“2–8 septiembre. 1 Korintios 14–16: “Li Dios moko Dios ta re po’ok ch’oolej, xDios b’an li tuqtuukilal” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“2–8 septiembre. 1 Korintios 14–16,” Kim, Taaqehin—Choq’ reheb’ li komon ut li junkab’al: 2019
2–8 septiembre
1 Korintios 14–16
“Li Dios moko Dios ta re po’ok ch’oolej, xDios b’an li tuqtuukilal”
Tz’iib’a li na’leb’ nakak’ul naq nakawil ru 1 Korintios 14–16. Tijon chirix li k’a’ru naxk’ut li Musiq’ej chawu, ut patz’ re laa Choxahil Yuwa’ ma wan chik li taaraj naq taatzol.
Xtz’iib’ankil li nakak’oxla
Rik’in naq li Iglees ut li k’a’ru k’utb’il chi sa’ toj ak’ sa’ Korinto, ink’a’ ch’a’aj xtawb’al ru naq eb’ laj santil paab’anel sa’ Korinto wan naq ke’sach xna’leb’eb’. Laj Pablo ak kixk’ut chaq chiruheb’ li yaalil na’leb’ kab’lanb’il wi’ li evangelio: “Naq li Kristo kikamk xb’aan li qamaak ... kimuqe’k ut kiwakliik chi yo’yo sa’ rox li kutan” (1 Korintios 15:3–4). A’b’anan, junjunq reheb’ li komon ke’ok chixk’utb’al naq “maak’a’ xwaklijikeb’ chi yo’yo eb’ li kamenaq” (1 Korintios 15:12). Laj Pablo kixye reheb’ naq “te’xk’uula sa’ xch’ool” li yaalil na’leb’ li xk’ute’ chiruheb’ (1 Korintios 15:2). Naq naqataw jalan jalanq na’leb’ chirix li evangelio li ink’a’ neke’xk’am rib’ chirib’ileb’ rib’, aajel ru naq taajultiko’q qe naq “li Dios moko Dios ta re po’ok ch’oolej, xDios b’an li tuqtuukilal” (1 Korintios 14:33). Rik’in li rab’inkil li raatineb’ li moos xaqab’anb’ileb’ xb’aan li Qaawa’, ut xchapb’al qib’ chiruheb’ li yaalil na’leb’ neke’xk’ut, naru naqataw li tuqtuukilal ut “kaw xaqxooqo sa’ li paab’ank” (1 Korintios 16:13).
Li na’leb’ re xtzolb’aleb’ li loq’laj hu aajunes
Naru ninsik’ li maatan re profeetil aatin.
Ma xak’oxla jun sutaq k’a’ru li maatan re profeetil aatin? Ma naraj naxye naq nakatru chixnawb’al k’a’ru taak’ulmanq? Ma naru yalaq ani chixk’ulb’al li maatan a’in? Malaj ka’ajwi’ reheb’ li profeet nak’eeman?
Ka’ajwi’ li Awa’b’ej sa’ xb’een li Iglees naru chixyeeb’al profeetil aatin ut chixk’ulb’al li k’utb’esinb’il na’leb’ choq’ re chixjunil li Iglees, a’ut sa’ li K’utul Raqal reheb’ li Loq’laj Hu, naxye naq li profeetil aatin a’an “aatin malaj tz’iib’ahom li musiq’anb’il xb’aan li Dios, li naxk’ul junaq chi k’utb’esinb’il xb’aan li Santil Musiq’ej. ... Naq na’aatinak junaq jo’ profeet, naxye malaj naxtz’iib’a k’a’ru naraj li Dios naq tixnaw, choq’ re lix chaab’ilal a’an malaj lix chaab’ilaleb’ jalan chik” (K’utul Raqal reheb’ li Loq’laj Hu, “Profeetil aatin, aatinak jo’ profeet;” chi’ilmanq ajwi’ Tz. ut S. 100:5–8). Apokalipsis 19:10 naxye naq li musiq’ej re profeetil aatin a’an “xch’olob’ahom li Jesus.”
K’a’ru nakatzol chirixeb’ li musiq’ejil maatan sa’ 1 Korintios 14:3, 31, 39–40? K’a’ru tana’ xyaalalil li raatin laj Pablo naq kixye reheb’ laj Korinto, “cheq’axtesi lee ch’ool chixsik’b’al li maatan re aatinak jo’ profeet”? (1 Korintios 14:39). Chan ru naru taab’aanu jo’ yeeb’il arin?
Chi’ilmanq ajwi’ Numeros 11:24–29; Jakob 4:6–7; Alma 17:3; Tzol’leb’ ut Sumwank 11:23–28.
K’a’ut naq laj Pablo kixye naq ink’a’ te’aatinaq li ixq sa’ li ch’utam?
Li raatin laj Pablo sa’ 1 Korintios 14:34–35 chanchan naq ch’a’aj xtawb’al ru, xb’aan naq sa’ ajwi’ li hu a’in kixtz’iib’a naq eb’ li ixq ke’tijok ut ke’xye profeetil aatin (chi’ilmanq 1 Korintios 11:5). Sa’ li Santil Hu chi jaltesinb’il ru xb’aan laj Jose Smith, ruuchil li aatin aatinak sa’eb’ li raqal 34 ut 35, wan li aatin taqlank. Chi jo’kan, maare laj Pablo yoo chaq chi aatinak chirixeb’ li ixq li ke’raj raj xchapb’al wankilal sa’eb’ li ch’utam re li Iglees. (Chi’ilmanq ajwi’ 1 Timoteo 2:11–12.)
Chi’lmanq ajwi’ “Mujeres en la Iglesia” Temas del Evangelio, topics.lds.org.
Li Jesukristo kixtaw xwankil sa’ xb’een li kamk.
Lix waklijik li Jesukristo chi yo’yo a’an q’axal aajel ru sa’ li Kristianil, ut taaruuq raj xyeeb’al naq chi maak’a’ a’an, maak’a’ li Kristianil—jo’ naxye li raatin laj Pablo, “maak’a’ raj xyaalal li naqapuktesi resil, maak’a’ aj raj wi’ xyaalal lee paab’aal” (1 Korintios 15:14). A’ut ke’wan laj santil paab’anel sa’ Korinto li yookeb’ chaq chixk’utb’al naq “maak’a’ xwaklijikeb’ chi yo’yo li kamenaq” (1 Korintios 15:12). Naq nakawil ru li k’a’ru kixsume laj Pablo sa’ 1 Korintios 15, k’oxla chiru junpaat chan raj ru taawanq laa yu’am wi ta ink’a’ nakapaab’ naq taawanq li wakliik chi yo’yo. Chan ru naq xat-osob’tesiik rik’in xnawb’al naq wan? K’a’ru li osob’tesink li nachal aawik’in rik’in naq li Jesukristo kiwakli chi yo’yo? (chi’ilmanq 2 Nefi 9:6–19; Alma 40:19–23; Tzol’leb’ ut Sumwank 93:33–34). K’a’ru xyaalalil choq’ aawe li ch’ol aatin, “wi li Kristo ink’a’ kiwakliik chi yo’yo, maak’a’ xyaalal lee paab’al”? (raqal 17).
Li tz’ejwalej waklijenaq chi yo’yo jalan wi’ rik’in li tz’ejwalej li wan li kamk sa’ xb’een.
Ma xak’oxla jun sutaq chan ru li junxaqalil naq waklijenaq chi yo’yo? Jo’ chanru naxye sa’ 1 Korintios 15:35, wankeb’ laj Korinto li yookeb’ chaq chixk’oxlankil a’an. Il ru li kixsume laj Pablo sa’eb’ li raqal 36–54, ut k’e reetaleb’ li aatin li neke’xk’ut chan ru naq jalaneb’ wi’ li ruchich’och’il tz’ejwalej rik’in li ak waklijenaq chi yo’yo. Jo’ jun eetalil, sa’eb’ li raqal 40–42, k’utb’il naq eb’ li tz’ejwalej li waklijenaqeb’ chi yo’yo te’lemtz’unq chi jalan jalanq xloq’alileb’, jo’ chanru naq jalan jalanq xlemtz’unkil ru li saq’e, li po, ut eb’ li chahim (chi’ilmanq ajwi’ li JJS, 1 Korintios 15:40; Tz. ut S. 76:50–112).
Chi’ilmanq ajwi’ Alma 11:43–45; Lukas 24:39.
“Jun wi’ lix lemtz’unkil li saq’e” (1 Korintios 15:41).
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Naqatzol sa’ li raqal 29 naq eb’ laj santil paab’anel sa’ najter kutan ke’xb’aanu li kub’iha’ choq’ reheb’ li kamenaq, jo’ naqab’aanu sa’ li Iglees sa’ li kutan a’in. Chan ru wanko sa’ li qajunkab’al sa’ xkawresinkil lix k’ab’a’eb’ li qaxe’ qatoon choq’ reheb’ li k’ojob’anb’il k’anjel re li santil ochoch? Chi’ilmanq ajwi’ “Kolb’a-ib’ choq’ reheb’ li kamenaq” sa’ li K’utul Raqal reheb’ li Loq’laj Hu.
K’a’ruheb’ li k’anjeleb’aal malaj li jalam-uuch li te’k’anjelaq aawe re xch’olob’ankil chiru laa junkab’al junjunq li aatin oksinb’il xb’aan laj Pablo re xk’utb’al chan ru naq jalan wi’ li ruchich’och’il tz’ejwalej rik’in li tz’ejwalej li waklijenaq chi yo’yo? Jo’ jun eetalil, re rilb’al chan ru naq jalan wi’ li naq’aak rik’in li ink’a’ naq’aak (chi’ilmanq li raqal 52–54), taaruuq taak’ut li ch’iich’ li xq’olen (jo’ li hierro) ut li ch’iich’ li ink’a’ namohon. Malaj ut taaruuq taak’ut k’a’ruhaq maak’a’ xkawilal ut k’a’ruhaq kaw rib’ (chi’ilmanq raqal 43).
Q’axal us aatinak chirixeb’ li raqal a’in wi eb’ li wankeb’ sa’ laa junkab’al neke’xnaw ru ani xkam. Eb’ li komon sa’ li junkab’al te’ruuq chixch’olob’ankil xyaalal chan ru naq li Jesukristo narisi chaq “xtiq’leb’ li kamk” (raqal 56). Li raatin li Elder Paul V. Johnson, “Ut ink’a’ chik taawanq li kamk,” (Jolomil ch’utub’aj-ib’ re abril 2016) naru texxtenq’a sa’ li seraq’ a’in.
Re xtenq’ankil laa junkab’al chixtawb’al ru li raqal a’in, taaruuq taayiib’ jun sirso sa’ li ch’och’, ut taaye re jun komon sa’ laa junkab’al naq “xaqxooq chi kaw” sa’ li sirso, ut taatz’ap li rilob’aal, ut taakanab’eb’ li jun siir chik chixyalb’aleb’ xq’e chirisinkil chaq sa’ li sirso. K’a’ru naxk’ul li komon sa’ li sirso naq tz’apb’il li rilob’aal ut ink’a’ naru chi ilok? K’a’ru naru taqab’aanu re naq “xaqxooqo chi kaw” sa’ li qayu’am naq naqak’ul li aaleek re xsik’b’al ru li ink’a’ us?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Chasik’ li k’a’ru nak’utun k’iila sut. Sa’eb’ li loq’laj hu, neke’tawman li na’leb’ li neke’tawman k’iila sut, ut neke’xk’ut chan ru naq li Qaawa’ naxb’aanu lix k’anjel. K’a’ruheb’ li na’leb’ k’utb’il k’iila sut sa’ 1 Korintios 14, li nokoxtenq’a chixnawb’al chan ru xtzolb’al qib’ ut xwaklesinkil qib’ chiqib’il qib’? Chi’ilmanq ajwi’ Tz. ut S. 50:13–23.
At ixq, k’a’ut naq nakatyaab’ak? xb’aan laj Simon Dewey