16–22 septiembre. 2 Korintios 8–13: “Li Dios naxra li nasihok chi sa sa’ xch’ool” ” Kim, Taaqehin—Choq’ reheb’ li komon ut li junkab’al: 2019 (2019)
16–22 septiembre. 2 Korintios 8–13,” Kim, Taaqehin—Choq’ reheb’ li komon ut li junkab’al: 2019
16–22 septiembre
2 Korintios 8–13
“Li Dios naxra li nasihok chi sa sa’ xch’ool”
Wi nakatz’iib’a li musiq’ejil na’leb’ nakak’ul, tatxtenq’a re taajultiko’q aawe li k’a’ru xatzol sa’ rilb’aleb’ ru li loq’laj hu. Us xtz’iib’ankil sa’ jun li ch’ina hu re tzolok, malaj taatz’iib’a chire li perel hu sa’eb’ laa loq’laj hu, taatz’iib’a sa’ li aplicación Biblioteca del Evangelio, malaj naru ajwi’ taachap laa waatin chirix.
Xtz’iib’ankil li nakak’oxla
K’a’ raj ru taab’aanu wi ta taawab’i naq wan jun ch’uut chi aj santil paab’anel sa’ jalan chik li na’ajej li wankeb’ xtz’okajik? A’in ajwi’ li yoo chi k’ulmank, li kixye laj Pablo resil reheb’ laj paab’anel aj Korinto sa’ 2 Korintios 8–9. Kiraj xq’unb’esinkileb’ xch’ool laj paab’anel aj Korinto naq te’xsi b’ayaq lix b’ihomaleb’ re xtenq’ankileb’ laj santil paab’anel li wankeb’ rajomeb’ ru. A’b’anan sa’ xtz’aamankil li eechej, sa’ li raatin laj Pablo wan ajwi’ li yaalil na’leb’ chirix li k’ehok: “Li junjunq chixk’ehaq jo’ nimal na’alaak sa’ xch’ool, ink’a’ chi kab’ rix xch’ol chi moko chi minb’ilaq ru, xb’aan naq li Dios naxra li nasihok chi sa sa’ xch’ool” (2 Korintios 9:7). Sa’ li kutan wanko wi’, toj wankeb’ laj santil paab’anel sa’ li jar tenamit sa’ ruchich’och’ li neke’raj ru xtenq’ankileb’. Wan naq maak’a’ chik nokoru chixb’aanunkil choq’ reheb’, ka’ajwi’ xkuyb’al qasa’ ut xk’eeb’al li mayej re li kuyuk sa’. A’ut wan naq naru ajwi’ naqatenq’aheb’ rik’in k’ehok reheb’ naq wankeb’ chiqu. Maak’a’ naxye chan ru naq naqak’e li mayej, a’ut us naq taqak’oxla k’a’ru na’eek’asink qe naq nokok’ehok. Ma naqak’e li qamayej sa’ xk’ab’a’ naq nokorahok? Xb’aan naq yaal ajwi’ naq a’an li rahok li naxk’e xsahil xch’ool li ani nak’ehok.
Li na’leb’ re xtzolb’aleb’ li loq’laj hu aajunes
Naru ninwotz li k’a’ru we chi sa inch’ool re rosob’tesinkileb’ li neb’a’ ut li neke’raj xtenq’ankil.
Maak’a’jo’ xk’ihaleb’ li neke’raj xtenq’ankil yalaq b’ar sa’ li ruchich’och’. Chan ru naq laa’o nokoru chixb’aanunkil k’a’ruhaq? Li Elder Jeffrey R. Holland kixye li aatin a’in: “Us ta b’ihomo malaj neb’a’o, tento “taqab’aanu jo’ ch’inal jo’ nimal naru” naq wan ani naraj xtenq’ankil [chi’ilmanq Markos 14:6, 8]. ... Li Dios texxtenq’a ut tixk’am eeb’e sa’ xb’aanunkil li uxtaanal k’anjel jo’ tzolom, wi chi anchal eech’ool yookex chirajb’al, ut chi tijok, ut chixsik’b’al chan ru xpaab’ankil jun taqlahom li xk’e k’iila sut” (“Ma maawa’o tab’i’ aj lemoox chiqajunilo?” Jolomil ch’utub’aj-ib’ re octubre 2014).
Il ru 2 Korintios 8:1–15; 9:6–15, ut tz’iib’aheb’ li na’leb’ kixk’ut laj Pablo chirix xtenq’ankileb’ li neb’a’ ut li ani neke’raj xtenq’ankil. K’a’ru sa’ li raatin laj Pablo na’eek’asink aawe? Naru tattijoq re xk’ulb’al aab’eresinkil chirix k’a’ru naru taab’aanu re rosob’tesinkil li ani naraj xtenq’ankil. K’e reetal naq taatz’iib’a li na’leb’ nakak’ul chi musiq’anb’il, ut naq taak’e aach’ool chixb’aanunkil.
Chi’ilmanq ajwi’ Mosiah 4:16–27; Alma 34:27–29; Henry B. Eyring, “Ma ink’a’ ta a’in li kuyuk sa’ sik’b’il ru inb’aan?” Jolomil ch’utub’aj-ib’ re abril 2015; Linda K. Burton, “Laa’in chaq aj jalanil tenamit,” Jolomil ch’utub’aj-ib’ re abril 2016.
Eb’ li b’alaq’il profeet neke’xyal xq’e chi b’alaq’ik.
Maare taataw ru li jun ch’ol a’in rik’in xnawb’al naq ke’wan li “b’alaq’il apostol” li ke’wakli chaq sa’ xyanqeb’ laj paab’anel aj Korinto (2 Korintios 11:13). K’a’ru nakatzol sa’eb’ li raqal 13–15 chirixeb’ li neke’k’utuk re li b’alaq’il tzol’leb’? K’a’ru nakatzol chirixeb’ li tz’aqal profeet, naq nakawil resil lix b’aanuhom laj Pablo jo’ aj k’anjel chiru li Kristo? (chi’ilmanq eb’ li raqal 23–33).
Ma tento naq “tink’e reetal” ma tz’aqal lin paab’aal chirix lix evangelio li Jesukristo?
Rik’in naq sa’ li kutan a’in wankeb’ naab’al li neke’xsik’ qajalb’ehinkil chaq “rik’in li yaal ut santilal wanko wi’ choq’ re li Kristo” (2 Korintios 1:3), maare us ab’ink chiru li raatin laj Pablo li naxye, “K’ehomaq reetal lee yu’am, ma tz’aqal yookex sa’ li paab’aal” (2 Korintios 13:5). Jo’ jun eetalil, naru nakak’oxla k’a’ru naru taawisi chaq sa’ laa yu’am re naq taab’eresi aawib’ rik’in li Kristo, malaj taab’aanu li “Actividad de atributos” sa’ Predicad mi Evangelio, perel 133.
K’a’ru li “rox xk’ojaril li choxa,” ut ani li winq li “kisaapuuk” aran?
Sa’eb’ li raqal a’in, laj Pablo yoo chi aatinak chirix lix yu’am a’an, a’ut ink’a’ kixye xk’ab’a’—re tana’ naq ink’a’ yooq chixnimankil rib’ chirix li chaq’al ru matk’ a’in. Li aatin “rox xk’ojaril li choxa” na’aatinak chirix li choxahil awa’b’ejihom (chi’ilmanq Tz. ut S. 76:96–98).
Li rusilal li Kolonel tz’aqal re tintaw kawilal us ta wan xq’unal wu.
Ink’a’ naqanaw k’a’ru li “tiq’leb’ sa’ xjunxaqalil” laj Pablo, a’ut moko ch’a’aj ta choq’ qe xtawb’al ru k’a’ut naq kiraj naq taa’isimanq chaq. Chiqajunil wan lix yalb’al qix ut li qamajelal li ink’a’ naraj li Qaawa’ risinkil chaq sa’ li qayu’am. K’oxlaheb’ lix yalb’al aawix naq nakawil ru 2 Korintios 12:5–10. K’a’ru kixye laj Pablo chirix li majelal? K’a’ru xyaalalil choq’ aawe naq tz’aqal choq’ aawe li rusilal li Dios? Chan ru naq xaweek’a lix wankil li Dios chixk’eeb’al aakawilal?
Chi’ilmanq ajwi’ Mosiah 23:21–24; 24:10–15; Eter 12:27; Moroni 10:32–33.
K’a’ru xyaalalil naq laj Pablo ki’aatinak chirix li “wiib’ malaj oxib’ chi aj yehol nawom”?
Sa’ xkutankil li Najter Chaq’rab’, ke’ajman ru wiib’ malaj oxib’ aj yehol nawom re xjitb’al anihaq (chi’ilmanq Deuteronomio 19:15). Laj Pablo yoo chi aatinak chirix a’in naq kixye naq rox sut taaxik Korinto. Sa’ li kutan a’in toj na’ilman li na’leb’ a’in chirix wiib’ oxib’ chi aj yehol nawom, jo’ li oxib’ aj chi aj yehol nawom chirix lix Hu laj Mormon, li wiib’ ch’olob’anb’il esil chirix li Jesukristo li wankeb’ sa’ li Santil Hu ut sa’ lix Hu laj Mormon, ut lix k’anjeleb’ li misioneer, laj tzolol ochochnal, ut li ixq aj ula’, li neke’xch’olob’ li yaal sa’ wiib’al.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
K’a’ru xataw sa’eb’ li ch’ol a’in li naxwaklesi xch’ooleb’ li wankeb’ sa’ laa junkab’al re te’xtenq’aheb’ li neb’a’ ut li ani te’raj xtenq’ankil? Maare us raj anajwan xk’oxlankil jun k’anjel taaruuq teeb’aanu jo’ junkab’al choq’ re anihaq li naraj tenq’aak.
Ma wan ani nawb’il ru xb’aan laa junkab’al, li naru xyeeb’al naq “nasihok chi sa sa’ xch’ool”? Chan ru naq nokoru chi k’anjelak chiru li qas qiitz’in chi jwal sa wi’chik qach’ool?
Chan ru naru taak’ut chiru laa junkab’al chirix “yalok-u” malaj pleetik rik’in li maa’usilal? Ma taawulaq raj chiruheb’ li wankeb’ sa’ laa junkab’al xyiib’ankil jun li kawil na’ajej rik’ineb’ li chunleb’aal ut li t’ikr? Rik’in a’in, taaruuq tex’aatinaq chirix chan ru xrumb’al li k’a’ru nanajtob’resink qe rik’in li Dios, ut xk’eeb’al qak’a’uxl “rub’el roq rub’el ruq’ li Kristo.” K’a’ruheb’ li musiq’ejil “ch’iich’ ” naru naqoksi re xb’eresinkil li qak’a’uxl? (chi’ilmanq Efesios 6:11–18).
K’a’ru naru nekeb’aanu sa’ lee junkab’al re xb’eresinkil eerib’ rik’in “li yaal ut santilal wankex wi’ choq’ re li Kristo”?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Tz’iib’an li na’leb’ nakak’ul. Li Elder Richard G. Scott kixye: “Li na’leb’ tz’iib’anb’il a’an li na’leb’ naru taa’oksimanq sa’ jun hoonal naq na’ajman ru. ... Wi nakatz’iib’a resil li musiq’ejil b’eresink nakak’ul, k’a’jo’ wi’chik naq tatruuq chixk’ulb’al chik xkomon li saqen” (“Cómo adquirir conocimiento espiritual,” Liahona, agosto 2001, 12–14; chi’ilmanq ajwi’ Li k’utuk jo’ li Kolonel, 12, 30.
“Li junjunq chixk’ehaq jo’ nimal na’alaak sa’ xch’ool, ink’a’ chi kab’ rix xch’ool, chi moko chi minb’ilaq ru, xb’aan naq li Dios naxra li nasihok chi sa sa’ xch’ool” (2 Korintios 9:7).