9-15 septiembre

2 Korintios 1–7

“Chek’e wi’chik eerib’ chi k’ame’k sa’ usilal rik’in li Dios”

Re xtikib’ankil lix kawresinkil aawib’, il ru 2 Korintios 1–7. Kim, Taaqehin—Choq’ reheb’ li komon ut li junkab’al naru nakatxtenq’a chixtawb’aleb’ ru li ch’ol a’an, ut li tusleb’ aatin a’in naru nakatxtenq’a chixtawb’aleb’ aana’leb’ re li k’utuk.

Xtz’iib’ankil li nakak’oxla

Xkanab’ankileb’ chi wotzok

Junjunq reheb’ li kok’al sa’ laa tzoleb’aal maare xe’xtz’iib’a junjunq li kok’ hu sa’ li xamaan a’in chirix chan ru naq jun li komon sa’ lix junkab’aleb’ a’an jun chaab’il eetalil jo’ jun xtzolom li Jesukristo. Wi jo’kan, kanab’eb’ chi rub’elaj naq te’xwotz li xe’xtz’iib’a sa’ li tzoleb’aal. Malaj, kanab’eb’ li kok’al chixwotzb’al k’a’ruhaq chik xtzolomeb’.

Xk’utb’al li tzol’leb’

Kok’al toj ka’ch’ineb’ xyu’am

2 Korintios 1:3–4

Li qaChoxahil Yuwa’ naxk’ojob’ inch’ool, ut laa’in naru nink’ojob’eb’ xch’ool li was wiitz’in.

Chan ru naru nakak’e xkawileb’ xnawom li kok’al naq li qaChoxahil Yuwa’ tixk’ojob’ xch’ooleb’? Chan ru naru nakawaklesiheb’ xch’ool chixk’ojob’ankileb’ xch’ool li ras riitz’in?

Kok’ k’anjel naru chi b’aanumank

• K’ameb’ k’a’aq re ru sa’ li tzoleb’aal neke’k’ojob’an ch’oolej, jo’ jun li isb’ malaj jun li b’ak’leb’ tiq’il. Patz’ reheb’ li kok’al k’a’ru naxk’ojob’ xch’ooleb’ naq raheb’ xch’ool malaj naq wankeb’ xxiw malaj naq wankeb’ jalan chik xch’a’ajkilaleb’. Il ru 2 Korintios 1:3–4 rik’ineb’ li kok’al ut ch’olob’ naq “li rahilal” a’an jun li aatin li naraj naxye ninqi ch’a’ajkilal. Aatinan chirix chan ru naq li qaChoxahil Yuwa’ naxk’ojob’ aach’ool, ut ch’olob’ xyaalal naq a’an tixk’ojob’ ajwi’ xch’ooleb’ li kok’al.

• K’uteb’ xjalam-uuch kristiaan li yookeb’ chi kub’eek xha’eb’ (chi’ilmanq Libro de obras de arte del Evangelio, ajl 103 ut 104) naq yooqat chirilb’al ru 2 Korintios 1:4 ut Mosiah 18:8–9 choq’ reheb’ li kok’al. Ch’olob’ naq rik’in li kub’iha’ naqayeechi’i qib’ chixk’ojob’ankileb’ xch’ool li qas qiitz’in. Chan ru naru naqataaqe lix na’leb’ laj Pablo re “xk’ojob’ankil xch’ooleb’ li wankeb’ sa’ chixjunil li rahilal”?

• Kanab’eb’ li kok’al chixyiib’ankil jun xjalam-uucheb’ ajwi’ a’an naq yookeb’ chixtenq’ankil anihaq wan li raajelil. Kanab’eb’ chixch’olob’ankil chan ru naq xb’aanunkil li k’a’aq re ru a’an naru xk’ojob’ankil xch’ooleb’ li ras riitz’in.

2 Korintios 2:7–8, 10

Naru ninkuyeb’ xmaak li was wiitz’in.

Sik’ ru sa’ xyanqeb’ li kok’ k’anjel a’in—malaj k’oxla junaq chik—re xtenq’ankileb’ li kok’al chixkawob’resinkil li rajomeb’ re xkuyb’aleb’ xmaak li ras riitz’in.

Kok’ k’anjel naru chi b’aanumank

• Ch’olob’ chiruheb’ li kok’al naq laj Pablo kiraj naq eb’ laj santil paab’anel aj Korinto te’xk’uy raj xmaak jun li winq kimaakob’k. Il ru 2 Korintios 2:7–8, 10, ut kanab’eb’ li kok’al chixk’eeb’al li ruq’eb’ chiru li raameb’ rajlal naq te’rab’i li aatin teekuy xmaak ut tinkuy ajwi’ xmaak.

• Kanab’eb’ li kok’al chixk’utb’esinkil chan ru naru neke’sumen sa’ jun li hoonal b’ar wi’ junaq kristiaan naxb’aanu k’a’ruhaq chi maak’a’ xrahom. Kanab’eb’ chixk’eeb’aleb’ xhoonal re xyeeb’al “chinaakuy” ut “ninkuy aamaak.” Chan ru naru naqatenq’aheb’ li kristiaan chixnawb’al naq xqakuyeb’ xmaak? Ch’olob’ naq naru a’an rik’in “xk’utb’al wi’chik naq nekera,” malaj rik’in xk’utb’al rahok choq’ reheb’ (2 Korintios 2:8).

2 Korintios 4:1–2

Ninpaab’ naq tento naq maak’a’aq inb’alaq’.

Laj Pablo kixk’ut naq eb’ lix moos li Kristo ink’a’ neke’xb’alaq’i li ras riitz’in—”neke’xk’e b’an chi nawe’k li yaal.” K’oxla rix chan ru naru nakakawresi li rajomeb’ li kok’al chi wank chi maak’a’eb’ xb’alaq’ sa’ chixjunil li k’a’aq re ru.

Kok’ k’anjel naru chi b’aanumank

• Tenq’aheb’ li kok’al chixkanab’ankil sa’ xk’a’uxleb’ li ch’ol aatin “Laaʼo naqapaabʼ naq tento naq maakʼaʼaq qabʼalaq’ ” (Eb’ lix Raqalil li Paab’aal 1:13). Tz’iib’a li ch’ol aatin a’an chiruheb’ kok’ huhil pulseer li naru neke’rutz’u’uji ru li kok’al ut te’xk’e chi ruq’ re xk’amb’al sa’ kab’l. Ch’olob’ naq li wank chi maak’a’ qab’alaq’ naraj naxye xyeeb’al li yaal.

• Kanab’eb’ li kok’al chixtaqsinkil li ruq’eb’ naq laa’at taaye k’a’ruhaq li yaal, ut naq te’xkub’si li ruq’ naq taaye k’a’ruhaq ink’a’ yaal. Yeheb’ k’a’aq re ru moko ch’a’aj ta xtawb’aleb’ ru a’b’an ak nawb’il, jo’ “Domingo anajwan” malaj “Oxib’ li wu’uj.” B’aanu li ch’ina k’anjel a’an wiib’ oxib’ sut, ut kanab’eb’ li kok’al chixk’eeb’al xhoonaleb’ chixyeeb’aleb’ li k’a’aq re ru yaal ut ink’a’ yaal. K’a’ut naq chaab’il li wank chi maak’a’ qab’alaq’?

Xk’utb’al li tzol’leb’

Kok’al ak ninqeb’

2 Korintios 1:3–4

Li qaChoxahil Yuwa’ naxk’ojob’ inch’ool, ut laa’in naru nink’ojob’ xch’ooleb’ li was wiitz’in.

Lix jultikankil chan ru naq li Dios nak’ojob’an ch’oolej naru naxwaklesi xch’ooleb’ li kok’al chixk’ojob’ankil xch’ooleb’ li ras riitz’in.

Kok’ k’anjel naru chi b’aanumank

• Naq yooqat chirilb’al ru 2 Korintios 1:3–4, patz’ reheb’ li kok’al naq te’rab’i chi us re xtawb’al jun xsumenkil li patz’om “K’a’ru naxb’aanu li Dios choq’ qe?” Tenq’aheb’ li kok’al chixk’eeb’al rajlil chan ru naq li Dios naxk’ojob’ qach’ool. Kanab’eb’ li kok’al chixwotzb’al xnumsihomeb’ b’ar wi’ xwan xrahil xch’ooleb’, xk’a’uxleb’, malaj xxiweb’ ut naq li Dios xk’ojob’ xch’ooleb’.

• Kanab’eb’ li kok’al chixwotzb’al chan ru naru naqak’ojob’ xch’ooleb’ li qas qiitz’in. K’eheb’ xhoonal re xjultikankil anihaq neke’xnaw ru li naraj ru xk’ojob’ankil xch’ool ut re naq te’xyiib’ jun xk’uub’anb’il na’leb’ re xye’b’aleb’ li ruq’ re li kristiaan a’an.

2 Korintios 2:5–11

Naru ninkuyeb’ xmaak li was wiitz’in.

Maare ch’a’ajaq xkuyb’aleb’ xmaak li qas qiitz’in naq mas b’ab’ay lix rahomeb’ choq’ qe. A’b’an eb’ li kok’al li nakatzoleb’ te’reek’a sahil ch’oolejil ut tuqtuukilal naq yooqeb’ chixtzolb’al kuyuk maak.

Kok’ k’anjel naru chi b’aanumank

• Ye reheb’ li kok’al naq jun kimaakob’k aran Korinto ut “xrahob’tesiheb’ ” laj santil paab’aanel (chi’ilmanq 2 Korintios 2:5). Kanab’eb’ li kok’al chixsik’b’al sa’ 2 Korintios 2:7–8 li k’a’ru kiraj laj Pablo naq te’xb’aanu laj santil paab’anel.

• Wotz jun laa numsihom b’ar wi’ aakuyum xmaak anihaq—malaj anihaq xkuyuk aamaak laa’at—ut li xaweek’a chirix a’an.

2 Korintios 5:6–7

“Li paab’aal nab’eresink we, ut maji’ saqenk nikin’ilok”

K’e reetal chan ru naru nakawaklesiheb’ xch’ool li kok’al chixpaab’ankileb’ lix taqlahom li Dios us ta ink’a’ te’ril sa’ junpaat li osob’tesihom neke’raj.

Kok’ k’anjel naru chi b’aanumank

• Il ru rik’ineb’ li kok’al 2 Korintios 5:6–7 ut Alma 32:21 ut kanab’eb’ chixsik’b’aleb’ aatin malaj ch’ol aatin li taatenq’anq chixch’olob’ankil li paab’aal. Kanab’eb’ chixtz’iib’ankil xch’olob’ankileb’, chirilb’aleb’ ru chi kaw xyaab’ xkuxeb’ ut chixk’eeb’al chiru li pizarron.

• Tz’ap li ru jun reheb’ li ch’ina al ut kanab’eb’ li jun siir chik naq te’xch’olob’ chiru chan ru xtz’aqob’resinkil ru jun li ch’ina k’anjel, jo’ xkab’lankil jun li nimla kab’l rik’in kok’ kaaxukuut, xyiib’ankil jun li jorb’a-k’a’uxlej, malaj b’eek sa’ li tzoleb’aal. Chan ru nokoxtenq’a li ch’ina k’anjel a’an chixtawb’al ru li k’a’ru naraj naxye “li paab’aal nab’eresink we” rik’in li Dios?

• K’ut li video “Fe pura y sencilla” (LDS.org) ut patz’ reheb’ li kok’al chan ru naq li saaj kib’eresiik xb’aan li paab’aal. Wotz jun aanumsihom b’ar wi’ tento naq kiwan aapaab’al chirix li Dios. Kanab’ jun li ch’ina al chixwotzb’al a’ yaal chi numsihom b’ar wi’ tento naq xb’eresiik xb’aan li paab’aal.

2 Korintios 7:8–11

Li rahil ch’oolej jo’ naraj li Dios nikinixk’am chixjalb’al ink’a’uxl.

Ak re naq eb’ li kok’al te’xutaanaq naq neke’tawman chixb’aanunkil k’a’aq re ru ink’a’ us. Tenq’aheb’ chixtawb’aleb’ ru xjalanil a’an rik’in li rahil ch’oolej, jo’ naraj li Dios, li nak’amok sa’ li tz’aqal jalb’a-k’a’uxlej.

Kok’ k’anjel naru chi b’aanumank

• Ch’olob’ naq sa’ 2 Korintios 7:8–11 laj Pablo na’aatinak chirix jun li hu kixtz’iib’a chaq choq’ reheb’ laj santil paab’anel, re xq’usb’aleb’ chi kaw xb’aan lix maakeb’. Ilomaqeb’ ru li raqal sa’ komonil. K’a’ut naq kisaho’ xch’ool laj Pablo naq eb’ laj santil paab’anel ke’reek’a xrahil xch’ooleb’? Jultika naq li rahil ch’oolej a’an nak’ab’a’iman rahil ch’oolej jo’ naraj li Dios.

• Kanab’eb’ li kok’al chixtz’apb’al xsa’ li ruheb’ ut che’xjultika junaq hoonal b’ar wi’ xe’xb’aanu k’a’ruhaq ink’a’ us ut xe’xutaanak xb’aan a’an. Kanab’eb’ chixpatz’b’al rib’eb’, “K’a’ut naq xinxutaanak?” Tz’iib’a sa’ li pizarron junjunqeb’ lix yaalal naq eb’ li kristiaan neke’xutaanak chirix naq neke’xb’aanu k’a’ruhaq ink’a’ us, jo’eb’ li “Ninxuwa naq tine’xk’e chixtojb’al inmaak” malaj “Ninxutaanak xb’aan li k’a’ru naru neke’xk’oxla li kristiaan chiwix” malaj “Ninnaw naq li qaChoxahil Yuwa’ kiraho’ xch’ool chiwix.” B’ar wan reheb’ li sumenk tz’iib’anb’ileb’ sa’ li pizarron chanchan naq a’an “li rahil ch’oolej jo’ naraj li Dios”? K’a’ut naq li rahil ch’oolej jo’ naraj li Dios chaab’il chi us chiruheb’ xkomoneb’ chik li rahil ch’oolej naqeek’a chirix naq naqab’aanu k’a’ruhaq ink’a’ us?

Xb’oqb’aleb’ chi tzolok sa’ kab’l

Ye reheb’ li kok’al naq naru neke’xwotz jun reheb’ li kok’ k’anjel xe’xb’aanu sa’ li tzoleb’aal anajwan rik’ineb’ lix junkab’al sa’ kab’l, maare sa’ li q’ojyin re junkab’al.

Xchaab’ilob’resinkil li qak’utum

K’e chi kutankil jun li raqal reheb’ li loq’laj hu. Sik’ ru jun li raqal sa’eb’ li loq’laj hu li nim xwankil choq’ aawe ut k’e sa’ jun na’ajej re li tzoleb’aal re naq li kok’al te’ril rajlal. Maare eb’ li kok’al naru neke’xk’e xhoonaleb’ re xsik’b’al ru jun li raqal sa’eb’ li loq’laj hu re taak’emanq sa’ li tzoleb’aal.