“9–15 septiembre. 2 Korintios 1–7: “Chek’e wi’chik eerib’ chi k’ame’k sa’ usilal rik’in li Dios” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“9–15 septiembre. 2 Korintios 1–7,” Kim, Taaqehin—Choq’ reheb’ li komon ut li junkab’al: 2019
9–15 septiembre
2 Korintios 1–7
“Chek’e wi’chik eerib’ chi k’ame’k sa’ usilal rik’in li Dios”
Naq nakatzoleb’ lix hu laj Pablo reheb’ laj Korinto, tz’iib’a junjunq li na’leb’ chirix li evangelio nakataw, ut k’oxla chan ru tatruuq chixyu’aminkil.
Xtz’iib’ankil li nakak’oxla
Wan naq li wank choq’ aj jolominel sa’ li Iglees naraj naxye naq tento xyeeb’al li kawil aatin. Yaal a’in sa’ xkutankil laj Pablo, jo’ ajwi’ sa’ li kutan wanko wi’. Nak’utun naq laj Pablo junxil ak xtaqla jun li hu rik’ineb’ laj santil paab’anel sa’ Korinto, li kixq’useb’ wi’, ut wankeb’ li ke’raho’ xch’ool. Sa’ li hu li moqon taanawmanq ru jo’ 2 Korintios, laj Pablo kixch’olob’ k’a’ut naq kiroksi chaq kawil aatin. “Relik chi yaal naq xintz’iib’ak eerik’in chi q’axal ra sa’ inch’ool: k’a’jo’ naq xyot’e’k li waam ut xinyaab’ak, a’b’anan moko re ta xrahob’tesinkil eech’ool naq xintz’iib’ak, re b’an naq teenaw naq numtajenaq raarokex inb’aan” (2 Korintios 2:4). Naq yookat chi q’use’k xb’aan jun aj jolominel, us xnawb’al naq eek’asinb’il a’an xb’aan li rahok, jo’ li Kristo. Ut us ta maare ink’a’ jo’kan, wi wan qach’ool chirilb’aleb’ li qas qiitz’in rik’in li rahok li kireek’a laj Pablo, ink’a’ ch’a’aj xsumenkil chi chaab’il li rahob’tesink. Jo’ kixye li Elder Jeffrey R. Holland, “Chaab’ilaq aach’ool chirix li majelal—aamajelal laa’at ut xmajelaleb’ li neke’k’anjelak aawochb’een sa’ jun li Iglees li jolominb’il xb’aaneb’ li winq ut li ixq li neke’k’anjelak chi ink’a’ minb’ileb’ ru, ut li moko tz’aqal ta re ruheb’. Chixjunileb’ li naxk’e li Dios chi k’anjelak wankeb’ xmajelal, ka’ajwi’ li Ralal Junaj Chirib’il ink’a’ ” (“Creo,” Liahona, mayo 2013, 94).
Li na’leb’ re xtzolb’aleb’ li loq’laj hu aajunes
2 Korintios 1:3–7; 4:6–10, 17–18; 7:4–7
Lix yalb’al wix naru taawanq choq’ osob’tesink.
Rik’in chixjunil li rahilal kixk’ul laj Pablo sa’ lix k’anjel, naqak’e reetal k’a’ut naq k’a’jo’ kitz’iib’ak chirix lix aajelil ru li rahilal, ut k’a’ruheb’ li osob’tesink li neke’chal rik’in. K’oxla chan ru naq eb’ lix yalb’al aawix naru te’wanq choq’ osob’tesink naq nakawil ru 2 Korintios 1:3–7; 4:6–10, 17–18; ut 7:4–7. Qayehaq, naru taak’oxla chan ru naq li Dios “naxk’ojob’ aach’ool sa’ chixjunil laa rahilal,” ut chan ru naq laa’at tatruuq “chixk’ojob’ankil xch’ooleb’ li wankeb’ sa’ chixjunil li rahilal” (2 Korintios 1:4). Malaj ut naru tat-aatinaq chirix lix saqen li Jesukristo li “xlemtz’un sa’ qach’ool,” us ta “rahob’tesinb’ilo” ut “wanko sa’ ch’a’ajkilal” (2 Korintios 4:6–10).
Chi’ilmanq ajwi’ Mosiah 24:13–17; K’utul Raqal reheb’ li Loq’laj Hu, “Ch’a’ajkilal.”
Laa’in nin’osob’tesiik, ut nawosob’tesiheb’ li was wiitz’in, naq ninkuyuk maak.
B’ab’ay ajwi’ naqanaw chirix li winq li yoo laj Pablo chixyeeb’al resil sa’ 2 Korintios 2:5–11—ka’ajwi’ naq a’an kiq’etok chaq aatin (chi’ilmanq li raqal 5–6, ut naq laj Pablo kiraj naq eb’ laj santil paab’anel te’xkuy lix maak (chi’ilmanq raqal 7–8). K’a’ut naq wan naq ink’a’ “naqak’ut naq naqara” li ani xrahob’tesink qe? (raqal 8). Chan ru naq nokorahob’tesiik laa’o ut neke’rahob’tesiik li qas qiitz’in naq ink’a’ nokokuyuk maak? (chi’ilmanq li raqal 7, 10–11). K’a’ru xyaalalil choq’ aawe naq laj tza “tooxb’alaq’i” wi ink’a’ naqakuyeb’ xmaak li qas qiitz’in? (raqal 11).
Chi’ilmanq ajwi’ Tzol’leb’ ut Sumwank 64:9–11.
Sa’ xk’ab’a’ lix tojb’al rix li maak xb’aan li Jesukristo, naru nink’ame’ sa’ usilal rik’in li Dios.
Laj Pablo, chi k’a’jo’ wi’chik chiru chixjunileb’, kixnaw k’a’ru xyaalalil li wank chi “ak’ yo’ob’tesinb’il chik.” A’an kitikla jo’ aj rahob’tesihom reheb’ laj Kristiano, a’ut moqon kiwan jo’ aj kawresihom paab’aal chirix li Kristo. A’an kixnaw chan ru naq li Jesus, li “ink’a’ xnawom ru li maak,” naru chirisinkil li qamaak, ut kixk’e li “tiik ch’oolej” re toowanq sa’ junajil rik’in li Dios. Naq yookat chirilb’aleb’ ru li raqal a’in, k’oxla k’a’ru xyaalalil xk’amb’al qib’ sa’ usilal rik’in jalan chik kristiaan. Chan ru naq a’in nakatxtenq’a chixtawb’al ru k’a’ru xyaalalil xk’amb’al qib’ sa’ usilal rik’in li Dios? K’oxla k’a’ru maare yoo chanajtob’resinkil rik’in li Dios. K’a’ru tento taab’aanu re tatk’ame’q wi’chik sa’ usilal rik’in?
Chi’ilmanq ajwi’ 2 Nefi 10:23–25.
Li rahil ch’oolej jo’ naraj li Dios nak’amok sa’ li jalb’a-k’a’uxlej.
Ink’a’ k’aynaqo chixk’oxlankil naq us li rahil ch’oolej, a’b’an laj Pablo ki’aatinak chirix li “rahil ch’oolejil jo’ naraj li Dios” jo’ jun raqal aajel ru re li jalb’a-k’a’uxlej. K’a’ru nakatzol chirix li jalb’a-k’a’uxlej jo’ naraj li Dios, rik’ineb’ li tz’iib’ahom a’in? 2 Korintios 7:8–11; Alma 36:16–21; Mormon 2:11–15; ut K’utul Raqal reheb’ li Loq’laj Hu, “Jalok k’a’uxl, jalb’a-k’a’uxlej.” Jo’q’e xaweek’a li rahil ch’oolej jo’ naraj li Dios, ut chan ru naq a’an xjal laa yu’am?
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Ma wan ani sa’ laa junkab’al li xpatz’ chiru anihaq naq tixtz’iib’a junaq hu choq’ re, chirix jun trab’aaj, malaj re ok sa’ jun tzoleb’aal? Patz’ re naq taa’aatinaq chirix a’an, ut tixye k’a’ru xye li hu chirix. Laj Pablo kixye naq lix yu’ameb’ laj santil paab’anel chanchaneb’ li hu taqlanb’il xb’aan li Kristo ajwi’, “moko tz’iib’anb’il ta rik’in b’on, rik’in b’an xMusiq’ li yo’yookil Dios.” Naq nekeril ru 2 Korintios 3:1–5 sa’ komonil, aatinanqex chirix chan ru naq li qab’aanuhom chanchaneb’ li hu chirix li evangelio, “nawb’il ut ilb’il ru xb’aaneb’ chixjunil.” Maare li junjunq komon sa’ li junkab’al taaruuq chixtz’iib’ankil jun li hu, re xyeeb’al chan ru naq jun chik komon xk’ut rik’in xb’aanuhom naq a’an xtzolom li Jesukristo. Eb’ li komon te’ruuq chixyaab’asinkileb’ li hu chiru li junkab’al, ut chirix a’an te’xk’e re li komon li xe’xtz’iib’a resil. K’a’ut naq aajel ru xnawb’al naq li qayu’am wan choq’ “xhu li Kristo”?
K’a’ru xyaalalil naq “li paab’aal nab’eresink qe, ut maji’ saqen noko’ilok”? K’a’ru yooko chixb’aanunkil re xk’utb’al naq naqapaab’ li k’a’ru maji’ nokoru chirilb’al?
Sa’ junkab’al, ma naru nekek’oxla—malaj neketaw—k’a’aq re ru sa’ tzuul taq’a li naxjal rib’ ut ak’ yo’ob’tesihom nawulak? (chi’ilmanq li jalam-uuch li wan rik’in li k’utleb’ aatin a’in). K’a’ru naxk’ut li k’a’aq re ru a’in qe chirix chan ru naq lix evangelio li Jesukristo naru chiqajalb’al?
Jo’ chanru naxye sa’eb’ li raqal a’in, k’a’ru xyaalalil li wank choq’ “aj k’anjel qochb’een li Dios”?
Chan ru naru taqapaab’ li raatin laj Pablo, “elenqex sa’ xyanqeb’ [laj maak] ut jek’omaq eerib’ rik’ineb’,” ut toj toowanq chixk’utb’al chaab’il b’aanuhom chiruheb’ li qas qiitz’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
K’ut li k’anjeleb’aal. Wankeb’ li na’leb’ re li evangelio, jo’ lix tojb’al rix li maak, li naru naq ch’a’aj xtawb’al ru. K’oxla roksinkileb’ li jalam-uuch malaj li kok’ k’anjeleb’aal, li taaten’qanq re laa junkab’al chixtawb’al ru li na’leb’ li neketaw sa’eb’ li loq’laj hu.
Naq noko’ok chixpaab’ankil lix evangelio li Kristo, q’axal nim li jalaak naqak’ul, jo’kan naq laj Pablo kixye naq chanchan naq “ak’ yo’ob’tesinb’ilo” (2 Korintios 5:17).