទានសាក្រាម៉ង់ យើងរំឭកការតាំងចិត្តដែលយើងបានធ្វើនៅពេលយើងបានទទួលពិធីបុណ្យជ្រមុជទឹក ដើម្បីដើរតាមព្រះយេស៊ូវគ្រីស្ទ ។ តើពិធីសាក្រាម៉ង់ជួយយើងឲ្យ « ដើរក្នុងជីវិតបែបថ្មី » តាមរបៀបណា ?
-
សូមអញ្ជើញកុមារឲ្យបង្កើតផ្ទាំងប្រកាសមួយ អំពីថា តើ « ដើរក្នុងជីវិតបែបថ្មី » មានន័យដូចម្ដេចចំពោះពួកគេ ។ កុមារអាចព្យួរផ្ទាំងក្រដាសទាំងនេះនៅក្នុងបន្ទប់ពួកគេ ដើម្បីជួយពួកគេឲ្យចងចាំពីការធ្វើជម្រើសត្រឹមត្រូវ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តកុមារឲ្យសុំសមាជិកគ្រួសាររបស់ពួកគេប្រាប់ពួកគេ នៅពេលឃើញថា ពួកគេកំពុងធ្វើអ្វីមួយដែលបង្ហាញពីសេចក្ដីជំនឿ ។
ការកែលម្អការបង្រៀនរបស់យើង
សូមបង្កើតការទុកចិត្តដល់កុមារ ។ ដើម្បីជួយកុមារឲ្យបង្កើតការទុកចិត្តថា ពួកគេអាចរៀនដំណឹងល្អដោយខ្លួនគេបាន នោះសូមសរសើរពួកគេនៅពេលមករៀនក្នុងថ្នាក់ ។