“26 agosto–1 septiembre. 1 Korintios 8–13: “Laa’ex xtz’ejwal li Kristo” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“26 agosto–1 septiembre. 1 Korintios 8–13.” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019
26 agosto–1 septiembre
1 Korintios 8–13
“Laa’ex xtz’ejwal li Kristo”
Naq nakawil ru rik’in tijok 1 Korintios 8–13, naru naq li Santil Musiq’ej tatraatina chi q’un li raatin (chi’ilmanq 1 Reyes 19:11–12). Wi nakatz’iib’aheb’ li musiq’anb’il na’leb’ a’in, tatxtenq’a chixjultikankil li k’a’ru xaweek’a ut xak’oxla naq yookat chi tzolok.
Xtz’iib’ankil li nakak’oxla
Sa’ xkutankil laj Pablo, Korinto a’an jun nimla tenamit na’ux wi’ naab’al li yakok, ut aran wankeb’ li xe’chal chaq sa’ chixjunileb’ li tenamit. Rik’in naq wankeb’ naab’al paay chi aatinob’aal ut chi paab’al sa’ li tenamit a’an, ch’a’aj choq’ reheb’ li komon sa’ li Iglees naq te’wanq sa’ junajil, ut chi jo’kan laj Pablo kixsik’ xtenq’ankileb’ chixtawb’al li junajil sa’ lix paab’aaleb’ chirix li Kristo. Li junajil a’in maawa’ yal wank sa’ tuqtuukilal chirib’ileb’ rib’; laj Pablo ink’a’ ka’ajwi’ kixpatz’ naq te’xkanab’ li ani jalan chi wank chi jo’kan. A’an kixk’ut b’an chiruheb’ naq chirix xjunajinkil rib’ rik’in lix Iglees li Jesukristo, “kub’sinb’il qaha’ ... chixk’uub’ankil ru jun chi tz’ejwalej,” ut neke’ajman ru chixjunil lix cha’al li junxaqalil (1 Korintios 12:13). Wi namaak’a’o’ jun xcha’al, chanchan natoqe’ jun uq’ej, ut nalaj xmetz’ew li junxaqalil. Naq jun xcha’al naxk’ul rahilal, chiqajunil tento taqeek’a, ut taqab’aanu li naru chiqu re xb’anb’al. Rik’in li junajil a’in, ink’a’ yal naqakuy naq wan ani jalan qik’in, naqara b’an, xb’aan naq wi ink’a’ jalan jalanq lix maataneb’ ut lix seeb’aleb’ lix cha’al, maak’a’aq raj xmetz’ew li junxaqalil. Chi jo’kan, maare nakaweek’a laa’at naq wan laa na’aj sa’ li Iglees, malaj maare wan naq nakak’oxla naq maak’a’ laa na’aj, a’ut li raatin laj Pablo choq’ aawe a’an naq li wank sa’ junajil, ink’a’ naraj naxye naq juntaq’eeto. Laa’at nakawajeb’ ru laa wech aj paab’anel, ut ajb’il aawu xb’aaneb’ a’an.
Li na’leb’ re xtzolb’aleb’ li loq’laj hu aajunes
Li Dios naxk’uub’ jun li b’e re xkolb’al qib’ chiru li aaleek.
Wi xqak’ul li musiq’ejil k’utb’esink, us ta q’axal nim, a’in ink’a’ naraj naxye naq ink’a’ taqak’ul li aaleek li “neke’xk’ul chixjunileb’ ” (1 Korintios 10:13). Maare xb’aan a’in naq laj Pablo kitz’iib’ak chirix chan ru naq eb’ laj Israelita sa’ xkutankil laj Moises ke’xyal ru rik’in li aaleek, us ta ke’ril ninqi musiq’ejil na’leb’ (chi’ilmanq Exodo 13:21; 14:13–31). Naq nakawil ru 1 Korintios 10:1–13, k’a’ru li ke’xk’ul laj Israelita li nak’anjelak choq’ aatijb’al sa’ laa yu’am? K’a’ru li xk’uub’ li qaChoxahil Yuwa’ choq’ aawe re “eelelik” chiru li aaleek? (chi’ilmanq ajwi’ Alma 13:27–30; 3 Nefi 18:18–19).
1 Korintios 10:16–17; 11:16–30
Li loq’laj wa’ak nokoxjunaji jo’ aj taaqehom re li Kristo.
Sa’ li k’ojob’anb’il k’anjel re li loq’laj wa’ak, li junjunq yoo chi ok sa’ sumwank rik’in li Qaawa’, a’ut jo’kan ajwi’ naqawotz a’in sa’ komonil—naq naqak’ul li loq’laj wa’ak, naqab’aanu sa’ komonil, jo’ aj santil paab’anel. Il ru li k’a’ru kixk’ut laj Pablo chirix li loq’laj wa’ak, ut k’oxla chan ru naq li loq’laj k’ojob’anb’il k’anjel a’in naru chiqatenq’ankil, us ta “naab’alo,” re toowanq choq’ “junaj chi tz’ejwalej” rik’in li Kristo (1 Korintios 10:17). Chan ru naru taak’ul aametz’ew rik’in xk’ulb’al li loq’laj wa’ak aawochb’eeneb’ laa wech aj paab’anel? Chan ru naq a’in naxjal chan ru naq nakakawresi aawib’ re xk’ulb’al li loq’laj wa’ak, ut chan ru naq nakayal aaq’e chixpaab’ankileb’ li sumwank xat-ok wi’ sa’ li kub’iha’?
K’a’ut naq laj Pablo ki’aatinak chirix lix ramb’aleb’ xjolom, ut chirix chan ru li rismaleb’?
Laj Pablo ki’aatinak chirix li aq’ej ut li tiqib’ank-ib’ li na’uxman sa’ lix tenamit re xk’utb’al xyaalal li komonil wankeb’ wi’ li winq rik’in li ixq, ut rik’in li Qaawa’. Us ta ink’a’ chik naqab’aanu li yeeb’il resil sa’ li kutan wanko wi’, toj wan k’a’ru naru taqatzol rik’in li raatin laj Pablo sa’ 1 Korintios 11:11, naq li winq jo’ ajwi’ li ixq ajb’il ru sa’ lix k’uub’anb’il na’leb’ li Qaawa’, sa’ li sumlaak jo’ ajwi’ sa’ li Iglees. Jo’ kixye li Elder David A. Bednar, “Eb’ li winq ut li ixq tento raj te’xtzol rib’, te’xkawob’resi rib’, te’rosob’tesi rib’, ut te’xtz’aqob’resi rib’ chirib’ileb’ rib’ ” naq wankeb’ sa’ xb’eenikeb’ re xk’ulb’al li taqenaqil loq’al (“Creemos en ser castos,”Liahona, mayo, 2013, 42; chi’ilmanq ajwi’ Markos 10:6–9).
K’eeb’ileb’ li musiq’ejil maatan re rosob’tesinkil chixjunileb’ li ralal xk’ajol li qaChoxahil Yuwa’.
Moko chixjunileb’ ta li musiq’ejil maatan wankeb’ chi tz’iib’anb’il sa’ 1 Korintios 12–13. A’b’anan us tiklaak aran re tat-ok chixk’eeb’al reetal ut chixk’oxlankileb’ li maatan li xk’e aawe li qaChoxahil Yuwa’. Li ch’olob’ank “Maatan naxk’e li musiq’ej (eb’ li)” sa’ li K’utul Raqal reheb’ li Loq’laj Hu naru tatxtenq’a chixtawb’aleb’ ru li maatan a’in. Rochb’eeneb’ li maatan yeeb’ileb’ resil xb’aan laj Pablo, naru taatiq li maatan xak’e reetal rik’ineb’ jalaneb’ chik kristiaan, aawik’in laa’at, malaj rik’ineb’ li ani yeeb’ileb’ resil sa’eb’ li loq’laj hu. Wi xak’ul jun rosob’tesihom li yuwa’b’ejil aj k’anjel, maare yeeb’il resil aran junjunq li musiq’ejil maatan xak’ul. Chan ru naq eb’ li maatan a’in nokohe’xtenq’a chixkab’lankil lix awa’b’ejihom li Dios? K’oxla k’a’ru taab’aanu re “xsik’b’al ru li xninqal ru aamaatan” (1 Korintios 12:31).
Chi’ilmanq ajwi’ Moroni 10:8–21, 30; Tzoleb’ ut Sumwank 46:8–26; Eb’ lix Raqalil li Paab’aal 1:7.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ ru li loq’laj hu aawochb’een laa junkab’al, sik’ k’ame’k aab’e xb’aan li Musiq’ej re xk’eeb’al li nak’anjelak choq’ re laa junkab’al. Eb’ li na’leb’ a’in naru tate’xtenq’a:
Rik’in naq laj Pablo kixjuntaq’eeta xyu’aminkil li evangelio rik’in alinak sa’ jun estadio, naru tex’alinaq jo’ junkab’al re xk’utb’al xyaalal. K’e jun ch’ina koroon re li junjunq li naxchoy li alinak, ut aatinanqex chirix chan ru naq chixjunileb’ li yalb’ileb’ xq’e chixtaaqenkil li Jesukristo sa’ li yu’am a’in tixk’ul li maatan li “ink’a’ nalaj na’oso’ ” (1 Korintios 9:24; chi’ilmanq ajwi’ 2 Timoteo 4:7–8). K’a’ru tento tixb’aanu jun chaab’il aj alinanel re xkawresinkil rib’ chi alinak sa’ li estadio? Chi jo’kan, chan ru naru naqakawresi qib’ chi sutq’iik rik’in li qaChoxahil Yuwa’?
Laj Pablo kixjuntaq’eeta xpaab’ankil li evangelio rik’in alinak sa’ jun estadio.
Naru taak’oxla xk’eeb’al re li junjunq jun ch’ina hu tz’iib’anb’il wi’ lix k’ab’a’ jun chik komon sa’ li junkab’al. Ye reheb’ li komon naq te’xtz’iib’aheb’ li musiq’ejil maatan li wankeb’ re li kristiaan a’an. Naru nakanumsiheb’ li hu rik’in chixjunqaleb’ li komon toj reetal naq li junjunq xru chixtz’iib’ankil resil lix maataneb’ li junjunq komon sa’ li junkab’al.
K’a’ut naq na’ajman ru li Santil Musiq’ej re xk’ulb’al jun xnawom qach’ool chirix li Jesukristo? K’a’ru naru taqab’aanu re xk’eeb’al xb’oqb’al li Santil Musiq’ej re tixkawob’resi lix nawom qach’ool chirix li Kristo?
Lix jaljookil ru aatin laj Pablo chirix li junxaqalil naru chetenq’ankil chi aatinak chirix li junajil sa’ lee junkab’al. Jo’ jun eetalil, eb’ li komon sa’ li junkab’al taaruuq te’xyiib’ xjalam-uuch jun li junxaqalil li ka’ajwi’ xnaq’ ru wan, malaj ka’ajwi’ xxik wan (chi’ilmanq li raqal 17). K’a’ru neke’xk’ut li raqal a’in chirix chan ru naq tento toowanq chiqib’il qib’ jo’ komon sa’ li junkab’al?
Li kixye laj Pablo chirix li rahok maare taaruuq taawanq choq’ eetalil aatin choq’ re laa junkab’al. Naru taapatz’ re li junjunq komon sa’ li junkab’al chixtzolb’al jun li ch’ol aatin sa’eb’ li raqal 4–8, ut te’xk’ut chiru li junkab’al k’a’ru xyaalalil, rik’in roksinkil li aatin, li ch’olob’ank, ut li k’a’ru xe’xk’ul. Chan ru naq li Kolonel naxk’ut rik’in xb’aanuhom eb’ li chaab’ilal a’in? Naru ajwi’ taayiib’ jun nimla hu wankeb’ wi’ li ch’ol aatin a’in, ut taak’e yalaq b’ar sa’ laa wochoch. K’oxla chan ru naru taayiib’.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
K’ut jun raqal reheb’ li loq’laj hu Sik’ ru jun raqal li xwulak chawu, ut k’ut chi tz’iib’anb’il b’ar wi’ eb’ li komon sa’ li junkab’al te’ril chi kok’ aj xsa’. Kanab’eb’ chixjunjunqaleb’ laa komon chixsik’b’al jun raqal reheb’ li loq’laj hu re xk’utb’al.
“Li wa naqajachi, ma maawa’ tab’i’ a’an li sumwank rik’in xtz’ejwal li Kristo? Wank jun ajwi’ chi wa; jo’kan naq, us ta naab’alo, a’b’an junaj chi tz’ejwalej naq wanko” (1 Korintios 10:16–17).