ch’utam re li loq’laj wa’ak

26 agosto–1 septiembre

1 Korintios 8–13

“Laa’ex xtz’ejwal li Kristo”

Naq yookat chirilb’al ru 1 Korintios 8–13, k’e reetaleb’ li na’leb’ taachalq rik’in li Musiq’ej chirix chan ru xk’utb’aleb’ li na’leb’ reheb’ li ch’ol a’an. Chijultiko’q aawe naq a’ yaal b’ar wan reheb’ li na’leb’ reheb’ li kok’ k’anjel naru neke’oksiman choq’ reheb’ li kok’al ak ninqeb’ jo’ ajwi’ li toj ka’ch’ineb’ xyu’am.

Xtz’iib’ankil li nakak’oxla

reetalil li wotzok

Xb’oqb’aleb’ chi wotzok

Kanab’eb’ li kok’al chixwotzb’al k’a’ruhaq xe’xb’aanu chiru li ch’utam re li loq’laj wa’ak re xk’oxlankil li Jesus.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

1 Korintios 10:13

Li qaChoxahil Yuwa’ tinixtenq’a chixsik’b’al ru li k’a’ru us.

Wan naq ch’a’aj xsik’b’al ru li k’a’ru us, a’b’an li qaChoxahil Yuwa’ tooxtenq’a chixsik’b’al ru li k’a’ru us.

Kok’ k’anjel naru chi b’aanumank

• Il ru 1 Korintios 10:13 choq’ reheb’ li kok’al ut kanab’eb’ chixb’alq’usinkileb’ rib’ naq te’rab’i li aatin “aaleek.”

• Yiib’eb’ kok’ eetalil li neke’xye “xaqlin” choq’ reheb’ li kok’al. Seraq’i junjunqeb’ li kok’ esil chirixeb’ kristiaan li ak okeb’ re chixsik’b’al ru li k’a’ru ink’a’ us. Naq eb’ li kok’al te’rab’i, kanab’eb’ chixtaqsinkil jun reetalil li xaqliik naq li kristiaan re li esil tixsik’ ru li ink’a’ us. B’ar raj wan li k’a’ru us? Ch’olob’ xyaalal naq li qaChoxahil Yuwa’ tixtenq’aheb’ chixsik’b’al ru li k’a’ru us.

• K’ut jun xjalam-uuch li Jesus ut b’icha rik’ineb’ li kok’al jun li b’ich li na’aatinak chirix li Jesukristo, jo’ “Chinwanq raj jo’ li Jesus” (B’ichleb’aal choq’ reheb’ li Kok’al, 40–41). Chan ru naq li xjultikankil li Jesus nokoxtenq’a chixsik’b’al ru li k’a’ru us? K’uteb’ xjalam-uuch jalaneb’ chik k’a’aq re ru li nokohe’xtenq’a chixsik’b’al ru li k’a’ru us, jo’eb’ li qana’ qayuwa’ malaj eb’ li loq’laj hu. Patz’ reheb’ li kok’al k’a’ru natenq’an reheb’ chixsik’b’al ru li k’a’ru us.

1 Korintios 12:4, 7–11

Li qaChoxahil Yuwa’ rosob’tesihomin rik’ineb’ li musiq’ejil maatan.

Li qaChoxahil Yuwa’ ak xk’ehom eb’ li musiq’ejil maatan reheb’ chixjunil li ralal xk’ajol. K’a’ruheb’ li musiq’ejil maatan nakawil laa’at rik’ineb’ li kok’al nakatzoleb’?

Kok’ k’anjel naru chi b’aanumank

• Ilomaq ru sa’ komonil 1 Korintios 12:7–11, ut ilomaqeb’ li musiq’ejil maatan kixye laj Pablo. Tenq’aheb’ li kok’al chixk’oxlankileb’ eek’asink-ib’ li naru neke’xk’ul rib’ rik’ineb’ li musiq’ejil maatan a’an, ut oksiheb’ li eek’asink-ib’ re xtenq’ankileb’ li kok’al chixjultikankileb’.

• Kanab’eb’ li kok’al chixyiib’ankil xjalam-uuch jun li maatan xk’ulumeb’ li jwal nawulak chiruheb’. Ch’olob’ naq li qaChoxahil Yuwa’ naxk’e qe li musiq’ejil maatan re xkawob’resinkil li qapaab’aal ut re qatenq’ankil chirosob’tesinkileb’ li qas qiitz’in.

• Tz’iib’a jun li ch’ina hu choq’ reheb’ li junjunq chi kok’al b’ar wi’ taach’olob’ jun li musiq’ejil maatan nakawil rik’in a’an (malaj naru taapatz’ reheb’ lix na’ xyu’wa’eb’ chixtz’iib’ankil li ch’ina hu) Laneb’ li kok’ hu jo’ jun li maatan. Kanab’eb’ li kok’al chixteeb’al lix maataneb’ ut tenq’aheb’ chirilb’al ru lix musiq’ejil maatan.

kok’ kaxon re li maatan

Li qaChoxahil Yuwa’ ak xk’ehomeb’ li musiq’ejil maatan reheb’ chixjunil li ralal xk’ajol.

1 Korintios 13:1–8

Naru ninraheb’ li was wiitz’in.

Eb’ li loq’laj hu neke’xk’ut chiqu naq li tz’aqal rahok a’an li “saq ruhil rahok narahok wi’ li Kristo” (Moroni 7:47). Chan ru naru nakatenq’aheb’ li kok’al chixtawb’al ut chixk’utb’al li rahok jo’ narahok li Kristo?

Kok’ k’anjel naru chi b’aanumank

• Il ru 1 Korintios 13:8 ut Moroni 7:47, ut tenq’aheb’ li kok’al chixka’sutinkil li ch’ol aatin “li tzʼaqal rahok aʼan li saq ruhil rahok narahok wiʼ li Kristo.” K’uteb’ xjalam-uuch li Jesus naq yoo chi rahok ut chixk’utb’al xchaab’ilal, ut patz’ reheb’ li kok’al chan ru kixk’ut lix rahom choq’ reheb’ li kristiaan (re xtawb’aleb’ li na’leb’, chi’ilmanq Libro de obras de arte del Evangelio).

• Sik’ ru jun li ch’ina al re naq taaxaqliiq toj chiru li tzoleb’aal. Patz’ re chan raj ru taak’anjelaq chiru junaq chik li komon re li tzoleb’aal. Ch’olob’ naq chi jo’kan naru naqak’ut li tz’aqal rahok choq’ reheb’ li qas qiitz’in. Kanab’eb’ jalaneb’ chik li kok’al chixk’eeb’aleb’ xhoonal re xk’utb’al li tz’aqal rahok.

• B’icha rik’ineb’ li kok’al jun li b’ich na’aatinak chirix xraab’aleb’ li qas qiitz’in, jo’ “Chiqara li qas qiitz’in” malaj “Li rahok chrerib’il eerib’ ” (B’ichleb’aal choq’ reheb’ li Kok’al, 39, 74). K’uteb’ xjalam-uuch jalan jalanq chi kristiaan (jo’ jun yuwa’b’ej, jun na’b’ej, jun aj k’utunel, malaj jun li amiiw), ut patz’ reheb’ li kok’al chan ru naru neke’k’anjelak chiru li kristiaan a’an. Kanab’eb’ li kok’al chixk’oxlankil junaq li kristiaan li naru neke’k’anjelak wi’ ut chixtz’iib’ankil jun li ch’ina hu malaj chixyiib’ankil jun li jalam-uuch re xk’eeb’al re li kristiaan a’an. Wi na’ajman ru xkomoneb’ li na’leb’, k’ut li video “Pass It On” (LDS.org).

reetalil li k’utuk

Xk’utb’al li tzol’leb’

Kok’al ak ninqeb’

1 Korintios 10:13

Li qaChoxahil Yuwa’ tinixtenq’a chixkuyb’al li aaleek.

Eb’ li yeechi’ihom wankeb’ sa’ li raqal a’an naru chixk’eeb’al xkawileb’ xch’ool li kok’al naq li qaChoxahil Yuwa’ tixtenq’aheb’ naq te’reek’a li aaleek.

Kok’ k’anjel naru chi b’aanumank

• Kanab’eb’ li kok’al chirilb’al ru 1 Korintios 10:13 chi ka’kab’il ut chixk’osb’al ru li raqal rik’ineb’ li raatin a’an. Kanab’eb’ li kok’al chixwotzb’al jun li numsihom b’ar wi’ xe’tenq’aak xb’aan li qaChoxahil Yuwa’ chixnumsinkil malaj chixkuyb’al li aaleek. K’a’ru naru naqab’aanu re xkanab’ankil qib’ chiru li qaChoxahil Yuwa’ naq noko’aaleek?

• Chiru kok’ setb’il hu, tz’iib’aheb’ li aaleek li naru neke’xk’ul li kok’al sa’eb’ li kutan a’in. Kanab’eb’ li junjunq chi kok’al chixsik’b’al ru jun li ch’ina hu ut chixwotzb’al li k’a’ru xk’ehom qe li qaChoxahil Yuwa’ re qatenq’ankil chixkuyb’aleb’ li aaleek. Re xtawb’aleb’ junjunq li na’leb’, ilomaq ru sa’ komonil Alma 13:28–29.

1 Korintios 11:23–29

Chiru li loq’laj wa’ak naru nink’oxla chan ru naq yookin chixtaaqenkil li Kolonel.

Li loq’laj wa’ak wan xkomon xyaalal choq’ reheb’ li kok’al li ak kub’enaqeb’ xha’. Tenq’aheb’ chirilb’al li loq’laj k’ojob’anb’il k’anjel a’an jo’ jun li hoonal re “xtz’ilb’al rixeb’ ” a’an ut re x’ak’ob’resinkil li rajomeb’ chixtaaqenkil li Kolonel (1 Korintios 11:28).

Kok’ k’anjel naru chi b’aanumank

• Kanab’ jun li ch’ina al chirilb’al ru 1 Korintios 11:28. K’a’ru naraj naxye “xtz’ilb’al qix” laa’o naq maji’ naqak’ul li loq’laj wa’ak? Kanab’eb’ li kok’al chixk’oxlankileb’ jalaneb’ li kristiaan li neke’tz’ilok-ix, jo’eb’ laj b’anonel, aj ilol tenamit, malaj aj tz’ilol rix k’a’aq re ru (qayehaq, eb’ laj b’anonel neke’xtz’il rix li qajunxaqalil re xtawb’aleb’ li toch’olal malaj yajel li tento te’k’irtesiiq). K’a’ru naxk’ut chiqu li neke’xb’aanu a’an sa’eb’ lix k’anjel chirix chan ru tento taqatz’il qix laa’o naq nokotz’aqon sa’ li loq’laj wa’ak?

• Kanab’eb’ li kok’al chixyiib’ankil jun xtusulal li naru neke’xk’oxla naq neke’tz’aqon sa’ li loq’laj wa’ak. Kanab’eb’ chiroksinkil li tusulal a’an jo’ xjultikankil k’oxlak chirixeb’ ajwi’ a’an chiru li loq’laj wa’ak.

1 Korintios 12:4, 7–12, 31; 13:1–8

Wankeb’ lin musiq’ejil maatan.

Laj Pablo kixk’ut naq eb’ li musiq’ejil maatan “k’eeb’il re li junjunq” (1 Korintios 12:7). Li na’leb’ a’an naru naxtenq’aheb’ li kok’al chixnimob’resinkil lix raab’aleb’ rib’, a’ tz’aqal naq neke’roksiheb’ lix maatan re rosob’tesinkileb’ li ras riitz’in.

Kok’ k’anjel naru chi b’aanumank

• Kanab’eb’ li kok’al chixtz’iib’ankil sa’ li pizarron eb’ li musiq’ejil maatan li neke’tawman sa’ 1 Korintios 12:7–11; 13:2. Kanab’eb’ chixtawb’aleb’ xkomoneb’ li maatan li neke’yeeman sa’ Moroni 10:8–18 ut sa’ Tzol’leb’ ut Sumwank 46:13–26. Wotz rik’ineb’ a’an junjunq li musiq’ejil maatan kixye li Elder Marvin J. Ashton: “Li maatan re li patz’ok; li maatan re li ab’ink; … li maatan re xnumsinkil li wech’ok-ib’; … li maatan re xsik’b’al li k’a’ru tiik; li maatan re ink’a’ jitok; li maatan re xsik’b’al xb’eresihom li Dios; … li maatan re rilb’aleb’ li qas qiitz’in; … li maatan re k’ehok osob’tesink; li maatan re ch’olob’ank xyaalal rik’in wankilal” (chi’ilmanq “Hay muchos dones”, Liahona, enero 1988, 19). Kanab’eb’ li kok’al chi aatinak chirixeb’ li musiq’ejil maatan neke’ril sa’ xyanqeb’ a’an.

• Naq maji’ natikla li tzolok, patz’ reheb’ lix na’ xyuwa’eb’ chirix li maatan neke’ril rik’ineb’ lix kok’al, malaj k’oxlaheb’ li maatan wankeb’ re. Ye reheb’ li kok’al eb’ li maatan a’an ut kanab’eb’ chixq’ehinkil ani aj-ik’in wan li maatan a’an. Kanab’eb’ li kok’al chixtz’iib’ankil chan ru naq te’roksiheb’ lix maatan re rosob’tesinkil anihaq chiru li xamaan a’in.

• Wotz jalan jalanq li hoonal b’ar wi’ anihaq naru chiroksinkil jun reheb’ li musiq’ejil maatan a’in li neke’yeeman sa’ 1 Korintios 12:7–10. Kanab’eb’ li kok’al chixk’eeb’al reetal b’ar wan li musiq’ejil maatan naru neke’roksi sa’eb’ li junjunq chi hoonal a’an.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’aleb’ lix musiq’ejil maatan rik’ineb’ lix junkab’al ut chixpatzb’al reheb’ li komon sa’ lix junkab’aleb’ k’a’ru li maatan wankeb’ re.

Xchaab’ilob’resinkil li qak’utum

K’eheb’ li b’oqom li taaroxloq’i lix taql ch’oolej. Naq taakanab’eb’ li kok’al chi k’anjelak jo’ chanru yookeb’ chixtzolb’al, k’oxla chan ru taawoxloq’i lix taql xch’ooleb’. Sa’ xna’aj naq taakanab’eb’ chixb’aanunkil k’a’ruhaq ak k’uub’anb’il, kanab’eb’ chixk’oxlankil chan ru te’xk’anjela li yookeb’ chixtzolb’al.

perel re kok’ k’anjel: naru ninraheb’ li was wiitz’in