16–22 septiembre

2 Korintios 8–13

“Li Dios naxra li nasihok chi sa sa’ xch’ool”

Eb’ li tz’aqal chaab’il na’leb’ re xtzolb’aleb’ li kok’al re laa tzoleb’aal te’wulaq naq yooqat chixtzolb’al 2 Korintios 8–13 rik’in tijok ut rik’ineb’ li kok’al sa’ laa k’a’uxl. Sa’ li tusleb’ aatin a’in wankeb’ xkomon li na’leb’ re li k’utuk.

Xtz’iib’ankil li nakak’oxla

Xkanab’ankileb’ chi wotzok

Jun li chaab’il na’leb’ re xb’oqb’aleb’ li kok’al chi wotzok a’an xjultikankil reheb’ k’a’ruhaq xab’oqeb’ chixb’aanunkil chiru junaq li tzolok numenaq. Kanab’eb’ chixwotzb’al lix numsihomeb’.

Xk’utb’al li tzol’leb’

Kok’al toj ka’ch’ineb’ xyu’am

2 Korintios 9:6–7

Naru ninsihok chi sa sa’ inch’ool reheb’ li kristiaan li wankeb’ raajelil.

Junelik chaab’il k’anjelak chiruheb’ li qas qiitz’in, a’b’an jwal chaab’il wi’chik k’anjelak rik’in sahil ch’oolejil. K’oxla k’a’ru taawaklesinq xch’ooleb’ li kok’al re naq “te’sihoq chi sa sa’ xch’ooleb’.”

Kok’ k’anjel naru chi b’aanumank

• Kanab’eb’ li kok’al chixka’sutinkil li ch’ol aatin “Li Dios naxra li nasihok chi sa sa’ xch’ool” (2 Korintios 9:7). K’a’ru naraj naxye li “nasihok chi sa sa’ xch’ool”? K’ut xjalam-uuch jun lix naq’ uhej sa xch’ool ut jun ra xch’ool, ut patz’ reheb’ li kok’al b’ar wan lix naq’ uhej a’an li nak’ehok chi sa sa’ xch’ool.

• B’ichahomaq junjunq sut sa’ komonil jun li b’ich na’aatinak chirix li k’anjelak chiru anihaq, jo’ “Naq yooko chi tenq’ank” (B’ichleb’aal choq’ reheb’ li Kok’al, 108). Li xb’een sut, kanab’eb’ li kok’al chi b’ichank chi sa sa’ xch’ooleb’; chirix a’an kanab’eb’ chi b’ichank rik’in jalan jalanq eek’ahom malaj wank, jo’ rik’in rahil ch’oolej, lub’k, josq’il, malaj xiw. Jultika reheb’ li kok’al naq li qaChoxahil Yuwa’ naraj naq te’qatenq’a li qas qiitz’in chi sa sa’ qach’ool. Chirix a’an b’ichahomaq wi’chik li b’ich rik’in sahil ch’oolejil.

• K’e reheb’ li kok’al xjalam-uucheb’ xnaq’ uhej se’se’eb’. Kanab’eb’ chixchapb’al chi kutankil lix jalam-uucheb’ naq’ neke’rab’i li aatin se’ naq nekeb’icha “Sahil ch’oolej” (B’ichleb’aal choq’ reheb’ li Kok’al, 128). Naru ajwi’ neke’xb’aanu a’an rik’ineb’ xjalam-uuch josq’il xnaq’ uhej ut rik’in li aatin josq’il. Ye reheb’ li kok’al naq jun li josq’ aj xnaq’ uhej moko sahil ch’oolej ta; li wank rik’in sahil ch’oolej ut k’anjelak chiru anihaq a’an li se’ek ut xtenq’ankileb’ li qas qiitz’in chi se’ek.

• K’uub’ahomaq jun li ch’ina k’anjel jo’ tzoleb’aal re k’anjelak chiru anihaq, jo’ jun li ch’ina al ink’a’ nawulak sa’ li Tzoleb’aal reheb’ li Kok’al malaj jun li komon re li teep malaj rech kab’aleb’ wankeb’ raajelil. Naru nekek’uub’ rula’aninkil rochoch junaq li kristiaan, xtz’iib’ankileb’ kok’ hu re rahok malaj xyiib’ankileb’ jalam-uuch, malaj xwotzb’al junaq li ch’ina kab’.

• Kanab’eb’ li junjunq chi kok’al chixk’uub’ankil jun li k’anjel chi sa sa’ xch’ooleb’ choq’ re jun li komon sa’ lix junkab’aleb’. Chiru li tzolok sa’ li xamaan chal re, kanab’eb’ chixwotzb’al resil li xe’xb’aanu.

2 Korintios 12:7–10

Li qaChoxahil Yuwa’ junelik naxsumeheb’ li tij, a’b’an moko junelik ta naxk’e we chixjunil li k’a’ru ninpatz’.

Li numsihom b’ar wi’ laj Pablo kitijok re naq taa’isiiq raj li “tiq’leb’ sa’ lix junxaqalil” naxk’ut chiqu naq li Dios wan naq naxk’ut chiqu lix rahom naq ink’a’ naxk’e qe li naqaj.

Kok’ k’anjel naru chi b’aanumank

• K’ut chiruheb’ li kok’al jun li ch’ina che’ wan xk’ixel (malaj xjalam-uuch jun li ch’ina che’). Tenq’aheb’ chixk’oxlankil k’a’ raj ru taa’eek’amanq rik’in jun li k’ix malaj tiq’leb’ ch’ikch’o sa’ li tib’elej chiru naab’al li hoonal. K’os ru 2 Korintios 12:7–10 choq’ reheb’ li kok’al, rik’in roksinkileb’ aatin neke’xtaw ru a’an. Ch’olob’ naq li “tiq’leb’ sa’ lix junxaqalil” laj Pablo a’an jun li yale’k, maare jun li q’unal metz’ew sa’ tib’elej. Us ta laj Pablo kixpatz’ re li Dios naq taarisi li yale’k a’an, li Dios ink’a’ kirisi. Sa’ xna’aj a’an, li Dios kixk’ut chiru laj Pablo naq eb’ li ch’a’ajkilal naru nokohe’xtenq’a chixtzolb’al wank chi tuulan ut chixkanab’ankil qib’ chiru a’an. Chi jo’kan ut li Dios naru naxk’e xkawil qametz’ew.

• Ch’olob’ xyaalal naq li qaChoxahil Yuwa’ naxnaw li k’a’ru jwal chaab’il choq’ qe ut naq tixk’e qe li k’a’ru naqaj ru, us ta jalan chiru li naqak’oxla naq naqaj ru. Naru ajwi’ nakawotz jun aanumsihom b’ar wi’ laa tij ke’sumeek chi jalan malaj sa’ jun hoonal jalan chiru li xawoyb’eni laa’at. Li esil “No se olviden de orar por Erik” (Liahona, enero 2017, 74–75) naru ajwi’ na’oksiman.

• B’icha rik’ineb’ li kok’al jun li b’ich na’aatinak chirix lix rahom li qaChoxahil Yuwa’, jo’ “Natijok jun ch’ina al” (B’ichleb’aal choq’ reheb’ li Kok’al, 6–7). Patz’ reheb’ li kok’al k’a’ raj ru te’xye re junaq li naxpatz’ ma narab’iheb’ ut naxsumeheb’ li qatij li qaChoxahil Yuwa’. B’ichahomaq wi’chik li b’ich ut k’eheb’ reetalil li raqal li naxch’olob’ li k’a’ru nareek’a li qaChoxahil Yuwa’ choq’ qe.

Xk’utb’al li tzol’leb’

Kok’al ak ninqeb’

2 Korintios 9:6–9

Naru ninsihok chi sa sa’ inch’ool reheb’ li kristiaan li wankeb’ raajelil.

Laj Pablo kiraj xwaklesinkil xch’ooleb’ laj santil paab’anel chixsiib’al lix naab’alileb’ re xtenq’ankileb’ li neb’a’. Chan ru taawoksi li raatin a’an re xwaklesinkil xch’ooleb’ li kok’al chi k’anjelak chiruheb’ li ras riitz’in?

Kok’ k’anjel naru chi b’aanumank

• Tz’iib’aheb’ li aatin wan sa’ 2 Korintios 9:7 sa’ li pizarron, ut kanab’eb’ chi yamyo li aatin ninqeb’ xwankil. Kanab’eb’ li kok’al chixq’ehinkil b’ar wankeb’ li aatin maak’a’eb’. Chirix a’an kanab’eb’ chirilb’al ru li raqal sa’eb’ li loq’laj hu re xnujob’resinkileb’ li yamyo. K’a’ru naraj naxye sihok “rik’in xkab’ rix ch’oolej, malaj chi minb’ilaq ru”? K’a’ru naraj naxye “li nasihok chi sa sa’ xch’ool”?

• Kanab’eb’ li kok’al chatenq’ankil chixtawb’aleb’ xjalam-uuch li Kolonel b’ar wi’ yoo chi k’anjelaq chiruheb’ li ras riitz’in (wankeb’ naab’al sa’ Kim, Taaqehin—Choq’ reheb’ li komon ut li junkab’al). Patz’ reheb’ k’a’ru neke’ril sa’eb’ li jalam-uuch a’an li natenq’an reheb’ chixnawb’al naq li Jesus kik’anjelak chiruheb’ li ras riitz’in rik’in rahok. Kanab’omaq eejayalihom jo’ tzoleb’aal re sumenk chi chaab’il naq jun li komon re lee junkab’al malaj junaq chik kristiaan tixpatz’ eere naq texk’anjelaq chiru li xamaan chal re, jo’ li tenq’ank rik’ineb’ li k’a’aq re ru tento te’b’aanumanq sa’ kab’l malaj rilb’aleb’ jalaneb’ chik kristiaan.

• Tenq’aheb’ li kok’al chirutz’u’ujinkileb’ ru kok’ pek. Kanab’eb’ chixk’amb’aleb’ lix “kok’ pek re k’anjelak” sa’ lix b’oolxeb’ chiru li xamaan a’in re xtenq’ankileb’ chixjultikankil li k’anjelak chi sa sa’ xch’ooleb’ chiruheb’ li ras riitz’in.

• Tenq’aheb’ li kok’al chixyoob’ankileb’ ak’ ch’ol sa’ jun li b’ich na’aatinak chirix li k’anjelak chiru anihaq, jo’ “Sa nawil” (B’ichleb’aal choq’ reheb’ li Kok’al, 129), li tixk’ut naq sa k’anjelak chiruheb’ li qas qiitz’in chi k’iila paay ru.

2 Korintios 12:7–10

Li qaChoxahil Yuwa’ junelik naxsumeheb’ li tij, a’b’an moko junelik ta naxk’e we chixjunil li k’a’ru ninpatz’.

Laj Pablo kixpatz’ re li Dios naq taarisi lix q’unal xmetz’ew, a’b’an li Dios naxnaw naq lix yajel laj Pablo tixq’unob’resi xch’ool ut tixk’e xmetz’ew.

Kok’ k’anjel naru chi b’aanumank

• Kanab’eb’ li kok’al chixjuntaq’eetinkil 2 Korintios 12:9–10 ut Eter 12:27. B’ar wan reheb’ li aatin malaj li ch’ol aatin ka’sutinb’ileb’? K’a’ru neke’xk’ut li raqal a’an? (Maare tento naq taach’olob’ naq laj Pablo sa’ li hoonal a’an yoo chixjuntaq’eetinkil lix ch’a’ajkilal rik’in jun li tiq’leb’ sa’ lix junxaqalil.) K’a’ru naxk’ut li Dios chiru laj Pablo chirixeb’ li yale’k?

• Kanab’eb’ li kok’al chixtusb’aleb’ rajlil junjunqeb’ li yale’k li neke’xk’ul li kristiaan. Tenq’aheb’ chixk’eeb’al reetal chan ru naq jun kristiaan naru chi tzolok rik’ineb’ li yale’k ut taa’osob’tesiiq xb’aan a’an.

• Il ru rik’ineb’ li kok’al “¿El Padre Celestial siempre contestará mis oraciones?” (Liahona, enero 2017, 69). Kanab’eb’ li kok’al chixwotzb’aleb’ xnumsihom b’ar wi’ xe’tijok re xk’ulb’al k’a’ruhaq ink’a’ xe’xk’ul. Kanab’eb’ chixwotzb’al li xe’xtzol rik’ineb’ lix numsihom. Maare wankeb’ ajwi’ laa numsihom laa’at li naru nakawotzeb’ ajwi’. Ch’olob’ xyaalal naq li qaChoxahil Yuwa’ junelik naxsumeheb’ li qatij jo’ chanru ut sa’ li hoonal naq a’anaq jun xnimal osob’tesihom choq’ qe.

Xb’oqb’aleb’ chi tzolok sa’ kab’l

Kanab’eb’ li kok’al chi sihok chi sa sa’ xch’ooleb’ sa’ li rochocheb’ chiru li xamaan a’in ut chi wulak sa’ li tzoleb’aal sa’ li xamaan jun chik chi kawresinb’ileb’ re xyeeb’al resil chan ru xe’k’anjelak chiru anihaq li wan raajelil.

Xchaab’ilob’resinkil li qak’utum

Yiib’ ru li ch’i’ilenk rik’in rahok. “Wan naq eb’ li kok’al neke’xb’aanu k’a’ruhaq li naxram ru li tzolok sa’ li tzoleb’aal. Naq na’uxman a’in, chiwanq aakuyum, aarahom, ut aanawom chirix li k’a’ru nach’a’ajk’o wi’ li ch’ina al. Wi li ch’ina al li naxb’aanu li ajtesink-ib’ wan xch’a’ajkilal sa’ xyu’am, aatinan rik’in li especialista en discapacidad sa’ li teep malaj li oqech, malaj ula’ani li perel web’ disabilities.lds.org re xtawb’al chan ru naru taatenq’a.” (Li k’utuk jo’ li Kolonel, 26).