Korinto, sa’ xtz’e li saq’e sa’ li ch’och’ Grecia, li k’ayil ut najteril poopol, b’onb’il xb’aan laj Balage Balogh

19–25 agosto

1 Korintios 1–7

“Wanqex sa’ junajil”

Li Santil Musiq’ej tatxtenq’a chixnawb’al k’a’ru li na’leb’ re li evangelio wankeb’ sa’ 1 Korintios 1–7 tixtenq’aheb’ li kok’al nakatzoleb’. Naq taatzoleb’ li ch’ol a’an rik’in li tij, tz’iib’aheb’ laa k’oxlahom ut laa week’ahom nakak’ul rik’in li Musiq’ej.

Xtz’iib’ankil li nakak’oxla

Xkanab’ankileb’ chi wotzok

Kutan chaq rub’elaj, patz’ re jun malaj wiib’eb’ li kok’al chixtawb’al jun raqal sa’ 1 Korintios 1–7 li naru te’xwotz sa’ li tzoleb’aal. Naru taab’oqeb’ xna’ xyuwa’ chixtenq’ankileb’ wi na’ajman ru.

Xk’utb’al li tzol’leb’

Kok’al toj ka’ch’ineb’ xyu’am

1 Korintios 2:11–14

Li Santil Musiq’ej naxk’ut chiwu li yaal re li evangelio.

Jun reheb’ lix k’anjel li Santil Musiq’ej a’an xk’utb’al chiqu li yaal. K’a’ru numsihom naru nakawotz rik’ineb’ li kok’al re xtenq’ankileb’ chixtawb’al ru a’an?

Kok’ k’anjel naru chi b’aanumank

• K’uteb’ k’a’aq re ru malaj jalam-uuch li te’reetali chan ru naq nokotzolok chirix li ruchich’och’ (jo’eb’ li tzoleb’aal, jun li tasal hu, malaj jun celular). K’a’ru naru naqatzol naq naqoksiheb’ li k’a’aq re ru a’an? Ch’olob’ naq sa’ 1 Korintios 2:11,1 14, laj Pablo kixk’ut naq naru nokotzolok chirix li Dios ka’ajwi’ rik’in lix Musiq’ li Dios, a’an li Santil Musiq’ej. K’a’ru naru naqab’aanu re xtzolb’aleb’ li “xchamal xk’a’uxl li Dios”?

• Poq’ xsa’ laa wuq’ rajlal naq taaye jun reheb’ li aatin sa’ li ch’ol aatin “Li Santil Musiq’ej naxk’ut chiqu li yaal.” Kanab’eb’ li kok’al chixpoq’b’al xsa’eb’ li ruq’ ut chixka’sutinkil li ch’ol aatin. Wotz’ rik’ineb’ li kok’al jun li numsihom b’ar wi’ naq li Santil Musiq’ej xatxtenq’a chixnawb’al k’a’ruhaq li yaal.

• B’ichahomaq sa’ komonil jun li b’ich li na’aatinak chirix li Santil Musiq’ej, jo’ “Li Santil Musiq’ej” (B’ichleb’aal choq’ reheb’ li Kok’al, 56). Tenq’aheb’ li kok’al chixtawb’aleb’ aatin ut ch’ol aatin sa’ li b’ich li naxk’ut chan ru naq li Santil Musiq’ej nokoraatina ut k’a’ru naxk’ut chiqu.

1 Korintios 3:10–11

Li Jesukristo a’an lin k’ojleb’aal.

Eb’ li kok’al yookeb’ chixk’eeb’al lix k’ojleb’aal lix nawom xch’ooleb’, ut laa’at naru nakatenq’aheb’ chixwaklesinkil jun xkawil k’ojleb’aal a’an rik’in li Jesukristo.

Kok’ k’anjel naru chi b’aanumank

• Il ru 1 Korintios 3:11 choq’ reheb’ li kok’al ut ch’olob’ naq li Jesukristo a’an li qak’ojleb’aal. K’ut chiruheb’ li kok’al jalan jalanq xjalam-uuch li naru nawan wi’ xnawom qach’ool, jo’ ajwi’ jun xjalam-uuch li Jesukristo. Tenq’aheb’ chixtusb’aleb’ ru li jalam-uuch re naq lix jalam-uuch li Jesus takanaaq toj rub’el, jo’ k’ojleb’aal, ut lix komoneb’ li jalam-uuch “te’wanq chi kab’lanb’il” sa’ xb’een jun xnawom ch’oolej chirix a’an.

• K’oxlaheb’ eek’asink-ib’ choq’ re li b’ich “Li ochoch sa’ xb’een li pek” (B’ichleb’aal choq’ reheb’ li Kok’al, 132) ut b’icha li b’ich rik’ineb’ li kok’al. K’e reheb’ li junjunq chi kok’al jun li pek tz’iib’anb’ilaq chiru a’in: “Li Jesukristo a’an lin k’ojleb’aal.” Kanab’eb’ chixk’amb’aleb’ li pek sa’ rochocheb’ re naq taajultiko’q reheb’ li xe’xtzol.

• K’uteb’ jalam-uuch li te’reetali junjunq li esil jwal nawulak chawu chirix lix yu’am li Kolonel, ut kanab’eb’ li kok’al chixyeeb’al aawe k’a’ru yoo chi k’ulmank sa’ li junjunq chi jalam-uuch. Kanab’eb’ chixwotzb’al junjunq li esil jwal neke’wulak chiruheb’ chirix li Jesus. Ch’olob’ xyaalal naq li Jesukristo a’an lix k’ojleb’aal lix paab’aaleb’.

1 Korintios 6:19

Lin junxaqalil a’an chanchan jun li santil ochoch.

Chan ru naru nakatenq’aheb’ li kok’al chiroxloq’inkil lix junxaqalileb’ jo’ jun xmaatan li Dios ut chixnimob’resinkil li rajomeb’ chirilb’al chi us?

Kok’ k’anjel naru chi b’aanumank

• K’ut chiruheb’ li kok’al xjalam-uucheb’ li santil ochoch (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al), ut ileb’ ru li aatin a’in sa’ 1 Korintios 6:19: “Lee tz’ejwal a’an rochoch li Santil Musiq’ej.” Tenq’aheb’ li kok’al chixtawb’al ru naq li qaChoxahil Yuwa’ naraj naq li qajunxaqalil taawanq chi saq ru ut chi sant, jo’ jun li santil ochoch.

• K’ut xjalam-uuch jun li ch’ina al ut k’e chixk’atq a’an xjalam-uuch li k’a’ru us ut li ink’a’ us choq’ re li junxaqalil. Kanab’eb’ li kok’al chixk’eeb’aleb’ xhoonaleb’ re xk’utb’al chiruq’eb’ li k’a’ru us ut chirisinkil li k’a’ru ink’a’ us.

• B’ichahomaq sa’ komonil jun li b’ich chirix li junxaqalil, jo’ “Jolom, xb’een tel, xb’een aq, oqej” (B’ichleb’aal choq’ reheb’ li Kok’al, 129) ut patz’ reheb’ li kok’al k’a’ut naq neke’xb’antioxi lix junxaqalil.

Xk’utb’al li tzol’leb’

Kok’al ak ninqeb’

1 Korintios 1:23–25

Li Dios mas chaab’il wi’chik xna’leb’ chiru li winq, ut nink’ut tz’aqal li chaab’il na’leb’ naq ninpaab’eb’ lix k’utum.

Eb’ li kok’al li nakatzoleb’ te’xtaw—wi maji’ neke’xtaw—naq junjunq li kristiaan neke’xk’ut k’a’aq re ru li naxik xjunpak’al lix chaab’il na’leb’ li Dios. Naq nakatzol 1 Korintios 1:23–25 naru nakatenq’aheb’ li kok’al chixtawb’al ru naq li Dios mas chaab’il wi’chik xna’leb’ chiru li winq.

Kok’ k’anjel naru chi b’aanumank

• Ilomaq ru sa’ komonil 1 Korintios 1:23–25 ut tenq’aheb’ li kok’al chixtawb’aleb’ li aatin xnimal na’leb’ ut memil na’leb’. Ch’olob’ naq naab’aleb’ li kristiaan ke’xk’ut naq lix k’utum laj Pablo a’an yal memil na’leb’, a’b’an laj Pablo kixch’olob’ naq xpaab’ankil lix evangelio li Kristo a’an li tz’aqal xnimal na’leb’. K’a’ut naq chaab’il na’leb’ xpaab’ankil li k’a’ru naxk’ut li Dios?

• Tenq’aheb’ li kok’al chixk’utb’al chan raj ru te’xsume li kristiaan neke’xk’oxla naq lix k’utum li Iglees—jo’ li xpaab’ankil li Kolonel, xpaab’ankil li Aatin re li Chaab’il Na’leb’ malaj xpaab’ankil li chaq’rab’ re li lajetqil a’an yal “memil na’leb’.” Qayehaq, naru neke’xye xnawom xch’ooleb’ chirixeb’ li osob’tesihom neke’k’ulman xb’aan xyu’aminkileb’ li k’utum a’an.

• Wotz jun numsihom b’ar wi’ naq jalaneb’ chik kristiaan xe’xk’oxla naq li k’a’ru nakapaab’ yal a’an memil na’leb’ malaj wotz junaq eetalil wan sa’eb’ li loq’laj hu. Ma naru neke’xwotz’ ajwi’ li numsihomeb’ kama’an li kok’al? Chan raj ru naru 1 Korintios 1:25 chiqatenq’ankil chi wank chi tiik naq eb’ li qas qiitz’in te’xk’ab’a’in li k’a’ru naqapaab’ jo’ memil na’leb’

1 Korintios 2:11–14

Li Santil Musiq’ej naxk’ut chiwu li yaal re li evangelio.

Chan ru naru nakatenq’aheb’ li kok’al chixk’eeb’al reetal naq aajel ru li Santil Musiq’ej re xtawb’aleb’ ru li “xchamal xk’a’uxl li Dios”?

Kok’ k’anjel naru chi b’aanumank

• Tz’iib’a jun xtusulal chan ru naq nokotzolok chirix li ruchich’och, jo’eb’ li tasal hu, li tzoleb’aal, ut li internet. Ilomaq ru sa’ komonil 1 Korintios 2:11–14. K’a’ru neke’xk’ut li raqal a’an chirix chan ru naqatzol “xchamal xk’a’uxl li Dios”?

• Kanab’eb’ li kok’al chi aatinak chirix junaq li hoonal xe’reek’a wi’ lix hasb’ li Santil Musiq’ej, li nak’ab’a’iman ajwi’ “lix Musiq’ li Dios” (1 Korintios 2:11–14). Naru neke’aatinak chirix naq wankeb sa’ li iglees, malaj naq yookeb’ chi tijok, malaj chirilb’aleb’ ru li loq’laj hu. Tenq’aheb’ chixtawb’al ru naq li Santil Musiq’ej yoo chixk’utb’al chiruheb’ li yaal, jo’ kixch’olob’ laj Pablo.

• Kanab’eb’ li junjunq chi kok’al chirilb’al ru jun reheb’ li raqal a’in sa’ li loq’laj hu: 1 Korintios 2:11–14; 1 Nefi 10:17; Moroni 10:3–5; ut Tzol’leb’ ut Sumwank 8:2–3. Kanab’eb’ li kok’al chixwotzb’al li k’a’ru xe’xtzol sa’eb’ li raqal a’an reheb’ li loq’laj hu chirix chan ru naq li Santil Musiq’ej nokoxtzol. Waklesiheb’ xch’ool chixtz’iib’ankileb’ li raqal a’an sa’ xxukeb’ lix loq’laj hu.

1 Korintios 6:19–20

Tento twil lin junxaqalil rik’in oxloq’ ut tink’uula xsantilal.

Li xtawb’al ru naq li qajunxaqalil a’an jun xmaatan li qaChoxahil Yuwa’ tixtenq’aheb’ li kok’al chixk’uulankil xsantilal lix junxaqalileb’, us ta te’aaleeq chixb’aanunkil lix junpak’alil a’an.

Kok’ k’anjel naru chi b’aanumank

• K’ameb’ xjalam-uuch jun ch’ina al ut jun li santil ochoch sa’ jun lanb’il maatan. Kanab’eb’ li kok’al chirilb’al ru 1 Korintios 6:19–20 ut chixq’ehinkil k’a’ru wan sa’ li maatan. Kanab’eb’ chixteeb’al li maatan ut chi aatinak chirix chan ru naq li qajunxaqalil a’an chanchan jun li santil ochoch.

• Aatinan rik’ineb’ li kok’al chirix chan ru naq tento taqil jun li santil ochoch. Wi li qajunxaqalil a’an chanchan jun li santil ochoch, chan ru tento taqil li qajunxaqalil? Li xb’ichankil malaj rilb’al ru li raatinul jun li b’ich li na’aatinak chirixeb’ li santil ochoch, jo’ “Jun santil ochoch k’eeb’il we” (B’ichleb’aal choq’ reheb’ li Kok’al, 73), naru chi tenq’ank chixsumenkil li patz’om a’an. Naq naqab’aanu li ink’a’ us, chan ru naru naq li “qasantil ochoch” tasaqo’q wi’chik ru?

• Ilomaq ru sa’ komonil li raqal “La salud física y emocional” sa’ Para la Fortaleza de la Juventud (2011, 25–27). Kanab’eb’ li kok’al chixtz’iib’ankileb’ sa’ li pizarron li na’leb’ neke’xtaw chirix chan ru rilb’al li qajunxaqalil.

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’ineb’ lix junkab’al jun li b’ich xe’xb’icha ut xe’xtzol sa’ li tzoleb’aal.

Xchaab’ilob’resinkil li qak’utum

Ye xnawom aach’ol chirix li Jesukristo. Jun reheb’ li k’a’ru jwal aajel ru naru nakab’aanu jo’ aj tzolonel a’an xyeeb’al xnawom aach’ool chirix li Jesukristo. Naq taab’aanu, taatenq’aheb’ li kok’al chixkawresinkil lix nawom xch’ooleb’ ut chireek’ankil lix rahom li Kolonel choq’ reheb’.