« ថ្ងៃទី ១៩–២៥ ខែ សីហា កូរិនថូស ទី១ ១–៧ ៖ ‹ ត្រូវឲ្យបានរួបរួមគ្នា › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ១៩–២៥ ខែ សីហា កូរិនថូស ទី១ ១–៧ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ទីក្រុង កូរិនថូស ក្រិកភាគខាងជើង មជ្ឈមណ្ឌលវេទិកាប្រជុំ និង សាធារណៈ គំនូរដោយ បាឡាហ្គ បាឡហ្វ
ថ្ងៃទី ១៩–២៥ ខែ សីហា
កូរិនថូស ទី១ ១–៧
« ត្រូវឲ្យបានរួបរួមគ្នា »
ព្រះវិញ្ញាណបរិសុទ្ធនឹងជួយអ្នកឲ្យដឹងពីអ្វីដែលគោលការណ៍ទាំងឡាយនៃដំណឹងល្អនៅក្នុង កូរិនថូស ទី១ ១–៧ នឹងជួយកុមារដែលអ្នកបង្រៀន ។ នៅពេលអ្នកអានជំពូកទាំងនេះប្រកបដោយការអធិស្ឋាន សូមកត់ត្រាគំនិត និងអារម្មណ៍នានា ដែលកើតឡើងចំពោះអ្នកពីព្រះវិញ្ញាណ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
នៅពីរបីថ្ងៃមុនការបង្រៀន សូមអញ្ជើញកុមារម្នាក់ ឬច្រើនឲ្យស្វែងរកនៅក្នុង កូរិនថូស ទី១ ១–៧ នូវអ្វីដែលពួកគេអាចចែកចាយជាមួយសិស្សក្នុងថ្នាក់ ។ ប្រសិនបើចាំបាច់ អ្នកអាចអញ្ជើញឪពុកម្ដាយរបស់ពួកគេឲ្យជួយ ។
បង្រៀនគោលលទ្ធិ
កុមារតូចៗ
ព្រះវិញ្ញាណបរិសុទ្ធបង្រៀនខ្ញុំអំពីសេចក្តីពិតនៃដំណឹងល្អ ។
តួនាទីមួយក្នុងចំណោមតួនាទីទាំងឡាយរបស់ព្រះវិញ្ញាណបរិសុទ្ធ គឺបង្រៀនយើងអំពីសេចក្ដីពិត ។ តើបទពិសោធន៍ណាខ្លះដែលអ្នកអាចចែកចាយជាមួយកុមារ ដើម្បីជួយពួកគេយល់អំពីការណ៍នេះ ?
សកម្មភាពដែលអាចជ្រើសរើស
-
សូមបង្ហាញវត្ថុ ឬរូបភាពនានាដែលបង្ហាញអំពីរបៀបដែលយើងអាចដឹងអំពីលោកិយ ( ដូចជា សាលា សៀវភៅ ឬទូរសព្ទដៃ ) ។ តើយើងអាចដឹងអ្វីខ្លះ នៅពេលយើងប្រើប្រាស់នូវវត្ថុទាំងនេះ ? សូមពន្យល់ថានៅក្នុង កូរិនថូស ទី១ ២:១១, ១៤ ប៉ុលបានបង្រៀនថា យើងអាចដឹងអំពីព្រះ តែតាមរយៈព្រះវិញ្ញាណនៃព្រះ ដែលជាព្រះវិញ្ញាណបរិសុទ្ធប៉ុណ្ណោះ ។ តើយើងអាចធ្វើអ្វីដើម្បីដឹងអំពី « សេចក្ដីខាងឯព្រះ » ?
-
សូមទះដៃនៅពេលអ្នកអានព្យាង្គនីមួយៗនៅក្នុងប្រយោគ « ព្រះវិញ្ញាណបរិសុទ្ធបង្រៀនយើងអំពីសេចក្ដីពិត » ។ សូមឲ្យកុមារទះដៃ ហើយថាតាមឃ្លានោះ ។ សូមចែកចាយជាមួយកុមារ អំពីបទពិសោធន៍មួយនៅគ្រាដែលព្រះវិញ្ញាណបរិសុទ្ធ បានជួយអ្នកឲ្យដឹងថាអ្វីមួយគឺជាការពិត ។
-
សូមច្រៀងជាមួយគ្នានូវបទចម្រៀងអំពីព្រះវិញ្ញាណបរិសុទ្ធ ដូចជាបទ « ព្រះវិញ្ញាណបរិសុទ្ធ » ( សៀវភៅចម្រៀងកុមារ ទំព័រ ៥៦ ) ។ សូមជួយកុមារឲ្យស្វែងរកពាក្យ និងឃ្លានៅក្នុងចម្រៀងនេះ ដែលបង្រៀនអំពីរបៀបដែលព្រះវិញ្ញាណបរិសុទ្ធមានបន្ទូលមកកាន់យើង និងអំពីសេចក្ដីដែលទ្រង់បង្រៀនយើង ។
ព្រះយេស៊ូវគ្រីស្ទគឺជាជើងជញ្ជាំងរបស់ខ្ញុំ ។
កុមារកំពុងតែពឹងផ្អែកលើជើងជញ្ជាំងមួយសម្រាប់ទីបន្ទាល់របស់ពួកគេ ហើយអ្នកអាចជួយពួកគេឲ្យសង់នៅលើជើងជញ្ជាំងដ៏មាំនៃព្រះយេស៊ូវគ្រីស្ទ ។
សកម្មភាពដែលអាចជ្រើសរើស
-
សូមអាន កូរិនថូស ទី១ ៣:១១ ឲ្យកុមារស្ដាប់ រួចពន្យល់ថា ព្រះយេស៊ូវគ្រីស្ទគឺជាជើងជញ្ជាំងរបស់យើង ។ សូមបង្ហាញដល់កុមារនូវរូបភាពនៃវត្ថុមួយចំនួន ដែលយើងអាចមានទីបន្ទាល់ រួមបញ្ចូលទាំងរូបភាពព្រះយេស៊ូវគ្រីស្ទផង ។ សូមជួយពួកគេរៀបចំរូបភាពទាំងឡាយ ដើម្បីដាក់រូបភាពរបស់ព្រះយេស៊ូវគ្រីស្ទនៅក្រោមគេ ទុកដូចជាជើងជញ្ជាំង និងរូបភាពដទៃទៀត « សង់ » នៅលើទីបន្ទាល់អំពីទ្រង់ ។
-
សូមបង្កើតកាយវិការនានាសម្រាប់បទចម្រៀង « មនុស្សប្រាជ្ញា និង មនុស្សល្ងង់ » ( សៀវភៅចម្រៀងកុមារ ទំព័រ ១៣២ ) រួចច្រៀងចម្រៀងនោះជាមួយកុមារ ។ សូមផ្ដល់ឲ្យកុមារម្នាក់ៗនូវថ្មមួយដុំដោយមានសរសេរពាក្យ « ព្រះយេស៊ូវគ្រីស្ទគឺជាជើងជញ្ជាំងរបស់ខ្ញុំ » ។ សូមឲ្យពួកគេយកដុំថ្មនោះទៅផ្ទះ ដើម្បីរំឭកពួកគេអំពីអ្វីដែលពួកគេបានរៀន ។
-
សូមចែកចាយរូបភាពនានាដែលពន្យល់អំពីរឿងមួយចំនួនដែលអ្នកចូលចិត្ត ចេញពីព្រះជន្មរបស់ព្រះអង្គសង្គ្រោះ រួចសូមឲ្យកុមារប្រាប់អ្នកអំពីអ្វីដែលកើតឡើងនៅក្នុងរូបភាពនោះ ។ សូមឲ្យពួកគេចែកចាយរឿងដែលពួកគេចូលចិត្តអំពីព្រះយេស៊ូវ ។ សូមថ្លែងទីបន្ទាល់របស់អ្នកថា ព្រះយេស៊ូវគ្រីស្ទគឺជាជើងជញ្ជាំងនៃសេចក្ដីជំនឿរបស់អ្នក ។
រូបកាយរបស់ខ្ញុំគឺដូចជាព្រះវិហារបរិសុទ្ធ ។
តើអ្នកអាចជួយកុមារឲ្យមានអំណរគុណចំពោះរូបកាយរបស់ខ្លួន ថាជាអំណោយមកពីព្រះ ហើយមានបំណងប្រាថ្នាកាន់តែខ្លាំងដើម្បីថែរក្សារូបកាយរបស់ពួកគេ តាមរបៀបណា ?
សកម្មភាពដែលអាចជ្រើសរើស
-
សូមបង្ហាញរូបភាពព្រះវិហារបរិសុទ្ធដល់សិស្ស ( សូមមើល គម្រោងមេរៀននៅសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និង ក្រុមគ្រួសារ ) រួចអាចពាក្យទាំងនេះចេញពី កូរិនថូស ទី១ ៦:១៩ ៖ « រូបកាយអ្នករាល់គ្នាជាវិហារនៃព្រះវិញ្ញាណបរិសុទ្ធ » ។ សូមជួយកុមារយល់ថា ព្រះវរបិតាសួគ៌សព្វព្រះទ័យឲ្យពួកគេរក្សារូបកាយរបស់ខ្លួនឲ្យបានស្អាតស្អំ និងបរិសុទ្ធ ដូចជាព្រះវិហារបរិសុទ្ធដែរ ។
-
សូមបង្ហាញរូបភាពកុមារម្នាក់ ហើយដាក់រូបភាពផ្សេងៗទៀតនៅជុំវិញរូបភាពកុមារនោះ ដែលជាវត្ថុល្អសម្រាប់រូបកាយ និងមិនល្អសម្រាប់រូបកាយ ។ សូមឲ្យកុមារដាក់វេនគ្នា ចង្អុលរូបភាពនៃវត្ថុល្អ រួចដកយករូបភាពនៃវត្ថុដែលមិនល្អចេញ ។
-
សូមច្រៀងបទចម្រៀងអំពីរូបកាយមួយបទជាមួយគ្នា ដូចជាបទ « ក្បាល ស្មា ជង្គង់ និងជើង » ( សៀវភៅចម្រៀងកុមារ ទំព័រ ១២៩ ) រួចសួរកុមារអំពីមូលហេតុដែលពួកគេ មានអំណរគុណចំពោះរូបកាយរបស់ពួកគេ ។
បង្រៀនគោលលទ្ធិ
កុមារធំៗ
ព្រះមានព្រះបញ្ញាញាណជាងមនុស្ស ហើយខ្ញុំបង្ហាញប្រាជ្ញាពិត នៅពេលខ្ញុំជឿលើការបង្រៀនរបស់ទ្រង់ ។
កុមារដែលអ្នកបង្រៀននឹងឃើញថា—ប្រសិនបើពួកគេពុំបានបង្រៀនអំពីប្រាជ្ញានៃព្រះទេ—នោះមនុស្សមួយចំនួននឹងបង្រៀនអំពីសេចក្ដីដែលប្រឆាំងនឹងប្រាជ្ញានៃព្រះហើយ ។ ការសិក្សានៅក្នុង កូរិនថូស ទី១ ១:២៣–២៥ អាចជួយកុមារយល់ថា ព្រះមានព្រះបញ្ញាញាណជាងមនុស្ស ។
សកម្មភាពដែលអាចជ្រើសរើស
-
សូមអាន កូរិនថូស ទី១ ១:២៣–២៥ ទាំងអស់គ្នា រួចជួយកុមារឲ្យស្វែងរកពាក្យ ប្រាជ្ញា និង សេចក្ដីល្ងង់ល្ងើ ។ សូមពន្យល់ថា មនុស្សជាច្រើនបានគិតថា សេចក្ដីបង្រៀនរបស់ប៉ុលគឺជាសេចក្ដីល្ងង់ល្ងើ ប៉ុន្តែប៉ុលបានពន្យល់ថា ការជឿលើដំណឹងល្អរបស់ព្រះគ្រីស្ទ គឺជាប្រាជ្ញាដ៏ពិត ។ ហេតុអ្វីបានជាវាជារឿងឆ្លាតវៃ ក្នុងការជឿលើសេចក្ដីដែលព្រះបង្រៀន ?
-
សូមជួយកុមារឲ្យសម្ដែងពីរបៀបដែលពួកគេអាចឆ្លើយតបទៅកាន់ មនុស្សដែលគិតថា សេចក្ដីបង្រៀនរបស់សាសានាចក្រគឺជា « សេចក្ដីល្ងង់ល្ងើ »—ដែលជាសេចក្ដីបង្រៀនអំពីការជឿលើព្រះអង្គសង្គ្រោះ ការគោរពតាមពាក្យសម្ដីនៃប្រាជ្ញាវាងវៃ ឬការធ្វើតាមច្បាប់ដង្វាយមួយភាគក្នុងដប់ជាដើម ។ ឧទាហរណ៍ ពួកគេអាចថ្លែងទីបន្ទាល់អំពីពរជ័យនានា ដែលកើតឡើងមកពីការរស់នៅតាមសេចក្ដីបង្រៀនទាំងនេះ ។
-
សូមចែកចាយបទពិសោធន៍មួយនៅពេលដែលមនុស្សដទៃបានគិតថា ជំនឿរបស់អ្នកគឺជាសេចក្ដីល្ងង់ល្ងើ ឬចែកចាយបទពិសោធន៍មួយចេញពីបទគម្ពីរ ។ តើកុមារអាចចែកចាយអំពីបទពិសោធន៍ស្រដៀងនេះដែរឬទេ ? តើ កូរិនថូស ទី១ ១:២៥ អាចជួយយើង បន្តស្មោះត្រង់ នៅពេលមនុស្សដទៃហៅជំនឿយើងថាជាសេចក្ដីល្ងង់ល្ងើ បានយ៉ាងដូចម្ដេច ?
ព្រះវិញ្ញាណបរិសុទ្ធបង្រៀនខ្ញុំអំពីសេចក្តីពិតនៃដំណឹងល្អ ។
តើអ្នកអាចជួយកុមារឲ្យទទួលស្គាល់ថា ពួកគេត្រូវការព្រះវិញ្ញាណបរិសុទ្ធដើម្បីយល់ « សេចក្ដីខាងឯព្រះ » យ៉ាងដូចម្ដេច ?
សកម្មភាពដែលអាចជ្រើសរើស
-
សូមធ្វើបញ្ជីនៃរបៀបនានាដែលយើងដឹងអំពីលោកិយ—ឧទាហរណ៍ សៀវភៅ សាលា និងអ៊ិនធើរណែត ។ បន្ទាប់មក សូមអានទាំងអស់គ្នានៅក្នុង កូរិនថូស ទី១ ២:១១–១៤ ។ តើខគម្ពីរទាំងនេះបង្រៀនអំពីរបៀបដែលយើងដឹង « សេចក្ដីខាងឯព្រះ » យ៉ាងដូចម្ដេច ?
-
សូមអញ្ជើញកុមារចែកចាយអំពីគ្រាមួយ ដែលពួកគេបានទទួលអារម្មណ៍នៃការបំផុសគំនិតមកពីព្រះវិញ្ញាណបរិសុទ្ធ ដែលត្រូវបានហៅផងដែរថា « ព្រះវិញ្ញាណនៃព្រះ » ( កូរិនថូស ទី១ ២:១១–១៤ ) ។ គ្រាទាំងនោះអាចរួមបញ្ចូលទាំងពេលដែលពួកគេនៅព្រះវិហារ អធិស្ឋាន ឬការអានបទព្រះគម្ពីរទាំងឡាយ ។ សូមជួយពួកគេយល់ថា ព្រះវិញ្ញាណបរិសុទ្ធបានបង្រៀនសេចក្ដីពិតដល់ពួកគេ ដូចប៉ុលបានពិពណ៌នា ។
-
សូមអញ្ជើញកុមារម្នាក់ៗអានបទគម្ពីរមួយចេញពីបទគម្ពីរទាំងនេះ កូរិនថូស ទី១ ២:១១–១៤, នីហ្វៃទី១ ១០:១៧, មរ៉ូណៃ ១០:៣–៥, និង គោលលទ្ធិ និង សេចក្ដីសញ្ញា ៨:២–៣ ។ សូមឲ្យសិស្សចែកចាយអ្វីដែលពួកគេបានរៀនពីបទគម្ពីរទាំងនេះ អំពីរបៀបដែលព្រះវិញ្ញាណបរិសុទ្ធបង្រៀនយើង ។ សូមលើកទឹកចិត្តពួកគេឲ្យសរសេរសេចក្ដីយោងទាំងនេះ នៅលើគែមព្រះគម្ពីររបស់ពួកគេ ។
ខ្ញុំគួរតែប្រព្រឹត្តចំពោះរូបកាយខ្ញុំដោយការគោរព ហើយរក្សាវាឲ្យបានបរិសុទ្ធ ។
ការយល់ថា រូបកាយរបស់យើងគឺជាអំណោយមកពីព្រះវរបិតាសួគ៌ នឹងជួយកុមារឲ្យរក្សារូបកាយរបស់ពួកគេឲ្យបានពិសិដ្ឋ ទោះជាពេលពួកគេត្រូវបានល្បួងឲ្យធ្វើដូចនោះក្ដី ។
សកម្មភាពដែលអាចជ្រើសរើស
-
សូមនាំយកកាដូដែលបានខ្ចប់ដោយមានរូបភាពកុមារម្នាក់ និងរូបភាពព្រះវិហារបរិសុទ្ធនៅខាងក្នុង ។ សូមអញ្ជើញកុមារឲ្យអាន កូរិនថូស ទី១ ៦:១៩–២០ រួចទាយថា តើមានអ្វីនៅក្នុងកាដូនោះ ។ សូមឲ្យពួកគេហែកកញ្ចប់កាដូនោះ រួចពិភាក្សាអំពីរបៀបដែលរូបកាយរបស់យើងគឺដូចជាព្រះវិហារបរិសុទ្ធ ។
-
សូមពិភាក្សាជាមួយកុមារអំពីរបៀប ដែលយើងគួរតែប្រព្រឹត្តចំពោះព្រះវិហារបរិសុទ្ធ ។ ប្រសិនបើរូបកាយរបស់យើងគឺដូចជាព្រះវិហារបរិសុទ្ធ តើយើងគួរតែប្រព្រឹត្តចំពោះរូបកាយយើងតាមរបៀបណា ? ការច្រៀង ឬការអានទំនុកបទចម្រៀងមួយអំពីព្រះវិហារបរិសុទ្ធ ដូចជា « ព្រះបានប្រទានវិហារឲ្យខ្ញុំ ( សៀវភៅចម្រៀងកុមារ ទំព័រ ៧៣ ) អាចជួយឆ្លើយសំណួរនេះបាន ។ នៅពេលយើងធ្វើកំហុស តើយើងអាចធ្វើឲ្យ « ព្រះវិហារបរិសុទ្ធ » របស់យើងបានស្អាតឡើងវិញតាមរបៀបណា ?
-
សូមអានទាំងអស់គ្នានៅក្នុងជំពូកមួយចំណងជើងថា « សុខភាពខាងរូបកាយ និង សតិអារម្មណ៍ នៅ ដើម្បីកម្លាំងនៃយុវជន ( ឆ្នាំ ២០១១ ទំព័រ ២៥–២៧ ) ។ សូមអញ្ជើញកុមារឲ្យសរសេរនៅលើក្ដារខៀន នូវដំបូន្មានដែលពួកគេរកឃើញអំពីរបៀបថែទាំរូបកាយរបស់ពួកគេ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយជាមួយក្រុមគ្រួសាររបស់ពួកគេ នូវបទចម្រៀងដែលពួកគេបានច្រៀងនៅក្នុងថ្នាក់ និងអំពីអ្វីដែលពួកគេបានរៀនពីចម្រៀងនោះ ។
ការកែលម្អការបង្រៀនរបស់យើង
សូមថ្លែងទីបន្ទាល់អំពីព្រះយេស៊ូវគ្រីស្ទ ។ កិច្ចការដែលសំខាន់ជាងគេបំផុតដែលអ្នកអាចធ្វើ ក្នុងនាមជាគ្រូបង្រៀន គឺត្រូវថ្លែងទីបន្ទាល់អំពីព្រះយេស៊ូវគ្រីស្ទ ។ ការណ៍ធ្វើដូចនេះនឹងជួយកុមារពង្រឹងទីបន្ទាល់របស់ពួកគេ ហើយទទួលអារម្មណ៍នៃសេចក្ដីស្រឡាញ់របស់ព្រះអង្គសង្គ្រោះដែលមានសម្រាប់ពួកគេ ។