li kub’sib’aal ha’ sa’ jun santil ochoch

2–8 septiembre

1 Korintios 14–16

“Li Dios moko Dios ta re po’ok ch’oolej, xDios b’an li tuqtuukilal”

Naq yooqat chirilb’al ru 1 Korintios 14–16, li Santil Musiq’ej tatxtenq’a chixnawb’al k’a’ru taak’ut chiruheb’ li kok’al sa’ laa tzoleb’aal. Re xtawb’al xkomon aana’leb’, numsi wi’chik li tusleb’ aatin a’in.

Xtz’iib’ankil li nakak’oxla

reetalil li wotzok

Xb’oqb’aleb’ chi wotzok

Re xtikib’ankil li tzolok re li xamaan a’in, naru taawil ru 1 Korintios 14:26 chi kaw xyaab’ aakux. Ch’olob’ naq rik’in naq naqach’utub’ qib’ sa’ li iglees, naru naqawaklesiheb’ li raam (naqakawob’resiheb’ ut naqatenq’aheb’) li qas qiitz’in naq nokowotzok. K’a’ru naru neke’xwotz li kok’al sa’ li kutan a’in re xwaklesinkil li raam anihaq?

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

1 Korintios 15:12–22

Sa’ xk’ab’a’ naq li Jesukristo kiwakli wi’chik, naru ninwan rik’in li qaChoxahil Yuwa’ chirix naq tinkamq.

Chan ru naru nakak’ut chiruheb’ li kok’al sa’ laa tzoleb’aal naq sa’ xk’ab’a’ naq li Jesukristo kiwakli wi’chik naru nawan wi’chik qayu’am?

Kok’ k’anjel naru chi b’aanumank

• Ye li ch’ol aatin a’in chi naab’al sut rik’ineb’ li kok’al: “chixjunileb’ te’wanq wi’chik xyu’am sa’ xk’ab’a’ li Kristo” (1 Korintios 15:22). K’ut jun xjalam-uuch li Kolonel waklijenaq wi’chik (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Ch’olob’ naq chiqajunilo tookamq sa’ jun kutan, a’b’an naq sa’ xk’ab’a’ naq li Jesukristo kiwakli wi’chik, chiqajunil tooq’ajq sa’ li yu’am chirix li kamk.

• Oksi jun li tzolok moko ch’a’aj ta ru jo’ a’in re xk’utb’al chirix li wakliik chi yo’yo: K’ut chiruheb’ li kok’al jun li chakeet, li taareetali li qajunxaqalil. Naq yo’yooko, li qamusiq’ wan sa’ li qajunxaqalil, ut li qajunxaqalil naru chi eek’ank (k’e chawix li chakeet). Naq nokokam, li musiq’ej na’el sa’ li qajunxaqalil ut li qajunxaqalil ink’a’ chik naru chi eek’ank (isi chawix li chakeet ut k’e chiru jun li meex malaj chunleb’aal re reetalinkil jun junxaqalil chi maak’a’ xmusiq’). Naq nokowakli chi yo’yo, li qamusiq’ naq’aj chaq sa’ li qajunxaqalil (k’e wi’chik chawix li chakeet) re naq maajun wa chik taajache’q ru. Kanab’eb’ li kok’al chixk’eeb’aleb’ xhoonal re xk’eeb’al ut re risinkil chirixeb’ li chakeet ut jun chik li ch’ina al naxch’olob’ li nak’ulman naq nokowakli wi’chik.

1 Korintios 15:29

Naru nakub’siik inha’ jo’ ruuchileb’ li kristiaan ak kamenaqeb’.

Eb’ li kok’al nakatzoleb’ naru neke’xkawresi rib’ chalen anajwan re xik sa’ li santil ochoch ut te’kub’eeq xha’ jo’ ruuchileb’ li kamenaq naq te’xket kab’laju chihab’. Laj Pablo na’aatinak chirix li aajel ruhil tzol’leb’ a’an sa’ lix hu choq’ reheb’ laj Korinto.

Kok’ k’anjel naru chi b’aanumank

• Tenq’aheb’ li kok’al chixk’oxlankil li k’a’ru ink’a’ neke’ru chixb’aanunkil yal xjuneseb’ rib’ (jo’ xpaqonkil k’a’ruhaq jwal aal malaj xtawb’al k’a’ruhaq wan taqenaq). Ani natenq’an reheb’ chixb’aanunkileb’ a’an? K’ut xjalam-uuch jun reheb’ laa xe’toonil li kikam chi ink’a’ kikub’e xha’. Aatinan rik’ineb’ li kok’al chirix li kristiaan a’an ut ch’olob’ naq moko naru ta chi kub’eek xha’ chi ink’a’ tenq’anb’il xb’aan anihaq arin sa’ li ruchich’och’.

• Patz’ reheb’ li kok’al wi anihaq sa’ lix junkab’aleb’ wulajenaq sa’ li santil ochoch re xb’aanunkileb’ li kub’iha’ jo’ ruuchileb’ li kamenaq. K’uteb’ xjalam-uuch li kub’sib’aal ha’ sa’ jun santil ochoch. Ma neke’xnaw li kok’al k’a’ru na’uxman sa’ li na’ajej a’an? Ch’olob’ naq sa’ li santil ochoch naru nakub’siman qaha’ jo’ ruuchileb’ li kristiaan ak kamenaqeb’ chi ink’a’ kub’sinb’ileb’ xha’. Toja’ naq eb’ li kristiaan a’an naru te’xsik’ ru ma te’xk’ulub’a li kub’iha’ a’an.

1 Korintios 15:40–41

Li qaChoxahil Yuwa’ naraj naq tinwanq rik’in a’an sa’ li choxahil awa’b’ejihom.

Chan ru naru nakak’ut chiruheb’ li kok’al chirixeb’ li choxahil, li terrestil, ut li teleestil awa’b’ejihom? Eb’ li kok’ k’anjel a’in naru neke’oksiman.

Kok’ k’anjel naru chi b’aanumank

• Tz’iib’a sa’ li pizarron Choxahil, Terrestil ut Teleestil. Tenq’aheb’ li kok’al chixyeeb’aleb’ li aatin a’an.

• K’uteb’ xjalam-uuch li saq’e, li po, ut eb’ li chahim. B’ar wan reheb’ nalemtz’un chi us? Il ru choq’ reheb’ li kok’al 1 Korintios 15:40–41 (chi’ilmanq ajwi’ JJS, 1 Korintios 15:40). Ch’olob’ naq li saq’e, li po, ut eb’ li chahim neke’reetali li awa’b’ejihom b’ar wi’ naru nokowulak chi wank chirix naq toowakliiq chi yo’yo. Sa’ li choxahil awa’b’ejihom naru nokowan rik’in qaChoxahil Yuwa’.

• Yiib’ xjalam-uuch jun li saq’e sa’ li pizarron ut k’eheb’ kok’ hu, malaj yokb’, chiru li tz’ak li te’wulaq toj sa’ li saq’e. Li junjunq chi hu naru nareetali k’a’ruhaq tento taqab’aanu re ok sa’ li choxahil awa’b’ejihom (chi’ilmanq Tz. ut S. 76:50–53). Kanab’eb’ li kok’al chixwotzb’al xna’leb’eb’ ut te’ok chi b’eek toj sa’ li choxahil awa’b’ejihom.

saqewk

Laj Pablo kixjuntaq’eeta li choxahil awa’b’ejihom rik’in li saq’e.

reetalil li k’utuk

Xk’utb’al li tzol’leb’

Kok’al ak ninqeb’

1 Korintios 15:12–22

Sa’ xk’ab’a’ li Jesukristo ut lix waklijik chi yo’yo laa’in tinwakliiq chi yo’yo.

Ma neke’xtaw ru li kok’al nakatzoleb’ lix aajelil ru lix waklijik chi yo’yo li Jesukristo? Eb’ li na’leb’ a’in naru neke’oksiman.

Kok’ k’anjel naru chi b’aanumank

• Kanab’eb’ li kok’al chixk’eeb’aleb’ xhoonal re rilb’aleb’ ru raqal sa’ 1 Korintios 15:12–22, re xsik’b’al xsumenkil li patz’om “K’a’ raj ru taak’ulmanq wi maak’a’ raj li wakliik chi yo’yo?”

• Kanab’eb’ li kok’al chixk’utb’esinkil chan raj ru naru neke’xch’olob’ li wakliik chi yo’yo chiru anihaq. Re xtawb’al na’leb’, chi’ilmanq li raatin li Awa’b’ej Thomas S. Monson, “Señora Patton: La historia continúa” (Liahona, noviembre 2007, 21–24). Chi’ilmanq ajwi’ li video “Hasta que nos volvamos a ver” (LDS.org). Ye lix nawom aach’ool chirix lix waklijik chi yo’yo li Kristo.

1 Korintios 15:12–13, 20–22, 29

Naru ninkawresi wib’ re xik sa’ li santil ochoch re taakub’eeq inha’ jo’ ruuchileb’ li kamenaq.

Naq eb’ li kok’al te’xket kab’laju chihab’, naru neke’xk’ul li ch’ina hu re ok sa’ li santil ochoch ut xb’aanunkil li kub’iha’ jo’ ruuchileb’ li kamenaq sa’ li santil ochoch. Chan ru naru nakatenq’aheb’ chixkawresinkileb’ rib’?

Kok’ k’anjel naru chi b’aanumank

• Il ru 1 Korintios 15:29. K’a’ru ke’xb’aanu chaq laj santil paab’anel sa’ lix kutankil laj Pablo li naqab’aanu ajwi’ laa’o sa’eb’ li kutan a’in?

• Patz’ reheb’ li kok’al k’a’ut naq nakub’e qaha’ jo’ ruuchileb’ li kamenaq. Wi na’ajman ru, ch’olob’ naq naab’aleb’ re li qaxe’toonil moko ke’wan ta xhoonal re ke’kub’e raj xha’ ut re ke’k’ojob’aak chiruheb’ lix yu’am. Sa’ li santil ochoch, naru nakub’e qaha’ ut nokok’ojob’aak jo’ ruuchileb’ a’an.

• Wiib’ oxib’ kutan rub’elaj li tzolok, patz’ re xna’ malaj xyuwa’ jun reheb’ li ch’ina al naq taachalq chi kawresinb’il re xwotzb’al li resilal lix junkab’al malaj re xseraq’inkil jun li esil chirix jun lix xe’toonil. Laa’at ajwi’ naru nakawotz k’a’ruhaq chirixeb’ laa xe’toonil.

• B’oq jun li komon re li obispil chixwotzb’al junjunq li k’a’aq re ru naru neke’xb’aanu li kok’al re wank chi k’ulub’ej re ok sa’ li santil ochoch. Patz’ reheb’ li kok’al k’a’ru naru neke’xb’aanu re xjultikankil xb’aanunkileb’ li k’a’aq re ru a’an. Tz’iib’a lix na’leb’eb’ sa’ li pizarron. Kanab’eb’ chixk’ojob’ankil xjayalihomeb’ re xik sa’ li santil ochoch sa’ jun kutan.

1 Korintios 15:40–41

Chirix naq tinwakliiq chi yo’yo, tinruuq chi wank sa’ li choxahil awa’b’ejihom.

Re xk’utb’al chiruheb’ laj Korinto chirix li junxaqalil taqak’ul sa’ li wakliik chi yo’yo, laj Pablo ki’aatinak chirix oxib’ tasal li awa’b’ejihom: li choxahil, li terrestil, ut li teleestil.

Kok’ k’anjel naru chi b’aanumank

• Il ru 1 Korintios 15:40–41 ut kanab’ jun li ch’ina al chixyiib’ankil xjalam-uuch li saq’e, jun li po, ut jun li chahim sa’ li pizarron. Kanab’eb’ li komon sa’ li tzoleb’aal chixk’utb’al chiruq’eb’ k’a’ chi tib’elej waklijenaqeb’ wi’chik neke’reetali li junjunq chi jalam-uuch.

• B’ichahomaq sa’ komonil jun li b’ich li na’aatinak chirixeb’ li santil ochoch, jo’ “Jun Santil ochoch k’eeb’il we” (B’ichleb’aal choq’ reheb’ li Kok’al, 73). K’a’ru naxk’ut chiqu li b’ich a’an chirix xkawresinkil qib’ re wank sa’ li choxahil awa’b’ejihom?

• Ch’olob’ naq laj Jose Smith kiril jun li k’utb’esinb’il matk’ b’ar wi’ kiril oxib’ li awa’b’ejihom li neke’xk’ul rib’ rik’ineb’ li tib’elej li na’aatinak wi’ laj Pablo. Tenq’aheb’ li kok’al chixtawb’aleb’ ch’ol aatin sa’ Tzol’leb’ ut Sumwank 76:50–53, 70; 76:71–79; 76:81–82 li neke’aatinak chirixeb’ li oxib’ chi awa’b’ejihom a’an.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixpatz’b’al reheb’ lix na’ xyuwa’eb’ naq te’xseraq’i jun li esil reheb’ chirix lix xe’toonileb’. Naru neke’xwotz li esil sa’ li tzoleb’aal sa’ li xamaan chal re.

Xchaab’ilob’resinkil li qak’utum

Waklesiheb’ xch’ool li kok’al naq’ te’patz’inq. “Ileb’ li patz’om neke’xb’aanu [li kok’al] jo’ jun chaab’il hoonal, ink’a’ jo’ jun ramleb’ sa’ li tzolok… Eb’ li patz’om a’an neke’xk’e aana’leb’ jwal aajel ru chirix li neke’xk’oxla, li k’a’ru neke’raj xnawb’al, ut chan ru neke’xk’ul li k’a’aq re ru neke’xtzol. Tenq’aheb’ chirilb’al naq lix sumenkileb’ lix patz’om naru neke’tawman sa’eb’ li loq’laj hu ut sa’eb’ li raatin li yo’yookil profeet (Li k’utuk jo’ li Kolonel, 25–26).

perel re kok’ k’anjel: eb’ li choxahil, li terrestil, ut li teleestil awa’b’ejihom